1, 2. Ndaño okuti tua tiamẽla kepata limuamue, oku litepa kupi ku kasi pokati ketu?

YEHOVA eye wa lulika epata liosi liomanu. (Va Efe. 3:14, 15) Ndaño okuti pamue tua tiamẽla kepata limuamue, pole, tu kuete ovituwa via litepa, kuenda ekalo lia litepa. Citava okuti omanu vamue va tekuiwa lolonjali viavo toke eci va linga akulu. Vakuavo, olonjali viavo via fa loku vela. Kulivo vamue okuti, olonjali viavo via tusuiwa loviendelo, kuenje via fa. Vakuavo, olonjali viavo via pondiwa lovilunga. Kulivo omanu vamue okuti, ka va kũlĩhĩle olonjali viavo.

² Vosi yetu tuakuepata liafendeli va Yehova, kuenda tua longisiwa ocili lolonjila via litepa. Citava okuti, ‘wa kulila vocisoko ca Yehova,’ kuenda wa tekuiwa lolonjali vimue via ku pindisa olonumbi Viembimbiliya. (Esin. 6:6, 7) Pamue wa lilongisa Embimbiliya lekuatiso liupange woku kunda u kasi oku lingiwa Lolombangi Via Yehova voluali luosi.—Va Rom. 10:13-15; 1 Tim. 2:3, 4.

3. Ocina cipi okuti vosi yetu tua kongeliwamo?

³ Ndaño tua tekuiwa lolonjila via litepa ndomo ca lomboluiwa, pole, kuli cimue okuti, vosi yetu tua kongeliwamo. Omo okuti Adama la Heva ka va pokuile ku Yehova, vosi yetu tua piñala ekambo lioku lipua, ekandu, kuenda olofa. (Va Rom. 5:12) Ndaño tu liyaka lovitangi viaco, pole, tu pondola oku tukula Yehova okuti, eye “Isietu,” momo tuafendeli vaye. Kosimbu, afendeli va Yehova va tukula olondaka vi sangiwa kelivulu lia Isaya 64:8, li popia hati: “A Yehova, ove vu Isietu.” Yesu vohutililo yaye wa popiavo hati: “A Isietu o kasi kilu. Onduko yove yi sumbiwe.”—Mat. 6:9.

4, 5. Nye tu konomuisa vocipama cilo, oco tu pamise ukamba wetu la Isietu Yehova?

⁴ Yehova Isietu wokilu, wa siata oku tu ĩha ovina tu sukila, kuenda o tu teyuila kovitangi. Ukualosamo wa popia hati: ‘Omo a ñakatela locisola ndu u yovola. Ndu u teyuila omo a kũlĩha onduko yange.’ (Osa. 91:14) Yehova Suku wa siata oku teyuila locisola afendeli vaye kovanyãli, oco ka va ka kuate ovitangi.

⁵ Oco tu pamise ukamba wetu la Yehova, Isietu wokilu, tu konomuisi atosi a velapo ndeci: (1) Eye Isietu, kuenda wa siata oku tu Ĩha ovina tu sukila. (2) Yehova wa siata oku tu Teyuila. (3) Eye Ekamba lietu lia velapo. Osimbu tu konomuisa atosi atatu a tukuiwa ndeti, tu sukila oku sokolola lutate ukamba wetu la Yehova, kuenda oku lekisa esumbilo kokuaye, momo eye Isietu. Nda tua sokolola asumũlũho Yehova a siata oku eca ku vana va likolisilako oku kuata ukamba laye, tu kuatisiwa calua.—Tia. 4:8.

6. Yehova wa linga ndati Ukuakueca ‘ovina viwa’ kokuetu?

⁶ “Ndonge Tiago wa soneha ndoco: “Ovina viosi viwa lombanjaile yosi ya lipua vi tunda kilu, ku Isia yovinyi.” (Tia. 1:17, NW) Omuenyo, ombanjaile yimue yi tunda ku Yehova. (Osa. 36:9) Nda tua linga ocipango ca Yehova cilo, tu tambula asumũlũho alua, lelavoko liomuenyo ko pui voluali luokaliye palo posi. (Olosap. 10:22; 2 Pet. 3:13) Tu tambula ndati asumũlũho aco omo liekandu tua piñala ku Adama?

7. Nye Suku a linga oco tu kuate ukamba laye?

⁷ Yehova eye wa Velapo koku eca ovina tu sukila. Ohenda a tu kuetele, oyo ya siata oku u vetiya oku tu kuatisa. Momo, vosi yetu ka tua lipuile, omo liekandu tua piñala ku Adama. (Va Rom. 3:23) Omo okuti Yehova o tu sole calua, wa yulula onjila oco tu kuate ukamba laye. Upostolo Yoano wa soneha ndoco: ‘Ocisola ca Suku ca molẽha kokuetu omo a tuma Omõlaye wongunga voluali, oco tu muile omuenyo kokuaye. Omo okuti hetuko tua sola Suku, puãi eye wa tu sola, wa tuma Omõlaye oco a linge ocitundasonde cakandu etu.’—1 Yoa. 4:9, 10.

8, 9. Yehova wa kala ndati Ukuakueca kotembo ya Avirahama la Isake? (Tala elitalatu kefetikilo liocipama cilo.)

⁸ Kocita 19, osimbu Yesu ka citiwile handi, Yehova wa linga eliangiliyo liokuti, omanu vosi vakuepokolo, va pondola oku kuata omuenyo ko pui. Elivulu lia Va Heveru 11:17-19, li popia ndoco: ‘Avirahama, omo a kuata ekolelo, eci a nyikiwa, wa lumba Isake, kuenje, wa tambula olohuminyo kuenda wa tava oku lumba omõlaye wongunga, ndaño Suku wo sapuila hati: ‘Vonduko ya Isake, omo mu ka tunda ombuto. Avirahama wa kolelele okuti, Suku o tẽla oku pindula omanu kolofa. Kuenje, vupopi wocindekaise, wo tambula kolofa.’ Ca sunguluka oku kuata elomboloko liaco. Momo, Avirahama wa yonguile oku eca omõlaye Isake ndocilumba, pole, Yehova wa nõlapo oku eca Yesu Kristu, oco a yovole omanu vosi.—Tanga Yoano 3:16, 36.

⁹ O pondola hẽ oku sokolola esanju Isake a kuata, eci a limbuka okuti, ka pondiwa vali? Eye wa eca olopandu ku Yehova omo a linga eliangiliyo lioku eca omeme okuti, oyo yi pondiwa. (Efet. 22:10-13) Eli olio esunga lieci ocitumãlo caco ci tukuiwila hati, “Yehova-yire,” ci lomboloka okuti, ‘Yehova o tu ĩha ovina viosi tu sukila.’—Efet. 22:14.

10, 11. Velie va kasi oku songuila ‘upange woku li sunguluisa la Suku,’ kuenda va kasi oku u linga ndati?

¹⁰ Poku sokolola ovina viosi Yehova a siata oku tu lingila, tu limbuka okuti, nda ka lingile eliangiliyo liocisembi ca Yesu, nda ka tu kuete ukamba laye. Paulu wa soneha ndoco: ‘Tua kolela okuti omunu umuamue wa fila vosi; momo vosi va fa. Kuenje eye wa fila vosi okuti, ava va kasi lomuenyo ka va kasilili lawo ovo muẽle, te oku pokola u wa va fila haeye wa pinduka.’—2 Va Kor. 5:14, 15.

¹¹ Omo okuti Akristão vo kocita catete va solele Yehova, va eca olopandu poku u fendela, kuenda, va tava ‘upange woku li sunguluisa laye.’ Upange waco woku kunda, wecelela omanu oku kuata ombembua la Yehova, kuenda oku kuata ukamba laye. Kuenje, vamue pokati kavo citava okuti, va linga omãla va Yehova kilu. Koloneke vilo, Akristão olombuavekua, va kasivo oku linga upange waco. Momo, ovo olonumiwa via Yehova kuenda via Kristu. Kuenje, upange woku kunda va kasi oku linga, u kuatisa vakuavitima via sunguluka, kuenda ambombe oku kokiwa la Yehova, oco va linge afendeli vaye.—Tanga 2 Va Korindo 5:18-20; Yoa. 6:44; Ovil. 13:48.

12, 13. Tu lekisa ndati okuti, tua sanjukila ovina Yehova a siata oku tu lingila?

¹² Olomeme vikuavo vi eca olopandu ku Yehova omo liovina a siata oku va Ĩha. Omo liaco, vi kasi oku kundila kumue lolombuavekua olondaka viwa Viusoma. Yehova wa linga eliangiliyo lioku tu ĩha Embimbiliya oco li tu kuatise oku linga upange waco. (2 Tim. 3:16, 17) Eci tu longisa omanu Lembimbiliya kupange woku kunda, tu eca kokuavo epuluvi lioku kuata omuenyo ko pui. Omunu lomunu pokati ketu, o sukila oku kolela kespiritu sandu Yehova a tu ĩha, oco li tu kuatise kupange woku kunda. (Sak. 4:6; Luka 11:13) Onima yaco tu yi limbukila kovolandu a siata oku sandekiwa unyamo lunyamo vo Anuário das Testemunhas de Jeová. Omo liaco, tu kuete esumũlũho lioku kuatisa kupange woku kunda, momo weca esivayo ku Isietu wa siata oku tu Ĩha ovina tu sukila!

¹³ Omo okuti Yehova wa siata oku tu lingila ovina vialua, tu sukila oku lipula ndoco: ‘Nda siata hẽ oku lekisa ombili kupange woku kunda oco ndi lekise okuti, nda sanjukila ovina a siata oku ndi lingila? Ndi pondola ndati oku lekisa ombili kupange woku kunda olondaka viwa?’ Tu pondola oku eca olopandu ku Yehova omo liovina viwa a siata oku tu lingila, poku pitisa kovaso upange Wusoma. Nda tua ci linga, Yehova o limbuka okuti, tua sanjukila ovina a siata oku tu ĩha. (Mat. 6:25-33) Omo okuti Yehova wa siata oku tu tata ciwa, tu sukila oku u lingila ovina viu sanjuisa.—Olosap. 27:11.

14. Yehova wa siata oku Teyuila ndati afendeli vaye?

¹⁴ Ukualosamo wa imba ocisungo hati: ‘Ame puãi ndihukũi, haime nda suka. Yehova o njivaloka. Ove uñuatisi yange, haive upopeli wange.’ (Osa. 40:17) Yehova wa siata oku Teyuila afendeli vaye, ca piãla enene eci va lambalaliwa lovanyãli vavo. Omo liaco, tu eca ololpandu ku Yehova, omo a siata oku tu ĩha ovina tu sukila, oco tu pamise ekolelo lietu poku liyaka lovitangi!

15. Lombolola ndomo isia umue ukuacisola a teyuila omõlaye.

¹⁵ Isia ukuacisola, eca komãla vaye ovina va sukila, kuenda o va teyuila. Nda wa limbuka okuti kuli cimue ci kapa kohele omuenyo wavo, o va teyuila. Manji umue, ivaluka ndomo isiaye o teyuila, eci a kala umalẽhe. Onjanja yimue eci a kala oku tiuka kumue la isiaye kupange woku kunda, va sukilile oku yoka olui lumue. Eteke liaco, olui lue yukile calua, omo liombela ya loka. Ovo, va sukilile oku liatela kewe limue linene, oco va tehẽle kewe li kasi kohulo yikuavo. Omo okuti omõla wa pitile kovaso ya isiaye, poku tẽha wa lisielũha, noke wa kupukila volui, kuenje wa iñila kosi yovava olonjanja vivali. Vepuluvi liaco, isiaye wa iñila lonjanga volui, kuenje wa nala omõlaye wa kala oku iñila kosi yovava. Noke, umalẽhe wa eca olopandu ku isiaye! Cimuamue haico Isietu wokilu a siata oku tu lingila poku tu popela kovina vi kapa kohele omuenyo wetu voluali lulo lua vialiwa la Satana. Yehova o kuete unene wa velapo woku tu teyuila, kuenda ka sokisiwa lomunu ukuavo.—Mat. 6:13; 1 Yoa. 5:19.

16, 17. Yehova wa kuatisa ndati va Isareli eci va liyaka la va Amaleke?

¹⁶ Yehova wa teyuila afendeli vaye kunyamo wo 1513, osimbu Yesu keyile handi palo posi. Noke yoku yovola va Isareli Kegito, wa va teyuilavo poku yoka Okalunga ka Kusuka. Noke yoku pita vekalasoko anyamo alua toke Komunda Sinai, va pitĩla volupale luo Refidimi.

¹⁷ Ndomo ca lomboluiwa vocitumasuku ci sangiwa kelivulu Liefetikilo 3:15, Satana wa sandiliya epuluvi lioku nenela ovitangi va Isareli, momo, va kala ndu okuti ka va kuatele umue o va popela. Noke, wa ci linga lekuatiso lia va Amaleke okuti, va kala ovanyãli vafendeli va Yehova. (Ate. 24:20) Kũlĩhĩsa ovina Yehova a linga, poku teyuila afendeli vaye lekuatiso lia Yehosua, Mose, la Arone, kuenda Huru. Osimbu Yehosua kumue lasualali vaye va kala oku yaka la va Amaleke, konele yikuavo yomunda, kua kala Mose, la Arone, kuenda Huru. Osimbu Mose a kala oku votola ovaka aye, Yehova wa eca ongusu yalua ku va Isareli okuti, ka yi sokisiwa leyi yovanyãli vavo. Omo okuti Mose wa kavele calua, Arone la Huru, vo kuatisa oku votola ovaka aye. Lekuatiso lia Yehova, ‘Yehosua wa ponda va Amaleke, kuenda omanu vavo vosi.’ (Etu. 17:8-13) Omo liaco, Mose wa tunga utala umue a tukula hati, “Yehova eye epandela liange,” ci lomboloka okuti: ‘Yehova Eye Ocitililo Cange.’—Tanga Etundilo 17:14, 15.

18, 19. Olonumbi vipi Yehova a siata oku eca oco vi teyuile afendeli vaye?

¹⁸ Yehova wa siata oku teyuila vana vo sole, kuenda va pokola kokuaye. Koloneke vilo, tua kolelavo ku Yehova oco a tu teyuile kovanyãli vetu, ndeci ca pita la va Isareli volupale luo Refidimi. Yehova o tu teyuila kovitangi Satana a siata oku tu kokela. Vepuluvi limue, Yehova wa teyuila vamanjetu va kala oku lambalaliwa omo lioku yuvula oku litenga vuyaki. Ocitangi caco ca pita ko Alemanya, kuenda kolofeka vikuavo eci olombiali vimue Viungangala via kala oku viala oku upisa kunyamo wo 1930 toke oku pitahãla kunyamo wo 1940. Eci tu tanga loku sokolola ovolandu a vamanji a sangiwa vo Anuário a lekisa ndomo Yehova a teyuila afendeli vaye kotembo yaco, ci pamisa ekolelo lietu.—Osa. 91:2.

¹⁹ Yehova wa siatavo oku tu teyuila lekuatiso lialungulo a eciwa locisoko caye, kuenda ana a sandekiwa valivulu etu. Sokolola ndomo alungulo aco a siata oku tu kuatisa koloneke vilo. Momo, omanu va tiamisila lika utima wavo kukahonga, kuholua, kuenda oku tala omanu va kasi epolõla haivo va linga upuepue. Pole, Yehova wa siata oku tu teyuila kovina vi nyõla ukamba wetu laye. Vanyamo a pita, tua tambula ku Yehova olonumbi vi tu kuatisa oku yuvula ukamba lomanu vana va siata oku tuma asapulo ka a sungulukile vo Internet. *—1 Va Kor. 15:33.

20. Olonumbi vipi tua siata oku tambula vekongeloleteyuilo oco vi tu teyuile?

²⁰ Tu lekisa ndati okuti, tu kasi oku “longisiwa la Yehova”? Tu ci linga, poku pokola kalungulo aye. (Isa. 54:13) Akongelo etu, ocitumãlo cimue tu pondola oku tambula olonumbi, kuenda eteyuilo. Momo, akulu vekongelo va pondola oku tu ĩha alungulo a tunda Vembimbiliya. (Va Gal. 6:1) Yehova wa eca ocikele ‘kalume vaco,’ oco va tu tate locisola. (Va Efe. 4:7, 8) Tu tenda ndati olonumbi va tu ĩha? Tu sukila oku lekisa epokolo, oco tu tambule asumũlũho a tunda ku Yehova.—Va Hev. 13:17.

21. (a) Nye tua nõlapo oku linga? (b) Nye tu ka lilongisa vocipama ci kuãimo?

²¹ Tu nõlipo oku songuiwa lespiritu sandu, loku pokola kolonumbi via Isietu wokilu. Tu sukila oku sokolola omuenyo wa Yesu Kristu, kuenda oku kuama ongangu yaye yiwa. Eye, wa tambula onima ya velapo, omo lioku pokola toke kolofa. (Va Fil. 2:5-11) Nda tua kolela Yehova lutima wetu wosi, tu ka tambula asumũlũho alua, ndeci ca pita la Yesu. (Olosap. 3:5, 6) Omo liaco, tu koleli Yehova wa siata oku tu ĩha ovina tu sukila, kuenda o tu teyuila lonjila yimue ya velapo. Tu kuete esanju lialua omo lioku vumba Yehova! Ocisola tu kuetele Yehova, ci li vokiya, osimbu tu sokolola etosi liatatu, liatiamẽla kukamba wetu laye. Ocipama ci kuãimo, ci ka lombolola ndomo Yehova a pondola oku kala ekamba lietu lia velapo.