1, 2. Ro fhambana hani musi zwi tshi ḓa kha zwiimo zwa muṱani na nḓila ye ra guda ngayo ngoho?

YEHOVA ndi ene muthomi wa ndugiselelo ya muṱa. (Vhaef. 3:14, 15) Naho arali ri tshi bva muṱani muthihi, vhumuthu na zwiimo a zwi fani. Ni nga kha ḓi vha no dzula na vhabebi vhaṋu u bva vhuṱukuni. Vhaṅwe vha nga kha ḓi vha vho felwa nga vhabebi vhavho, khamusi nga vhulwadze, khombo kana maṅwe makhaulambilu. Zwiṅwe hafhu, vhaṅwe a vha ḓivhi vhabebi vhavho.

² Kha miraḓo ya muṱa wa vhagwadameli vha Yehova, nḓila ye ra guda ngoho ngayo a i fani. Ni nga kha ḓi vha no ‘alutshela ngohoni,’ nahone vhabebi vhaṋu vho kokomedza milayo ya Mudzimu kha inwi. (Doit. 6:6, 7) Kana ni nga kha ḓi vha ni muṅwe wa vha zwigidi vho gudiswaho ngoho nga muṅwe wa vhashumeli vha Yehova.—Vharoma 10:13-15; 1 Tim. 2:3, 4.

3. Ndi mini zwine roṱhe ra fana ngazwo?

³ Hu sa londwi zwe zwa ambiwa mathomoni, roṱhe ri na zwine ra fana ngazwo. Ri tshenzhela mvelelo dzo ḓiswaho nga u sa thetshelesa ha Adamu, nahone ro mamela u sa fhelela, tshivhi na lufu. (Vharoma 5:12) Naho zwo ralo, sa vhagwadameli vha ngoho, zwo tea uri ri vhidze Yehova uri ndi “Khotsi-ashu.” Musi Yesaya  64:8 i tshi amba nga ha vhathu vhe Mudzimu a vha nanga vha zwifhingani zwa kale, i ri: “Iwe Yehova, Khotsi-ashu ndi Iwe.” Zwiṅwe hafhu, Yesu o thoma thabelo yawe ya tsumbo nga maipfi ane a ri: “Khotsi ashu wa ṱaḓulu, dzina ḽau nga ḽi itwe ḽikhethwa.”—Mat. 6:9.

4, 5. U itela u funa Yehova Khotsi ashu nga ho engedzeaho, ndi mini zwine ra ḓo zwi ṱolisisa?

⁴ Khotsi ashu wa ṱaḓulu u a ri ṱhogomela na u ri tsireledza musi ri tshi vhidzelela dzina ḽawe nga lutendo. Musi mupsalme a tshi redza zwe Mudzimu a amba, o ri: “Ndi ḓo mu tshidza [mugwadameli wa ngoho] ngauri o nnambatela; ndi ḓo mu khudisa ngauri u ḓivha dzina ḽanga.” (Ps. 91:14) Vhukuma, Yehova Mudzimu u a ri phulusa kha maswina ashu na u ri tsireledza samusi ri vhathu vhawe, uri ri si fheliswe.

⁵ U itela uri ri fune Khotsi ashu wa ṱaḓulu nga ho engedzeaho, kha ri ṱolisise zwithu zwiraru zwa ndeme: (1) Khotsi ashu ndi Muṋei washu. (2) Yehova ndi Mutsireledzi washu. (3) Nahone Mudzimu ndi Khonani yashu ya tsini. Musi ri tshi ṱhogomela dzenedzi mbuno, zwi ḓo ri vhuyedza u elekanya nga vhushaka hashu na Mudzimu u itela uri ri ḓivhe nḓila ine ra nga mu hulisa ngayo samusi e Khotsi ashu. Zwi ḓo dovha zwa vha zwi vhuyedzaho u elekanya nga ha phaṱhutshedzo dzine Yehova a ḓo dzi ḓisela vhane vha sendela tsini nae.—Yak. 4:8.

6. Ndi nḓila ifhio ine Yehova a vha Muṋei wa “tshifhiwa tshiṅwe na tshiṅwe tshavhuḓi”?

⁶ Mufunziwa Yakobo o ṅwala uri: “Tshifhiwa tshiṅwe na tshiṅwe tshavhuḓi na tsho fhelelaho tshi bva ṱaḓulu, tshi tsa tshi tshi bva ha Khotsi wa tshedza tsha ṱaḓulu.” (Yak. 1:17) Vhutshilo ndi tshifhiwa tshavhuḓi tshi bvaho ha Yehova. (Ps. 36:9) Musi ri tshi shumisa vhutshilo hashu u ita zwine Mudzimu a zwi funa, ri wana phaṱhutshedzo nnzhi zwino nahone ri vha na tshilavhelelwa tsha u wana vhutshilo vhu sa fheli shangoni ḽiswa. (Mir. 10:22; 2 Pet. 3:13) Fhedzi zwenezwi zwi konadzea hani ngeno ro sedzana na mvelelo mmbi dza u sa thetshelesa ha Adamu?

7. Mudzimu o dzhia hani vhukando uri ri vhe na vhushaka ha tsini nae?

⁷ Vhukuma, Yehova ndi Muṋei washu Muhulwane nga nḓila nnzhi. Sa tsumbo, vhuthu hawe vhuhulwane vhu a ri tshidza. Roṱhe ri vhaitazwivhi nahone ro mamela u sa fhelela kha khotsi ashu wa u thoma wa kha ḽifhasi. (Vharoma 3:23) Naho zwo ralo, Yehova o dzhia vhukando uri ri vhe na vhushaka ha tsini nae nga nṱhani ha uri u a ri funa. Muapostola Yohane o ṅwala uri: “Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe mubebwa e eṱhe shangoni uri ri kone u wana vhutshilo ngae. Lufuno lu nga heyi nḓila, a si riṋe vhe ra funa Mudzimu, fhedzi ndi ene we a ri funa, a rumela Murwa wawe uri a vhe tshiṱhavhelo tshi pfumelelaho zwivhi zwashu.”—1 Yoh. 4:9, 10.

8, 9. Yehova o sumbedza hani uri u Muṋei Muhulwane tshifhingani tsha Abrahamu na Isaka? (Sedzani tshifanyiso tsha u thoma.)

⁸ Ḓanani ḽa vhu-19 ḽa miṅwaha B.C.E., ro pfesesa vhuporofita he ha dzumbulula ndugiselelo ya Yehova ya lufuno ye a i itela vhathu vhane vha thetshelesa uri vha wane vhutshilo vhu sa fheli. Vhaheberu 11:17-19 i ri: “Nga lutendo Abrahamu, musi a tshi lingwa, zwo nga o ṋekedza Isaka uri a vhe tshiṱhavhelo; muthu we a ṱanganedza mafulufhedziso o takala o lingedza u ṋekedza ṅwana wawe muthihi fhedzi sa tshiṱhavhelo, naho o vhudzwa uri: “Ine ya ḓo pfi ‘mbeu yau’ i ḓo vha nga Isaka.” Fhedzi o humbula uri Mudzimu o vha a tshi nga kona u mu vusa na lufuni; nahone a dovha a mu wana nga nḓila ya lwa pfanyisedzo.” Zwenezwi zwi fana na zwe Yehova a zwi ita musi a tshi ṋekedza Murwa wawe Yesu Kristo a tshi itela vhathu vhoṱhe.—Vhalani Yohane 3:16, 36.

⁹ Isaka a nga vha o takala vhukuma u vhofhololwa lufuni lwa tshiṱhavhelo. A zwi timatimisi uri a nga vha o takalela iṅwe  ndugiselelo ya Mudzimu ya tshiṱhavhelo—thutha ye ya vha yo fashwa tshiṱakani tshi re henefho tsini. (Gen. 22:10-13) Ndi ngazwo henefho fhethu ho vhidzwa u pfi “Yehova-dzhaire,” zwine nga Luheberu zwa amba uri, “Yehova U Ḓo Ṋea.”—Gen. 22:14, NW.

10, 11. Ndi vhafhio vhe vha ranga phanḓa “vhuḓinḓa ha u pfumedzanya,” nahone vho ita zwenezwo nga nḓila-ḓe?

¹⁰ Musi ri tshi elekanya nga ha nḓila ine Yehova a vha ngayo Muṋei Muhulwane, ri livhuha mushumo wa ndeme we wa itwa nga Yesu Kristo, samusi na Paulo o sumbedza u livhuha, musi a tshi ṅwala uri: “Zwenezwi ndi zwe ra phetha ngazwo, uri muthu muthihi o ri fela roṱhe; nga zwenezwo, vhoṱhe vho fa; nahone o fela vhoṱhe uri vhoṱhe vha tshilaho vha si tsha ḓitshilela, fhedzi vha tshilele we a vha fela nahone a vuswa.”—2 Vhakor. 5:14, 15.

¹¹ Vhakriste vha u thoma vho ṱanganedza “vhuḓinḓa ha u pfumedzanya” nga mbilu tshena, nge vha vha vha tshi funa Mudzimu na u livhuha ndugelo i sa vhambedzwi na tshithu ya u mu shumela. Mushumo wavho wa u huwelela na u ita vhathu vhafunziwa wo vulela vhathu vha mbilu dzavhuḓi tshibuli tsha uri vha vhe na mulalo na Mudzimu, vha takalele vhukonani hawe na u vha vhana vhawe vha lwa muya. Ṋamusi vhashumeli vha Yehova vho ḓodzwaho vha ita mushumo u fanaho. Zwine vha zwi khunyeledza sa vhaimeli vha Mudzimu na Kristo zwi ita uri vhathu vha re na mavhonele o teaho vha kone u kokodzwa nga Yehova nahone vha vhe vhatendi.—Vhalani 2 Vhakorinta 5:18-20; Yoh. 6:44; Mish. 13:48.

12, 13. Ri nga sumbedza hani uri ri livhuha ndugiselelo nnzhi dza Yehova?

¹² Vhakriste vhoṱhe vhane vha vha na fulufhelo ḽa u tshila kha ḽifhasi vha ṱanganela na vhaḓodzwa kha mushumo wa u huwelela nga ha Muvhuso, vha tshi livhuha Yehova samusi e Muṋei wavho Muhulwane. Kha wonoyu mushumo, ri shumisa Bivhili, ine ya vha iṅwe ya ndugiselelo dzavhuḓi dza Mudzimu. (2 Tim. 3:16, 17) Musi ri tshi shumisa Ipfi ḽa Mudzimu ḽo hevhedzwaho nga vhuṱali vhuḓinḓani hashu, ri ṋea vhaṅwe tshibuli tsha u wana vhutshilo vhu sa fheli. U itela u wana thuso kha wonoyu mushumo, roṱhe ri ḓitika nga iṅwe ndugiselelo ya Yehova, ine ya vha muya wawe mukhethwa. (Sak. 4:6; Luka 11:13) Mvelelo ndi dzi takadzaho vhukuma, samusi zwi tshi sumbedzwa kha khandiso iṅwe na iṅwe ya Yearbook of Jehovah’s Witnesses. Zwi takadza lungafhani u shela mulenzhe kha wonoyu mushumo u itela u hulisa Khotsi na Muṋei washu!

¹³ Musi ri tshi vhona zwoṱhe zwe Mudzimu a ri ṋea zwone, zwi ḓo vha zwavhuḓi u ḓivhudza uri: ‘Naa ndi khou ita zwoṱhe zwine nda nga kona vhuḓinḓani hanga u itela u sumbedza Yehova uri ndi livhuha nga mbilu yoṱhe ndugiselelo dzawe? Ndi nga vhu khwinisa hani u itela uri ndi vhe muhuweleli a bvelelaho wa mafhungo maḓifha?’ Ri nga sumbedza uri ri livhuha ndugiselelo dzavhuḓi dza Mudzimu nga u vhea zwithu zwoṱhe zwi tshimbidzanaho na Muvhuso u thoma vhutshiloni hashu. Arali ra ita nga u ralo, Yehova u ḓo ita vhungoho ha uri u a ṱhogomela zwishaiwa zwashu. (Mat. 6:25-33) Nga nṱhani ha uri Mudzimu u a ri funa, ri ṱoḓa u ita zwoṱhe zwi re maanḓani ashu u itela u takadza mbilu yawe.—Mir. 27:11.

14. Yehova o vha hani Mulamuleli wa vhathu vhawe?

¹⁴ Mupsalme Davida o imba a ri: “Huno nṋe—na u tambula—na u tshinyala—Yehova u ḓo ṋyelelwa. Mutshidzi wanga, Mulamuleli ndi Iwe.” (Ps. 40:17) Yehova o ḓi vha Mulamuleli wa vhathu vhawe sa tshigwada, zwihuluhulu musi vha tshi tovholwa nga nḓila i vhavhaho lwa tshifhinga tshilapfu nga maswina avho. Ri livhuha lungafhani nḓila ine Mudzimu a ri thusa ngayo nga zwenezwo zwifhinga, na nga ndugiselelo nnzhi dza muya dzine a dzula a tshi ri itela dzone!

15. Fanyisani nḓila ine khotsi wa lufuno a tsireledza ngayo ṅwana wawe.

¹⁵ Khotsi wa lufuno ha sokou ṋea vhana vhawe zwishaiwa zwavho, fhedzi u dovha a vha tsireledza. A nga lingedza u vha tsireledza arali vhe khomboni. Muṅwe wahashu wa tshinnani u kha ḓi humbula tshiitea tsha musi a tshee muṱuku. Ene na khotsi awe vho vha vha tshi khou bva tsimuni nahone vha tshi tea u pfuka mulambo. Mvula khulu ye ya na eneo matsheloni yo ḓadza mulambo. U itela uri vha pfuke wonoyo mulambo, vho vha vha tshi fanela u kanda kha matombo mahulwane. Onoyo mutukana o vha a tshi khou tshimbila phanḓa ha khotsi awe, a mbo ḓi redzemuwa musi a tshi kanda ḽiṅwe ḽa eneo matombo nahone a wela maḓini, a ṱoḓa u nwela khothe luvhili. O takala vhukuma musi khotsi awe vha tshi mu gavha uri a si nwele khothe. Khotsi ashu wa ṱaḓulu u ri vhofholola kha ḽino shango ḽivhi ḽine ra nga ḽi fanyisa na mulambo une wa khou elela nga maanḓa na kha muvhusi waḽo, Sathane. Yehova ndi Mutsireledzi wavhuḓi vhukuma.—Mat. 6:13; 1 Yoh. 5:19.

16, 17. Yehova o thusa na u tsireledza hani Vhaisiraele musi vha tshi lwa na Vhaameleke?

¹⁶ Nḓila ya lufuno ine Yehova a tsireledza ngayo i vhonala kha zwe zwa itea musi a tshi vhofholola Vhaisiraele vhupulini ha Egipita, nahone a vha tsireledza nga lwa vhuṱolo musi vha tshi pfuka Lwanzhe Lutswuku nga 1513 B.C.E. Musi lwonolwo lushaka lwo no fhira sogani lwo livha thungo ya Thavha ya Sinai, lwo mbo ḓi swika Rafidima.

¹⁷ U ya nga vhuporofita vhu re kha Genesi 3:15, Sathane a nga vha o hanganea musi a tshi ṱoḓa tshibuli tsha u vutshela Vhaisiraele vhe vha vhonala vha songo tsireledzea. Zwenezwi o zwi ita a tshi shumisa Vhaameleke, vhe vha vha vhe maswina a vhathu vha Mudzimu. (Num. 24:20) Ṱhogomelani zwe Yehova a zwi khunyeledza musi a tshi shumisa vhanna vhaṋa vha fulufhedzeaho, Yoshua, Mushe, Aroni na Huri. Musi Yoshua  a tshi lwa na Vhaameleke, Mushe, Aroni na Huri vho vha vho ima tshikwarani tshi re nga tsini. Vhaisiraele vho vha vha tshi kunda musi Mushe a tshi imisa zwanḓa zwawe. Musi zwanḓa zwawe zwi tshi neta, Aroni na Huri vho vha vha tshi zwi tika. Nga thuso na tsireledzo ya Yehova, “Yoshua a kunda Vhaamaleke na vhathu vhavho.” (Ek. 17:8-13) Mushe o fhaṱa aletare henefho, a i vhidza uri “Tshiphuga tshanga ndi Yehova.”—Vhalani Ekisodo 17:14, 15.

18, 19. Mudzimu o tsireledza hani vhashumeli vhawe misini yashu?

¹⁸ Yehova u tsireledza vhane vha mu funa na u mu thetshelesa. U fana na Vhaisiraele musi vhe ngei Rafidima, ri fulufhela Mudzimu uri a ri tsireledze musi ro sedzana na maswina. Yehova o no ḓi ri tsireledza lunzhi sa tshigwada nahone u bvela phanḓa a tshi ri tsireledza kha mvutshelo dza Diabolo. Humbulani nga ha zwiitea zwinzhi zwe Mudzimu a tsireledza vhahashu musi vha tshi hana u dzhia sia nga nṱhani ha uri ndi Vhakriste. Sa tsumbo, zwenezwi zwo itea tshifhingani tsha Vhunazi ngei Dzheremane na kha maṅwe mashango nga vho-1930 na mathomoni a vho-1940. U vhala na u elekanya nga ha nganeavhutshilo na mafhungo o ṅwalwaho kha Yearbook a ambaho nga ha tsireledzo ya Mudzimu tshifhingani tsha u tovholwa, zwi ḓo khwaṱhisa lutendo lwashu kha Yehova sa Vhukhudo hashu.—Ps. 91:2.

¹⁹ Ri wana khumbudzo dza lufuno dzi tsireledzaho ndanguloni ya Yehova na kha khandiso dzayo. Ṱhogomelani nḓila ye zwenezwi zwa ri vhuyedza ngayo misini yashu. Musi ḽeneḽi shango ḽi tshi khou tou ṋaṋa u mbwandamela tshoṱhe kha vhuaḓa na zwifanyiso zwi karusaho maḓipfele a zwa vhudzekani, Yehova o ri ṋea khumbudzo dzo ṱavhanyiswaho na thuso i shumaho u itela uri ri fhaṱutshele matshilele a re na khombo. Sa tsumbo, ri wana nyeletshedzo ine ya nga i bva ha khotsi ine ya ri thusa u iledza vhukonani vhu si havhuḓi uri ri sa shumise luvhi Web site dza vhudavhidzano. *—1 Vhakor. 15:33.

20. Ndi tsireledzo na vhulivhisi vhufhio vhune ra vhu wana tshivhidzoni tsha Vhukriste?

²⁰ Ri nga zwi sumbedza hani uri vhukuma ri “funzwa nga Yehova”? Nga u thetshelesa milayo yawe nga vhuronwane. (Yes. 54:13) Zwivhidzoni zwashu ri wana vhulivhisi na tsireledzo, ngauri henefho hu na vhanna vha fulufhedzeaho vhane vha shuma sa vhahulwane vhane vha ri ṋea thuso na nyeletshedzo ya Maṅwalo. (Vhagal. 6:1) Yehova u shumisa “zwifhiwa zwine zwa vha vhathu” u itela u ri ṋea ṱhogomelo ya lufuno. (Vhaef. 4:7, 8) Ri fanela u aravha hani? Arali ra ḓiṱukufhadza na u thetshelesa nga u ḓifunela, ri ḓo wana phaṱhutshedzo ya Mudzimu.—Vhaheb. 13:17.

21. (a) Ri fanela u ḓiimisela u ita mini? (b) Thero i tevhelaho i ḓo ṱolisisa mini?

²¹ Kha ri ḓiimisele u rangwa phanḓa nga muya mukhethwa na u tenda u livhiswa nga Khotsi ashu wa ṱaḓulu. Ri fanela u dovha ra elekanya nga ha vhutshilo ha Murwa wawe Yesu Kristo, na u lingedza u tevhela tsumbo yawe yo fhelelaho. Yesu o lambedzwa nga nḓila khulwane nge a thetshelesa u swika lufuni. (Vhafil. 2:5-11) Na riṋe ri ḓo fhaṱutshedzwa arali ra fulufhela Yehova nga mbilu dzashu dzoṱhe. (Mir. 3:5, 6) Nga zwenezwo, u nga ri ri nga dzula ri tshi fulufhela Yehova samusi e Muṋei na Mutsireledzi a sa vhambedzwi na muṅwe. U mu shumela zwi ri ḓisela dakalo nahone ndi ndugelo khulwane vhukuma. Ri ḓo mu funa nga nḓila yo engedzeaho musi ri tshi elekanya nga ha sia ḽa vhuraru ḽa nḓila ine Khotsi ashu a ri ṱhogomela ngayo—vhukonani hawe. Thero i tevhelaho i livhisa ṱhogomelo kha nḓila ine Yehova a vha ngayo Khonani yashu ya tsini.