1, 2. So asaa hanotaynne asay tumaa tamaarido hanotay dumma dumma gidiyoy aybiinee?

SO ASAA deˈuwaa doomissidaagee Yihoowa. (Efi. 3:14, 15) Nuuni issi keettaa asa gidikkokka, nu eeshshaynne nu hanotay dumma dumma. Neeni naatettaappe doommada gastta asa gidana gakkanaashin nena yelidaageetuura deˈennan aggakka. Harati qassi, banttana yelidaageeti geella harggiyan, daafaban woy harabaa gaasuwan hayqqidoogeeta gidana danddayoosona. Issoti issoti ubba banttana yelidaageeta erokkona.

² Yihoowayyo goynniya a keettaa asay tumaa tamaarido hanotaykka dumma dumma. Nena yelidaageeti Geeshsha Maxaafaa maaraa loytti tamaarissin diccennan aggakka. (Zaa. 6:6, 7) Woy Yihoowayyo haggaaziya harati sabbakiyoogaa siyidi tumaa erida shaˈan qoodettiyaageetuppe neeni issuwaa gidennan aggakka.—Roo. 10:13-15; 1 Xim. 2:3, 4.

3. Nu ubbaa hanotay issi mala gidiyoy aybiinee?

³ Nuuni qommoora beˈidobatun issoy issuwaappe dummatiyaaba gidikkokka, nu ubbaa hanotaa issi mala oottiyaabay deˈees. Addaamee azazettibeenna gishshau nagaraanne hayquwaa laattida, qassi hegaa gaasuwan tuggatoos. (Roo. 5:12) Gidikkokka,  nuuni Yihoowayyo tumuppe goynniyo gishshau, a ‘nu Aawau’ giidi xeesana danddayoos. Isiyaasa 64:8y, beni wode Xoossay doorido asay a, “Abeet GODAU, neeni nu aawaa” giidoogaa yootees. Hegaa bollikka, Yesuusi tamaarissido woosaa doommiiddi, “Saluwan de7iya nu Aawau, ne geeshsha sunttai anjjetto” yaagiis.—Maa. 6:9.

4, 5. Nu Aawaa Yihoowa ay keena nashshiyaakko pilggiyo wode, ay qoppiyoogee maaddii?

⁴ Saluwan deˈiya nu Aaway ammanuwan ba sunttaa xeegiya nuuyyo, koshshiyaabaa kunttees, qassi nuna naagees. Mazamuraawee Yihooway, “I [tumatettan goynniya uri] tana siiqido gishshau, taani a ashshana. I ta sunttaa erido gishshau, taani a naagana” yaagidoogaa xaafiis. (Maz. 91:14) Ee, Xoossaa Yihooway nuna ba asaa nu morkketi xayssenna mala ashsheesinne naagees.

⁵ Saluwan deˈiya nu Aawaa kaseegaappe aaruwan nashshanau, keehi koshshiya heezzubata ane beˈoos: (1) Nu Aaway nuuyyo koshshiyaabaa kunttiyaagaa. (2) Yihooway nuna naagiyaagaa. (3) Xoossay nuuyyo mata dabbuwaa. Nuuni ha qofaa beˈiyo wode nuussi Xoossaara deˈiya dabbotaa wotti dentti qoppiyoogeenne i nu Aawaa gidiyo gishshau, a waati bonchana danddayiyaakko akeekiyoogee maaddees. Yihooway baakko shiiqiyaageetuyyo immiyo anjjuwaa yereriyoogeekka goˈˈees.—Yaaq. 4:8.

6. Yihooway ‘loˈˈo imo ubbaa’ Immiyaagaa gidiyoogaa bessido ogetuppe issoy aybee?

⁶ Erissiyo ashkkaraa Yaaqoobi, “Lo77o imo ubbainne kumetta woito ubbai saluwaappe yees. Saluwaa poo7uwaa medhdhida Xoossaappe yees” yaagidi xaafiis. (Yaaq. 1:17) Deˈoy ba huuphe Yihooway immido maalaalissiya imota. (Maz. 36:9) Nu deˈuwan Xoossaa sheniyaa oottiyo wode, ha wodiyan daro anjjuwaa demmoos; qassi sinttappe ooratta alamiyan merinaa deˈuwaa demmana. (Lee. 10:22; 2 PHe. 3:13) SHin Addaame nagaray kaalettido azzanttiyaabay deˈishin hegee waanidi hanana danddayii?

7. Yihooway nuuni ayyo mata dabbo gidanaadan hanotaa waatidi giigissidee?

⁷ Yihooway keehi daro ogiyan nuussi koshshiyaabaa kunttiyaagaa. Leemisuwau, i ba aaro kehatettan nuna ashshees. Ee, nuuni Addaameppe nagaraa laattido gishshau ubbaykka nagarancha. (Roo. 3:23) Gidikkokka, siiqoy denttettin Yihooway nuuni ayyo mata dabbo gidanaadan hanotaa giigissiis. Kiitettida Yohaannisi hagaadan giidi xaafiis: “Xoossai nuna ba siiquwaa hagan bessiis; nuuni Kiristtoosa baggaara de7uwaa demmana mala, ba issi Na7aa ha sa7aa kiittiis. Siiqo giyoogee hagaa; Xoossai nuna siiqidi, nuuni nu nagaraappe maarotettaa demmido ba Na7aa nuuyyo kiittiisippe attin, nuuni a siiqidoogaana gidenna.”—1 Yoh. 4:9, 10.

8, 9. Yihooway koshshiyaabaa kunttiyaagaa gidiyoogaa Abrahaama wodenne Yisaaqa wode waati bessidee? (Ha huuphe yohuwaa doomettan deˈiya misiliyaa xeella.)

⁸ Yesuusi yelettanaappe 1,900 gidiya layttaa kasetidi hanidabay, azazettiya asaa naati merinaa deˈuwaa demmanaadan Yihooway ba gita siiquwan giigissanabaa qonccissiis. Ibraawe 11:17-19 hagaadan gees: “Abrahaami Yisaaqa yarshshanaakko yarshshennaakko, Xoossai eranau xomoosido wode, Abrahaami ammanuwan a yarshshiis. Xoossai Abrahaama, ‘Ne zaree Yisaaqa baggaara xeesettana’ giidaashinkka, Abrahaami ba na7aa Yisaaqa yarshshanau giigiis. Abrahaami Xoossai Yisaaqa harai atto, haiquwaappekka pattanau danddayiyoogaa eriis; hegaa gishshau, haiquwaappe guyye a zaaridi ekkiis.” Abrahaami ba naˈaa Yisaaqa yarshshanau eeno giidoogaadan, Yihoowaykka asaa naata ashshanau ba Naˈaa Yesuus Kiristtoosa yarshsho oottidi immiis.—Yohaannisa 3:16, 36 nabbaba.

 ⁹ Yisaaqi yarshsho gididi hayqqennan attidoogan keehippe ufayttidoogee qoncce! Xoossay a gishshaa yarshsho gidanaadan dorssaa giigissidoogan i keehippe ufayttidoogee sirissenna. (Doo. 22:10-13) Abrahaami he sohuwaa ‘Yihooway immana’ giidi sinttidoogee bessiyaaba.—Doo. 22:14.

10, 11. ‘Harata Xoossaara sigettiyo oosuwaa’ sintta xeera gididi oottiyaageeti oonee, qassi eti hegaa waatidi oottidonaa?

¹⁰ Yihooway koshshiyaabaa kunttiyaagaa gidiyoogaa waati bessidaakko nuuni yereriyo wode, Yesuus Kiristtoosi oottido gitabaa akeekoos; Kiitettida PHauloosi hagaadan giidi xaafiis: “Issi asi asa ubbaayyo haiqqidoogaa nuuni akeekida; hegaa gidikko asai ubbai aara haiqqiis. Paxa de7iyaageeti bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo de7enna mala, i asa ubbaa gishshau haiqqiis.”—2 Qor. 5:14, 15.

¹¹ Beni wode deˈida Kiristtaaneti Xoossaa siiqiyo gishshaunne ayyo oottiyo gita maataa keehippe nashshiyo gishshau, ‘harata Xoossaara sigettiyo oosuwaa’ ufayssan oottidosona. Eti sabbakiyoogeenne erissiyo ashkkara oottiyoogee, suure wozanay deˈiyoogeeti Xoossaara sigettanaadan, a dabbo gidanaadaaninne guyyeppe ayyaanaaban a naata gidanaadan oottiis. Ayyaanan tiyettida Yihoowa ashkkarati ha wodiyan hegaa mala oosuwaa oottoosona. Eti Xoossaanne Kiristtoosa gishshaa haasayiyaageeta gididi oottiyo oosoy suure wozanaa koshshay deˈiyoogeeti Yihoowakko yaanaadaaninne ammaniyaageeta gidanaadan oottiis.—2 Qoronttoosa 5:18-20 nabbaba; Yoh. 6:44; Oos. 13:48.

12, 13. Yihooway immiyo darobaa nashshiyoogaa waati bessana danddayiyoo?

¹² Ha saˈan deˈanau hidootiya Kiristtaaneti ubbay, Yihooway koshshiyaabaa kunttiyaagaa gidiyoogaa nashshiyo gishshau, ayyaanan tiyettidaageetuura issippe Kawotettaa mishiraachuwaa sabbakoosona. Nuuni ha oosuwaa oottiyo wode, Xoossay immido hara gita imotaa, Geeshsha Maxaafaa loyttidi goˈettoos. (2 Xim. 3:16, 17) Haggaazuwan Xoossaa Qaalaa loytti goˈettiyo wode, harati merinaa deˈuwaa demmanaadan maaddoos. Ha oosuwan nuna maaddanaadan Yihooway immiyo hara imotan, geeshsha ayyaanan nuuni ubbay ammanettoos. (Zak. 4:6; Luq. 11:13) Yihoowa Markkatu Laytta Maxaafaa ubban qonccidaagaadan hegee demissiyo ayfee keehippe ufayssiyaagaa. Nu Aawaanne nuuyyo koshshiyaabaa kunttiyaagaa sabbanau ha oosuwaa oottiyoogee keehi gita maata!

¹³ Xoossay immido ha ubbabaa qoppiyo wode, nuna hagaadan giidi oychana koshshees: ‘Yihooway immidobaa keehippe nashshiyoogaa bessanau, haggaazuwan taani oottana danddayiyoogaa keenaa oottiyaanaa? Taani mishiraachuwaa sabbakiyoogan kaseegaappe aaruwan muruta gidana danddayiyoy ayba ogetuunee?’ Nuuni nu deˈuwan ubbatoo Kawotettaabaa kaseyiyoogan, Xoossay immiyo loˈˈo imotaa nashshiyoogaa bessana danddayoos. Hegaadan oottiyaaba gidikko, Yihooway nuuyyo koshshiyaabaa kunttana. (Maa. 6:25-33) Xoossay nuna siiqiyo gishshau, a ufayssanau nuuyyo danddayettida ubbabaa oottana koyiyoogee qoncce.—Lee. 27:11.

14. Yihooway ba asaa ashshiyaagaa gidiyoogaa waatidi bessidee?

¹⁴ Daawiti, “Taani hiyyeesanne metootanchcha; tabaa Godai qoppo. Tana maaddiyainne ashshiyai nena” yaagidi yexxiis. (Maz. 40:17) Yihooway ba asaa citan ashshiyaagaa gidiyoogaa daroto bessiis; ubba qassi eta morkketi wolqqaama yedetaa gattiyo wode hegaa bessiis. Hegaa mala wodiyan nuna maaddiyo gishshaunne ubbatoo ayyaanaaban nuuyyo darobaa immiyo gishshau, Xoossaa keehippe galatoos!

15. Issi siiqiya aaway ba naˈaa waatidi naagiyaakko leemisuwaa yoota.

¹⁵ Issi siiqiya aaway ba naatussi koshshiyaabaa kunttiyoogaa xalla gidennan, eta iitabaappe naagees. Eta qohiyaabay gakkikko, sohuwaara ashshanau baaxetees. Issi ishay i naatettan deˈiyo wode hanidabaa awudenne dogenna. Inne a aaway haggaazuwaappe simmiyo wode, pinnanau issi shaafaakko gakkidosona. He gallassi maallado wolqqaama iray bukkido gishshau haattay kixxiis. Pinnana danddayiyoy shaafan deˈiya wogga shuchatun issuwaappe haraa bolli guppi guppi wodhiyoogaa xallaana. Naˈay ba aawaa sinttan biiddi, shuchaa bolli gedee herchin kunddidi, naaˈˈutoo haattan muukettiis. Aaway sohuwaara a haraqiyaa oyqqidi, haattay meennaadan ashshido gishshau i keehippe galatees! Hegaadankka, saluwan deˈiya nu Aaway ha alamiyan deˈiya iitabaappenne a haariya Seexaanaa qohuwaappe nuna naagees. Yihooway ooppenne aaruwan naagiyaagaa.—Maa. 6:13; 1 Yoh. 5:19.

16, 17. Israaˈeelati Amaaleeqatuura olettiyo wode Yihooway eta waatidi maaddideenne naagidee?

¹⁶ Yihooway 1513n K.K. Israaˈeelata Gibxxe aylletettaappe kessidi, maalaalissiyaabaa oottidi eta Zoˈo Abbaa pinttido wode, i siiquwan ashshiyaagaa gidiyoogee oottidoban qoncciis. Eti bazzuwaa kanttidi Siinaa Deriyaakko simmidi Rafiidima giyoosaa gakkidosona.

¹⁷ Doomettaabaa 3:15n odettida hiraagaa maaran, naagiyaabi baynnaba milatiya Israaˈeelata Seexaanay qohanau malennan aggenna. I Xoossaa asau morkke gidida Amaaleeqatu baggaara qohanau maliis. (Qoo. 24:20) Yihooway ammanettida oyddu asatu, hegeetikka Yaasu, Muuse, Aaroonanne Huura baggaara oottidobaa akeekite. Yaasu  Amaaleeqatuura olettiyo wode Muusee, Aarooninne Huuri hegaa heeran deˈiya keraa huuphiyan deˈoosona. Muusee ba kushiyaa denttiyo wode Israaˈeelati olan xoonoosona. A kushee arggaaciyo wode Aaroonine Huuri a kushiyaa sitti oottidi oyqqidosona. Yaatiyo gishshau, Yihooway hegaadan oottidi maaddiininne naagin, “Yaasu Amaaleeqatu olanchchata bisuwan xooniis.” (Kes. 17:8-13) Muusee yan yarshshiyoosaa keexxidi, ‘Yihooway ta Banddiraa’ giidi sunttiis.—Kessaabaa 17:14, 15 nabbaba.

18, 19. Ha wodiyan Xoossay ba ashkkarata naaganau ay oottidee?

¹⁸ Yihooway bana siiqiyaageetanne bau azazettiyaageeta naagees. Israaˈeelati Rafiidiman oottidoogaadan, nu morkketuppe ashshanaadan Yihoowakko xeelloos. Yihooway nuna citan darotoo naagiis, qassi Dabloosa qohuwaappe ashshees. Polotikan shaalettennaadan bantta ammanuwan minni eqqida nu ishata darotoo Xoossay waati naagidaakko qoppite. Leemisuwau, Naaze haaruwaa wode Jarmanen, qassi hara biittatun 1930 heeraaninne 1940 heeran hegaa malabay haniis. Yihoowa Markkatu deˈuwan hanidabaanne Laytta Maxaafan kiyiya, Xoossay yedetaa wode ashshiyoogaa bessiya taarikiyaa nabbabiyoogee, qassi hegaa wotti dentti qoppiyoogee, nuna ashshiya Yihoowan keehi ammanettanaadan oottees.—Maz. 91:2.

¹⁹ Yihooway ba dirijjitiyaa baggaaranne nu xuufetu baggaara hassayissiyoogankka nuna naagees. Hegaadan oottiyoogan nuna mata wode waatidi naagidaakko akeekite. Ha alamee shori baynnabaa oottiyoogaaninne pokkobaa haniyoogaa misiliyan beˈiyoogan kaseegaappe yaa iiti itti biis; shin kandduwaaban qohiyaabaappe naagettanaadan Yihooway nuna keehi maaddiisinne bessiya wodiyan hassayissiis. Leemisuwau, Intternneetiyan sooshal networkkiyaa giyoobaa baggaara iita asatuura laggetennaadan saluwan deˈiya nu Aaway zorees. *—1 Qor. 15:33.

20. Kiristtaane gubaaˈiyaa baggaara demmiyo naagoynne kaaletoy aybee?

²⁰ Nuuni ‘Yihooway tamaarissidoogeeta’ gidiyoogaa waatidi bessana danddayiyoo? A azazuwaa mintti naagiyoogaana. (Isi. 54:13) Gubaaˈee nuuni koshshiya kaaletuwaanne naaguwaa demmiyo soho; yan cimati Geeshsha Maxaafaappe nuna maaddiyaabaanne loˈˈo zoriyaa yootoosona. (Gal. 6:1) ‘Imota gidida’ he asatu baggaara Yihooway nuussi koshshiyaabaa siiquwan kunttees. (Efi. 4:7, 8) Eti zoriyo wode nuuni waatana koshshii? Eeno giidi azazettiyoogee Xoossaa anjjuwaa demissees.—Ibr. 13:17.

21. (a) Nuuni ay oottanau murttana koshshii? (b) Kaalliya huuphe yohuwan ay beˈanee?

²¹ Nuna maaddanaadan ane geeshsha ayyaanan ammanettiyaageetanne saluwan deˈiya nu Aawaa kaaletuwaa kaalliyaageeta gidoos. Qassi nuuni a Naˈaa Yesuus Kiristtoosa deˈuwaabaa wotti dentti qoppananne laggetiyay baynna a leemisuwaa kaallanau baaxetana koshshees. Yesuusi hayqqana gakkanaashin azazettido gishshau, daro anjjuwaa demmiis. (Pili. 2:5-11) Aagaadan nuuni kumetta wozanaappe Yihoowan ammanettikko, anjjuwaa demmana. (Lee. 3:5, 6) Yaatiyo gishshau, ooppenne aaruwan nuna naagiyaanne nuuyyo koshshiyaabaa kunttiya Yihoowan ubbatoo ammanettiyaageeta gidoos. Yihoowayyo oottiyoogee keehi ufayssiya gita maata! SHin Yihooway nuuyyo waanidi mata dabbo gidii? Nuuni kaalliya huuphe yohuwan ha oyshaa zaaruwaa tobbiyo wode a kaseegaappe aaruwan siiqana.