1, 2. Ha ano nga paagi nagkakaiba-iba kita may kalabotan ha pamilya ngan ha kon paonan-o naton hinbaroan an kamatuoran?

HI Jehova an nagpatikang han kahikayan han pamilya. (Efe. 3:14, 15) Pero bisan kon usa la nga pamilya an aton gintikangan, iba-iba an aton personalidad ngan kahimtang. Bangin nagdaku ka upod han imo mga kag-anak. An iba naman bangin namatyan han ira mga kag-anak, posible tungod han sakit, aksidente, o iba pa nga trahedya. May iba pa ngani nga diri maaram kon hin-o an ira mga kag-anak.

² An mga membro han pamilya han mga magsiringba ni Jehova nahibaro han kamatuoran ha iba-iba liwat nga paagi. Bangin nagdaku ka ha kamatuoran, ngan iginpasilsil ha imo han imo mga kag-anak an mga prinsipyo ha Biblia. (Deut. 6:6, 7) O bangin usa ka hadton yinukot nga nahibaro han kamatuoran tungod kay nasangyawan ka han mga surugoon ni Jehova.—Roma 10:13-15; 1 Tim. 2:3, 4.

3. Ano nga mga butang an pariho kita ngatanan?

³ Bisan pa han mga pagkaiba-iba nga gin-unabi na, may mga butang nga pariho kita ngatanan. Nag-aantos kita han mga resulta han pagtalapas ni Adan ngan napanunod naton an pagkadiri-hingpit, sala, ngan kamatayon. (Roma 5:12) Bisan pa hito, sugad nga tinuod nga mga magsiringba,  matatawag naton hi Jehova sugad nga “aton Amay.” May kalabotan ha katawohan nga pinili han Dios ha kadaan nga panahon, an Isaias 64:8 nasiring: “O Jehova, ikaw an amon Amay.” Dugang pa, gintikangan ni Jesus an iya modelo nga pag-ampo pinaagi hini nga mga pulong: “Amay namon ha langit, pagbaraanon an imo ngaran.”—Mat. 6:9.

4, 5. Basi maghilarom an aton gugma ha aton langitnon nga Amay nga hi Jehova, ano an aton hihisgotan?

⁴ Ginmamangnoan ngan ginpapanalipdan kita han aton langitnon nga Amay sugad nga katawohan nga natawag ha iya ngaran nga may pagtoo. Sumala ha salmista, hi Jehova nagsiring: “Kay iya [tinuod nga magsiringba] iginbutang an iya gugma ha akon, salit akon hiya luluwason: Igbubutang ko hiya ha kahitas-an [“akon hiya papanalipdan,” NW], kay kinilala niya an akon ngaran.” (Sal. 91:14) Oo, hi Jehova nga Dios mahigugmaon nga nagtatagana ha aton hin katalwasan tikang ha aton mga kaaway ngan nagpapanalipod ha aton sugad nga iya katawohan basi diri kita mapoo.

⁵ Basi maghilarom an aton gugma ha aton langitnon nga Amay, aton hisgotan an tulo nga importante nga punto: (1) An aton Amay an aton Paratagana. (2) Hi Jehova an aton Parapanalipod. (3) Ngan an Dios an aton gimaopayi nga Sangkay. Samtang ginhihisgotan naton ini, makakabulig kon papamalandungon naton an aton relasyon ha Dios ngan kon masasabtan naton kon paonan-o mapapasidunggan hiya sugad nga aton Amay. Makakabulig liwat kon papamalandungon naton an mga bendisyon nga iginhahatag ni Jehova ha mga nangangalimbasog nga magin duok ha iya.—San. 4:8.

6. Ano an usa nga paagi nga ginpapamatud-an ni Jehova nga hiya an Humaratag han “tagsa nga maopay nga regalo”?

⁶ An disipulo nga hi Santiago nagsurat: “An tagsa nga maopay nga regalo ngan an tagsa nga perpekto nga hatag nagtitikang ha igbaw, . . . tikang ito ha Amay han mga lamrag ha kalangitan.” (San. 1:17) An kinabuhi maopay gud nga regalo tikang kan Jehova. (Sal. 36:9) Kon gagamiton naton ito ha pagbuhat han iya kaburut-on, makakakarawat kita hin damu nga bendisyon yana ngan hin kinabuhi nga waray kataposan ha bag-o nga kalibotan. (Prob. 10:22; 2 Ped. 3:13) Kondi paonan-o ini magigin posible nga napanunod man naton kan Adan an pagkadiri-hingpit, sala, ngan kamatayon?

7. Ano an ginhimo han Dios basi magkaada kita duok nga relasyon ha iya?

⁷ Iginpapakita ni Jehova ha damu hinduro nga paagi nga hiya gud an Harangdon nga Paratagana. Pananglitan, tungod han iya diri matupngan nga pagkabuotan napagios hiya nga talwason kita. Oo, kita ngatanan makasasala ngan napanunod naton kan Adan an pagkadiri-hingpit. (Roma 3:23) Bisan pa hito, tungod han gugma ni Jehova, hiya an siyahan nga naghimo hin paagi basi magkaada kita duok nga relasyon ha iya. Hi apostol Juan nagsurat: “An gugma han Dios iginpahayag ha aton hini nga paagi, han ginpakanhi han Dios ha kalibotan an iya bugtong nga Anak basi makarawat naton an kinabuhi pinaagi ha iya. Iginpahayag ini nga gugma, diri tungod kay ginhigugma naton an Dios, kondi tungod kay ginhigugma kita niya ngan ginpakanhi an iya Anak sugad nga halad ha pagpahiuli para ha aton mga sala.”—1 Juan 4:9, 10.

8, 9. Paonan-o ginpapamatud-an ni Jehova nga hiya an Harangdon nga Paratagana ha panahon nira Abraham ngan Isaac? (Kitaa an retrato ha tinikangan hini nga artikulo.)

⁸ Han ika-19 ka siglo B.C.E., iginpakita han usa nga hitabo ha kinabuhi ni Abraham kon paonan-o mahigugmaon nga itatagana ni Jehova ha ngatanan nga masinugtanon nga katawohan an kinabuhi nga waray kataposan. An Hebreo 11:17-19 nagsasaysay: “Tungod han pagtoo ni Abraham, sugad hin iginhalad niya hi Isaac han ginsarihan hiya; ini nga lalaki nga malipayon nga nagkarawat han mga saad andam gud maghalad han iya bugtong nga anak, bisan kon ginsidngan hiya: ‘An tatawagon nga imo binhi magtitikang kan Isaac.’ Pero nangatadongan hiya nga mababanhaw gud han Dios hi Isaac; ngan tikang didto nahibalik ha iya an iya anak ha simboliko nga paagi.” Sugad la nga andam hi Abraham nga ighalad an iya anak nga hi  Isaac, andam liwat hi Jehova nga ighalad an iya Anak nga hi Jesu-Kristo basi matalwas an katawohan.—Basaha an Juan 3:16, 36.

⁹ Sigurado nga nalipay gud hi Isaac nga natalwas hiya tikang ha kamatayon! Ngan mapasalamaton gud hiya nga hi Jehova nagtagana hin kasaliwan nga halad—usa nga lalaki nga karnero nga nahigagaod ha hirani nga kasapinitan. (Gen. 22:10-13) Diri urusahon nga ito nga lugar gintawag nga “Jehova-Yireh,” nga ha Hebreo nangangahulogan “Hi Jehova Magtatagana.”—Gen. 22:14.

10, 11. Hin-o an nangunguna ha “sagrado nga buruhaton han pagpahiuli,” ngan paonan-o nira ito ginhihimo?

¹⁰ Samtang ginpapamalandong naton kon paonan-o ginpapamatud-an ni Jehova nga hiya an Harangdon nga Paratagana, mapasalamaton nga ginkakarawat naton an importante nga ginbuhat ni Jesu-Kristo. Hi apostol Pablo nagsurat: “Kay ini an amon konklusyon, nga an usa nga tawo namatay para ha ngatanan, kay an ngatanan nga tawo namatay. Namatay hiya para ha ngatanan basi an mga buhi diri na mabuhi para ha ira kalugaringon, kondi para ha iya nga namatay para ha ira ngan ginbanhaw.”—2 Cor. 5:14, 15.

¹¹ Tungod han gugma han siyahan siglo nga mga Kristiano ngan han ira pagin mapasalamaton ha Dios para ha daku gud nga pribilehiyo nga makag-alagad ha iya, malipayon nga ginkarawat nira an “sagrado nga buruhaton han pagpahiuli.” An ira pakigbahin ha pagsangyaw ngan panhimo hin disipulo naghatag hin higayon ha mga tangkod an kasingkasing nga magkaada kamurayawan ha Dios, magin iya kasangkayan, ngan ha urhi magin iya espirituwal nga mga anak. Yana, an dinihogan nga mga surugoon ni Jehova naghihimo liwat hin pariho nga sagrado nga buruhaton. Tungod han ira nahimo sugad nga mga embahador han Dios ngan ni Kristo, nagin posible nga adton may husto nga disposisyon maipahirani kan Jehova ngan magin iya mga tumuroo.—Basaha an 2 Corinto 5:18-20; Juan 6:44; Buh. 13:48.

12, 13. Paonan-o naton maipapakita nga gin-aapresyar naton an damu nga tagana ni Jehova?

¹² Tungod han pag-apresyar kan Jehova sugad nga an Harangdon nga Paratagana, an ngatanan nga Kristiano nga may tunan-on nga paglaom nabulig ha mga dinihogan ha pagsangyaw han Ginhadian. Hini nga buruhaton, ginagamit naton an Biblia, usa pa nga maopay gud nga tagana han Dios. (2 Tim. 3:16, 17) Pinaagi han epektibo nga paggamit han Pulong han Dios ha aton ministeryo, gintatagan naton hin higayon an iba nga magkaada hin kinabuhi nga waray kataposan. Basi magin epektibo kita hini nga buruhaton, kita ngatanan nasarig ha usa pa nga tagana ni Jehova—an iya baraan nga espiritu. (Sak. 4:6; Luc. 11:13) Makatirigamnan gud an mga resulta han pagsangyaw, sugad han iginpapakita han tagsa nga edisyon han Yearbook of Jehovah’s Witnesses. Daku gud nga pribilehiyo an pakigbahin hini nga buruhaton nga nagdadayaw ha aton Amay ngan Paratagana!

¹³ Tungod kay damu gud nga butang an igintatagana ha aton han Dios, maopay nga pakianhan naton an aton kalugaringon: ‘Ginbubuhat ko ba an ngatanan ko nga mahihimo ha ministeryo basi ipakita kan Jehova nga gin-aapresyar ko gud an iya mga tagana? Paonan-o ako magigin mas epektibo ha pagsangyaw han maopay nga sumat?’ Maipapakita naton an aton pagpasalamat ha mag-opay gud nga tagana han Dios kon uunahon naton ha aton kinabuhi an mga buruhaton may kalabotan ha Ginhadian. Kon bubuhaton naton ito, sisiguruhon ni Jehova nga maihatag an aton mga panginahanglan. (Mat. 6:25-33) Tungod han gugma han Dios, karuyag gud naton buhaton an ngatanan naton nga mahihimo basi mapalipay an iya kasingkasing.—Prob. 27:11.

14. Paonan-o gintatalwas ni Jehova an iya katawohan?

¹⁴ Hi salmista David nagkanta: “Maluya ako ngan waray gud nahihimo, kundi ginhuhunahuna mo ako, O Ginoo. Ikaw an akon parabulig ngan magtaralwas.” (Sal. 40:17, Maopay nga Sumat) Pauroutro nga gintatalwas ni Jehova an iya katawohan sugad nga grupo, labi na kon duro nga gintitimaraot ngan ginkukontra hira han ira mga kaaway. Mapasalamaton gud kita ha bulig han Dios durante hito nga mga panahon ngan para ha damu nga espirituwal nga tagana nga padayon nga iginhahatag niya ha aton!

15. Iilustrar kon paonan-o ginpanalipdan han mahigugmaon nga amay an iya anak.

¹⁵ An usa nga mahigugmaon nga amay diri la nagtatagana ha iya mga anak kondi nagpapanalipod liwat hiya ha ira. Nangangalimbasog dayon hiya nga talwason hira kon may peligro. Nahinumdoman han usa nga brother an usa nga hitabo han bata pa hiya. Han tipauli na hiya ngan an iya tatay tikang ha pagsangyaw, bumaha an sapa ha ira aragian tungod han makusog nga uran durante han aga. An paagi la basi makatabok amo an pagpiktaw tikang ha usa nga daku nga bato ngadto ha usa pa nga bato. Hiya an siyahan nga pumiktaw, kondi nawad-an hiya hin balanse. Nahulog hiya ha sapa ngan makaduha ka beses nga lumunod. Mapasalamaton gud hiya nga ginkaptan dayon hiya ha sugbong han iya tatay salit waray hiya malumos! Ha pariho nga paagi, gintatalwas kita han aton langitnon nga Amay tikang ha mga peligro hinin maraot nga kalibotan ngan ha magmarando hini nga hi Satanas. Oo, hi Jehova gud an pinakamasasarigan nga Parapanalipod.—Mat. 6:13; 1 Juan 5:19.

16, 17. Paonan-o ginbuligan ngan ginpanalipdan ni Jehova an mga Israelita han nakig-away hira ha mga Amalekanhon?

¹⁶ An mahigugmaon nga pagpanalipod ni Jehova matin-aw nga iginpakita han nahitabo katapos niya talwason an mga Israelita tikang ha pagkauripon ha Ehipto ngan milagroso nga ginpanalipdan niya hira samtang natabok ha Dagat nga Pula hadton 1513 B.C.E. Katapos han paglakaton ha kamingawan pakadto ha Bukid Sinai, an mga Israelita nakaabot ha Repidim.

¹⁷ Tungod han tagna ha Genesis 3:15, posible nga desperado hi Satanas samtang namimiling hiya hin higayon basi atakehon an baga hin waray mahihimo nga mga Israelita. Ginbuhat niya ini pinaagi han mga Amalekanhon, nga kaaway han katawohan han Dios. (Num. 24:20) Tagda an ginbuhat ni Jehova pinaagi han upat nga matinumanon nga kalalakin-an nga hira Josue, Moises, Aaron, ngan Hur. Samtang nakikig-away hi Josue ha mga  Amalekanhon, hira Moises, Aaron, ngan Hur nakadto ha hirani nga bungtod. Nagigin madaugon an mga Israelita kon gin-aalsa ni Moises an iya mga kamot. Han ginkapoy na an iya mga kamot, ginbuligan hiya nira Aaron ngan Hur basi magpabilin ito nga nakaalsa. Salit pinaagi han bulig ngan panalipod ni Jehova, “ginlaglag ni Josue hi Amalek ngan an iya katawohan.” (Eks. 17:8-13) Hi Moises naghimo hin altar didto, ngan gintawag ito nga “Jehova-nissi,” nga nangangahulogan “Hi Jehova an Akon Arayopan.”—Basaha an Eksodo 17:14, 15.

18, 19. Paonan-o ginpapanalipdan han Dios an iya mga surugoon yana?

¹⁸ Ginpapanalipdan ni Jehova adton mga nahigugma ngan nasugot ha iya. Pariho ha mga Israelita didto ha Repidim, nasarig kita ha Dios nga tatalwason kita niya tikang ha aton mga kaaway. Kasagaran na nga ginpapanalipdan kita ni Jehova sugad nga grupo, ngan gintatalwas kita niya tikang ha mga pag-atake han Yawa. Pananglitan, damu ka beses nga ginpanalipdan han Dios an aton mga kabugtoan nga gintimaraot tungod han ira pagpabilin nga neutral. Nahitabo ito ha Germany ngan ha iba pa nga nasud han nagmando an mga Nazi hadton dekada 1930 tubtob ha temprano han dekada 1940. An pagbasa ngan pagpamalandong han mga istorya ha kinabuhi ngan han mga eksperyensya ha aton Yearbook nga nagpapakita kon paonan-o nagpanalipod an Dios durante han panahon han pagtimaraot, magpaparig-on han aton pagsarig kan Jehova sugad nga aton Arayopan.—Sal. 91:2.

¹⁹ Ginpapanalipdan liwat kita ni Jehova pinaagi ha paghatag ha aton hin mahigugmaon nga mga pahinumdom tikang ha iya organisasyon ngan ha aton mga publikasyon. Tagda kon paonan-o ito nagpanalipod ha aton han naglabay pa la nga mga tuig. Samtang ini nga kalibotan padayon nga nagtitikaduro an hingyap ha sekso, makahurubog nga irimnon, ngan pornograpiya, hi Jehova nagtatagana ha aton hin importante nga mga pahinumdom ngan praktikal nga mga bulig basi magin alerto kita ha anoman nga butang nga mahimo makadaot han aton moralidad. Pananglitan, nakakakarawat kita hin mga sagdon basi malikyan naton an maraot nga mga kaupod pinaagi ha sayop nga paggamit han social networking. *—1 Cor. 15:33.

20. Ano nga panalipod ngan giya an aton nakakarawat pinaagi han Kristiano nga kongregasyon?

²⁰ Paonan-o naton maipapakita nga ‘tinutdoan [gud kita] ni Jehova’? Pinaagi ha pagsunod hin maopay ha iya mga sugo. (Isa. 54:13) An aton mga kongregasyon usa nga talwas nga lugar diin nakakarawat naton an panalipod ngan giya tungod kay aada an mga tigurang nga mabulig ngan maghahatag ha aton hin sagdon tikang ha Biblia. (Gal. 6:1) Iginpapakita ni Jehova an iya mahigugmaon nga pagmangno ha aton pinaagi hinin “regalo nga kalalakin-an.” (Efe. 4:7, 8) Salit paonan-o kita nagios kon ginsasagdonan kita han mga tigurang? Kon andam kita magpasakop ngan sumugot, makakarawat naton an bendisyon han Dios.—Heb. 13:17.

21. (a) Determinado kita nga buhaton an ano? (b) Ano an hihisgotan ha sunod nga artikulo?

²¹ Salit magin determinado kita nga sumarig ha bulig han baraan nga espiritu ngan magpagiya ha aton langitnon nga Amay. Kinahanglan liwat naton pamalandungon an paagi han pagkinabuhi han Iya Anak nga hi Jesu-Kristo, ngan mangalimbasog nga sundon an iya maopay hinduro nga ehemplo. Tungod han iya pagin masinugtanon tubtob ha kamatayon, nakarawat niya an daku nga balos. (Fil. 2:5-11) Pariho ha iya, bibendisyonan kita kon masarig kita kan Jehova ha aton bug-os nga kasingkasing. (Prob. 3:5, 6) Salit hinaot pirme kita sumarig kan Jehova sugad nga aton Harangdon nga Paratagana ngan Parapanalipod. Makalilipay gud ngan daku nga pribilehiyo an pag-alagad ha iya! Maghihilarom pa an aton gugma ha iya kon aton papamalandungon an ikatulo nga bahin kon paonan-o kita ginmamangnoan han aton Amay—an iya pakigsangkay. Hihisgotan ha sunod nga artikulo kon paonan-o naton magigin gimaopayi nga Sangkay hi Jehova.