Ko Sehova ʼe Lotofoaki Pea Mo Puipui Tatou
“O tupu e ofa ia ia kia au, e au fakamauli anai ia ia; e au puipui anai ia ia, koteuhi e ina iloi toku huafa.”—PES. 91:14.
1, 2. ʼE kehekehe feafeaʼi ʼotatou aluʼaga fakafamili pea mo tatatou iloʼi ʼae ia te moʼoni?
NEʼE fakatupu e Sehova te famili. (Efe. 3:14, 15) Logo la tatatou kau ki he foʼi famili ʼe tahi, kaʼe ʼe tou kehekehe fuli ʼi ʼotatou ʼulugaaga pea mo ʼotatou aluʼaga. Ohage la ko ʼihi neʼe lahilahi ake mo ʼanatou matuʼā. Ko ʼihi kua lagi mamate ʼanatou matuʼā koteʼuhi neʼe mahahaki, peʼe neʼe faifakaʼi, peʼe ko he tahi age tuʼutamaki. Pea ko ʼihi leva ʼe mole natou iloʼi pe la pe ko ai ʼanatou matuʼā.
2 ʼE tou kau fuli ʼi te foʼi famili ʼo te kau atolasio ʼa Sehova pea neʼe tou iloʼi te moʼoni ʼi ni aluʼaga kehekehe. Ohage la neʼe lagi pusiʼaki koutou e ʼakotou matuʼā ʼo natou akoʼi atu te ʼu pelesepeto ʼi te Tohi-Tapu. (Tet. 6:6, 7) Peʼe lagi kotou hage ko te ʼu lau ʼi afe hahaʼi ʼae neʼe natou iloʼi te moʼoni ʼi te faifakamafola ʼa te ʼu kaugana ʼa Sehova.—Loma 10:13-15; 1 Tim. 2:3, 4.
3. Kotea te ʼu faʼahi ʼe tou tatau fuli ai?
3 Logo la te ʼu kehekehe ʼaia, kaʼe ʼe ʼi ai te ʼu faʼahi ʼe tou tatau fuli ai. ʼI te talagataʼa ʼa Atama ki te ʼAtua, kua tou liliu fuli ai ʼo heʼe haohaoa, mo agahala pea mo mamate. (Loma 5:12) Kaʼe ʼe feala pe, ʼi totatou ʼuhiga kau atolasio moʼoni, ke tou ui ʼo ʼuhiga mo Sehova ko “tatatou Tamai.” ʼI te temi muʼa, neʼe feala ki te hahaʼi ʼae neʼe filifili e te ʼAtua ke natou fai te ʼu palalau ʼaeni ʼe tuʼu ia Esaia 64:7: “[“E Sehova,” MN], ko koe ko tamatou tamai.” Pea neʼe kamata e Sesu te faikole faʼifaʼitaki ʼaki te ʼu palalau ʼaeni: “Tamatou Tamai ae e nofo i te atu lagi! Ke tapuha tou huafa.”—Mat. 6:9.
4, 5. Ke lahi age totatou ʼofa ʼae kia Sehova, tatatou Tamai ʼae ʼe ʼi selo, kotea ʼae ʼe lelei ke tou vakaʼi?
4 Ko tatatou Tamai ʼae ʼe ʼi selo ʼe tokaga pea mo puipui ia te hahaʼi ʼae ʼe fetapa ki tona huafa ʼi te tui. Ohage ko tona tohi e te tagata faipesalemo, neʼe ui fenei e Sehova ʼo ʼuhiga mo ia ʼae ʼe tauhi moʼoni age kia te ia: “O tupu e ofa ia ia kia au, e au fakamauli anai ia ia; e au puipui anai ia ia, koteuhi e ina iloi toku huafa.” (Pes. 91:14) ʼAki tona ʼofa, ʼe haofaki e Sehova ʼAtua ia tana hahaʼi mai ʼonatou fili pea mo puipui natou, ke mole fakaʼauha ai natou.
5 Ke lahi age totatou ʼofa ʼae kia Sehova, tatatou Tamai ʼae ʼe ʼi selo, tou vakaʼi peʼe feafeaʼi (1) tana lotofoaki, (2) tana puipui tatou pea mo (3) tana liliu ko hotatou kaumeʼa lelei. ʼI tatatou vakaʼi te ʼu faʼahi ʼaia ʼe tolu, tou fakakaukauʼi lelei tatatou fakakaumeʼa ʼae mo te ʼAtua pea mo tou ako pe feafeaʼi hatatou fakaʼapaʼapa kia te ia, heʼe ko ia tatatou Tamai. Pea tou fakakaukauʼi ia te ʼu tapuakina ʼae ʼe fakapapauʼi e Sehova kia natou ʼae ʼe fakaovi age kia te ia.—Sakp. 4:8.
KO SEHOVA ʼE LOTOFOAKI LAHI
6. He ko ʼe ʼe feala ke tou ui ko Sehova ʼe ina foaki “te u kalasia lelei fuli”?
6 Neʼe tohi fenei e te tisipulo ko Sakopo: “Ko te u kalasia lelei fuli pea mo te u meaofa lelei tukupau fuli e natou hihifo mai oluga, mai te Tamai o te u malama.” (Sakp. 1:17) Ko te maʼuli ʼe ko he meʼa ʼofa taulekaleka mai ia Sehova. (Pes. 36:10) Kapau ʼe tou fakaʼaogaʼi totatou maʼuli moʼo fai te finegalo ʼo Sehova, pea ʼe tou maʼu anai he ʼu tapuakina lahi ʼi te temi nei pea mo te maʼuli heʼe gata ʼi te malama foʼou. (Taag. 10:22; 2 Pet. 3:13) Kaʼe ʼe lava feafeaʼi te faʼahi ʼaia mai tona aluʼaga ʼae ʼe tou tau fuli mo te ʼu fua ʼo te talagataʼa ʼa Atama?
7. Neʼe fakafealagia feafeaʼi e te ʼAtua ke tou felogoʼi lelei mo ia?
7 ʼE ʼi ai te tahi ʼu faʼahi ʼe foaki lahi ai e Sehova. Ohage la, ʼaki tona ʼofa makehe ʼe ina haofaki tatou. ʼE tou agahala pea mo tou heʼe haohaoa fuli ʼuhi ko Atama. (Loma 3:23) Kaʼe ʼaki te ʼofa ʼo Sehova, neʼe ina fakafealagia ke tou felogoʼi lelei mo ia. Neʼe tohi fenei e te apositolo ko Soane: “Nee fakaha te ofa o te Atua kia tatou i tana fekaui mai tona Alo ulutokotahi ki te malamanei, o uhi ke tou mauli ia ia. Pea koeni te ofa aena: E mole ko tatou ae nee oofa ki te Atua, kae ko te Atua ae nee ofa kia tatou pea nee ina fekaui mai tona Alo o hage ko he vikitima ke totogi ai atatou agahala.”—1 Soa. 4:9, 10.
8, 9. Neʼe ha feafeaʼi te lotofoaki ʼo Sehova ʼi te temi ʼo Apalahamo pea mo Isaake? (Vakaʼi te ʼuluaki pakī.)
8 Ia teitei taʼu ʼe 1 800 ʼi muʼa ʼo te tupu ʼa Sesu, neʼe hoko te aluʼaga ʼi te maʼuli ʼo Apalahamo neʼe ina fakata ai ia te toe ʼofa lahi ʼo Sehova ʼi tana foaki te maʼuli heʼe gata ki te hahaʼi fakalogo fuli. ʼE ui fenei ia Hepeleo 11:17-19: “Ko te tui ae nee momoli ai leva e Apalahamo ia Isaake, i tona ahiahii, pea nee ina momoli leva tona foha ulutokotahi, ae nee tuku ki ai te u fakapapau, pea nee ui ki ai: Ia Isaake e ke mau anai he hakoga ae e fakahigoa anai ki tou higoa. Nee manatu ia e mafimafi osi te Atua, o ina toe fakatuuake te kau mate; koia i he fakatata nee ina toe mau leva tona foha.” Ohage pe ko te lotolelei ʼa Apalahamo ke ina momoli tona foha, ia Isaake, neʼe lotolelei ia Sehova ke ina momoli tona ʼAlo, ia Sesu Kilisito, moʼo haofaki te malamanei.—Lau ia Soane 3:16, 36.
9 Neʼe mole kei lagi tuʼania ia Isaake ʼi tana hao ʼae mai te mate fakasakilifisio ʼaia! ʼE mahino ia neʼe lotofakafetaʼi ʼi te foaki ʼae e te ʼAtua he manu ke sakilifisioʼi, neʼe ko he ovi tagata neʼe maʼua ʼona tala ʼi he kiʼi fuʼu ʼakau neʼe tuʼu ovi age. (Sen. 22:10-13) Neʼe fakahigoa e Apalahamo ia te koga meʼa ʼaia ko “Sehova-Sile” ko tona fakaʼuhiga ʼi te Fakahepeleo “ ʼE Foaki Anai e Sehova.”—Sen. 22:14.
TE FEALAGIA KE TOU FAKATOKATOKA MO TE ʼATUA
10, 11. Ko ai ʼae neʼe ina takitaki “te gaue o te fakatokatoka” ʼo kaku mai ki te temi ʼaeni, pea ʼe natou fakahoko feafeaʼi te gaue ʼaia?
10 Ka tou metitasio ki te ʼu meʼa fuli ʼae neʼe foaki mai e Sehova, ʼe tou mahino ai neʼe mole feala ke tou kaumeʼa mo te ʼAtua mo kapau neʼe mole sakilifisioʼi e Sesu tona maʼuli. Neʼe tohi fenei e Paulo: “[ʼE] ma iloi kapau nee mate he toko tahi o uhiga mo te tagata fuli, pea nee mate te tagata fuli; pea nee mate ia o uhiga mo te tagata fuli, koteuhi ko natou ae e mauli ke aua naa natou mauli kia natou totonu, kae kia ia ae nee mate pea nee toe tuuake o uhiga mo natou.”—2 Ko. 5:14, 15.
11 Mai tona ʼuhiga ʼae neʼe ʼoʼofa te kau ʼuluaki Kilisitiano ki te ʼAtua pea mo lotofakafetaʼi ki te pilivilesio ʼae ke natou tauhi kia te ia, koia neʼe natou tali fakafiafia ai “te gaue o te fakatokatoka.” Ko te gaue ʼaia neʼe ko te faifakamafola, ʼae neʼe fakafealagia ai ki te hahaʼi ke natou fakatokatoka mo te ʼAtua, ke natou liliu ko ʼona kaumeʼa, pea ki muli age ko he ʼu foha ʼo te ʼAtua ʼi selo. ʼE toe fakahoko ia ʼaho nei e te ʼu kaugana fakanofo ʼa Sehova ia te gaue ʼaia. ʼE natou hage ko he ʼu hahaʼi fakafofoga ʼo te ʼAtua pea mo Kilisito. ʼAki tanatou faifakamafola, ʼe feala ai ki te hahaʼi faitotonu mo agavaivai ke taki mai natou e Sehova pea mo natou liliu ko ʼana kaugana.—Lau ia 2 Kolinito 5:18-20; Soa. 6:44; Gaue 13:48.
12, 13. ʼE tou lava fakaha feafeaʼi tatatou lotofakafetaʼi ki te ʼu meʼa fuli ʼae ʼe foaki mai e Sehova?
12 ʼE lotofakafetaʼi te tahi ʼu ovi kia Sehova ʼi tana Lotofoaki Lahi, koia ʼe natou lagolago ai ki te kau fakanofo ʼi te fakamafola ʼo te logo lelei. ʼI te gaue faifakamafola ʼaia, ʼe tou fakaʼaogaʼi te Tohi-Tapu, ʼae ʼe ko te tahi meʼa ʼofa taulekaleka mai te ʼAtua. (2 Tim. 3:16, 17) Ka tou fakaʼaogaʼi lelei te Tohi-Tapu ʼi tatatou minisitelio, ʼe tou foaki ki ʼihi te faigamalie ʼae ke natou maʼu te maʼuli heʼe gata. ʼE toe foaki mai e Sehova tona laumalie maʼoniʼoni. ʼE tou falala fuli ki te laumalie maʼoniʼoni moʼo tokoni mai ʼi tatatou minisitelio. (Sakl. 4:6; Luka 11:13) Ohage ko tona ha ʼi te taʼu fuli ʼi te Annuaire des Témoins de Jéhovah, ʼe fakaofoofo ia te ʼu fua ʼo te gaue faifakamafola. ʼE ko he toe pilivilesio lahi hatatou kau ki te gaue ʼaia ʼae ʼe fakavikiviki ai tatatou Tamai ʼae ʼe lotofoaki lahi!
13 Mai tona aluʼaga ʼae ʼe lahi te ʼu meʼa ʼae ʼe foaki mai e te ʼAtua, koia ʼe tonu ke tou fai te ʼu fehuʼi ʼaeni: “ ʼE au faiga fakamalotoloto koa ʼi taku minisitelio ke au fakaha toku lotofakafetaʼi kia Sehova ʼuhi ko te ʼu meʼa fuli ʼae ʼe ina foaki mai? ʼE feafeaʼi haku hikihiki ke lelei age taku fakamafola te logo lelei?” Kapau ʼe tou lotofakafetaʼi ki te ʼu meʼa fuli ʼae ʼe foaki mai e te ʼAtua, ʼe tou fakamuʼamuʼa anai ia te Puleʼaga ʼi totatou maʼuli. Kapau ʼe tou fai te faʼahi ʼaia, ʼe fakapapau mai e Sehova ʼe tou maʼu tuʼumaʼu pe anai te ʼu meʼa ʼae ʼe ʼaoga kia tatou. (Mat. 6:25-33) Mai tona aluʼaga ʼae ʼe ʼofa ia Sehova kia tatou, ʼe tou faiga lahi anai ke tou fakafiafiaʼi tona loto.—Taag. 27:11.
14. ʼE haofaki feafeaʼi e Sehova tana hahaʼi?
14 Neʼe hivaʼi fenei e te tagata faipesalemo ko Tavite: “ ʼE au lotomamahi mo masiva; ʼofa pe ke tokagaʼi au e Sehova. Ko koe toku tokoni pea mo Ia ʼae ʼe ina fakahao ia au.” (Pes. 40:17, MN) Neʼe haofaki tuʼa lahi e Sehova tana hahaʼi, tafitō ʼi te ʼu temi ʼae neʼe fakatagaʼi kovi pea mo tuli ai natou e ʼonatou fili. ʼE tou lotofakafetaʼi lahi ʼi te foaki tuʼumaʼu mai e Sehova ia te ʼu meʼa ʼae ʼe ʼaoga ke tou nonofo agatonu ai ʼi te ʼu temi faigataʼa.
ʼE PUIPUI TATOU E SEHOVA
15. Kotou tuku mai he faʼifaʼitaki ʼe fakaha ai pe ʼe feafeaʼi te puipui e he tamai ia tona foha.
15 Ko te tamai ʼae ʼe ʼofa ki ʼana fanau, ʼe mole gata pe tana foaki te ʼu meʼa ʼae ʼe ʼaoga kia natou, kaʼe ʼe ina toe puipui natou. Ka natou tuʼutamakiʼia, pea ʼe ina foimo haofaki natou. Ohage la, ʼe manatuʼi e te tehina te aluʼaga neʼe hoko ʼi tana kei veliveli. Neʼe toe liliu mo tana tamai ki tonatou ʼapi ʼi tanā ʼosi faifakamafola, pea neʼe tonu ke nā fakalaka ʼi te vai tafe. Kaʼe neʼe ʼua lalahi ʼi te uhu ʼaia, ʼo hake ai te vai tafe. Ke feala hanā fakalaka, neʼe tonu ke nā hihiki ʼi te ʼu foʼi maka. Neʼe ʼuluaki alu te tama, kaʼe neʼe heke ʼo to ai ki te vai tafe, pea neʼe mou tuʼa lua. Neʼe lotofakafetaʼi lahi te tama ʼi tona foimo tohoʼi e tana tamai ʼo ina haofaki ai ia ia ke ʼaua naʼa malemo. ʼE toe feia mo tatatou Tamai ʼae ʼe ʼi selo, ʼe ina puipui tatou mai te ʼu tuʼutamaki ʼi te malama agakovi ʼaeni pea mo tana pule, ia Satana. ʼE lelei ʼaupito te puipui ʼo tatou e Sehova!—Mat. 6:13; 1 Soa. 5:19.
16, 17. Neʼe tokoni pea mo puipui feafeaʼi e Sehova te kau Iselaele ʼi tanatou tauʼi ia te kau Amaleke?
16 ʼI te taʼu 1513 I.M.T.S., * neʼe ha te puipui ʼofa e Sehova tana hahaʼi. Neʼe kua ina haofaki te kau Iselaele mai tonatou maʼuli popula pea mo puipui natou ʼi tanatou fakalaka ʼi te Tai Kula. Hili tanatou haʼele ʼi te toafa ki te Moʼuga ʼo Sinai, neʼe tau leva te kau Iselaele ki Lefitimi.
17 ʼUhi ko tana mahino ki te lea fakapolofeta ʼo Senesi 3:15, neʼe faiga ia Satana ke ina ʼohofi te kau Iselaele, ʼae neʼe hage neʼe mole honatou puipuiʼaga. Neʼe ina fai te faʼahi ʼaia ʼaki tana fakaʼaogaʼi ia te kau Amaleke, ʼae neʼe ko te ʼu fili ʼo te hahaʼi ʼa te ʼAtua. (Num. 24:20) Neʼe puipui feafeaʼi e Sehova tana hahaʼi mai te ʼu fili ʼaia, ʼaki ia Sosue, mo Moisese, mo Alone, pea mo Ulu? Lolotoga te tauʼi e Sosue mo ʼana tagata ia te kau Amaleke, neʼe tutuʼu ovi age ia Moisese, mo Alone, pea mo Ulu ʼi te fuga sia. ʼI te temi ʼae neʼe hiki ai e Moisese ʼona nima, neʼe tokoni ai Sehova ki te kau Iselaele ke natou malolohi age ʼi ʼonatou fili. Pea ʼi te temi ʼae neʼe vaivai ai te ʼu nima ʼo Moisese, neʼe puke e Alone mo Ulu ʼona nima. Ki muli age, ʼaki te tokoni pea mo te puipui ʼa Sehova, “nee malo leva Sosue ia Amaleke mo tana hahai i te tau.” (Eke. 17:8-13) Hili ʼaia, pea neʼe laga ai e Moisese he ʼaletale ʼo ina fakahigoaʼi “ko Seova-Nisi,” ko tona fakaʼuhiga ʼi te Fakahepeleo ko Sehova “ko toku fuka [peʼe “ ʼAkau Fakaʼiloga”].”—Eke. 17:14, 15.
ʼE INA HAOFAKI TATOU MAI TE ʼU ʼOHOFI ʼA SATANA
18, 19. Ia ʼaho nei, ʼe puipui feafeaʼi e te ʼAtua ʼana kaugana?
18 ʼE puipui e Sehova ia natou ʼae ʼe ʼoʼofa pea mo fakalogo kia te ia. Ohage pe ko te kau Iselaele ʼi Lefitimi, ʼe tou toe falala ʼe haofaki tatou e te ʼAtua mai ʼotatou fili. Neʼe tautau puipui tatou e Sehova pea mo ina haofaki tatou mai te ʼu ʼohofi ʼa te Tiapolo. Ohage la, neʼe puipui tuʼa lahi e te ʼAtua ʼotatou tehina ʼae neʼe fakatagaʼi ʼuhi ko tanatou mole kau ki te malamanei. Neʼe hoko te faʼahi ʼaia ʼi Siamani pea mo ʼihi atu fenua ʼi te pule ʼa te kau Nasi, ʼi te ʼu taʼu 1930 pea mo te kamata ʼo te ʼu taʼu 1940. Ka tou lau pea mo metitasio ki te fakamatala ʼo te maʼuli ʼo ʼotatou tehina, ʼo toe feia mo te Annuaire ʼae ʼe fakamatala ai te puipui ʼa te ʼAtua lolotoga te ʼu fakataga ʼaia, ʼe malohi ai tatatou falala ʼae kia Sehova.—Pes. 91:2.
ʼE lava fakaʼaogaʼi e Sehova ʼotatou tehina mo tuagaʼane moʼo tokoni mai ke tou nonofo agatonu ʼi te ʼu temi faigataʼa (Vakaʼi te palakalafe 18-20)
19 ʼE toe puipui tatou e Sehova ʼaki tana foaki mai he ʼu fakamanatu ʼofa ʼaki tana kautahi pea mo te ʼu tohi. Kotou fakakaukauʼi age muʼa ia te puipui ʼo tatou ʼi te ʼu taʼu ʼaeni, ʼaki te ʼu fakamanatu ʼaia neʼe foaki mai. ʼE ʼaʼasili age ʼi te malamanei ia te ʼu aga heʼe ʼaoga, mo te inu kava fakavale pea mo te ʼu pakī ʼo he ʼu felaveʼi fakasino heʼe ʼaoga. Kaʼe neʼe foaki mai e Sehova he ʼu fakamanatu maʼuhiga pea mo he tokoni moʼo puipui ʼo tatou ke ʼaua naʼa tou fai he aga ʼe feala ke fua kovi ai ki ʼatatou felogoʼi mo ia. Ohage la, ʼi te ʼu taʼu ʼaeni kua hili atu, neʼe foaki e tatatou Tamai ʼae ʼe ʼi selo he ʼu tokoni ke tou tekeʼi te ʼu fakakaugā kovi ʼi te Neti. *—1 Ko. 15:33.
20. ʼE puipui pea mo takitaki feafeaʼi tatou ʼi te kokelekasio?
20 ʼE tou lava fakaha feafeaʼi ʼe tou fakalogo ki te ʼu tokoni ʼofa ʼaia pea mo fakaha ai ko tatou ko “he ʼu hahaʼi neʼe akoʼi e Sehova”? ʼAki tatatou mulimuli fakalelei ki ʼana fakatotonu. (Esa. 54:13, MN) ʼE puipui pea mo takitaki tatou ʼi te kokelekasio. ʼE foaki mai e te kau tagata ʼafeā he ʼu tokoni ʼaki te Tohi-Tapu. (Kal. 6:1) ʼE fakaʼaogaʼi e Sehova te ʼu “meʼa ʼofa [ʼaia] ko he ʼu tagata” ke natou tokakaga kia tatou, ʼaki te ʼofa. (Efe. 4:7, 8, MN) Koia, kotea ʼae ʼe tonu ke tou fai moka foaki mai e te kau tagata ʼafeā ia he tokoni? ʼE tonu ke tou lotolelei ʼo fakalogo. Kapau ʼe tou fai feia, pea ʼe tapuakiʼi anai tatou e Sehova.—Hep. 13:17.
21. (1) Kotea ʼae ʼe tonu ke tou lotomalohi ʼo fai? (2) Kotea ʼae ka tou vakaʼi anai ʼi te alatike ʼae ka hoa mai?
21 Koia, tou falala ki te takitaki ʼa te laumalie maʼoniʼoni pea mo tou tali te tokoni ʼa tatatou Tamai ʼae ʼe ʼi selo. ʼE toe ʼaoga ke tou metitasio ki te maʼuli ʼo Sesu pea mo tou faiga ʼo mulimuli ki tona faʼifaʼitaki lelei tukupau. Neʼe lahi tona fakapale koteʼuhi neʼe “fakalogo o kaku ki te mate.” (Filp. 2:5-11) ʼE toe tapuakina mo tatou mo kapau ʼe tou falala kia Sehova ʼaki totatou loto katoa. (Taag. 3:5, 6) Tou falala tuʼumaʼu kia Sehova, ia ia tokotahi ʼae ʼe lotofoaki pea mo ina puipui tatou. ʼE tou fiafia lahi ʼi tatatou tauhi ʼae kia te ia. Kaʼe ʼe lava liliu feafeaʼi ia Sehova ko hotatou Kaumeʼa lelei? ʼE tou tali anai ki te fehuʼi ʼaia ʼi te alatike ʼae ka hoa mai, pea ʼe toe malohi ai anai mo totatou ʼofa ʼae kia te ia.
^ pal. 16 Ko te ʼu mata ʼi tohi ʼaeni I.M.T.S. ko tona fakaʼuhiga: ʼI Muʼa ʼo te Temi ʼo Sesu.
^ pal. 19 Ohage la, ʼe feala ke kotou lau he ʼu fakatokaga neʼe fai mai ʼi Te Tule Leʼo ʼo te ʼaho 1 ʼo ʼAukusito 2012, ʼi te pasina 21, palakalafe 10-12 pea ʼi te pasina 23-32, te ʼu alatike ʼae ko tona kupu tafitō “Kotou Tokaga Ki Te ʼu Hele ʼa Te Tiapolo!” pea “Kotou Tuʼu Ke Maʼu Pea Mo Tekeʼi Te ʼu Hele ʼa Satana!”