1, 2. Mang boch ban’en nib thilthil u rogon nda ilalgad nge rogon ni kad nanged e tin riyul’?

 JEHOVAH e ir e ke sunumiy e tabinaw. (Efe. 3:14, 15) Yugu ra gad taab tabinaw, machane ba thilthil rarogodad. Sana boch i gadad e gallabthir rok e chuguliy nge ilal. Ma boch i gadad e yim’ e gallabthir rok u nap’an ni kab bitir ni bochan e m’ar, ara ke maad’ad ke yim’, ara yugu boch ban’en. Ma boch i gadad e de nang ko mini’ e gallabthir rok.

² Ku er rogodad e piin ni gad ma liyor ngak Jehovah nra bagadad ma rogon ni nang e tin riyul’. Sana ‘nni chuguliyem ko tin riyul’’ ma ke fil e gallabthir rom e pi kenggin e motochiyel nu Bible ngom. (Deut. 6:6, 7) Fa reb e sana gur bagayad e piin ni kan fil e tin riyul’ ngorad u daken fare maruwel ni machib ni ma tay e pi tapigpig rok Jehovah.​—Rom. 10:13-15; 1 Tim. 2:3, 4. 

3. Mang boch ban’en ni taareb rogodad riy?

³ Yugu aram rogon ni bay boch ban’en nib thilthil u rarogodad, machane ku bay boch ban’en ni taareb rogodad riy. Bochan de fol Adam rok Got ma ke af e denen nge yam’ ngodad. (Rom. 5:12) Yugu aram rogon ma rayog ni nga dogned ni Jehovah e ‘Chitamangidad’ ni bochan e gad ma pigpig ngak. I weliy Isaiah murung’agen e pi tapigpig rok Got kakrom ko Isaiah 64:8 ni gaar: “Gur Somol e chitamangimad.” Maku  reb e, u tabolngin fare meybil ni fil Jesus ngak pi gachalpen me yog ni gaar: “Chitamangimad ni ga bay u tharmiy: Ngan tay fan fithingam nib thothup.”​—Matt. 6:9.

4, 5. Mang e gad ra weliy ya nge yag ni gel feni t’uf Jehovah rodad ni ir e Chitamangidad?

⁴ Bochan ni gad ma pining fithingan e Chitamangidad ni bay u tharmiy u daken e michan’ rodad, ma aram fan ni ma ayuwegdad ma ma yororiydad. I sul fare psalmist u daken e thin rok Jehovah ni gaar: “Bay gu ayuweg e piin [riyul’ ni yad ma liyor ngog] ni gub t’uf rorad, mu gu yoror rok e piin ni yad manangeg.” (Ps. 91:14) Ere, ma yoror Jehovah rodad ni gadad e pi tapigpig rok ma ma ayuwegdad u pa’ e pi toogor rodad ya nge dabi buch ban’en rodad.

⁵ Chiney e ngad weliyed dalip ban’en nra gelnag feni t’uf e Chitamangidad nu tharmiy rodad, ni aram e: (1) ma Pi’ e Tin nib T’uf rodad, (2) ma Ma Yororiydad, (3) ma ir e bin th’abi fel’ e Fager rodad. Nap’an ni gad be weliy e pi n’ey mab fel’ ni ngad fal’eged i lemnag rogon e tha’ u thildad Got nge rogon nrayog ni ngad pininged e sorok ngak ni ir e Chitamangidad. Kub fel’ ni ngad lemnaged e pi tow’ath nra pi’ Jehovah ngak e piin ni yad ma gay rogon ni ngar chuchugurgad ngak.​—Jas. 4:8.

6. Mang reb e kanawo’ ni ma Pi’ Jehovah “urngin e tin nib fel’” e tow’ath ngodad riy?

⁶ I yog James nreb i gachalpen Jesus ni gaar: “Urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunumiy urngin ban’en ni be gal ramaen u lan e lang.” (Jas. 1:17) Yafas rodad e ba tow’ath nrib fel’ ni yib rok Jehovah. (Ps. 36:9) Faan gad ra fanay ni ngad rin’ed e tin nib m’agan’ Got ngay, ma boor e tow’ath nra yag ngodad e chiney ma ra yag e yafas ndariy n’umngin nap’an ngodad u lan e bin beech e m’ag. (Prov. 10:22; 2 Pet. 3:13) Machane, uw rogon ni nge yag e pi n’ey ngodad ni yugu aram rogon ni ke af wenegan e denen rok Adam ngodad?

7. Uw rogon ni ke rin’ Got boch ban’en ya nge yag ni fel’ e tha’ u thildad?

⁷ Riyul’ ni boor e kanawo’ ni ma Pi’ Jehovah e Tin nib T’uf rodad riy. Ke ayuwegdad ni bochan e be runguydad. Gad gubin nda kud flontgad ya ke af e denen rok Adam ngodad. (Rom. 3:23) Machane bochan ni gad ba t’uf rok Jehovah, ma aram fan ni ke rin’ boch ban’en ya nge yag ni fel’ e tha’ u thildad. I weliy apostal John murung’agen e re n’ey ni gaar: “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’og Fak nge yib, nu daken Fak e nge n’ag Got fan e denen rodad riy.”​—1 John 4:9, 10.

8, 9. Uw rogon ni ke micheg Jehovah ni ir e ma Pi’ e Tin nib T’uf ko pi tapigpig rok u nap’an Abraham nge Isak? (Mu guy e sasing ni bay u tabolngin e re article ney.)

⁸ Nap’an e bin 19 e chibog B.C.E., me buch ban’en rok Abraham ni be micheg nriyul’ nib t’uf e girdi’ rok Jehovah ni bochan e ke pi’ e athap ko yafas ndariy n’umngin nap’an ngak e piin ni yad ma fol rok. Be yog e Hebrews 11:17-19 ni gaar: “Michan’ rok Abraham ngak Got e ir e pow’iy Abraham nge pi’ Isak ni maligach ngak Got ko fa ngiyal’ nem ni faani skengnag Got gelngin e michan’ rok Abraham ngak. Yi Abraham e ir e cha’ ni yog Got ngak ni bayi pi’ bbitir ngak, machane i dugliy u wan’ ni nge pi’ fak ni kari maagirag rok ngak Got ni nge mang maligach. Ya ke mu’ i yog rok Got ngak ni gaar, ‘U daken Isak ni fakam e bayi yib owchem riy ni pire’.’ Me pagan’ Abraham ngay nrayog rok Got ni nge faseg Isak ko yam’, ere yan i aw ni susun e fos Isak ko yam’ nge sul ngak Abraham.” Ba tamilang ni taareb rogon e n’en ni ke rin’ Abraham ko n’en ni rin’ Jehovah. Ya ku er rogon Jehovah ni pi’ Jesus Kristus ni Fak ni nge biyuliy e girdi’ nu fayleng.​—Mu beeg e John 3:16, 36.

⁹ Dabisiy nrib gel e felfelan’ ni tay Isak u nap’an ni nang ndab kun pi’ nib maligach! Maku dabisiy ni ke pining e magar ngak Jehovah ni ke pi’ fare saf ni pumoon ni ngan pi’ ni maligach ni  immoy u fithik’ i papa’ngin boch ke gek’iy. (Gen. 22:10-13) Aram fan ni kan tunguy fithingan e re gin’em ni “Jehovah-jireh,” ni fan ko thin ni Hebrew e “Somol e Ma Pi’.”​—Gen. 22:14.

10, 11. Mini’ e piin ni yad be rin’ fare ‘maruwel ni ngan guy rogon e tin ni ka ba’ e girdi’ ngkur manged pi tafager’ rok Got, ma uw rogon ni kar rin’ed e re maruwel ney?

¹⁰ Gad ra fal’eg i lemnag rogon ni ma Pi’ Jehovah e Tin nib T’uf rodad ma gad ra nang ni faan gomanga de pi’ Jesus fare maligach rok ma dabiyog ni nge fel’ e tha’ u thildad Got bayay. I yoloy Paul ni gaar: “Kug nanged ni taareb e girdi’ e yim’ ni fan ngak urngin e girdi’, ni fan e re n’em e urngin e girdi’ ma kar uned ngak ko yam’. I yim’ ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.”​—2 Kor. 5:14, 15.

¹¹ Bochan nib t’uf Got ko pi Kristiano ko bin som’on e chibog mab ga’ fan u wan’rad e pigpig ni ur ted ngak, ma aram fan ni m’agan’rad ngay ni ngar rin’ed fare ‘maruwel ni ngar guyed rogon e tin ni ka ba’ e girdi’ ngkur manged pi tafager’ rok Got. Bochan ni kar uned ko fare maruwel ni machib ma aram fan ni ke yag ni nge aw e gapas u thilin Got nge girdi’, mi yad mang fager rok, me munmun mi yad mang pi fak u tharmiy. Ireray e n’en ni be rin’ e pi Kristiano ni kan dugliyrad e ngiyal’ ney. Yad e pi ta mol’og rok Got nge Kristus ni yad be ayuweg e girdi’ ni ngki fel’ e tha’ u thilrad Jehovah bayay mar manged boch e tapigpig rok.​—Mu beeg e 2 Korinth 5:18-20; John 6:44; Acts 13:48.

12, 13. Uw rogon ni ngad daged nriyul’ nib ga’ fan u wan’dad e pi n’en ni ma pi’ Jehovah ni nge ayuwegdad ko fare maruwel ni machib?

¹² Gubin e Kristiano ni yad be athapeg e par u fayleng e yad be un ngak e pi Kristiano ni kan dugliyrad yad be machibnag murung’agen Gil’ilungun Got ni bochan e ba ga’ fan Jehovah u wan’rad ni ir e ma Pi’ e Tin nib T’uf rodad. Gad ma fanay yugu reb e tow’ath ni ke pi’ Jehovah ngodad ni aram e Bible u nap’an ni gad be rin’ e re maruwel ney. (2 Tim. 3:16, 17) Gad ra fanay e thin rok Got nib fel’ rogon u nap’an e machib ma aram e gad be ayuweg e girdi’ ni nge yag e athap ko yafas ndariy n’umngin nap’an ngorad. Ku gad ma taga’ nga reb e tow’ath ni ke pi’ Jehovah ngodad ni aram gelngin nib thothup ni nge ayuwegdad ko re maruwel ney. (Zek. 4:6; Luke 11:13) Rayog ni ngad beeged murung’agen angin e re maruwel ney ni gad ma tay u lan e Yearbook ko Pi Mich Rok Jehovah. Ere ri gad ba tow’ath ni gad ma un i rin’ e re maruwel ney ya be pining e sorok ngak Jehovah ni ir e Chitamangidad ni ma Pi e Tin nib T’uf rodad!

¹³ Bochan e pi n’en ni ke pi’ Jehovah ni fan ngodad, mab fel’ ni ngad fithed gadad ni nge lungudad: ‘Gu be rin’ urngin e tin nrayog rog ni fan ko machib ya nge m’ug ni gu be pining e magar ngak Jehovah ko pi n’en ni be pi’ ni fan ngog, fa? Mang boch e kanawo’ nrayog ni nggu mon’og riy u rogon e machib ni gu ma tay?’ Rayog ni ngad daged nib ga’ fan u wan’dad e pi n’en ni ma pi’ Jehovah ni nge ayuwegdad ko re maruwel ney ni aram e ngad m’oneged Gil’ilungun Got u wan’dad nge tin nib m’agan’ ngay. Faan gad ra rin’ e re n’ey, ma ra pi’ Jehovah e tin nib t’uf rodad. (Matt. 6:25-33) Bochan ni gad ba t’uf rok Jehovah ma thingar da athamgilgad ni ngad rin’ed e tin nib m’agan’ ngay ma gad felfelan’nag.​—Prov. 27:11.

14. Uw rogon ni ke mang Jehovah e Taayuw rok e pi tapigpig rok?

¹⁴ I tang David ni gaar: “I gag e gub meewar ndabiyog ni gu ayuwegneg, machane gur Somol e ga be lemnigeg. I gur e ga ma ayuwegneg me gur e ga ma chuwegneg u fithik’ e gafgow.” (Ps. 40:17) Ke yoor yay ni ke Ayuweg Jehovah e pi tapigpig rok ni yad ba ulung nib ga’ nu nap’an ni ke togopuluw e pi toogor rorad ngorad ara u nap’an ni yad be guy rogon ni ngar gafgownaged yad. Ri gad be pining e magar ngak Got ni bochan e ma ayuwegdad ni ngad pared ni gad ba yul’yul’ ngak u nap’an ni ke yib e pi magawon ney ngodad!

15. Mu weliy rogon ni ma ayuweg reb e matam pi fak nib t’uf rok.

¹⁵ Reb e matam nrib t’uf pi fak rok e gathi kemus ni ma pi’ e tin nib t’uf rorad, ya ku ma ayuwegrad ndabi buch ban’en rorad. Faanra kar mada’naged e magawon ma ma gur ni nge ayuwegrad. Immoy reb e walag ni pumoon ni yib ngan e n’en ni buch rok u nap’an ni kab bitir. Immoy bayay ni yow be sul e chitamangin i yan nga tabinaw rorow u tomuren ni kar mu’gow ko machib ma ranow u bangi ban’en nib t’uf ni ngar th’abew e lul’ riy nga barba’. Ma re lul’ nem e ke sugubur ni bochan e ke aw e n’uw nib ga’ e rofen nem ni kakadbul. Ere ba t’uf ni ngar tim’oggow u daken reb e malang nga reb ya nge yag nra thapgow nga barba’ fare lul’. Ere m’on fare pagal rok e chitamangin, me tim’og nga daken reb fapi malang me sirgig nge mul nga lan fare lul’ me yan nga ar nge chugur ni nge limach. Ke pining e re pagal nem e magar ngak e chitamangin ni bochan e ka ngiyal’ nem me kol pa’ nge girngiy nga lang ya nge dabi limach! Ku er rogon e Chitamangidad ni bay u tharmiy ni ma ayuwegdad u fithik’ e pi magawon nib gel ni gad ma mada’nag u lan e re fayleng nib kireb ney, ma ma ayuwegdad rok Satan ni ir e be gagiyegnag e re fayleng ney. Ere ba tamilang ni Jehovah e ir e en ma Yororiydad nib fel’ rogon.​—Matt. 6:13; 1 John 5:19.

16, 17. Uw rogon ni ke ayuweg Jehovah piyu Israel me yoror rorad u nap’an ni kar chamgad ngak piyu Amalek?

¹⁶ Ke m’ug rogon ni ma yororiy Jehovah e pi tapigpig rok ko n’en ni rin’ ni fan ngak piyu Israel u nap’an ni ur moyed ni yad e sib u Egypt. Ke chuwegrad ko sib me fekrad nga wuru’ e nam nu Egypt me ayuwegrad ni ngar th’abed fare Red Sea nga barba’ u nap’an e duw ni 1513 B.C.E. Tomuren ni ke yan piyu Israel u daken e ted ni yad be sor i yan ko Burey nu Sinai, ma ranod nga bangi ban’en ni ka nog yu Refidim ngay.

¹⁷ Bochan ni manang Satan murung’agen fare yiiy ni bay ko Genesis 3:15, ma dabisiy ni i guy  rogon ni nge magawonnag piyu Israel ya gowa ba mom ni ngan gafgownagrad. I fanay piyu Amalek ni ngar chamgad ngak e pi tapigpig rok Got. (Num. 24:20) Am lemnag e n’en ni rin’ Jehovah u daken Joshua, nge Moses, nge Aron, nge Hur. Nap’an ni be cham Joshua ngak piyu Amalek ma bay Moses, nge Aron, nge Hur u daken e burey ni yad be guy e n’en ni yibe rin’. N’umngin nap’an ni par Moses ni ke k’iyag pa’ nga lang ma aram mi i gel piyu Israel ko pi toogor rorad. Nap’an nra magaf pa’ Moses me sak’iy Aron nge Hur nga tooben nge bagayow me kol baraba’ i pa’ nge pug nga lang. Ere, bochan e ayuw rok Jehovah ma aram me “gel Joshua ngak fapi Amalek.” (Ex. 17:8-13) I toy Moses ba altar u rom me tunguy fithingan ni “Jehovah-nissi” ni fan ko thin ni Hebrew e “Somol e Flak Rog.”​—Mu beeg e Exodus 17:14, 15.

18, 19. Uw rogon ni ma ayuweg Got e pi tapigpig rok e ngiyal’ ney?

¹⁸ Ma yororiy Jehovah e piin ni yad ma t’ufeg ma yad ma fol rok. Gad ma taga’ ngak Got ni nge ayuwegdad u pa’ e pi toogor rodad ni bod e n’en ni rin’ ngak piyu Israel u nap’an ni ur moyed u Refidim. Ke yoor yay ni ke ayuwegdad Jehovah ko cham ni ma tay Satan ngodad. Bod ni, ke yoor yay ni ke ayuweg Jehovah e pi walag ni kan togopuluw ngorad ni bochan e kar pared u mathilin ngongolen e am. Aram e n’en ni buch ko girdi’ u Chiyamen nge boch e nam ni ur moyed u tan pa’ e pi Nazi kakrom. Faan gad ra fal’eg i beeg murung’agen e n’en ni buch rok e pi walag e ngiyal’ nem ni bay u lan e pi Yearbook rodad ma ra ayuwegdad ni nge pagan’dad ngak Jehovah ni ir e Manaf rodad.​—Ps. 91:2.

¹⁹ Ma pi’ Jehovah e fonow nra ayuwegdad u daken e ulung rok nge pi babyor rodad. Am lemnag angin ni ke yib ngodad e ngiyal’ ney. Ngiyal’ ney e ba ga’ ni ma un e girdi’ ko ngongol ndarngal, nge chingaw, maku yad ma yaliy yaan e puwlag. Machane ke pi’ Jehovah e fonow ngodad nra ayuwegdad ni ngad pilo’gad ko pi ngongol ney nra kirebnag e tha’ u thildad. Bod ni ke pi e fonow ngodad u rogon ni nge dab ud chaggad ngak e girdi’ nib kireb e ngongol rorad u daken boch ban’en ko internet ni ka nog e social networking ngay ara yu yang ko internet nrayog ni ngaud nonad boch e girdi’ riy. *​—1 Kor. 15:33.

20. Uw rogon ni yima ayuwegdad ma yima pow’iydad u daken e ulung ni Kristiano?

²⁰ Uw rogon ni ngad daged nriyul’ ni be ‘machibnagdad’ Jehovah? Aram e ngaud folgad ko pi motochiyel rok. (Isa. 54:13) Rayog ni ngad pirieged e ayuw min pow’iydad u daken e ulung, ya aram e gin ni bay e piin piilal riy ni yad ma pi’ e fonow nib puluw ko thin nu Bible nra ayuwegdad. (Gal. 6:1) Ma fanay Jehovah e pi “pumoon ni tow’ath” ney ni ngar ayuweged gadad u fithik’ e t’ufeg. (Efe. 4:7, 8, NW) Ere, mang e susun ni ngad rin’ed u nap’an nra fonownagdad e piin piilal? Susun ni nge m’agan’dad ngay ni ngad folgad ko pi fonow ni kan pi’ ngodad, ya faan gad ra rin’ ni aram rogon ma ra tow’athnagdad Jehovah.​—Heb. 13:17.

21. (a) Mang e susun ni ngad dugliyed ni ngad rin’ed? (b) Mang e gad ra weliy ko bin migid e article?

²¹ Ere, ngad dugliyed u lanin’dad ni ngad paged gelngin Got nib thothup ni nge ayuwegdad ma gad fol u rogon ni be pow’iydad e Chitamangidad ni bay u tharmiy. Kub t’uf ni ngad fal’eged i lemnag e n’en ni i rin’ Jesus Kristus ma gad guy rogon ni ngad folwokgad rok. Ke par nib yul’yul’ nge mada’ ko ngiyal’ ni yim’ riy, ma aram fan ni tow’athnag Got. (Fil. 2:5-11) Faanra pagan’dad ngak Jehovah u polo’ i gum’ircha’dad ma rayog ni nge tow’athnagdad ni bod rogon e n’en ni rin’ ngak Jesus. (Prov. 3:5, 6) Ere manga yugu da sapgad ngak Jehovah ni ir e ma Pi’ e Tin nib T’uf rodad ma Ma Yororiydad! Ri gad ba tow’ath ni gad be pigpig ngak! Maku ra gel e t’ufeg rodad ngak u nap’an ni gad ra fal’eg i lemnag e bin dalip e kanawo’ ni ma ayuwegdad riy, ni aram e ir e bin th’abi fel’ e Fager rodad. Aram e n’en ni be weliy e bin migid e article.