Kestyon Lekter

Ki rezon bann Zwif dan premye syek ti annan pour “dan lespektasyon” Mesi?

▪ Dan letan Zan Batis, “lafoul ti dan lespektasyon e ti pe demann dan zot menm, si Zan pa limenm li Mesi.” (Lik 3:15) Akoz bann Zwif ti pe ekspekte Mesi pour ariv dan sa letan? I annan plizyer rezon.

Apre ki Zezi ti’n ne, lanz Zeova ti aparet avek bann berze ki ti pe vey mouton Betleenm. Sa lanz ti dir: “Ozordi en Sover in ne dan lavil David, li menm Kris, li menm li Senyer.” (Lik 2:8-11) Apre sa, “en gran kantite lanz ti zwenn ansanm avek sa enn. Zot ti glorifye Bondye, zot ti dir, * ‘Glwar-a-Dye dan lesyel, e lo later lape parmi son bann byenneme.’”​—Lik 2:13, 14.

Sirman sa lanons ti annan en gran lefe lo sa bann berze ki ti annan limilite. Deswit zot ti al Betleenm e kan zot ti vwar Zozef, Mari ek zot pti baba Zezi, ‘zot ti rakont sa ki bann lanz ti’n dir zot konsernan sa pti zanfan.’ An rezilta sa, “tou dimoun ki ti tann sa ki bann berze ti dir, ti etonnen.” (Lik 2:17, 18, nou ki’n met an italik.) Sa lekspresyon “tou dimoun ki ti tann sa” i vedir ki sa bann berze ti koz avek lezot apard ki Zozef ek Mari. Apre, anmezir bann berze ti retourn kot zot, zot ti kontinyen ‘glorifye Bondye; zot ti remersi li pour tou sa ki zot in tande e war, parey lanz ti’n dir zot.’ (Lik 2:20) Sertennman, sa bann berze pa ti pe gard bann bon keksoz ki zot ti’n tande lo Kris zis pour zot!

Kan Mari ti anmenn son garson premye ne Zerizalenm pour prezant li avek Zeova parey Lalwa Moiz ti demande, Ann sa madanm ki ti en profet “ti rann glwar Bondye, e koz lo sa zanfan avek tou bann ki ti pe esper delivrans Zerizalenm.” (Lik 2:36-38, nou ki’n met an italik; Egz. 13:12) Alor, sa nouvel konsernan larive Mesi ti kontinyen fannen.

Pli tar, “bann savan sorti dan les ti ariv Zerizalenm. Zot ti demande, ‘Oli sa lerwa pep Zwif ki fek ne? Nou’n war son zetwal leve dan les, e nou’n vin [rann li loner].’” (Mat. 2:1, 2) “Lerwa Erod ek tou dimoun dan Zerizalenm ti trakase kan zot ti tann sa. I ti apel tou son bann sef pret ek bann profeser Lalwa e demann zot, ‘Kote Mesi pou ne?’” (Mat. 2:3, 4, nou ki’n met an italik.)  Alor bokou dimoun ti’n remarke ki: Sa Mesi ki ti’n ganny predir ti’n vini! *

Dan Lik 3:15, ki ti ganny site anler i endike ki petet serten Zwif ti krwar ki Zan Batis ti Kris. Me, Zan ti fer vwar ki sa pa ti leka kan i ti dir: “Sa enn ki pe vin apre mwan i pli for ki mwan, e mon pa diny pour delarg son sandal, li i pou batiz zot dan Sent-Espri ek dife.” (Mat. 3:11) Parol ki Zan ti dir avek limilite ti pou’n san dout fer zot pli dan ekspektasyon Mesi.

Eski i posib ki bann Zwif dan premye syek ti’n kalkil larive Mesi dapre sa profesi 70 semenn ki ganny trouve dan Danyel 9:24-27? Sa i kapab le ka, me i pa posib pour nou konfirmen. Anfet, i ti annan bokou diferan lenterpretasyon konsernan sa 70 semenn dan letan Zezi e napa ni enn ki ti pros avek nou konprenezon ozordi. *

Bann Esenyen (Essenes an Angle), ki ganny rekonnet konman en sekt Zwif ki ti izol zot avek lasosyete ti ansennyen ki de Mesi ti pou vini ver lafen 490 lannen. Me nou pa kapab asire ki bann Esenyen ti baz zot kalkilasyon lo profesi Danyel. Menm si zot ti’n fer sa, i difisil pour mazinen ki mannyer bann Zwif an zeneral ti pou’n ganny enfliyanse avek kronolozi en group ki ti pe viv a lekar avek lezot.

Dan dezyenm syek N.L., serten Zwif ti krwar ki sa 70 semenn ti pandan sa peryod depi destriksyon premye tanp 607 A.N.L. ziska destriksyon dezyenm tanp an 70 N.L., tandis ki lezot ti krwar ki lakonplisman sa profesi ti annan en lyen avek letan bann Makabe (Maccabean an Angle) dan dezyenm syek A.N.L. Alor, i ti napa okenn lagreman lo ki mannyer sa 70 semenn ti bezwen ganny konte.

Si bann zapot ek lezot Kretyen dan premye ti’n byen kalkil sa 70 semenn, i ti pou fer sans ki zot ti pou servi sa konman en laprev ki sa Mesi ki ti’n ganny promet ti ariv zis a tan e ki i ti li menm Zezi Kri. Par kont, napa okenn levidans ki zot ti fer sa.

I annan en lot keksoz ki nou bezwen pran kont. Bann ki’n ekrir Levanzil in souvan montre ki serten profesi ki ganny trouve dan Lekritir Ebre ti ganny akonpli par Zezi Kri. (Mat. 1:22, 23; 2:13-15; 4:13-16) Pourtan ni enn parmi zot pa’n relye larive Zezi lo later avek sa profesi 70 semenn.

An bref: Nou pa kapab konfirmen ki dimoun dan letan Zezi ti byen konpran sa profesi 70 semenn. Par kont, levanzil i donn bann rezon ki fer sans lo akoz bann dimoun ti pou “dan lespektasyon” Mesi.

[Not anba lo paz]