Mu izuua ia Nzuá dia Batizu, ‘o kifuxi kioso ki kala mu ku kingila. Ene oso ia banza ku mixima iâ, kuila Nzuá muene Kristu.’ (Luka 3:15) Mukonda diahi o Jijudé akexile mu kingila Mexiia mu kithangana kieniókio? Ima iavulu ia bhangesa ku kingila.

Kioso kia vuala Jezú, o anju ia Jihova ia monekena o abhidi akexile mu langa o jimbudi jâ mu mukau ua zukamene mu Beleme. O anju iambe: “Lelu, mu sanzala ia Davidi, a mi vualela-mu Kibhamuenhu, muène Kristu, muène Ngana.” (Luka 2:8-11) Kioso o anju ki ia zubha o kuzuela, anga ku tukuluka “kifuxi kia akua diulu a di bandeka ni mukunji, anga a kala mu kuimba mimbu ia kutondela Nzambi exi: * Fuma i kale ia Nzambi mu diulu! O mu ngongo uembu mu’axaxe k’athu oso a mu uabhela!”—Luka 2:13, 14.

Sé phata, o ngolokela íii ia tula ku mixima ia abhidi enhó a lendukile. Ni lusolo, ene ai mu Beleme, kioso kia sange Zuze ni Madiia ni Jezú bhu maku, “a kuata kuambela athu o njimbu ioso ievu ene ku ji-anju, ia tokala o kamon’oko.” Mu kiki, ‘oso a k’ivu anga a diuana ima ia a tangela o abhidi.’ (Luka 2:17, 18) O izuelu “oso a k’ivu,” ilombolola kuila, o abhidi ka tangela ngó Zuze ni Madiia, maji a tangela ué athu a mukuá. Kioso kia vutuka ku bhata, a kolokota “kutonda ni kuximana Nzambi mu ima ioso ievu, ia mono. Kuma ia bhiti muene kala kioso kia a tangelele na-iu kuala o anjo.” (Luka 2:20) Sé phata, o abhidi enhó ka suekele o ima iambote ievuidile, ia lungile ni Kristu!

Kioso Madiia kia bheka o mon’ê ua phande kumbi mu Jeluzaleme, phala ku muidikisa kua Jihova, kala kia tumine o Kitumu kia Mozé, o polofeta Ana “u kuata kutonda Nzambi, anga u tanga o kamona ku athu oso a kexile mù kinga o kubhanduluka kua Jeluzaleme.” (Luka 2:36-38; Mak. 13:12) Kiki kilondekesa kuila, o njimbu ia lungu ni Mexiia iai ni ku di muanga.

Mu ku bhita kithangana, o “jinganga ku Thunda jiza mu Jeluzaleme, exi: A mu vuala, Sobha ia Jijudé, iu kuebhi? Mukonda théthembua iê tua i mono ku Thunda, etu tueza ku mu sambela.” (Mat. 2:1, 2) “Helode-phe, kiévu kiki, u tangalala, kia mu bhonzo ni Jeluzaleme ioso kiá. O kia zubha  kubhongolola jinganga joso ja makota ni jimesene ja kitumu, ua ebhudisa o Kristu mba u tokala ku mu vuala kuebhi.” (Mat. 2:3, 4) Mu kiki, athu avulu evu o njimbu íii: O Mexiia ua bhixile! *

Kála ki tua mono ku dima, o divulu dia Luka 3:15, dia londekesa kuila saí Jijudé ja banzele kuila Nzuá dia Batizu, muéne uexile Kristu. Maji Nzuá, ua a kuatekesa ku lungulula o ibanzelu iâ kioso kia zuela: “Uoso-phe ua ngi kaiela ku dima ua ngi tundu, eme ki nga tokala ngó ku mu ambatela o jihaii jê. Muène ua kà mi batizala ni Nzumbi Ikôla ni túbhia.” (Mat. 3:11) Sé phata, o izuelu ia Nzuá, ia a suínisa ku kingila Mexiia.

O kuila o Jijudé ku hama ia dianga eji sola o kizuua kieji bhixila Mexiia ni kikuatekesu kia kikanenu kia 70 a jisemana, kio soneke mu divulu dia Daniiele 9:24-27? Ki tu tena kuamba kuila, ene a bhange kiki, maji nange a ki bhange muene. Mu kidi, mu izuua ia Jezú, kuexile ibanzelu iavulu ia lungile ni 70 a jisemana, maji se-ku kibanzelu kia sokela ni i tuejiia lelu ia lungu ni maka enhá. *

O kibuka kia Jijudé a kixana Essênios, a longo kuila, kueji moneka Mexiia jiiadi ku di sukilu dia 490 a mivu, maji ki tu tena kuamba kuila o kibuka kia Essênios kia solo o kizuua kiki ni kikuatekesu kia ikanenu mu divulu dia Daniiele. Né muene se ene a bhangele kiki, ki bhonza ku xikina kuila o Jijudé a kaiele o milongi ia kibuka kiki kia di tunguile.

Saí Jijudé ku hama ia kaiiadi K.K., a banzele kuila o 70 a jisemana, ja mateka ku muvu ua 607 A.K.K., kioso kia buika o tembulu ia dianga, katé ku muvu ua 70 K.K., kioso kia buika o tembulu ia kaiiadi. A mukuá a banzele kuila o kikanenu kiki kia di kumbidila mu thembu ia akua Makabeu, ku hama ia kaiiadi A.K.K. Ki kuexile kibanzelu kilondekesa kiambote kiebhi kieji tanga o 70 a ji semana.

Se a ki tendele kiambote, o kithangana kia 70 a jisemana, ku hama ia dianga K.K., tueji banza kuila o jipoxolo ni Jikidistá ja mukuá ku hama ia dianga, a zuela kuma, Mexiia, ua bhixila kioso kia moneka Jezú Kristu. Maji se-ku kima kilondekesa kuila o Jikidistá ja dianga a bhangele kienhiki.

Saí kima dingi ki tua tokala kuijiia. Mu veji javulu o asoneki a madivulu a Matesu, Marku, Luka ni Nzuá, a tumbula kuila saí ikanenu mu Mikanda ia Jihebeleu ia dikumbidila kua Kristu. (Mat. 1:22, 23; 2:13-15; 4:13-16) Maji se-ku muthu mudiâ uambe kuila o kuíza kua Jezú mu ixi kua lungile ni kikanenu kia 70 a jisemana.

Mu ku suka-ku: Ki tu tena kuzuela kuila o athu mu izuua ia Jezú, a tendele kiambote o kikanenu kia 70 a jisemana. Maji, o Madivulu a uana a zuela ué ima ia mukuá ia bhangesele o athu ku ‘kingila’ Mexiia.