Na ini a ten fu Yohanes a Dopuman „a pipel ben fruwakti a Krestes èn den alamala ben prakseri fu Yohanes: ’A kan taki en na Krestes?’” (Luk. 3:15) Fu san ede den Dyu ben e fruwakti taki a Mesias ben o kon na a ten fu den? Meki wi luku fu san ede.

Baka di Yesus gebore, wan engel fu Yehovah kon na wan tu skapuman di ben e luku den skapu fu den na ini den gron krosibei fu Betlehem. Na engel taki: „Tide wan Frulusuman gebore gi unu na ini a foto fu David. En na Krestes, a Masra” (Luk. 2:8-11). Baka dati „wan heri ipi engel fu hemel ben de nanga na engel disi èn den ben e prèise Gado. Den taki: * ’Gi glori na Gado na ini hemel èn meki sani waka bun na grontapu gi sma di Gado feni bun.’”—Luk. 2:13, 14.

Di den skapuman yere a nyunsu disi, dan a no de fu taki dati a naki den ati srefisrefi. Wantewante den go na Betlehem. Di den feni Yosef, Maria nanga a pikin Yesus „den fruteri den san na engel taigi den fu a yongu pikin disi. Ala sma di yere disi, ben fruwondru fu den sani di den skapuman fruteri den” (Luk. 2:17, 18). Den wortu „ala sma di yere disi” e sori taki den skapuman no fruteri a nyunsu na Yosef nanga Maria wawan, ma den fruteri tra sma tu. Di den skapuman ben e drai go na oso baka den tan „gi Gado glori èn den prèise en gi ala den sani di den yere èn si, soleki fa den engel fruteri den” (Luk. 2:20). Wi kan de seiker taki den skapuman dati fruteri tra sma den bun sani di den ben yere fu a Krestes!

Soleki fa a wèt fu Moses ben taki, dan wan sma ben musu tyari wan ofrandi gi Yehovah te a ben kisi en fosi pikin. Di Maria go na Yerusalem fu tyari wan ofrandi gi en fosi manpikin, dan na umaprofeiti Ana „bigin taki Gado tangi. Ala sma di ben fruwakti a frulusu fu Yerusalem, a ben e fruteri fu a pikin” (Luk. 2:36-38; Eks. 13:12). Na so a nyunsu fu a Mesias ben e panya go na ala sei.

Bakaten „lukuman kon na Yerusalem. Den ben de fu Owstusei èn den ben e ondrosuku den stari fu sabi san o pasa. Den taki: ’Pe a sma de di gebore fu tron kownu fu den Dyu? Bika wi si en stari di wi ben de na Owstusei èn wi kon fu gi en grani’” (Mat. 2:1, 2). „Di Kownu Herodes yere disi, a bruya srefisrefi èn heri Yerusalem bruya tu. Ne a kari ala den edeman fu den priester kon nanga ala den leriman  di e leri a pipel a Wèt èn a aksi den pe a Krestes ben o gebore” (Mat. 2:3, 4). Sobun, bun furu sma ben kon sabi taki a sma di ben o tron a Mesias, ben gebore kaba! *

Soleki fa wi si na ini Lukas 3:15, dan son Dyu ben denki taki Yohanes a Dopuman ben de a Krestes. Ma Yohanes sori den krin taki a san dati no tru. A taki: „Baka mi wan sma o kon di bigi moro mi èn mi no warti srefi fu puru en susu na en futu. A sma dati o dopu unu nanga santa yeye èn nanga faya” (Mat. 3:11). A musu de so taki a sani disi di Yohanes taki, meki taki sma bigin angri moro fu sabi suma na a Mesias.

Son sma e denki taki den Dyu fu a fosi yarihondro ben fruwakti a Mesias, fu di den ben teri den 70 wiki fu a profeititori di skrifi na ini Danièl 9:24-27. A kan taki den ben du disi, ma buweisi no de fu dati. Ma san wi sabi, na taki den sma fu a ten fu Yesus ben abi ala sortu denki fu den 70 wiki èn nowan fu den e kruderi nanga a fasi fa wi e frustan a profeititori disi now. *

Soleki fa a sori, dan wan grupu fu Dyu moniki ben de na a ten dati di den ben kari Eseinasma. Den sma disi ben e bribi taki tu Mesias ben o kon na a kaba fu wan pisi ten fu 490 yari. Ma wi no sabi seiker efu den ben e bribi disi fu di den ben teri den 70 wiki fu a profeititori fu Danièl. Awinsi dati ben de so, toku a no sori leki den Dyu ben o bribi wan sani fu a grupu disi di no ben e bumui nanga tra sma.

Na ini a di fu tu yarihondro Baka Krestes, son Dyu ben e bribi taki den 70 wiki ben de a pisi ten fu a yari 607 Fosi Krestes di a fosi tempel ben kisi pori, te go miti a yari 70 Baka Krestes di a di fu tu tempel kisi pori. Trawan ben e bribi taki a profeititori ben o kon tru na ini a di fu tu yarihondro Fosi Krestes, na a pisi ten fu den Makabeisma. Sobun, sma ben e teri den 70 wiki fu a profeititori na difrenti fasi.

Ma kon meki wi taki dati den sma fu a fosi yarihondro ben e sabi fa fu teri den 70 wiki fu a profeititori bun. Efu disi ben de so, dan den apostel nanga den tra Kresten fu a fosi yarihondro ben o gebroiki a profeititori disi fu buweisi sma taki Yesus Krestes ben de a pramisi Mesias di kon na a yoisti ten. Ma nowan sani e sori taki den fosi Kresten ben du disi.

Wan tra sani de di wi musu hori na prakseri tu. Nofo tron te wan profeititori fu Yesus Krestes ben kon tru, dan den Evangelie skrifiman ben e taki fu en (Mat. 1:22, 23; 2:13-15; 4:13-16). Ma nowan fu den e sori taki a profeititori fu den 70 wiki ben abi fu du nanga a ten di Yesus ben o kon na grontapu.

Sobun, wi no kan taki krin dati den sma na ini a ten fu Yesus ben frustan a profeititori fu den 70 wiki krin. Ma den Evangelietori e sori krin fu san ede den sma „ben fruwakti” taki a Mesias ben o kon.