Iha João Batista nia tempu, “povu hein namanas” ba Kristu, no sira “hanoin iha sira-nia laran katak João mak Kristu karik”. (Lucas 3:15) Tanbasá mak ema judeu sira hein Mesias atu mosu iha tempu neʼebá? Mai ita haree razaun balu.

Depois Jesus moris mai, Maromak Jeová nia anju ida mosu ba bibi-atan sira neʼebé hein hela sira-nia bibi iha rai-luan iha Belein. (1) Anju neʼe hatete: “Ohin iha David nia sidade, foin moris ba imi Maksoin ida, katak Kristu Naʼi.” (Lucas 2:8-11) Depois neʼe, “anju lubun boot ida halibur hamutuk ho anju neʼe hodi hahiʼi Maromak dehan: a ‘Glória ba Maromak iha leten aas bá, dame iha raiklaran ba ema sira neʼebé nia hadomi!’” (Haree nota-rodapé.)—Lucas 2:13, 14.

Anju nia mensajen neʼe kona duni bibi-atan sira-neʼe nia laran. Nuneʼe, sira bá kedas iha Belein, no kuandu sira hetan José no Maria no bebé Jesus, “sira haktuir buat neʼebé anju sira hateten kona-ba kiʼik oan neʼe”. Rezultadu mak saida? “Ema hotu neʼebé rona bibi-atan sira hakfodak ho sira-nia liafuan.” (Lucas 2:17, 18) Liafuan “ema hotu neʼebé rona” hatudu katak bibi-atan sira-neʼe konta buat neʼebé anju fó-hatene ba sira laʼós deʼit ba José no Maria, maibé mós ba ema seluk. No kuandu bibi-atan sira-neʼe fila fali daudaun ba uma, sira kontinua “hahiʼi hawelok Maromak tan buat hotu neʼebé sira haree no rona, nuʼudar anju sira fó-hatene nanis”. (Lucas 2:20) Sin, bibi-atan sira-neʼe habelar duni buat diʼak neʼebé sira rona kona-ba Kristu!

Liutiha loron balu, Maria lori ninia oan primeiru ba Jeruzalein hodi tuir Moisés nia Ukun-Fuan. Kuandu profeta ida naran Ana haree bebé neʼe, nia “fó-agradese ba Naʼi no koʼalia kona-ba labarik neʼe ba sira hotu neʼebé hein maksoin Jeruzalein nian”. (2) (Lucas 2:36-38; Êxodo [Keluaran] 13:12) Ho ida-neʼe, liafuan diʼak katak Mesias mosu ona kontinua atu habelar.

Tuirmai, “ema matenek balun husi lorosaʼe toʼo ba Jeruzalein. Sira husu: ‘Judeu sira-nia liurai neʼebé foin moris iha loos neʼebé? Ami haree tiha nia fitun iha lorosaʼe no ami mai tuku tuur hanaʼi nia.’” (Mateus 2:1, 2) Rona tiha kona-ba neʼe “Liurai Herodes hamutuk ho sidade tomak laran-taridu tebetebes. Nia halibur amlulik boot  sira no eskriba sira povu nian hodi husu ba sira Kristu sei moris loos iha neʼebé.” (3) (Mateus 2:3, 4) Sin, ema barak hetan avizu katak Mesias neʼebé promete nanis mai ona! b

Liafuan iha Lucas 3:15 neʼebé temi iha leten, hatudu katak ema judeu balu hanoin João Batista mak Kristu. Maibé, João hadiʼa sira-nia hanoin sala neʼe hodi hatete: “Ida neʼebé mai tuir haʼu, makaʼas liu haʼu; haʼu la soʼi atu lori nia sandálias. Nia sei sarani imi ho espíritu santu no ahi.” (Mateus 3:11) João nia liafuan neʼe halo ema barak hein namanas liután ba Mesias.

Ema judeu sira hatene ona ka lae, bainhira mak Mesias sei mai hodi sura tuir profesia kona-ba semana 70 iha Daniel 9:24-27? Maski sira karik koko atu halo nuneʼe, maibé Bíblia la fó-hatene. Iha tempu neʼebá, ema komprende iha dalan oioin profesia kona-ba semana 70, no sira-nia hanoin la hanesan duni ho dalan neʼebé ita komprende profesia neʼe ohin loron. c

Ema judeu sira neʼebé tuir grupu relijiaun nian ida naran Essene, hanorin katak Mesias naʼin-rua sei mosu iha parte ikus durante tinan 490 nia laran, maibé ita la bele hatene ho loloos se sira sura ida-neʼe tuir Daniel nia profesia ka lae. Maski sira halo nuneʼe, maibé karik ema judeu barak liu la hatene sira-nia ideia neʼe, tanba grupu relijiaun neʼe halaʼo sira-nia moris iha rai-fuik hodi haketak an husi ema seluk.

Depois apóstolu sira-nia tempu mós ema judeu balu fiar katak semana 70 sura husi tinan 607 molok Kristu kuandu ema sobu templu ba dala primeiru toʼo tinan 70 liutiha Kristu kuandu ema sobu templu ba dala segundu. Maibé ema seluk fali dehan katak profesia neʼe sai loos maizumenus iha tinan 170 molok Kristu. Entaun, iha tempu neʼebá ema iha hanoin oioin kona-ba oinsá atu sura semana 70 iha Daniel nia profesia.

Se apóstolu sira no ema kristaun iha tempu uluk hatene ona oinsá atu sura ho loloos profesia kona-ba semana 70, karik sira sei koʼalia kona-ba neʼe atu hatudu katak Jesus Kristu mak Mesias neʼebé mosu iha tempu neʼebé loos tuir profesia. Maibé, la iha buat ida neʼebé hatudu katak ema kristaun sira iha tempu uluk koʼalia kona-ba neʼe.

No mós, sira neʼebé hakerek Evanjellu dala barak temi kona-ba profesia sira husi Eskritura Lia-Ebraiku neʼebé sai loos iha Jesus Kristu. (Mateus 1:22, 23; 2:13-15; 4:13-16) Maibé, sira nunka koʼalia kona-ba tempu neʼebé Mesias mosu mai hodi liga ho profesia kona-ba semana 70.

Entaun, ita la hatene se ema iha Jesus nia tempu komprende ho loloos profesia kona-ba semana 70 ka lae. Maibé, Evanjellu sira fó razaun seluk neʼebé hatudu tansá mak ema iha tempu neʼebá “hein namanas” ba Mesias.