Ebẹbẹ e rẹ sai kpomahọ omai yoyoma. E rẹ sae rehọ iroro mai, mi omai ẹgba, je ru nọ ma gbẹ rọ were eva ha. Ebẹbẹ buobu i te Devidi ovie Izrẹl oke anwae na. Eme o ru kpahe ebẹbẹ nana? Devidi ọ jọ olezi riẹ jọ ta nọ: “Me bo se ỌNOWO, avọ uru mẹ rọ lẹ olẹ ayare kẹ ỌNOWO, mẹ rehọ onọ orọ omẹ eva kpobi bru ỌNOWO, mẹ ta uye kpobi nọ orọ omẹ oma kẹ e. Okenọ ẹzi mẹ ọ lọhọ, whẹ ọvo ọ riẹ edhere mẹ.” Ẹhẹ, Devidi ọ rọ omaurokpotọ lẹ se Ọghẹnẹ kẹ obufihọ.—Ol. 142:1-3.

Evaọ olezi ọfa jọ, Devidi ọ ta nọ: “Oware ovo mẹ jọ obọ ỌNOWO guọlọ, onọ mẹ rẹ te nọ e na; re mẹ jọ uwou ỌNOWO bẹdẹ nọ me re whuẹ, re me riwi eru ỌNOWO, re me he kpohọ uwou egagọ-ode riẹ.” (Ol. 27:4) Devidi ọ jọ ohwo Livai ha, rekọ ọ jẹ hai dikihẹ etegu ọgwa uwou-udhu na, kẹle oria nọ o jọ ehri egagọ uzẹme. Eva e jẹ hae were Devidi nọ o te dikihẹ oria nana te epanọ ọ rọ gwọlọ nọ ọ rẹ jọ etẹe evaọ edẹ uzuazọ riẹ kpobi, re ọ hai ‘riwi erru ỌNOWO na.’

Ẹme nọ a fa “erru” na u kiekpahe epanọ oware u re “kiehọ ohwo oma.” Ọruẹrẹfihotọ egagọ Ọghẹnẹ ọ jẹ hae were Devidi oke kpobi. Ma sae nọ omamai nọ: ‘Epanọ o jọ kẹ Devidi na, kọ ere o rrọ kẹ omẹ re?’

Evaọ oke mai na, orọnikọ etẹmpol jọ nọ a rẹ rọ ẹro ruẹ Ọghẹnẹ ọ ta nọ ma rẹ jọ gọe re ọ tẹ jẹ egagọ mai rehọ họ. Ukpoye kọ etẹmpol nọ a rẹ ruẹ hẹ, koyehọ eruẹrẹfihotọ kpobi nọ Ọghẹnẹ o ru nọ ma sae rọ gọe evaọ edhere nọ ọ rẹ jẹrehọ. * Ma tẹ be hai wo evawere kpahe eruẹrẹfihotọ nana, mai omamai ma rẹ sai ‘riwi erru ỌNOWO na’ re.

Roro kpahe agbada-idhe nọ a rehọ ẹroo ru nọ o jọ unuẹthẹ uwou-udhu na. (Ọny. 38:1, 2; 40:6) Agbada-idhe yena o dikihẹ kẹ unevaze nọ Jihova ọ rọ jẹ idhe nọ Jesu ọ rehọ uzuazọ riẹ dhe rehọ. (Hib. 10:5-10) Dai roro kpahe otofa nọ oyena u wo kẹ omai. Pọl ukọ na o kere nọ: “Okenọ ma [jọ] ewegrẹ a rọ fiki uwhu ọmọ riẹ kuomaigbe Ọghẹnẹ.” (Rom 5:10) Ma te wo ẹrọwọ fihọ Jesu nọ ọ rehọ uzuazọ riẹ dhe idhe, ma rẹ sai wo ọjẹrehọ Ọghẹnẹ. Onana u ve ti ru omai reawere usu okpekpe ‘kugbe Ọghẹnẹ.’—Ol. 25:14.

Ma re ti wo “aruodhidhivio [no] obọ Ọnowo na ze” keme a “voro izieraha” mai no. (Iruẹru 3:19) A sae rọ omai dhesẹ ohwo nọ a mu fihọ uwou-odi nọ a bruoziẹ uwhu kpe, rekinọ o be da gaga nọ o ruthọ. Nọ obruoziẹ nọ o wo ohrọ na ọ ruẹ nọ ohwo nana o kurẹriẹ no, ọ tẹ rọ vrẹe, a gbe kpei hi. Ababọ avro, ohwo na o re duola avọ oghọghọ. Wọhọ obruoziẹ yena, Jihova ọ rẹ reohrọ ọrahauzi nọ o kurẹriẹ jẹ rọ uwhu vrẹ riẹ.

Ẹsejọhọ eware jọ nọ Devidi o je muẹrohọ okenọ o dikihẹ uwou-udhu egagọ Jihova họ, ibe emọ Izrẹl riẹ nọ e jẹ hai kokohọ uwou-egagọ na, izi Ọghẹnẹ nọ a jẹ hai se do via je ruvẹ, insẹnse nọ a jẹ hae mahe, gbe eware efa nọ izerẹ gbe ahwo Livai a jẹ hai ru. (Ọny. 30:34-38; Ik. 3:5-8; Izie. 31:9-12) A  bi ru ọkpọ eware itienana evaọ egagọ uzẹme nẹnẹ re.

“Ẹvẹ uwoma je fo te re inievo i wo ọriakugbe ọvo!” (Ol. 133:1) Onana o jọ oware evawere gaga evaọ oke nọ u kpemu, yọ epọvo na o rrọ nẹnẹ re. “Imoni” hayo inievo akpọ-soso mai a bi dhe ebuebu. (1 Pita 2:17) A be hai se je ru Ebaibol na vẹ evaọ etoke iwuhrẹ mai. Jihova ọ be rọ ẹkwoma ukoko riẹ wuhrẹ omai eware sa-sa. Ọrigbo nọ o wo ẹrọwọ na o bi kere ebe sa-sa nọ ma sai ro ru iwuhrẹ omobọ mai gbe iwuhrẹ uviuwou. Omọvo Ugboma Esuo na jọ ọ ta nọ: “Ẹme Ọghẹnẹ nọ mẹ be hai se je roro didi kpahe ẹsikpobi, gbe ekiakiẹ nọ mẹ be hai ru kpahe ae, u bi ru iwuhrẹ Ọghẹnẹ kẹ omẹ evevọwẹ gbe evawere kẹdẹ kẹdẹ.” Avro ọ riẹ hẹ, ‘eriariẹ Ọghẹnẹ e te were omai oma.’—Itẹ 2:10.

Nẹnẹ, idibo Jihova a be lẹ sei kẹdẹ kẹdẹ. Elẹ itieye na i bi gbo ore awere sei. (Ol. 141:2) O be kẹ omai evawere gaga nọ ma rọ riẹ nọ o rẹ were Jihova Ọghẹnẹ gaga nọ ma tẹ be lẹ sei avọ omaurokpotọ.

Mosis ọ lẹ nọ: ‘Jọ aruoriwo Ọnowo ỌGHẸNẸ mai o bru omai ze, ru re iruo abọ mai i wo ovao kẹ omai.’ (Ol. 90:17) Nọ ma be rọ ọwhọ ruabọhọ iruo usiuwoma ota na, Jihova ọ be ghale iruo na. (Itẹ 10:22) O sae jọnọ ma fi obọ họ kẹ ahwo jọ kurẹriẹ ziọ ukoko na no. O sae jẹ jọnọ ma dadamu iruo nana anwọ ikpe buobu no ghelọ omukpahọ, ẹyao, hayo edada sa-sa. (1 Tẹs. 2:2) O make rrọ ere na, kọ ma gbe bi ‘rri erru ỌNOWO na’ jẹ ruẹ nọ oma nọ ma be dawo evaọ egagọ riẹ o be were iẹe?

Devidi ọ so nọ: “ỌNOWO họ ẹkẹ nọ mẹ hae gbe egho mẹ; whẹ ọ rọ omẹ ẹyọrọ. Eva oria omawere, etẹe ẹkẹ na o je te omẹ obọ.” (Ol. 16:5, 6) Devidi o yere Ọghẹnẹ rọkẹ “ẹkẹ” riẹ, koyehọ emamọ usu nọ o wo kugbe Jihova gbe uvẹ-ọghọ nọ ọ be rọ gọe. Wọhọ Devidi, ma sae nyaku ebẹbẹ sa-sa, rekọ u wo eware buobu nọ ma be reawere rai evaọ egagọ Ọghẹnẹ. Fikiere, joma hai wo evawere kpahe egagọ uzẹme n’oke t’oke jẹ hai “kpohọ uwou egagọ-ode riẹ,” koyehọ obọ nọ ma re wo ẹsikpobi evaọ eruẹrẹfihotọ nọ Jihova o ru nọ ma sae rọ gọe evaọ edhere nọ ọ rẹ jẹrehọ.