Wi kin rili fil am we bad tin dɛn kin mit wi. Na dɛn nɔmɔ wi go de tink bɔt, dɛn go mek wi nɔ ebul fɔ du ɛnitin, ɛn dɛn go mek wi nɔ ɛnjɔy wi layf. Di bad bad tin dɛn we bin de apin na Kiŋ Devid in layf, bin ambɔg am bad wan. Wetin i bin du we dɛn tin ya de mit am? Na dis Devid bin se: “A beg PAPA GƆD fɔ ɛp mi. A ala ɛn beg PAPA GƆD fɔ av masi. A opin mi at to am; ɛn tɛl am wetin de mɔna mi. Wɛn a giv ɔp, na yu nɔmɔ no wetin a fɔ du. Dɛn dɔn sɛt trap fɔ mi na di rod we a de pas.” Devid bin put insɛf dɔŋ ɛn pre to Gɔd fɔ ɛp am.—Sam 142:1-3.

Insay wan ɔda Sam, Devid se: “Na wan tin nɔmɔ mi at de pan, ɛn nain a de beg PAPA GƆD fɔ; dat na sote a day, mek a go de wok nain os, so dat a go ɛnjɔy in gudnɛs ɛn a go du wetin i want.” (Sam 27:4) Devid nɔto bin Livayt, bɔt jɔs tink bɔt am we i tinap nia di tɛmpul usay dɛn bin de wɔship Jiova. Devid bin so gladi dat i want fɔ spɛn ɔl in layf na Gɔd in os so dat i go “ɛnjɔy [Jiova] in gudnɛs.”

Devid bin lɛk fɔ de go na Gɔd in os fɔ de wɔship am. I bin de wet fɔ di tɛm we i go go de fɔ du dat. I fayn mek wi aks wisɛf, ‘Na da sem we de misɛf de fil?’

Tide, Jiova nɔ gɛt wan bildin usay i want mek wi go fɔ wɔship am. Bɔt i gɛt we aw i want mek wi wɔship am. * If wi gladi fɔ ‘du wetin Gɔd want,’ wisɛf go “ɛnjɔy [Jiova] in gudnɛs.”

Tink bɔt di ɔlta we bin de bifo di tabanakul usay dɛn bin de bɔn sakrifays. (Ɛks. 38:1, 2; 40:6) Da ɔlta de min di day we Gɔd bin gri mek Jizɔs kam day fɔ wi sin. (Ibru 10:5-10) Jɔs tink bɔt aw dat go bɛnifit wi! Di apɔsul Pɔl se: “Wi na pipul we nɔ bin lɛk Gɔd, bɔt Gɔd briŋ wi kam bak to insɛf bay di day we in Pikin day.” (Rom 5:10) We wi sho se wi gɛt fet pan Jizɔs in day, wi go mek Gɔd gladi fɔ wi, ɛn wi go bi in padi.—Sam 25:14.

Bikɔs “Gɔd go padin” wi sin, dat go mek ‘in spirit wok insay wi at fɔ mek wi tinap tranga wan.’ (Akt 3:19, 20) Di we aw wi de, tan lɛk pɔsin we dɛn put na jel, ɛn dɛn dɔn sɛntɛns am fɔ day. Bɔt i dɔn fil bad fɔ di tin we i dɔn du, ɛn i dɔn chenj. We wan gud jɔj si di we aw dis man dɔn chenj, i fri am frɔm di sɛntɛns we dɛn put pan am. Aw yu tink se di man we bin de na jel go fil? I go rili gladi! Na Jiova na di jɔj. I kin gladi fɔ pipul dɛn we kin fil bad fɔ di bad tin we dɛn dɔn du, so i de fri dɛn frɔm di day sɛntɛns we dɛn gɛt.

Sɔm pan di tin dɛn we Devid bin gladi fɔ we i de wɔship Jiova, na we in ɛn in kɔmpin Izrɛlayt dɛn bin de gɛda na Gɔd in os, we dɛn de rid di Lɔ ɛn ɛksplen am, we dɛn de bɔn insɛns, ɛn we di prist ɛn di Livayt dɛn bin de du dɛn wok na Gɔd in os. (Ɛks. 30:34-38;  Nɔm. 3:5-8; Dit. 31:9-12) Tin dɛn de tide we wi de du we tan lɛk wetin di Izrɛlayt dɛn bin de du we dɛn de wɔship Gɔd.

Tide, “i fayn ɛn i swit wɛn PAPA GƆD in pipul gɛda wit wan at fɔ wɔship am.” Na da sem we de i bin de bi trade. (Sam 133:1) Ɛn naw, wi “kɔmpin Kristiɛn dɛn” dɔn bɔku ɔlsay na di wɔl. (1 Pit. 2:17) Wi kin rid ɛn ɛksplen Gɔd in Wɔd na wi mitin dɛn. Jiova de yuz in ɔganayzeshɔn fɔ sho in pipul dɛn wetin dɛn fɔ du. Wi gɛt bak plɛnti tin dɛn we wi kin yuz fɔ stɔdi. Wan pan di brɔda dɛn na di Gɔvnin Bɔdi bin se: “We a kin tink gud wan bɔt Jiova in Wɔd, tray fɔ no wetin i min, ɛn stɔdi am gud gud wan fɔ gɛt sɛns ɛn ɔndastand plɛnti tin, dɔn mek a no bɔku tin bɔt Jiova ɛn gɛt satisfay maynd.” Fɔ tru, we wi ‘sabi sɔntin go mek wi gladi.’—Prɔv. 2:10.

Tide, Jiova in savant dɛn kin pre to am ɛvride. Dɛn prea ya tan lɛk insɛns to Jiova. (Sam 141:2) Wi rili gladi fɔ no se Jiova Gɔd kin lɛk we wi de pre to am frɔm wi at!

Mozis bin pre se: “Lɛ wi Masta we na PAPA GƆD we wi de wɔship blɛs wi; lɛ di wok wi de du kɔmɔt fayn; yɛs, lɛ i kɔmɔt fayn fɔ wi.” (Sam 90:17) We wi de du di prichin wok wit zil, Jiova go blɛs di prich we wi de prich. (Prɔv. 10:22) I go bi se wi dɔn ɛp sɔm pipul dɛn fɔ lan di trut. Sɔntɛm wi dɔn de prich fɔ lɔng tɛm pan ɔl we pipul dɛn nɔ kin lisin to wi, ɔ wi nɔ wɛl, ɔ wi gɛt prɔblɛm we de mɔna wi, ɔ pipul dɛn dɔn mek wi sɔfa. (1 Tɛs. 2:2) Bɔt pan ɔl dat, wi nɔ dɔn si Jiova “in gudnɛs” ɛn no se wi Papa na ɛvin rili lɛk ɔl wetin wi de du fɔ am?

Devid bin se: “PAPA GƆD, yu dɔn gi mi wetin a want ɛn mi layf de na yu an . . . A gladi fɔ wetin yu gi mi.” (Sam 16:5, 6) Devid bin gladi fɔ wetin Jiova ‘gi am.’ Wetin Jiova bin gi am? I bin mek Devid ebul bi in padi ɛn sav am. Wisɛf go gɛt sɔntin we de mɔna wi, bɔt stil Jiova de blɛs wi, jɔs lɛk Devid. So lɛ wi ɔl kɔntinyu fɔ gladi fɔ wɔship Jiova di rayt we ɛn gladi fɔ ‘du wetin i want.’