Nsombelu mikole idi mua kutukebela tunyinganyinga tukole. Idi mua kunyanga lungenyi luetu, kukepesha bukole buetu ne kunyanga mushindu utudi tuangata muoyo. Davidi mukalenge wa mu Isalele wa kale uvua ne kanyinganyinga kakole bua ntatu ya bungi ivuaye mupete. Mmunyi muvuaye muyitantamene? Wakandamuna mu Musambu kampanda udi ulenga ku muoyo ne: ‘Ndi ndila ne dîyi dianyi kudi Yehowa, ndi ntendekena Yehowa ne dîyi dianyi. Ndi mpumuna mêyi a kuabakana kuanyi kumpala kuende, ndi mmulondela ntatu yanyi kumpala kuende. Papanga nyuma wanyi munda muanyi, wewe udi mumanye njila wanyi.’ Eyowa, Davidi wakalomba ne budipuekeshi diambuluisha kudi Nzambi.​—Mus. 142:1-3.

Davidi wakamba mu Musambu mukuabu ne: ‘Ngakulomba Yehowa bualu bumuepele, mbuobu bundi nkebakeba: bua meme kushikama mu nzubu wa Yehowa matuku onso a muoyo wanyi, bua kumona buimpe bua Yehowa, ne bua kuelangana meji a malu a mu ntempelo wende.’ (Mus. 27:4) Davidi kavua muena Lewi to, kadi fuanyikijabi umumona muimane pambelu pa lupangu lua tshijila pabuipi ne muaba wa ntendelelu mulelela. Muoyo wa Davidi mmuwule tente ne dianyisha ne mmusue kusomba matuku ende onso a muoyo muaba au bua “kumona buimpe bua Yehowa.”

Muaku “buimpe” badi bawusangisha ne ngikadilu wa kuikala “muanyishibue anyi ne disanka mu meji, mu lungenyi anyi mu bieledi bia meji.” Davidi uvua misangu yonso welangana meji bua malu avua Nzambi mulongolole bua kumutendelela. Tudi mua kudiebeja ne: ‘Ntuku ndiumvua bu Davidi anyi?’

Matuku etu aa, malu adi Yehowa mulongolole bua tuetu kusemena pabuipi nende ki mmimanyine pa bintu bia ku mubidi to. Kadi adi atangila ntempelo munene wa mu nyuma wa Nzambi, mmumue ne: malu a tshijila malongolola bua ntendelelu mulelela. * Tuetu ‘tuelangana meji’ bua malu aa, tudi petu mua “kumona buimpe bua Yehowa.”

Tuakule bua tshioshelu tshia tshiamu tshia mitaku tshivuabu buoshela milambu tshivua ku tshibuelelu tshia ntempelo. (Ekes. 38:1, 2; 40:6) Tshioshelu etshi tshivua tshimfuanyi tshia mudi Yehowa muitabe muoyo wa Yezu bu mulambu. (Eb. 10:5-10) Ela meji bua tshidi bualu ebu butuenzela. Mupostolo Paulo wakafunda ne: “Patutshivua bena lukuna ba Nzambi tuakalengejangana nende ku diambuluisha dia lufu lua Muanende.” (Lomo 5:10) Patudi tuleja ditabuja mu mashi a Yezu akedibua panshi, tudi mua kuanyishibua kudi Nzambi ne kupeta dieyemena didi difumina ku dikala balunda bende. Nunku, tudi tudia ‘bulunda bujalame ne Yehowa.’​—Mus. 25:14.

Bu mudibu ‘batujimijila mibi yetu,’ tudi tupeta “bikondo bia dikoleshibua bifume kumpala kua Yehowa.” (Bien. 3:19) Nsombelu wetu mmufuanangane ne wa muena buloko udi unyingalala bua malu mabi avuaye muenze ne udi ushintulula nsombelu wende padiye muindile bua kumushipabu. Padi mulumbuluishi muimpe umona bualu ebu, bidi bimusaka bua kumujimijila bubi buende ne kumumbushila tshibawu tshia lufu. Kakuyi mpata, muena buloko eu neadiumvue musulakane ne neikale ne disanka. Anu bu mulumbuluishi eu, Yehowa udi wanyisha bantu badi banyingalala ne udi ubumbushila tshibawu tshia lufu.

Munkatshi mua malu a ntendelelu mulelela avua Davidi umona ku nzubu wa Yehowa muvua disangisha  dia bisumbu bia bena Isalele nende, dibala mikenji ya Mose patoke ne diyumvuija, diosha musenga wa manananshi ne dienza dia mudimu wa tshijila kudi bakuidi ne bena Lewi. (Ekes. 30:34-38; Nom. 3:5-8; Dut. 31:9-12) Malu a mushinga avua enzeka mu ntendelelu mulelela mu Isalele aa adi apetangana ne adi enzeka lelu.

Anu bu ku kale, lelu ‘bidi bitambe buimpe ne bia disanka bua bukua bantu badikunguije pamue ne mutshima umue.’ (Mus. 133:1) Kudi didiunda dinene didi dienzeka mu “tshisumbu tshijima tshia bana betu” pa buloba bujima. (1 Pet. 2:17) Badi babala Dîyi dia Nzambi patoke mu bisangilu bietu ne badiumvuija. Yehowa mmutuenzele programe muimpe bua kutulongesha ku diambuluisha dia bulongolodi buende. Tudi kabidi ne biakudia bia mu nyuma bia bungi bidi mu mikanda itudi tuenza nayi mudimu mu didilongela dietu anyi mu ntendelelu wa mu dîku. Muanetu mukuabu wa mu Kasumbu kaludiki wakamba ne: “Kuelangana meji mu Dîyi dia Yehowa, kukeba kumanya tshididi diumvuija ne kukeba meji ne dijingulula dia mianda nkumpeteshe bubanji ne disanka bia mu nyuma.” Bushuwa, ‘dimanya didi mua kusankisha muoyo webe.’​—Nsu. 2:10, NW.

Lelu, Yehowa udi uteleja masambila a batendeledi bende dituku dionso. Masambila aa adi kudiye bu mupuya muimpe wa musenga wa manananshi. (Mus. 141:2) Bidi bituenza disanka mu muoyo wetu patudi tumanya ne: Yehowa Nzambi udi usanka bua bualu buetu patudi tumulomba mu disambila ne budipuekeshi.

Mose wakasambila wamba ne: ‘Dianyisha dia Mukalenge Nzambi wetu dikale kutudi, utujadikile mudimu wa bianza bietu.’ (Mus. 90:17) Patudi tukumbaja mudimu wetu ne tshisumi, Yehowa udi uwubenesha. (Nsu. 10:22) Tudi mua kuikala bambuluishe bamue bantu bua kumanya bulelela. Pamuapa tudi mua kuikala bayishe bidimu bia bungi mu bikondo bidi bantu babenga kututeleja, bia disama, bia tunyinganyinga peshi bia dikengeshibua. (1 Tes. 2:2) Nansha nanku, katuenaku bamone “buimpe bua Yehowa” ne bamone ne: Tatu wetu wa mu diulu udi usanka bua mutudi tudienzeja anyi?

Davidi wakamba ne: ‘Yehowa udi luanyi luseke lua bumpianyi buanyi ne lua lupanza luanyi; wewe mene udi unjadikila luseke luanyi lua bumpianyi. Mionji ya luidi yakupona mu miaba mimpe bua bualu buanyi.’ (Mus. 16:5, 6) Davidi uvua ne dianyisha bua “tshitupa” tshiende, mmumue ne: kuikala mu malanda mimpe ne Yehowa ne kuikala ne diakalenga dia kumuenzela mudimu. Anu bu Davidi, tudi mua kupeta ntatu, kadi tudi ne malu mimpe a bungi a kudi Nzambi. Nunku, tutungunukayi ne kuikala ne disanka mu ntendelelu mulelela ne tuikalayi misangu yonso ‘tuelangana meji’ bua ntempelo wa mu nyuma wa Yehowa.