“Tala Ouwa wa Jeova”

Ovitateka vipondola okutukalesa omapita unene. Vipondola okunyona omalusoke etu, nokutusoyesa, nokunyona onkhalelo tutala omuenyo wetu. Ohamba David yo Isilayeli yokohale wakalele novitateka ovinyingi. Oñgeni evitetululile? Mo salmu imwe David wakumbulula okuti: “Nondaka yange nahimbika okuliyavela okuita ombatelo ku Jeova. Nondaka yange naita opo Jeova ankhuateseko. Ame ankho ndyiuyulila kwe esukalalo liange. Ankho ndyimupopila ononkhumbi mbange, etyi ononkhono mbange mbapuamo mokati kange. Iya ove oyungu nawa ondyila yange.” Tyotyili, David welikuambelele ku Huku nomutima weliola okuita opo emukuateseko.—Sal. 142:1-3.

Mo salmu onkhuavo, David waimba okuti: “Naita otyipuka tyike ku Jeova, otyo mandyiovola: Okukala mondyuo ya Jeova ononthiki ambuho mbomuenyo wange. Opo ndyitale ouwa wa Jeova, nokutala nolupandu ondyuo yae.” (Sal. 27:4) David ankho hamu Levita ko, mahi, pahe soka David watalama kondye yotyitali tyikola ponthele pokati-nakati kekaka liefendelo liotyotyili. David ankho wahambukwa unene, iya ankho uhanda okukalamo ononthiki ambuho mbomuenyo wae opo “atale ouwa wa Jeova.”

Ondaka “ouwa” ipondola okulekesa ‘omunthu una omutima nomalusoke omawa.’ David ankho apeho utala nolupandu onkhalelo Huku aonganeka ovipuka pala efendelo. Otyiwa tulipule okuti: ‘Okuti naame ndyilitehelela nga David?’

“TALA NOLUPANDU” ONKHALELO HUKU AONGANEKA OVIPUKA

Hono, onkhalelo Jeova aonganeka ovipuka opo tufuene kwe kaimoneka komaiho. Mahi, yakutikinya ondyuo onene yopaspilitu ya Huku, eonganeko likola liefendelo liotyotyili. * Inkha “tutala nolupandu” onkhalelo ondyuo oyo onene yaonganekwa, nonthue “matumono ouwa wa Jeova.”

Soka komutala wovilikutila walingua notyivela otyinkhuhu ankho ukala pombundi yekaka liefendelo. (Êxo. 38:1, 2; 40:6) Omutala oo ankho ulekesa okuti Huku wafuapo pala okutavela omuenyo wa Jesus ngotyilikutila. (Heb. 10:5-10) Soka oityi otyo tyilekesa kuonthue! Apostolu Paulu wahoneka okuti: “Etyi ankho tunondyale tuapakwa vali kumwe na Huku mokonda yononkhia mbo Mona wae.” (Rom. 5:10) Inkha tukala nekolelo mohonde ya Jesus, matukala omapanga a Huku, iya otyo matyituetela ouwa, nonthumbi. Mokulinga ngotyo, tukala “noupanga omuwa na Jeova.”—Sal. 25:14.

Mokonda ‘ononkhali mbetu mbanyimuapo,’ pahe ‘Jeova wetuavela ononthiki mbomapole.’ (Atos 3:19) Onkhalelo yetu yelifwa no yonkhuatwa yelivela mokonda yovipuka yalingile kohale, aipilulula onkhalelo yomuenyo wayo putyina ikevelela okuipawa. Etyi omukoyesi una okankhenda etyimona, apilulula ovipapelo vionkhuatwa oyo, anyimipo ehitiso liononkhia ankho ikevelela. Tyotyili, onkhuatwa oyo ihambukwa unene, iya ilitehelela okuti pahe yapepukilwa! Ngomukoyesi oo, Jeova una okankhenda novanthu velivela, iya unyimapo ehitiso liononkhia.

HAMBUKILWA EFENDELO LIOTYOTYILI

Ovipuka vimwe viefendelo liotyotyili David ankho apondola okumona mondyuo ya Jeova, ova Isilayeli vakuavo veliongiya, nokutangela ovanthu aveho Ovitumino nokuvihangununa,  nokuyoka oisesu, novilinga ovanakwa nova Levita ankho valingila Huku. (Êxo. 30:34-38; Núm. 3:5-8; Deu. 31:9-12) Ovipuka ovio viefendelo liotyotyili mo Isilayeli yo kohale vielifwa novio hono.

Ngo kohale, hono “otyiwa unene ngatyi iya tyihambukiswa tyina ovakuatate vakala kumwe aveho netokeko!” (Sal. 133:1) ‘Ovakuatate mouye auho,’ vekahi nokuliyawisa monkhalelo imwe ihuvisa. (1 Ped. 2:17) Momaliongiyo etu, Ondaka ya Huku ikahi nokutangelwa nokuhangununinwa ovanthu aveho. Pokati keongano liae, Jeova ukahi nokuava onondonga ononyingi pala ouwa wetu. Tupu tuna omikanda ominyingi tupondola okuundapesa melilongeso lietu liombunga ine o lioulike. Umwe Pononkhalamutwe mbo Nombangi mba Jeova wati: “Okusokolola Kondaka ya Jeova, netyi ihangununa, nokuovola okuinoñgonoka vali nawa, tyinkhuatesako unene nokunthyambukiswa.” Tyotyili, ‘enoñgonoko lipondola okutuhambukiswa.’—Pro. 2:10.

Hono, ononthiki ambuho Jeova wiiva omalikuambelo ovaumbili vae valinga nomutima auho. Ku Jeova, omalikuambelo oo ekahi ngomuniko omuwa wo isesu. (Sal. 141:2) Tyotyili, tyituhambukiswa unene okuimbuka okuti Jeova Huku uhambukwa tyina tuhika kwe nomalikuambelo atunda komutima!

Moisesi welikuambelele okuti: “Okankhenda ka Jeova Huku yetu kakale nonthue, iya ovilinga viomaoko etu vieende nawa.” (Sal. 90:17) Tyina tuundapa nombili movilinga viokuivisa, Jeova uyamba ovilinga vietu. (Pro. 10:22) Hamwe tuakuatesako vamwe okulilongesa otyili. Tupu, hamwe tuakoleleya omanima omanyingi movilinga viokuivisa namphila ovanthu vehetavela, ine hamwe tuvela, nokumoneswa ononkhumbi. (1 Tes. 2:2) Mahi, okuti katunemone “ouwa wa Jeova” nokuimbuka okuti Tate yetu keulu upanda unene ononkhono tulinga?

David waimbile okuti: “Jeova epingo liange, nokopo yange. Ove uyunga nawa epingo liange. Wamphakela onomphangu onongwa.” (Sal. 16:5, 6) David wapandulile “epingo” liae, tyilekesa okuti ankho una oupanga omuwa na Jeova nelao liokumuumbila. Nga David, nonthue hamwe tumona ononkhumbi, mahi Jeova utuyamba unene! Tutualeiko okuhambukilwa efendelo liotyotyili ‘nokutala apeho nolupandu’ ondyuo yopaspilitu ya Jeova.

[Onondaka Poutoi]

[O pondo ia tokala pefo 29]

Mokueenda kuomivo viepuiya, David ankho ulikuambela nomutima auho ku Jeova opo emukuateseko