Sinchi sasachakuykunapi tarikuspan mayninqa yuyayninchis chayllapiña kanman, kallpanchis pisiyapunman, manataqmi imatapas allinpaqchu qhawarisunman. Rey Davidpas chhaynapin tarikurqan sinchi sasachakuykunapi kashaspa. Ichaqa, ¿imaynatan pay chaykunata atiparqan? Pay kikinmi chaymanta willakun, nirqanmi: “Kunkayoqtan Señor Diosmanta waqyakuni, kunkayoqtan Señor Diosmanta khuyapayakuyninta mañakuni. Paymanmi llakipakuyniyta rimarini, paymanmi llaki-phutiyniyta willakuni. Sinchi llakiq ñit’isqan kashaqtiymi qanqa imayna purinayta yachanki”, nispa (Sal. 142:1-3). Arí, Davidqa huch’uyyaykukuq sonqowanmi Diospa yanapayninta mañakurqan.

Huk salmo qelqasqanpin nillarqantaq: “Kayllatan Señor Diosmanta mañakurqani, kayllatan munani: tukuy kawsasqay p’unchaykunapi Señor Diospa wasinpi kayta, sumaq-kayninta qhawanaypaq, yupaychana wasinpi kusisqallaña qhawanaypaq”, nispa (Sal. 27:4). Davidqa manan Leví ayllumantachu karqan, chaymi hawallamanta qhawashanman karqan chay yupaychana karpaq pationta. Chaywanpas Diospaq ancha agradecido kasqanraykun, tukuy kawsasqan tiempo Diospa ‘sumaq-kayninta qhawayta’ munarqan.

Salmo 27:4 textopi ‘sumaq-kaynin’ nisqa simin hebreo rimaypi tupan sienteq, reparaq, sumaq kaywan. Kamachinkuna yupaychananpaq Diospa tukuy imaymana qosqanpin Davidqa sapa kutilla yuyaymanaq. Ñoqanchisri, ¿David hinachu Diospa tukuy imaymana ruwasqanpi yuyaymananchis?

Kay tiempopiqa manañan huk wasitachu necesitanchis Diosman asuykunapaq. Kunanqa espiritual wasipin Diosta yupaychashanchis, chayqa payta yupaychanapaq tukuy imaymana qowasqanchismi. * Sichus chaykunata ‘kusisqallaña qhawasun’ chayqa, David hinan Jehová Diospa ‘sumaq-kayninta qhawasun’.

Yupaychana karpaq ñawpaqenpi sacrificiota ruphachinapaq altar imapaq kasqanpi yuyaymanasun (Éx. 38:1, 2; 40:6). Chay altarmi rikch’akurqan Jesuspa sacrificio ruwasqanta Jehová Dios allinpaq qhawarisqanwan (Heb. 10:5-10). ¿Imaynatan chay sacrificio haywakusqan yanapawanchis? Pablon qelqarqan: ‘Diospa awqan kashaqtinchismi payqa Churinpa wañusqanwan sumaqta chaskiykapuwarqanchis’, nispa (Rom. 5:10). Sichus Jesuspa yawar hich’arisqanpi iñisun chayqa, Diospa allin qhawarisqanmi kasun astawantaq paypi confiasun. Chay hinapin paypa amigon kapusun (Sal. 25:14).

Huchanchiskuna pampachasqa kasqanraykun ‘Señor Diosqa sumaq kawsaypi samarichiwanchis’ (Hech. 3:19). Ñawpaqqa carcelpi wañunanpaq huchachasqa runa hinan kasharqanchis. Ichaqa carcelpi runaqa tukuy atisqantan kallpachakun kawsayninta cambiananpaq. Juezqa chayta rikuspan khuyapayan, hinaspa millaykuna ruwasqanta papelmanta pichapuspa pampachan wañuypaq huchachasqa kasqanta. ¡Maytachá chaywanqa carcelpi kaq runaqa kusikun, chayraqchá sonqonpas “thak” nin! Chay khuyapayakuq juez hinan Jehová Diospas pesapakuq runaq huchanta pichapun, wañuypaq huchachasqa kasqantapas pampachan.

Davidqa ancha chaninpaqmi qhawarirqan Diosta yupaychanapaq tukuy imaymana ruwakusqanta. Wakinmi karqan: Diosta yupaychanapaq llaqtantin huñukusqanku, Diospa Kamachikuy Siminta leekusqan yachachikusqanpas, incienso ruphachisqanku,  Leví runakuna sacerdotekunapas yupaychana wasipi llank’asqanku ima (Éx. 30:34-38; Núm. 3:5-8; Deut. 31:9-12). Kunanpas chayman rikch’akuqtan Diospa llaqtanpi ruwakun.

Davidmi Diospa llaqtanmanta nirqan: “¡Mayna allinmi, ancha sumaqmi wawqe-panakunaq huk-nisqalla kawsayninkuqa!”, nispa, chay nisqanmi kunanpas hunt’akushan (Sal. 133:1). Hallp’antinpin Diospa llaqtanpi ‘iñiq-masinchiskuna’ astawan yapakushan (1 Ped. 2:17). Huñunakuykunapin Diospa Siminta leekun yachachikun ima. Hinaspapas Diosmi ancha allin espiritual mikhunata qowashanchis. Chaymantapas familianchiswan otaq sapallanchispi estudianapaqmi askha qelqakunata qowanchis. Umalliq T’aqamanta huk iñiqmasin nirqan: “Jehová Diospa Simin Qelqapi yuyaymanasqay, allin yachayta allin reparayta maskhasqaymi anchata yanapawan iñiyniypi allin kanaypaq kusisqa kanaypaqpas”, nispa. Arí, yachayta tariyqa anchatapunin yanapawasunman (Prov. 2:10).

Ñawpa tiempopi hinan kunanpas Jehová Diosta serviqkuna sapa p’unchay paymanta mañakunku. Chay mañakusqankutan Diosqa inciensoq sumaq q’apayninta hina chaskin (Sal. 141:2). ¡Maytan sonqonchispi kusikunchis huch’uyyaykukuywan mañakusqanchista Diospa uyarisqanta yachaspa!

Moisesmi Diosmanta mañakurqan: “Señor Diosniyku, sumaqta qhawarimuwayku. ¡Llank’asqaykuta allinta sayachiy! ¡Arí, llank’asqaykuta allinta takyachiy!”, nispa (Sal. 90:17). Jehová Diosqa tukuy sonqowan predicasqanchista qhawarispan chay llank’ayninchispi yanapawanchis (Prov. 10:22). Yaqapaschá pitapas yanaparqanchis Diosta reqsinanpaq, mana uyarikuy munaq runakuna ukhupi, mana qhali kaspa, llakikuykunapi tarikuspa otaq qatiykachasqaña kashaspapas unayña predicashanchis (1 Tes. 2:2). Chhaynapiña tarikushanchis chaypas, Diospa ‘sumaq-kaynintan qhawashanchis’, rikushanchistaqmi hanaq pacha Taytanchis kallpachakushasqanchista allinpaq qhawarisqanta.

Davidmi nirqan: “Waqaychawaqniymi kanki, qanllan kay kawsaypiqa ima hayk’aypas [otaq herenciay] kanki”, nispa (Sal. 142:5). Davidqa Diostan agradecekurqan herenciayoq kasqanmanta, chay herencia chaskisqanqa karqan Dioswan allinpi kasqanmi, paypa kamachin kasqanpiwan. Yaqapaschá David hina ima sasachakuypipas tarikusunman, ichaqa David hinan Diosmanta imaymanata chaskirqanchis. Chayrayku kusikushallasun Diosta yupaychaspa, ancha chaninpaqtaq qhawarisun espiritual yupaychana wasinpi kasqanchismanta.