E maata te au turanga tumatetenga te ka akatupu i te au tu kino ki runga ia tatou. Ka akapou te reira i to tatou manako, to tatou maroiroi e ka akatuke i to tatou manakonakoanga no te oraanga. E maata ua atu te au turanga ngata tei tupu ki te Ariki ko Davida. Akapeea ra aia i te akono anga i te reira? Na roto i tetai taramo manea, karanga a Davida e: “E kapiki au ma toku reo ia Iehova; ma toku reo i te pati anga atu kia Iehova. E riringi ua atu au i toku manako ki mua i tona aroaro; e akakite au kiaia i toku tumatetenga. I te tumatetenga roa o toku vaerua i roto iaku nei, te kite ra koe i toku aerenga i reira.” Ae, kua pure a Davida ma te tu akaaka kia tauturu mai te Atua iaia.​—Sala. 142:1-3.

I roto i tetai taramo ke mai, kua imene a Davida e: “Okotai aku mea anoano ia Iehova ra, ko taku ï e umuumu ua nei; kia noo rai i roto i te are o Iehova e ope roa ake oku puke rā i te ora anga nei, kia akara au i te meitaki o Iehova, e kia ui marie au ki roto i tona nao.” (Sala. 27:4) Kare a Davida i te ngati Levi, e akamanako ua ana ra iaia e tu ra i vao i te paepae tapu vaitata atu ki te ngai tikai o te akamorianga mou. Kua ki ua te ngakau o Davida i te akameitaki, e kua inangaro aia i te akapou i te toenga o tona oraanga ki reira i te “akara i te meitaki o Iehova.”

E pirianga to te kupu “meitaki,” ki te turanga “tau me kore te tu mareka ua o te manako, te ngakau, e te kopapa.” E akaperepere ua ana a Davida i ta Iehova akanoonooanga no te akamorianga. Penei ka tau kia ui tatou kia tatou uaorai e, ‘Te aite ra ainei toku aerenga manako mei to Davida?’

I to tatou nei tuatau, kare ta Iehova akanoonooanga i akatumuia ki runga i tetai apinga tei maaniia e te tangata. Mari ra ki runga i te nao pae vaerua​—te akanoonooanga tapu no te akamorianga mou. * Me “ui marie” mai tatou ki teia akanoonooanga, ka rauka katoa ia tatou “kia akara i te meitaki o Iehova.”

Akamanako ana i te atarau veo no te atinga karakaratio e tu ra i mua i te ngutupa o te tapenakara. (Exo. 38:1, 2; 40:6) Te akaari maira tera atarau e kua ariki puareinga ua te Atua i to Iesu oraanga ei atinga. (Ebe. 10:5-10) Akamanako ana ra e eaa te puapinga o te reira no tatou! Kua tata te apotetoro a Paulo e: “I akaongiia oki tatou i te Atua, i to tatou vai enemi anga, i te mate o tana Tamaiti.” (Roma 5:10) Me tuku tatou i te akarongo i roto te toto o Iesu, ka rauka ia tatou te akaperepereanga a te Atua e ka rauka ia tatou kia irinaki i roto iaia ei au oa nona. Te ka tupu, ka rauka ia tatou tetai pirianga oa vaitata kia Iehova.​—Sala. 25:14.

No te mea ka ‘taparaia ta tatou ara,’ ka kite tatou i te “tuatau rekareka no mua mai i te aroaro o te Atua.” (Anga. 3:19) Aite rai to tatou turanga ki to tetai mouauri tei tataraapa no tana au angaanga kino i mua ana, e kua taui takiri i tona au tu, e te tiaki ua ra aia i tona taime ka tamateia. Te kite anga tetai akavanui aroa ua i teia, kua takore takiri aia i tona au apa, e kua akakore i tana utunga no te mate. E kua rekareka tikai taua mouauri ra! Mei tera akavanui rai, ka ariki aroa mai a Iehova i te au tangata tei tataraara, e ka akakore takiri i te utunga o te mate.

Tetai tuanga o te akamorianga mou ta Davida i kite i ko i te are o Iehova, koia oki ko te au urupu maata o te au tangata Iseraela, te tatau anga e te akamarama anga i te ture ki mua i te katoatoa, te  oronga anga i te atinga kakara, e te angaanga tapu tei ikuikuia te kau taunga e te kopu o Levi kia rave. (Exo. 30:34-38; Nume. 3:5-8; Deu. 31:9-12) Aite rai teia au tuanga o te akamorianga mou a to Iseraela i taito ki to teia tuatau.

Aite to tatou nei tuatau mei te tuatau i topa, ‘te meitaki e te mataora, kia noo te au taeake ma te tau tikai!’ (Sala. 133:1) Maata ua atu te tangata e kapitiia mai nei ki to tatou “au taeake,” i te ao katoa nei e pini ua ake. (1 Pete. 2:17) E tatauia ana e e akamaramaia ana te Tuatua a te Atua ki te katoatoa i ko i ta tatou au uipaanga. Oronga mai a Iehova i tetai porokaramu apii meitaki tikai na roto i tona akaaerenga. E maata katoa te kai pae vaerua e neneiia mai nei na roto i te au puka, kia taangaanga tatou i roto i ta tatou uaorai apii, e ta te pamiri katoa. Akakite mai tetai mema o te Pupu Akaaere e: “Riro te akamanako oonu anga i te Tuatua a Iehova, te manakonako anga no runga i tona aiteanga, e te kimi marie anga i te pakari e te marama, ei akaki i te au atinga ravarai o toku araanga ki te au mea memeitaki e te pumaana i te pae vaerua.” Ae, ka ‘riro te kite ei mea mataora’ kia tatou.​—Mase. 2:10.

Teia tuatau, te akarongo maira a Iehova i te au pure a tona au tavini i te au ra ravarai. Kia Iehova, aite rai taua au pure ra mei te kakara o te atinga karakaratio. (Sala. 141:2) E mea mareka tikai kia kite i to Iehova rekareka maata ia tatou, me akavaitata atu tatou kiaia ma te akaaka na roto i te pure!

Kua pure a Mose e: “Kia vai mairai te akaperepere o to matou nei Atua, o Iehova, ki runga ia matou nei, e te angaanga a to matou nei rima e akatinamou koe ki runga ia matou.” (Sala. 90:17) Ia tatou e rave maroiroi nei i ta tatou angaanga orometua, te akameitaki maira a Iehova i ta tatou angaanga. (Mase. 10:22) Penei kua tauturu ana tatou i etai ke kia kite i te tuatua mou. Kare e kore kua akakoromaki ana tatou i te tu reka kore mai o te tangata, te tu makimaki, te mamae ngakau, e te takinga kino. (1 Tesa. 2:2) Noatu ra, kare ainei e kua kite ana tatou i “te meitaki o Iehova,” e kua kite katoa tatou e te rekareka maata maira to tatou Metua i te rangi i ta tatou au tautaanga?

“Ko Iehova, ko taku ïa tuanga, e taku kapu,” i imene ei a Davida. “Ko koe tei akono mai i toku nei kelero. Kua topa akenei taku tuanga i te ngai meitaki.” (Sala. 16:5, 6) Akameitaki maata a Davida i tana “tuanga” koia oki, no tei rauka iaia tetai pirianga meitaki kia Iehova e te tikaanga ngateitei kia tavini iaia. Mei ia Davida rai, penei ka na roto tatou i te au turanga ngata, inara e maata ua atu ta tatou akameitakianga pae vaerua! No reira kia rekareka ua atu rai tatou i roto i te akamorianga mou “e kia ui marie” ua atu rai i roto i to Iehova nao.