“Iloa ai le Matagofie o Ieova”
E telē se aafiaga o tulaga faigatā iā i tatou, e lē gata e alu ai o tatou mafaufau, faavaivaia ai i tatou ae e aafia ai foʻi la tatou vaaiga e faatatau i le olaga. E tele faigatā ogaoga na aafia ai Tavita le tupu o Isaraelu. Sa faapefea ona ia fesagaʻia na faigatā? Na ia tatalo atu ma le lotomaulalo i le Atua mo se fesoasoani, i se salamo faamomoiloto e faapea: “Na ou valaau atu iā Ieova i loʻu leo mo se fesoasoani; na ou ʻaiʻoi atu iā Ieova i loʻu leo. Na ou sasaa atu pea i ona luma oʻu popolega; na ou taʻu atu pea foʻi i ona luma oʻu puapuaga. Ina ua vaivai loʻu loto i totonu iā te aʻu. Ona e silafia ai lea o loʻu ala.”—Sala. 142:1-3.
Na tatalo atu ma le lotomaulalo Tavita i le Atua mo se fesoasoani i taimi faigatā
Na pese Tavita i se isi salamo e faapea: “E tasi lava le mea ua ou talosaga atu ai iā Ieova o le mea lea o loo oʻu naunau i ai. Ina ia ou nofo i le fale o Ieova i aso uma o loʻu ola, e iloa ai le matagofie o Ieova ma ia ou vaai atu ai ma le fiafia i lona malumalu.” (Sala. 27:4) E ui e lē o Tavita o se sa Levī, ae seʻi manatu i le taimi na ia tū ai i fafo o le lotoā paia e latalata i le faleʻie paia, le nofoaga autū o le tapuaʻiga moni. Na faatumulia lona loto i le naunau e nofo ai i inā i lona olaga atoa, ma “iloa ai le matagofie o Ieova.”
O le upu “matagofie,” e faasino atu “i se mea e manaia i le tofo, e faamalieina ai le mafaufau ma faalogona.” Sa masani ona talisapaia e Tavita faatulagaga a le Atua mo le tapuaʻiga. E tatou te ono fesili ifo iā i tatou lava, ʻPe e tutusa oʻu faalogona ma Tavita?’
ʻIA VAAI ATU MA LE FIAFIA’ I LE FAATULAGAGA A IEOVA
E lē o toe faatulaga e Ieova i aso nei se nofoaga patino ina ia tatou faalatalata atu ai iā te ia. Ae ina ia faalatalata i le Atua i aso nei, ua aofia ai le malumalu sili faaleagaga a le Atua, po o le faatulagaga paia o le tapuaʻiga moni. * Pe a tatou ʻvaai atu ma le fiafia’ i lenei faatulagaga, o le a mafai ona tatou “iloa ai le matagofie o Ieova.”
Seʻi iloilo le fata faitaulaga ʻapamemea e ofo ai taulaga mū, lea na tū i luma o le faitotoʻa o le fale fetafaʻi. (Eso. 38:1, 2; 40:6) O lenā fata faitaulaga, e faaāta mai ai le lotomalie o le Atua e talia le ola faaletagata o Iesu o se taulaga. (Epe. 10:5-10) O le ā le uiga o lenā mea mo i tatou? Na tusi le aposetolo o Paulo: “A o fai i tatou ma ona fili, na tatou toe lelei ai ma le Atua e ala i le maliu o lona Alo.” (Roma 5:10) O le faatuatua i le toto maligi o Iesu, e tatou te maua ai le finagalo malie o le Atua ma maufaatuatuaina ai i tatou i le avea ai ma ana uō “vavalalata.”—Sala. 25:14.
Talu ai ua ʻsoloiesea a tatou agasala,’ ua tatou oo ai i le ʻtaimi e toe faafouina ai e Ieova’ mea. (Galu. 3:19) E tai pei o tatou tulaga o se pagota ua salamō mai i ana gaoioiga na faia, ma faia suiga lelei a o faatalitali i le taimi o lona faasalaga oti. Pe a mātauina e se faamasino agalelei na suiga, e uunaʻia ai o ia e aveesea le faasalaga oti. Maʻeu le fiafia o le pagota i lenā mapusaga! E pei Ieova o lenā faamasino, e na te faaalia lona finagalo malie i tagata e faaalia le salamō, ma aveesea ai le faasalaga oti.
IA FIAFIA I LE TAPUAʻIGA MONI
Na vaaia e Tavita i le fale o Ieova le toʻatele o tagata Isaraelu na faapotopoto ai, le faitauina ma le faamatalaina o le Tulafono i le lautele, le faamūina o mea manogi, ma le ofoina atu o le auaunaga paia e ositaulaga ma le ʻau sa Levī. (Eso. 30:34-38; Nu. 3:5-8; Teu. 31:9-12) O nei vala o le tapuaʻiga moni i Isaraelu anamua e iai se fesootaʻiga i aso nei.
“Maʻeu le lelei ma le matagofie pe a nonofo faatasi o uso i le autasi” i aso nei, e pei ona sa iai i taimi ua mavae. (Sala. 133:1) Ua faatupulaʻia le aofaʻi o le “ʻauuso atoa” i le lalolagi aoao. (1 Pete. 2:17) O loo faitauina ma faamalamalama i le lautele le Afioga a le Atua i a tatou sauniga. Ua saunia e Ieova le tele o aʻoaʻoga ma faatonuga e ala mai i lana faalapotopotoga. E tele foʻi meaʻai faaleagaga ua maua mai i lomiga mo suʻesuʻega a le tagata lava ia ma suʻesuʻega a le aiga. Na faapea mai se sui o le Vaega Pule: ʻO le manatunatu loloto i le Afioga a le Atua ma lona uiga, ma saʻiliʻili mo le tofamamao ma le malamalama, ua ou maua ai le faamalieina ma faatamaoaigaina ai faaleagaga.’ E mafai ona avea ʻle poto ma mea e mālie iā i tatou.’—Faata. 2:10.
E talia e le Atua tatalo a ana auauna i aso taʻitasi pe afai e talafeagai ma lona finagalo, ma e pei na tatalo o mea manogi i lana silafaga. (Sala. 141:2) Maʻeu lo tatou fiafia i le iloaina e fiafia le finagalo o Ieova iā i tatou, pe a tatou tatalo ma le lotomaulalo.
Na tatalo Mose: “Ia oo mai iā i matou le matagofie o Ieova lo matou Atua, ia e matuā faatumauina foʻi iā i matou le galuega a o matou lima.” (Sala. 90:17) E faamanuia e Ieova lo tatou maelega i le faiva. (Faata. 10:22) Atonu na tatou fesoasoani i isi e aʻoaʻoina le upu moni, pe ua tele foʻi tausaga o tatou auai i le talaʻiga e ui i le lē ano mai o tagata, o maʻi o le tino, tigā o faalogona po o sauāga foʻi. (1 Tesa. 2:2) E ui i lea, po o tatou mātauina le “matagofie o Ieova,” ma iloa o loo matuā faatāua e lo tatou Tamā faalelagi a tatou taumafaiga?
Na pese Tavita: “O Ieova o loʻu tofi ma o laʻu ipu. Ua e taofimau foʻi i loʻu tofi. O le mea ua e fuaina mai e fai ma oʻu tofi, e matagofie lea.” (Sala. 16:5, 6) Na talisapaia e Tavita lona “tofi” o le mauaina o se faiā lelei ma Ieova, ma le faaeaga e auauna ai iā te ia. E tatou te ono mafatia ona o faigatā e pei o Tavita, peitaʻi o loo tatou maua le tele o faamanuiaga faaleagaga. O lea, seʻi faaauau ona tatou ʻvaai atu ma le fiafia’ i le tapuaʻiga moni ma le malumalu faaleagaga o Ieova.
