Te wi abi problema, dan dati kan gi wi furu broko-ede, a kan meki wi kon swaki, èn a kan abi krakti na tapu a fasi fa wi e si a libi. Kownu David fu owruten Israel ben kisi furu tesi. San ben yepi en? Na ini wan moi psalm, David taki: „Mi opo mi sten fu kari Yehovah meki a yepi mi. Mi opo mi sten fu bari kari Yehovah meki a du bun gi mi. Doronomo mi ben e fruteri en san ben e moro mi. Doronomo mi ben e fruteri en den nowtu fu mi di mi ben lasi-ati. Na a ten dati yu ben sabi mi pasi.” Iya, nanga sakafasi David begi Gado fu yepi en.—Ps. 142:1-3.

Na ini wan tra psalm, David singi: „Wán sani mi aksi Yehovah èn dati na san mi wani trutru: Fu mi kan tan na ini na oso fu Yehovah, solanga mi de na libi, fu mi kan si taki Yehovah e du bun èn fu mi kan luku a tempel fu en nanga prisiri” (Ps. 27:4). David no ben de wan Leifisma, ma wi kan frustan fa a ben e firi te a ben e tanapu na fesi a santa fesidyari fu a tempel pe den ben e anbegi a tru Gado. A musu fu de so, taki David ati ben furu nanga tangi so te, taki a ben wani tan drape en heri libi langa fu si fa „Yehovah e du bun”.

Nofo tron a wortu „bun” abi fu du nanga sani di sma feni bun èn di e meki den firi bun. Ala ten David ben abi furu warderi gi den sani di Gado ben seti so taki sma kan anbegi En. A bun te wi e aksi wisrefi: ’Mi abi warderi tu neleki David?’

Na ini a ten disi wi no abi fu go na wan tempel fu anbegi a tru Gado Yehovah. Ma Yehovah seti sani so taki wi kan anbegi en na a yoisti fasi. * Efu wi abi warderi gi den seti disi, dan wi srefi o „si taki Yehovah e du bun”.

Meki wi poti prakseri na a kopro altari pe den Israelsma ben e tyari bron-ofrandi. Na altari disi ben e tanapu na a mofodoro fu a tabernakel (Eks. 38:1, 2; 40:6). Na altari ben sori taki Gado ben o de klariklari fu teki a skin fu Yesus leki wan ofrandi (Hebr. 10:5-10). Prakseri san disi wani taki! Na apostel Paulus ben skrifi: „Efu a dede fu Gado en Manpikin meki taki wi kon bun baka nanga Gado, aladi wi ben de feanti, dan wi kan de seiker taki now di wi kon bun baka nanga Gado, wi o kisi frulusu nanga yepi fu a libi fu en Manpikin” (Rom. 5:10). Te wi abi bribi na ini a brudu fu Yesus, dan wi kan de seiker taki Gado o feni wi bun èn taki a o frutrow wi. Na so wi o de ’bun mati fu Yehovah’.—Ps. 25:14.

Wi e firi koloku fu di Yehovah ’figi wi sondu puru’ (Tori 3:19). A situwâsi fu wi de leki a di fu wan strafuman di kisi dedestrafu. Na a pisi ten fosi den kiri en, a e sari fu den ogri di a du èn a e kenki en libi. Te wan bun-ati krutuman e si disi, a e sari a strafuman èn a e bosroiti fu puru en na dedestrafu. A no de fu taki dati a strafuman ben o breiti srefisrefi. Yehovah de leki a krutuman disi. Te libisma e sori berow, dan Yehovah e sari den èn a e frulusu den fu dede.

Wan fu den moi sani fu a tru anbegi di David ben kan si na a oso fu Yehovah, ben de den bigi grupu Israelsma di ben e kon makandra drape. Tra sani di a ben kan si, na taki den priester nanga den Leifisma ben gwenti leisi èn fruklari a Wèt, den ben e bron switismeri leki ofrandi gi Yehovah,  èn den ben e du santa diniwroko (Eks. 30:34-38; Num. 3:5-8; Deut. 31:9-12). Son sani di anbegiman fu Yehovah e du na ini a ten disi, yu kan agersi nanga den sani di den owruten Israelsma ben e du na a tempel.

„Luku o bun èn o switi a de te brada e libi makandra leki wán famiri!” (Ps. 133:1) Disi ben de so na ini owruten, èn te now ete a de so. A grupu brada nanga sisa fu wi na heri grontapu, e kon bigi dei fu dei (1 Petr. 2:17). Na den konmakandra fu wi, den e leisi èn fruklari Gado Wortu. Nanga yepi fu en organisâsi, Yehovah e gi wi furu leri. Wi e kisi buku nanga tijdschrift di e leri wi sani fu Bijbel èn wi kan gebroiki den buku disi te wi e studeri wi wawan noso te wi e studeri nanga wi osofamiri. Wan memre fu a Tiri Skin ben taki dati ala ten a ben lobi prakseri fu Yehovah en Wortu èn san a wani taki. A taki: „Mi e ondrosuku Bijbel moro fini tu fu frustan en moro bun. Mi e leri someni moi sani èn disi e gi mi furu prisiri.” Iya, ’sabi kan gi yu bigi prisiri’.—Odo 2:10.

Na ini a ten disi, den futuboi fu Yehovah e begi en ala dei. Gi Yehovah den sortu begi disi de leki switismeri (Ps. 141:2). A e prisiri wi ati srefisrefi fu sabi taki Yehovah Gado breiti trutru te wi e begi nanga sakafasi!

Moses ben begi: „Meki Yehovah wi Gado sori taki a e prisiri nanga wi. . . . Meki a go bun nanga den sani di wi e du” (Ps. 90:17). Yehovah o blesi a diniwroko fu wi te wi e du en fayafaya (Odo 10:22). Kande wi yepi wan tu sma fu teki a tru bribi. Kande wi du a preikiwroko furu yari langa aladi sma no wani arki wi, aladi den e frufolgu wi, aladi wi siki, noso aladi wi e firi brokosaka (1 Tes. 2:2). Ma fu di wi „si taki Yehovah e du bun”, meki wi sabi taki a breiti srefisrefi nanga a muiti di wi e meki.

David ben singi: „Mi e dini Yehovah èn dati na ala san mi abi fanowdu. Na en e furu a kan fu mi. Mi Gado, na yu e kibri a gudu di mi musu kisi. Mi breiti nanga a pisi kontren di yu poti na wan sei gi mi” (Ps. 16:5, 6). David ben breiti nanga a „gudu” fu en. A gudu dati na a matifasi di a ben abi nanga Yehovah èn a grani di a ben abi fu dini en. Kande wi e kisi tesi neleki David, ma wi e kisi so furu blesi fu Yehovah! Sobun, meki wi tan prisiri na ini a tru anbegi èn meki wi abi warderi gi den seti fu Yehovah ala ten.