Ekakatanu kokaka monga la shɛngiya ya kɔlɔ efula le so. Vɔ koka nanya ekanelo kaso, tɔlɛndja ndo toshishɛ elongamelo kele la so. Nkumekanga Davidɛ ka l’Isariyɛlɛ w’edjedja akadiɛnɛ la ekakatanu efula. Ko ngande wakandalɔshana la wɔ? Lo osambu ɔmɔtshi wananda otema, nde kadimolaka ate: “Dimi latulelelaka [Jehowa], la tukuku mbatumosengasengaka [Jehowa]. Dimi latukitshaka ukiyanu ami la ntundu kandi, latûsanyiaka [paa] kami. Lam’atolembiamaka utema ami, we atulimbitelaka mbuka kami.” Mbokɛmaka mɛtɛ dia Davidɛ akalɔmbɛ Nzambi l’okitshakitsha tshɛ dia nde mbokimanyiya.—Osam. 142:1-3.

Lo osambu okina, Davidɛ akembe ate: “Engo otoi kakamalombe [Jehowa], to kayumuyangaka, dia dimi mbidjase lu luudu la [Jehowa] lu nshi tshe ya lumu lami; dia menda dimena dia [Jehowa], ndu dia mamba dia etemwelo kandi.” (Osam. 27:4) Kaanga mbaki Davidɛ komonga ose Lɛwi, ohɔsa dia wɛ ekɔ lo mbɛɛna emadi l’andja wa sɛkɛ di’ekila suke la tɛmpɛlɔ ka Nzambi. Otema waki Davidɛ wambolola tɔɔ la lowando woho ɔnɛ wele nde okombola monga lɔsɛnɔ lande l’otondo lo tɛmpɛlɔ dia “menda[ka] dimena dia [Jehowa].”

Tshɛkɛta “dimena” mbelaka kanyi ya dionga diele “ɔlɔlɔ kana diangɛnyangɛnya yimba, nsaki ndo awoki.” Davidɛ akendaka tɛmpɛlɔ kaki Nzambi la lowando tshɛ. Laasɔ yambola wate: ‘Onde dimi ndjaokaka oko wakayaokaka Davidɛ?’

Lam’ele taya la tɛmpɛlɔ ka woke kaki Nzambi ka lo nyuma, hayɔlɔmbama dia paka sho mbotshwe lo luudu lɔmɔtshi shikaa ko sho tɔtɛmɔla Nzambi. Tɛmpɛlɔ kɛsɔ nembetshiyaka yɛdikɔ y’ekila yendana l’ɔtɛmwɛlɔ wa mɛtɛ. * Naka sho ‘menda tɛmpɛlɔ kɛsɔ la lowando’ tshɛ, kete sho lawɔ koka “menda dimena dia [Jehowa].”

Tɔtɛkɛtɛ dia dihole di’elambwelo diakasalema la ɔhɔtɛla diakawalambolaka elambo wa lotshumba diaki la soko dia tabɛrnakɛlɛ. (Etum. 38:1, 2; 40:6) Dihole di’elambwelo sɔ diaki didjidji dia woho waki Nzambi suke dia mbetawɔ dia Yeso nkimɔ demba diande di’onto oko olambo. (Hɛb. 10:5-10) Ɔpɔstɔlɔ Pɔɔlɔ akafunde ate: “Etena kakiso atunyi, sho takayokana la Nzambi oma lo nyɔi k’Ɔnande.” (Rɔmɔ 5:10) Lo monga la mbetawɔ lo dikila di’oshinga wolo diaki Yeso, sho koka mbetawɔma le Nzambi ndo monga angɛnyi ande. Etombelo wayonga la dui sɔ ele, ‘tayokoma angɛnyi wa Jehowa.’—Osam. 25:14.

Lam’ele ‘pɛkato yaso nimɔmaka,’ sho kondjaka ‘ekeketshelo oma le Jehowa.’ (Etsha 3:19) Sho tekɔ oko ose lokanu lamboyatshumoya l’ɔtɛ wa kɛnɛ kakandasale ko ambosala etshikitanu wa mamba ndo okonga etshungwelo. Etena kambɛna shushi dui sɔ, nde ambɔsa yɛdikɔ ya mbokimwɛ kɔlɔ kakandasale ndo mbonyɛ kibawo ka nyɔi kakawoofundɛ. Ande ɔngɛnɔngɛnɔ wayonga l’ose lokanu ɔsɔ lee! L’ɛnyɛlɔ ka shushi shɔ, Jehowa mbokaka wanɛ wayatshumoya kɛtshi ndo nde tshikitanyaka yɛdikɔ yande ya mbadiaka.

Etena kaki Davidɛ lo luudu la Jehowa, nde akɛnyi awui wele oko osanganelo wa nyemba y’ase Isariyɛlɛ, wadielo ndo olembetshielo w’Ɛlɛmbɛ  wa Mɔsɛ la ntondo k’anto waki laawɔ, otshumbelo wa tshɔ ndo olimu w’ekila wakakambaka ɛlɔmbɛdi l’ase Lɛwi. (Eum. 30:34-38; Wal. 3:5-8; Euh. 31:9-12) Awui wakasalemaka l’ɔtɛmwɛlɔ wa mɛtɛ l’Isariyɛlɛ w’edjedja asɔ wekɔ lo salema ndo nshi nyɛ.

Oko wakadiasalemaka lo nshi nshɔ, “olo weko di’anangu mbidjase kame” ndo lo nshi yaso nyɛ. (Osam. 133:1) Ehamelo wa mamba wambosalema l’andja w’otondo lo “nkumbo k’otondo k’anangɛso.” (1 Pet. 2:17) Bible mbadiemaka ndo nembetshiyamaka lo nsanganya yaso. Jehowa ekɔ lo tetsha dimɛna lo tshimbo y’etenyi ka la nkɛtɛ k’okongamelo ande. Tekɔ lo nkondja lokema l’ekanda wakamba la so lo wekelo w’onto ndamɛ kana l’Ɔtɛmwɛlɔ wa lo nkumbo. Ɔnangɛso ɔmɔtshi la l’Olui-walɔmbɔla akate ate: “Lo nkana yimba lo Ɔtɛkɛta wa Nzambi ndo lo kitshimudi yawɔ ndo lo nyanga shɛnɔdi la ewo mbakamaleke nkondja ɔngɔnyi wa lo nyuma ndo ɔngɛnɔngɛnɔ.” Aha la taamu, ‘ewo koka tɔngɛnyangɛnya.’—Tuk. 2:10.

Nshi nyɛ, Jehowa mbokaka alɔmbɛlɔ wasala ekambi ande lushi tshɛ nɛ dia nde mbaɔsaka oko opumu wa tshɔ. (Osam. 141:2) Ande ɔngɛnɔngɛnɔ wonga la so lo mbeya dia Jehowa tɔsaka la nɛmɔ di’efula etena kɔɔlɔmbaso l’okitshakitsha lee!

Mɔsɛ akalɔmbɛ ate: “Ngandji ka mamba ka Khumadiondjo [Nzambi k]asu kayali la su. Ushikike ulimu watutukambaka l’anya!” (Osam. 90:17) Etena kasambishaso l’ohetoheto tshɛ, Jehowa tshɔkɔlaka olimu aso. (Tuk. 10:22) Mbeyaka monga ko tambokimanyiya anto amɔtshi dia vɔ mbeya akambo wa mɛtɛ. Ondo aya ɛnɔnyi efula wambotosambisha ndo tambokikɛ wendjudi, elando, ekiyanu wa lo yimba kana ɛhɛnyɔhɛnyɔ. (1 Tɛs. 2:2) Ko, shi tekɔ lo mɛna “dimena dia [Jehowa]” ndo tekɔ lo nshihodia ɔnɛ Shɛso lele l’olongo ngɛnangɛnaka welo wadjaso?

Davidɛ akembe ate: “[Jehowa], we eli sangu diami la dikoho diami di’ukito. We atunamelaka etenyi kami. Vo wambombedikela etenyi kuleki ololo.” (Osam. 16:5, 6) Davidɛ akokaka Jehowa losaka lo “sangu” diande, mbuta ate diɔtɔnganelo diaki lam’asande la Jehowa ndo diɛsɛ diaki la nde dia mbokambɛ. L’ɛnyɛlɔ ka Davidɛ, kaanga mbakokaso monga l’ekakatanu, teye dia tekɔ la ɛtshɔkɔ efula wa lo nyuma. Ɔnkɔnɛ, nyɛsɔ totetemale ngɛnangɛna lo ɔtɛmwɛlɔ wa mɛtɛ ndo tendake nshi tshɛ la ‘lowando’ tɛmpɛlɔ ka lo nyuma kaki Jehowa.