Ol hevi inap daunim tru yumi. Ol hevi inap mekim na yumi tingting planti, na tu, em inap pinisim strong bilong yumi, na senisim tru tingting bilong yumi. King Devit bilong lain Israel long bipo i bin karim planti bikpela hevi. Olsem wanem em i karim ol dispela hevi? Devit i raitim wanpela song na em i tok: “Mi singaut strong long Bikpela bilong em i helpim mi. Mi wok strong long askim em long helpim mi. Mi save tokim em long olgeta wari na olgeta hevi i kamap long mi. Taim bel bilong mi i hevi moa, na mi ting bai mi bagarap, Bikpela, yu save wanem samting mi mas mekim.” Devit i daunim em yet na i beten askim God long helpim em.—Sng. 142:1-3.

Long narapela song, Devit i tok: “Wanpela samting tasol mi askim Jehova, em samting mi laikim tru. Olsem mi laik stap long haus bilong Jehova olgeta de mi stap laip. Mi laik lukim gutpela pasin bilong Jehova. Mi laik lukim tempel bilong em na amamas.” (Sng. 27:4, NW ) Devit i no bilong lain Livai, tasol piksaim long tingting olsem em i sanap ausait long banis bilong ples holi klostu long ples stret bilong mekim lotu i tru. Bel bilong Devit i pulap tru long amamas, olsem na long laip olgeta bilong em, em i laik stap long dispela hap na bai em inap “lukim gutpela pasin bilong Jehova.”

Dispela tok “gutpela pasin” i poroman wantaim pasin bilong “stap wanbel o samting i amamasim tingting na filings bilong man.” Oltaim Devit i save amamas long lukim pasin God i makim bilong mekim lotu. Yumi ken askim yumi yet olsem, ‘Mi save pilim wankain olsem Devit?’

Long nau, Jehova i no redim wanpela ples stret em yumi mas i go long en bilong lotuim em, nogat. Yumi mas bihainim pasin em God yet i makim bilong mekim lotu i tru. a Sapos yumi ‘lukim na amamas’ long dispela pasin, yumi tu bai “lukim gutpela pasin bilong Jehova.”

Skelim kopa alta bilong kukim ol ofa we i stap klostu long dua bilong haus sel. (Kis. 38:1, 2; 40:6) Dispela alta i makim olsem God i orait long Jisas i givim laip bilong em olsem ofa. (Hib. 10:5-10) Tingim olsem wanem dispela inap helpim yumi! Aposel Pol i tok: “Taim yumi bin stap birua bilong God, yumi bin kamap wanbel wantaim em long rot bilong dai bilong Pikinini bilong en.” (Rom 5:10) Taim yumi bilip long blut bilong Jisas we i bin kapsait, yumi inap amamas na bilip olsem God i orait long yumi kamap ol pren bilong em. Long dispela rot, yumi inap pilim olsem “God em i pren tru” bilong yumi.—Sng. 25:14.

“Jehova yet bai givim nupela strong” long yumi, long wanem, em ‘bai tekewe ol sin bilong yumi.’ (Apo. 3:19) Samting i painim yumi long nau i wankain olsem samting i painim wanpela kalabusman. Em i bel hevi long ol rong em i bin mekim, na em i mekim ol bikpela senis, na wet long kisim strafe, olsem ol bai kilim em i dai. Sapos jas em i gutpela man, na em i lukim pasin em dispela kalabusman i mekim, em bai tok dispela man i no gat asua moa na em bai rausim strafe bilong kilim dispela man i dai. Dispela kalabusman bai amamas tru! Wankain olsem dispela jas, Jehova i orait long ol man husat i tanim bel na em i kisim bek ol long kalabus bilong i dai.

Sampela samting bilong lotu i tru em Devit i lukim long haus bilong Jehova em olsem: planti lain Israel i kam bung, ol i ritim na kamapim mining bilong ol tok bilong Lo, ol i kukim ol paura, na ol pris  na ol Livai i mekim wok lotu. (Kis. 30:34-38; Nam. 3:5-8; Lo 31:9-12) Ol dispela samting bilong lotu i tru long lain Israel bilong bipo i wankain long ol samting bilong lotu i tru long taim bilong yumi.

Wankain olsem bipo, long taim bilong yumi long nau, em i gutpela samting long lukim olsem ‘ol manmeri bilong God i sindaun gut wantaim na i stap wanbel olsem ol brata tru, na ol i stap belgut’! (Sng. 133:1) Long olgeta hap bilong graun, namba bilong ‘olgeta wanbilip bilong yumi’ i go antap tru. (1 Pita 2:17) Long ol miting bilong yumi, yumi save harim man i ritim Tok Bilong God na kamapim mining bilong en. Jehova i yusim oganaisesen bilong em long redim planti samting bilong skulim gut yumi. Na tu, i gat planti buk na nius samting em ol i prinim na bai yumi inap yusim long mekim stadi bilong yumi yet na famili lotu. Wanpela memba bilong Gavening Bodi i tok: “Taim mi tingim tingim Tok Bilong Jehova long bel, na tingim mining bilong en, na luksave long savetingting i stap long en, dispela i save strongim bilip bilong mi na mi stap belgut.” Tru tumas, “gutpela save” inap mekim yumi stap “belgut.”—Snd. 2:10.

Long nau, Jehova i save orait long ol beten em ol wokman bilong em i mekim long olgeta wan wan de. Ol dispela beten i olsem smok bilong paura i gat gutpela smel i go long Jehova. (Sng. 141:2) Yumi belgut taim yumi luksave olsem God Jehova i save amamas tru taim yumi beten askim em long helpim yumi!

Moses i beten olsem: “Bikpela, yu God bilong mipela, mipela i laik bai yu marimari long mipela na mekim gut long mipela. Na olgeta samting mipela i mekim i ken kamap gutpela.” (Sng. 90:17) Taim yumi givim bel tru long autim tok, Jehova i save blesim wok bilong yumi. (Snd. 10:22) Ating yumi bin helpim sampela long kisim save long tok i tru. O ating yumi bin stap strong long mekim wok autim tok inap planti yia maski ol man i les long harim tok, o yumi kisim bikpela sik, bikpela bel hevi, o ol man i mekim nogut long yumi. (1 Tes. 2:2) Yumi bin “lukim gutpela pasin bilong Jehova” na luksave olsem Papa bilong yumi long heven i amamas tru long olgeta hatwok bilong yumi.

Devit i tok: “God, yu tasol yu bilong mi na mi no gat narapela samting moa. Na yu givim mi olgeta samting mi sot long en. Laip bilong mi i stap long han bilong yu. Mi kisim olgeta gutpela samting long yu tasol.” (Sng. 16:5, 6) Devit i tenkyu long Jehova i orait long em inap stap pren bilong em na mekim wok bilong em. Wankain olsem Devit, ating yumi gat planti hevi, tasol yumi gat planti samting em God i givim bilong helpim yumi long pas gut wantaim em! Olsem na yumi ken wok yet long amamas long lotu i tru, na oltaim yumi mas “lukim . . . na amamas” long pasin Jehova i makim bilong lotuim em.