Kʼalal jaʼo chkiltik tsots vokolile xuʼ mu xa lekuk xnop kuʼuntik, chlaj kiptik xchiʼuk xuʼ jelel tajek chkiltik li kuxlejale. Taje jech kʼot ta stojolal li ajvalil Davide, ti ep laj yil svokole. ¿Kʼuxi kuch batel yuʼun? Li stakʼobile te ta jtatik ta jun salmo ti la stsʼiba stuke: «Xiʼavet noʼox ta scʼanbel vocol li Mucʼul Diose; xiʼavet noʼox ta scʼanel li cʼuxubinele. Ta jambe scotol li sloʼil coʼntone; jaʼ noʼox chcalbe cʼusi jvocol ti cʼalal mu xa xcuch cuʼun. Mucʼul Dios; voʼot xavotquin li jbe jxanebe». Lek xvinaj ti bikʼit laj yakʼ sba David kʼalal la skʼanbe koltael li Diose (Sal. 142:1-3).

Ta yan salmo xtoke xi laj yale: «Jun noʼox li cʼusi jcʼanojbe o li Mucʼul Diose, jun noʼox li cʼusi oy ta coʼnton oe; jaʼ ti te chicom o ta xchʼulna ti jayib cʼacʼal cuxulune. Te chcaʼay cʼu yutsil stuc li Mucʼul Diose; te chquichʼ o ta mucʼ ta xchʼulna» (Sal. 27:4). Jnoptik noʼox avaʼi ti yakal tskʼel batel li yamakʼil chʼulna pasbil ta nukule, ti nopol yiloj ti bu toʼox chichʼ ichʼel ta mukʼ melel Dios li ta skʼakʼalile. Skʼan nom noʼox skʼeloj batel, yuʼun maʼuk te likem li ta jvokʼ nitilulal yuʼun jlevietike. Akʼo mi jech, solel tstoj tajek ta vokol, yuʼun tskʼan te chkom-o kʼu sjalil kuxul li ta xchʼulna Jeovae xchiʼuk ti xakʼ venta ti «cʼu yutsil stuc li Mucʼul Diose».

Li jpʼel kʼop «cʼu yutsil» xie jaʼ chakʼ ta ilel ti leke, o ti chakʼ jun oʼontonale. Li Davide oy onoʼox sbalil laj yil li kʼusi xchapanoj Jeova ta stojolal yajtuneltak ta sventa ti kʼu yelan skʼan xichʼ ichʼel ta mukʼe. ¿Mi oy van sbalil chkiltik ek?

Li avie, mu xa persauk oyuk jpʼejuk na sventa xijnopaj ta stojolal li Jeovae, yuʼun li avie jaʼ xa xchʼulna Jeova ti jaʼ li kʼusi xchapanoj sventa chichʼ ichʼel ta mukʼe. * Mi te chkichʼtik-o ta mukʼ ta xchʼulna Jeova ti mu xkiltike, li voʼotik eke xuʼ me xkakʼtik venta ti «cʼu yutsil stuc li Mucʼul Diose», jech kʼuchaʼal kʼot ta stojolal li Davide.

Jnoptik lek kʼusi skʼan xal li skajleb smoton Dios sventa xchikʼobil matanale, o li skajleb smoton Dios ti pasbil ta kovree, ti te oy ta stiʼ chʼulna pasbil ta nukule (Éx. 38:1, 2; 40:6). Li skajleb matanal taje jaʼ skʼan xal ti la xchʼam Jeova ti xakʼ xkuxlejal kʼuchaʼal krixchano li Jesuse (Heb. 10:5-10). ¿Kʼusi skʼan xal chkaʼitik? Li jtakbol Pabloe xi la stsʼibae: «Ti contra onoʼox chquil jba jchiʼuctic li Diose, lec xa jcʼopan jba jchiʼuctic ta sventa ti icham ta jcojtic li Xnichʼone» (Rom. 5:10). Mi chkakʼ xchʼunel koʼontontik ta sventa ti la smal xchʼichʼel li Jesuse, xuʼ me lek xilutik li Jeovae xchiʼuk ti jpat koʼontontik ti xuʼ xijkʼot ta yamigoe, vaʼun lek me chkil jbatik xchiʼuk li Diose (Sal. 25:14).

Ta skoj ti chʼaybil xa li jmultike poʼot xa jkʼupintik li kʼusi chal liʼe: «Jech chcʼot yorail ta xacʼ xcuxetel avoʼntonic li Cajvaltique» (Hech. 3:19). Ti kʼu yelan oyutike, xijkoʼolaj kʼuchaʼal jun jchukel ti solel chopol tajek chaʼi sba ta skoj li kʼusi la spas ta voʼnee, vaʼun ta anil noʼox tsjel xkuxlejal kʼalal skʼan toʼox xichʼ milele. Kʼalal jech chil taje, jun jchapanvanej ti chkʼuxubinvane chtijbat yoʼonton sventa xtupʼbat li kʼusitik spasojane xchiʼuk ti muʼyuk xa chakʼ ti akʼo xichʼ milele. ¡Solel xkuxet van tajek yoʼonton xchiʼuk xmuyubaj avi li jchukele! Li Jeovae xkoʼolaj kʼuchaʼal li jchapanvanej taje, yuʼun chakʼbe ta ilel slekil yoʼonton li krixchanoetik ti tsutes yoʼontonike xchiʼuk chchʼaybe skʼoplal ti chakʼbe slajebike.

Li Davide laj yil skotol li jeltos abtelaletik chichʼ pasel ta sventa li melel yichʼel ta mukʼ li ta sna Jeovae. Jtos li abtelal taje, jaʼo kʼalal tstsob sbaik li slumale, li skʼelel xchiʼuk li chanubtasel ta sventa li Mantaletike,  li xchikʼel pome xchiʼuk li chʼul abtelal tspasik li paleetike xchiʼuk li jlevietike (Éx. 30:34-38; Núm. 3:5-8; Deut. 31:9-12). Li avie, oy jechtik li kʼusitik chichʼ pasel li avi eke.

Li kʼusi chal liʼe, jech chkʼot ta pasel avi xchiʼuk jech kʼot ta pasel ta voʼne: «Toj lec, toj jun yutsil cʼalal lec coʼol coʼntontic ti cutsʼ calal jbatique» (Sal. 133:1). «Li bochʼo coʼol jchʼunojtic Dios jchiʼuctique» epajemik xa li ta spʼejel Balumile (1 Ped. 2:17). Jech xtok, ta xichʼ kʼelel xchiʼuk ta xichʼ albel lek smelolal kʼusitik chal Vivlia sventa skotol krixchanoetik li ta jtsobajeltike. Ta yan xtoke, li Jeovae jaʼ tstunes s-organisasion sventa xakʼbutik muil veʼliletik ti jaʼ li chanubtaseletik ta Vivliae. Jech xtok oy epal veʼlil kuʼuntik ta mantal ti ta vunetik lokʼemike, taje xuʼ jtunestik li ta yichʼel ta mukʼ Jeova ta kutsʼ kalaltike xchiʼuk kʼalal ta jchan Jvivlia jtuktike. Jun ti chtun li ta Jtsop Jbeiltasvaneje xi jamal laj yale: «Kʼalal ta jnopbetik skʼoplal li Skʼop Jeovae, ti ta jnoptik ti kʼusi skʼan xale xchiʼuk ti ta jsaʼ jpʼijiltik xchiʼuk li yojtikinobile, jaʼ yakʼojbun muyubajel xchiʼuk kʼulejal ta mantal». Melel onoʼox, ¡ti yojtikinobile xuʼ chakʼ jun yutsilal ta koʼontontik! (Prov. 2:10.)

Jech kʼuchaʼal kʼot ta pasel li ta voʼnee, li avie mu albajuk chkʼot ta stojolal Jeova jujun kʼakʼal li orasion tspas yajtuneltake. Ti kʼu yelan chaʼi Jeova li orasionetik taje xkoʼolaj kʼuchaʼal muil pom kʼalal chichʼ chikʼele (Sal. 141:2). ¡Toj ep tspat koʼontontik kʼalal ta jnaʼtik ti lek chil Jeova kʼalal bikʼit chkakʼ jbatik ta jkʼopontik ta orasione!

Xi la skʼan ta orasion li Moisese: «Cajval Dios, liʼ oyuc o ta jtojolcutic li alequilale. Jʼechʼel lec acʼo comuc o li cabtelcutique» (Sal. 90:17). Li Jeovae chakʼbe bendision li cholmantal ta jpastike, yuʼun ta sjunul koʼontontik ta jpastik (Prov. 10:22). Xuʼ van oy buchʼu jkoltaojtik sventa x-och ta mantal, o xuʼ van kakʼojbetik-o yipal ta cholmantal akʼo mi epal jabil xa ti mu skʼanik li krixchanoetike, ti oy jchameltike, ti chopol noʼox chkaʼi jbatike o ti chkichʼtik nutsele (1 Tes. 2:2). Pe akʼo mi jech, kakʼojtik venta ti «cʼu yutsil stuc li Mucʼul Diose» xchiʼuk kilojtik ti lek chil Jtotik ta vinajel ti chkakʼtik persae.

Xi kʼejin li Davide: «Jtaoj ta aventa scotol, Cajval, yepal ti avaʼanoj aba ta jtojole; ta avoc ta acʼob oy ti jcuxleje. Jun noʼox yutsil ta jʼechʼel laj jta avuʼun ta sliquebal bu cʼot ti coraile, batsʼi echʼem yutsil ti jrexto laj avacʼbune» (Sal. 16:5, 6, Ch). Li stuke solel tstoj ta vokol ti jaʼ ta sventa Jeova staoj skotol li Davide, jaʼ xkaltik, ti xuʼ xtun ta stojolal Jeovae xchiʼuk ti lek x-ilate. Xuʼ van xkil jvokoltik ek jech kʼuchaʼal kʼot ta stojolal li Davide. Pe jech kʼuchaʼal li Davide, li voʼotike kichʼojtik epal bendisionetik ta mantal. Jaʼ yuʼun jkʼupintik li melel yichʼel ta mukʼ Diose xchiʼuk oyuk sbalil xkiltik li xchʼulna Jeovae.