An magkuri nga problema mahimo magkaada daku nga epekto ha aton. Mahimo nga ito na la an aton paghinunahunaon, magpaluya ito ha aton, ngan makaapekto han aton pagtagad ha kinabuhi. Hi Hadi David han kadaan nga Israel nakaeksperyensya hin damu nga magkuri nga problema. Paonan-o niya gin-atubang ito? Ha usa nga makapabantad nga salmo, hiya nagsiring: “Nagsisinggit ako ha akon tingog ngadto kan Jehova; ha akon tingog ngadto kan Jehova naaro ako hin pagkalooy. Gin-iipis nakon an akon sumbong ha atubangan niya. Iginpapahayag ko ha iya atubangan an akon kakurian. Han paglipong han akon espiritu ha sakob nakon, maaram ka han akon dalan.” Oo, hi David mapainubsanon nga nag-ampo ha Dios para hin bulig.—Sal. 142:1-3.

Ha usa pa nga salmo, hi David nagkanta: “Usa la nga butang [an] ginpangaro ko kan Jehova, ini pangingitaon ko: Nga hi ako makaukoy ha balay ni Jehova ha ngatanan nga mga adlaw han akon kinabuhi, basi ako makatan-aw han katahom ni Jehova, ngan pagpakiana [“malipay ha pagkita,” NW] dida hiton iya templo.” (Sal. 27:4) Hi David diri Lebihanon, kondi handurawa nga natindog hiya ha gawas han baraan nga bungsaran hirani ha sentro mismo han tinuod nga pagsingba. An iya kasingkasing puno gud hin pagpasalamat salit karuyag niya umukoy dida hito ha bug-os niya nga kinabuhi basi “makatan-aw han katahom ni Jehova.”

An pulong nga “katahom” iginkakaw-ing ha kahimtang o kalidad han pagin “makaruruyag ha hunahuna, pagbati, o mga sentido.” Pirme nalilipay hi David ha mga kahikayan han Dios para ha pagsingba. Mahimo naton pakianhan an aton kalugaringon, ‘Sugad ba liwat hito an akon inaabat?’

Yana, an kahikayan ni Jehova basi makadaop ha iya diri nakasentro ha usa nga istraktura. Lugod nahiuupod hito an daku nga espirituwal nga templo han Dios, an sagrado nga kahikayan han tinuod nga pagsingba. * Kon ‘malipayon nga kikitaon’ naton ini nga kahikayan, kita liwat ‘makakatan-aw han katahom ni Jehova.’

Tagda an tumbaga nga altar para ha mga halad nga sinunog nga nahimumutang ha atubangan han ganghaan han tabernakulo. (Eks. 38:1, 2; 40:6) Ito nga altar nagsisimbolo han pagin andam han Dios nga karawaton an tawhanon nga kinabuhi ni Jesus sugad nga halad. (Heb. 10:5-10) Hunahunaa kon ano an kahulogan hito para ha aton! Hi apostol Pablo nagsurat: “Han mga kaaway pa kita, iginpahiuli kita ha Dios pinaagi han kamatayon han iya Anak.” (Roma 5:10) Pinaagi ha pagtoo han halad lukat ni Jesus, mapapahimulosan naton an pag-uyon ngan pagsarig han Dios sugad nga iya kasangkayan. Sugad nga resulta, naieksperyensyahan naton an ‘pakigsangkay kan Jehova.’—Sal. 25:14.

Tungod kay ‘ginpasaylo na an aton mga sala,’ naieksperyensyahan naton an “panahon han pagrepresko tikang kan Jehova.” (Buh. 3:19) Maipapariho kita ha usa nga priso nga nagbasol han iya mga sala ngan naghimo hin daku nga pagbag-o samtang ginhuhulat an iya sentensya nga kamatayon. Han makita ito han usa nga buotan ngan makatadunganon nga hukom, gin-abswelto niya an priso tikang ha sentensya nga kamatayon. Sigurado nga nalipay gud hito an priso! Pariho hito nga hukom, hi Jehova liwat nagpapakita hin kalooy hito nga mga mabinasulon ngan gintatalwas niya hira tikang ha sirot nga kamatayon.

An pipira nga bahin han tinuod nga pagsingba nga naobserbaran ni David ha balay ni Jehova amo an pagkatirok han damu hinduro nga iya igkasi-Israelita,  pagbasa ngan pagsaysay ha publiko mahitungod han Balaud, pagsunog hin insenso, ngan an pagbuhat hin sagrado nga pag-alagad han mga saserdote ngan mga Lebihanon. (Eks. 30:34-38; Num. 3:5-8; Deut. 31:9-12) Ini nga mga bahin han tinuod nga pagsingba ha kadaan nga Israel may katugbang ha aton panahon.

Sugad han naglabay, naieksperyensyahan naton yana an ‘kamaopay ngan an kairindig han magburugto nga nagkakatarampo ha pag-urosa!’ (Sal. 133:1) Nagtitikadamu gud an aton “kabugtoan” ha bug-os nga kalibotan. (1 Ped. 2:17) An Pulong han Dios ginbabasa ngan ginsasaysay ha aton mga katirok. Pinaagi han organisasyon ni Jehova, nagtatagana hiya hin damu nga programa ha pagtutdo. Hura liwat an espirituwal nga pagkaon nga mababasa ha aton mga publikasyon para magamit naton ha personal ngan panpamilya nga pag-aram. Usa nga membro han Nagmamando nga Lawas an nagsiring: “Tungod ha pagpamalandong han Pulong ni Jehova ngan ha kahulogan hito ngan ha pagpamiling han kinaadman ngan pagsabot, nagin riko ako ha espirituwal ngan nagin kontento.” Oo, an ‘hibaro makakapalipay han aton kalag.’—Prob. 2:10.

Yana, pinamamatian ni Jehova kada adlaw an mga pag-ampo han iya mga surugoon. Para ha iya, an sugad nga mga pag-ampo pariho hin mahamot nga insenso. (Sal. 141:2) Makaruruyag hunahunaon nga nalilipay gud hi Jehova ha aton mapainubsanon nga mga pag-ampo!

Hi Moises nag-ampo: “Mahimo kunta nga an grasya han Dios maaada ha amon; ngan imo igparig-on an buhat han amon mga kamot.” (Sal. 90:17) Samtang madasigon nga gintutuman naton an aton ministeryo, ginbibendisyonan ito ni Jehova. (Prob. 10:22) Bangin may nabuligan na kita nga mahibaro han kamatuoran. Posible liwat nga ha damu na nga katuigan, nagpapadayon kita ha pagministeryo bisan pa han kawaray-interes, mga pagkontra, sakit ha pisikal ngan emosyon, o pagtimaraot. (1 Tes. 2:2) Bisan pa hito, nakikita naton an ‘katahom ni Jehova’ ngan nasasantop nga an aton langitnon nga Amay nalilipay gud ha aton mga pangalimbasog.

Hi David nagkanta: “Hi Jehova amo an bahin han akon panurundon ngan han akon tagayan; Ikaw an nagpapadayon han akon kahimtang. . . . Oo, matahom an akon panurundon.” (Sal. 16:5, 6) Mapasalamaton hi David han iya “bahin,” nga amo an pagkaada inuuyonan nga relasyon kan Jehova ngan an pribilehiyo nga mag-alagad ha Iya. Pariho kan David, bangin naatubang kita hin mga problema, pero damu gud an aton nakakarawat nga espirituwal nga bendisyon! Salit padayon kita nga malipay ha tinuod nga pagsingba ngan pirme “malipay ha pagkita” ha espirituwal nga templo ni Jehova.