YIA ya 2014, hem i makem 100 yia blong sinema ya “Photo-Drama of Creation,” (Sinema Blong Ol Samting We God i Mekem). Oli wokem sinema ya blong pulum ol man blong oli bilif se Baebol hem i Tok Blong God. Long taem ya, plante man oli bilif long tijing blong evolusen, mo ol man we oli skul gud oli daonem Baebol, nao plante man oli no moa bilif long hem. Be sinema ya i leftemap Jehova se hem nao i mekem olgeta samting.

Charles T. Russell, we i lukaot long wok blong ol Baebol Studen long taem ya, i traehad blong faenem rod we i beswan blong mekem se trutok blong Baebol i kasem plante moa man kwiktaem. Bitim 30 yia finis, ol Baebol Studen oli yusum ol buk mo magasin. Be naoia, wan narafala rod i pulum tingting blong olgeta, hemia sinema.

Long ol yia 1890, hemia fas taem we ol man oli lukluk ol sinema, be i no gat voes mo miusik i joen wetem. Long 1903, ol man oli go long wan jos long New York, blong wajem wan sinema blong jos. Long 1912, Russell i stat blong rerem “Photo-Drama.” Brata Russell i luksave se sinema ya bambae i givhan kwiktaem long ol man blong oli kasem trutok, i bitim we oli ridim ol buk mo magasin nomo.

I nidim eit aoa blong lukluk “Photo-Drama” ya. Plante taem oli seraotem i go long 4 haf. Insaed long hem, i gat 96 sot tok long Baebol. Wan man we plante man oli save voes blong hem, i ridimaot ol tok ya. Long plante haf, i gat miusik tu. Ol brata oli yusum ol gramafon blong plei ol tok mo miusik we oli rikodem finis. Mo long semtaem, oli soem ol slaed pija we oli gat kala, mo pija blong ol man we oli aktem ol stori blong Baebol.

Oli pem plante pija mo slaed we oli wokem long glas long sam kampani blong wol. Ol man blong droem pija, we oli stap long Philadelphia, New York, Paris, mo London, oli pentem ol pija wanwan long ol slaed. Ol brata long Betel, we wok blong olgeta i  blong pentem ol pija, olgeta tu oli pentem plante pija. Mo oli jenisim ol slaed we oli brok tu. Antap long ol pija we oli pem, oli tekem plante pija blong ol memba blong famle blong Betel, we oli aktem Ebraham, Aesak, mo enjel we i blokem Ebraham blong i no kilim boe blong hem olsem wan sakrefaes. Oli mekem samting ya long Yonkers, Niu Yok.—Jen. 22:9-12.

Wan brata we i wok wetem Brata Russell i tokbaot “Photo-Drama” ya long ol man we oli raetem niuspepa, i se bambae “sinema ya i pulum tingting blong plante taosen man i go long Baebol, i bitim eni samting we oli yusum bifo blong tijim ol man long Baebol.” ?Olsem wanem? ?Ol lida blong skul oli glad taem ol Baebol Studen oli traehad blong mekem trutok i kasem plante man we oli wantem tumas ol save blong God? Nogat. Ol lida blong ol skul we oli talem se oli Kristin, oli agensem “Photo-Drama.” Samfala oli yusum ol trik blong blokem ol man blong oli no lukluk sinema ya, mo samfala oli talem stret long ol man se oli no mas lukluk. Long wan ples we ol brata oli soem sinema ya, wan kaonsel blong jos i katem lektrik.

Nating se i olsem, fulap man oli kam lukluk “Photo-Drama,” we i fri nomo. Long Amerika, evri dei oli go long klosap 80 taon blong soem sinema ya. Plante man oli neva bin luk wan sinema we ‘i gat saon blong hem.’ Oli soem ol foto wanwan we oli mekem i pas kwik, nao ol man oli luk se i olsem muvi. Tu haf blong sinema ya, hemia wan smol faol we sloslo i stap kamaot long eg, mo wan flaoa we i stap open. Mo tu, oli yusum ol save we ol saentis oli faenemaot finis, blong makem gud bigfala waes blong Jehova. Olsem we yumi talem finis, taem wan man i luk pija blong Brata Russell long stat blong sinema ya, hem i talem se: “!Man ya i olsem Brata Russell nomo! !Yes, hemia Brata Russell ya!”

Wan man blong raetem buk blong histri blong ol sinema, i talem se “Photo-Drama” i “faswan long ol bigfala sinema we i gat saon, ol pija oli muvmuv, mo ol slaed oli gat kala.” Sam sinema we oli kamaot bifo long “Photo-Drama,” oli gat sam long ol samting ya, be i no evriwan, speseli ol sinema we oli tokbaot Baebol. I no gat plante man we oli wajem ol narafala sinema. Be long fas yia nomo we oli soem “Photo-Drama,” i gat bitim naen milian man long Not Amerika, Yurop, Ostrelia, mo Niusilan, we oli kam wajem.

Faswan long ol taem we oli soem “Photo-Drama,” hemia long 11 Jenuware 1914, long New York. Seven manis afta, Wol Wo Wan i stat. Nating se i olsem, fulap man long olgeta ples long wol oli wajem “Photo-Drama.” Ol pija we oli soemaot ol blesing blong Kingdom, oli leftemap tingting blong olgeta. !Yes, long yia 1914, “Photo-Drama” i wan samting blong sapraes stret! !Hem i winim ol narafala sinema bifo!