KARON nga tuig ang ika-100 nga anibersaryo sugod sang ginpagua ang “Photo-Drama of Creation,” ang pelikula nga gindesinyo para palig-unon ang pagpati sa Biblia subong Pulong sang Dios. Sang tion nga nagluya ang pagtuo sang madamo tungod sa ebolusyon, higher criticism, kag mga pangduhaduha, ginpakilala sang “Photo-Drama” si Jehova subong Manunuga.

Si Charles T. Russell, nga nagadumala sa mga Estudyante sang Biblia, padayon nga nangita sing pinakamaayo kag pinakamadasig nga paagi sa pagpalapnag sang kamatuoran sa Biblia. Ginagamit na sang mga Estudyante sang Biblia ang naimprinta nga mga publikasyon sa sulod sang sobra tatlo ka dekada. Karon may bag-o naman sila nga paagi nga napensaran—ang pelikula.

Sang katuigan 1890, ginpasalida sa publiko ang mga pelikula nga wala sing tunog. Sang 1903, may isa na ka relihioso nga pelikula nga ginpasalida sa simbahan sa New York City. Gani, nagaumpisa pa lang ang paghimo sang mga pelikula sang 1912, sang maisugon nga ginsugdan ni Russell ang paghimo sang “Photo-Drama.” Narealisar niya nga ini nga paagi sang komunikasyon makapahayag sang kamatuoran sa Biblia nga indi mahimo sang naimprinta nga publikasyon.

Ang walo ka oras nga presentasyon sang “Photo-Drama,” nga sa masami ginapasalida sa apat ka bahin, may 96 ka malip-ot nga rekording sang mga pamulongpulong sa Biblia nga ginsaysay sang bantog nga humalambal upod ang isa sa kilala nga mga tingog sadto nga tion. May klasikal nga musika sa madamo nga eksena. Ang sagad nga mga opereytor nagapatokar sang mga tingog kag musika sa ponograpo, nga ginadungan sa de-kolor nga mga slide kag salida sang bantog nga mga sugilanon sa Biblia.

Ang kalabanan nga kuha sang pelikula kag kristal nga mga slide naghalin sa komersial nga mga estudyo. Ang propesyonal nga mga artist sa Philadelphia, New York, Paris, kag London manomano nga nagdrowing sa tagsa ka kristal nga mga slide kag mga film. May mga grupo man sa Art Room sang Bethel nga nagahimo sing mga drowing, sa masami para islan ang nabuka  nga mga slide. Magluwas sa ginbakal nga mga film, ginkuhaan man ang mga miembro sang pamilya Bethel sa Yonkers, New York, samtang ginatungdan nila ang papel ni Abraham, Isaac, kag ang anghel nga nagpugong kay Abraham sa paghalad sa iya anak.—Gen. 22:9-12.

Ang upod ni Brother Russell nagsiling sa media nga ini nga paagi “makakuha sang interes sang linibo ka tawo sa Kasulatan, labaw pa sa bisan ano nga ginhimo sadto sa pagpauswag sang relihion.” Malipay ayhan ang klero sa sining maayo nga panikasog para malab-ot ang mga ginagutom sa espirituwal? Sa kabaliskaran, ang mga ministro sang Cristiandad nagpakamalaut sang “Photo-Drama,” ang iban gani naggamit sing malimbungon ukon matampalason nga mga taktika para punggan ang publiko nga magtan-aw. Sa isa ka lokasyon, ginpautod sang mga ministro ang kuryente.

Pero, puno gihapon ang mga ginapasalidahan para sa libre nga pagtan-aw sang “Photo-Drama.” Sa Estados Unidos, naglab-ot sa 80 ka siudad ang nagapasalida sini kada adlaw. Madamo ang nagdayaw sang una nila nga nakita ang ‘pelikula nga may nagahambal.’ Paagi sa time-lapse photography, nakita nila ang paggua sang piso sa itlog kag ang matahom nga pagbuskag sang bulak. Ang ginpakita nga mga impormasyon sa siensia nagapadaku sang dalayawon nga kaalam ni Jehova. Subong sa ginsambit sa umpisa, sang nakita si Brother Russell sa pelikula nga nagapakilala sang “Photo-Drama,” ang isa ka tumalan-aw nakasiling, “Daw si Brother Russell gid ang iya hitsura sangsa kay Brother Russell mismo!”

Ang awtor kag historian sang pelikula nga si Tim Dirks naglaragway sa “Photo-Drama” subong ‘una nga daku nga salida nga nagadungan ang tunog (narekord nga hambal), nagahulag nga eksena, kag de-kolor nga mga slide.’ Ang mga pelikula nga ginhimo pagkatapos sang “Photo-Drama” nag-ilog sang pila ka teknik sini pero indi tanan sa isa lang ka pagpasalida, ilabi na gid kon ang tema halin sa Biblia. Kag wala na sing may makalabaw pa sa kadamuon sang tumalan-aw. Ang kabilugan nga nagtan-aw sa Aminhan nga Amerika, Europa, Australia, kag New Zealand naglab-ot sa siam ka milyon sa una pa lang nga tuig!

Ang “Photo-Drama” una nga ginpasalida sang Enero 11, 1914, sa New York City. Pagligad sang pito ka bulan natabo ang daku nga kinagamo nga gintawag sang ulihi nga Bug-os Kalibutan nga Inaway I. Pero ang mga tawo sa bilog nga kalibutan padayon nga nagatipon para magtan-aw sing “Photo-Drama,” bangod nalugpayan sila nga makita ang maathag nga mga eksena kon mag-abot na ang mga pagpakamaayo sang Ginharian. Para sa tuig 1914, wala na sing mas talalupangdon nga salida sangsa “Photo-Drama.”