IRUẸRU MAI ERỌ OKE NỌ U KPEMU

Oware nọ O Bọ Ẹrọwọ Ahwo Ga nọ U Kri te Ikpe 100 No

KPORO

“O wọhọ ẹsenọ whọ be ruẹ Brọda Russell evaọ otọ ovao dhe ovao.”—Ere ọzae jọ nọ o riwi ifimu “Photo-Drama” na ọ ta evaọ ukpe 1914.

ENUKPE nana o gba ikpe udhusoi (100) nọ a ro dhesẹ ifimu ọ “Photo-Drama of Creation” na evaọ orọ ọsosuọ riẹ, o jọ ifimu ọrọ iwoho nọ i wo ekọlọ gbe edo ikporakporo nọ a ru re ahwo a ruẹsi fi ẹrọwọ họ Ẹme Ọghẹnẹ, Ebaibol na. Evaọ oge ọyena nọ ẹrọwọ ahwo ọ jọ whrehe kpobi no fiki ahwo nọ a jẹ wọso Ẹme Ọghẹnẹ, yọ otujọ o bi wuhrẹ nọ Ọghẹnẹ ọ ma eware he na, ifimu ọ “Photo-Drama” na u je whowho kẹ akpọ nọ Jihova ọ ma eware kpobi.

Charles T. Russell nọ ọ jẹ rẹrote iruẹru Emọ-Uwuhrẹ Ebaibol oke yena, ọ jẹ gwọlọ edhere nọ ọ mai woma nọ ovuẹ Ebaibol na o sai ro te ahwo oma vẹrẹ vẹrẹ. Evaọ oke yena yọ Emọ-Uwuhrẹ Ebaibol na a rehọ ẹkwoma ebe ikere ta usiuwoma vrẹ ikpe 30 no. Rekọ a te duku edhere ọkpokpọ jọ nọ a re ro ru onana; iwoho nọ a ru fihọ ifimu.

USIUWOMA OTA ẸKWOMA IWOHO IFIMU

Etoke ikpe 1890 iwoho nọ a ru fihọ ifimu e rọ romavia. Evaọ ukpe 1903, ichọche jọ o dhesẹ ifimu otiọnana evaọ New York. Fikiere evaọ ukpe 1912 nọ Russell o ro mu ifimu ọ “Photo-Drama” na họ ẹruẹrẹhọ, yọ iwoho nọ a re ru fihọ ifimu oghẹrẹ utiona e jẹ romavia obọ. Russell ọ ruẹ nọ edhere ọkpokpọ nana o ti fi obọ họ kẹ ahwo riẹ uzẹme Ebaibol na vi ẹsenọ a tẹ be jọ ebe ọvo se ai.

Ifimu ọ “Photo-Drama” na o rẹ rehọ euwa eree, yọ u wo abane. Oniọvo jọ nọ o wo emamọ uvou ọ kẹ evuẹ Ebaibol nọ i bu te 96 nọ a rekọdo lele iwoho na. Ikporakporo i lele abọ sa-sa ighe na. Inievo nọ e riẹ egramafonu ekporo ziezi a rẹ thahe egramafonu na evaọ oghẹrẹ nọ ovuẹ na, hayo edo ikporakporo na o re ro kiehọ okenọ iwoho ikuigbe Ebaibol na e be rọ romavia.

“A jariẹ dhesẹ iwoho nọ i kiekpahe okenọ a ro mu eware họ ẹma rite ekuhọ Esuo Odu Ikpe Kristi.”—F. Stuart Barnes, nọ ọ jọ ikpe 14 evaọ ukpe 1914

Iwoho jọ nọ a dhesẹ evaọ ifimu na yọ enọ a dẹ mi ahwo nọ a rẹ drọ eware. Ahwo nọ a no obọ Philadelphia, New York, Paris, gbe London ze nọ a wo onaa nọ a rẹ rọ drọ eware a rehọ obọ ralọ iwoho nọ a drọ fihọ ighẹgbe nọ a ro ru ifimu na. Inievo nọ e rrọ Ẹko-Iruo Ebẹtẹle nọ o rẹ rẹrote iwoho a drọ iwoho fihọ ighẹgbe buobu re, yọ a je nwene ighẹgbe nọ e raha kpobi. U te no iwoho nọ a dẹ no, inievo nọ e rrọ Ebẹtẹle ru iruo a kpohọ ẹwho jọ nọ ọ kẹle New York nọ a re se Yonkers nyai ru edrama Abraham nọ ọ jẹ te rehọ Aiziki dhe idhe nọ ẹnjẹle ọ jẹ whaha iẹe, yọ a bi vidio rai.—Emu. 22:9-12.

Inievo nọ i wuhrẹ epanọ a re kporo egramafonu ziezi, a jẹ rọ egramafonu kporo evuẹ nọ i bu te 26, je dhesẹ iwoho nọ a ru fihọ ighẹgbe nọ i bu te egba isoi (500)

Oniọvo jọ nọ ọ jọ ogbẹnya Brọda Russell ọ ta kẹ egba-iyẹrẹ-enẹ inọ ifimu nana “u ti ru ahwo buobu wo isiuru kpahe Ebaibol na vi eware efa kpobi nọ ahwo a rọ daoma gwọlọ wha iwuhrẹ egagọ haro no evaọ okenọ u kpemu.” Kọ edhere owoma nana nọ Emọ-Uwuhrẹ Ebaibol a gwọlọ ro fi obọ họ kẹ ahwo riẹ uzẹme Ebaibol na o were isu egagọ? Vievie. Ukpoye, isu egagọ Kristẹndọm a jẹ wọso ifimu ọ “Photo-Drama” na, yọ a jẹ tubẹ rehọ ẹghẹ whaha ahwo re a siẹe ba eriwo. Osu egagọ jọ avọ ahwo riẹ a bru ikpẹ oria jọ nọ inievo na a jẹ jọ dhesẹ ifimu na.

Inievo-emetẹ nọ i no ikoko sa-sa ze nọ e jọ eruẹrẹahwohọ evaọ etoke ughe na a jẹ kẹ ahwo emebe evẹvẹ wọhọ iprogramo nọ i wo iwoho abọ sa-sa ọrọ ifimu ọ “Photo-Drama” na

A kẹ ahwo nọ a nyaze ti rri ughe na kpobi ebaje nọ a kere “Pax” fihọ, avọ uwoho orọ okenọ Jesu ọ jọ ọmaha. Ebaje na o jẹ kareghẹhọ ohwo kpobi nọ ọ sa riẹ mu nọ u fo re ọ jọ “ọmọ udhedhẹ”

Ghele na, ahwo a jẹ hai su vọ iwou isinima sa-sa nyai rri “Photo-Drama” na ọvọvẹ. A jẹ jọ ewho nọ i bu te 80 dhesẹ ifimu na kẹdẹ kẹdẹ evaọ America. Oyena o jọ orọ ọsosuọ nọ ahwo buobu a rọ ruẹ ifimu nọ a rẹ jọ ta ẹme. A jariẹ dhesẹ epanọ arifẹ o bi ro no eva eke ze, gbe epanọ ododo ọboba ọ be rọ ghahọ. Abọ ifimu na nọ a jọ ta kpahe otokiẹ-eriariẹ u dhesẹ epanọ areghẹ Jihova o kpehru te. Wọhọ epanọ ma fodẹ evaọ obọ emuhọ na, ohwo jọ nọ ọ ruẹ Brọda Russell nọ ọ rrọ evaọ ifimu na ta ẹme taure uzedhe ughe “Photo-Drama” na o te ti muhọ, ọ ta nọ: “O wọhọ ẹsenọ whọ be ruẹ Brọda Russell evaọ otọ ovao dhe ovao!”

EDHERE OBỌDẸ NỌ A RO WUHRẸ AHWO EBAIBOL

Edẹ 11 amara Ọvo ọrọ ukpe 1914 o jọ orọ ọsosuọ nọ a rọ jọ obọ New York rri ifimu ọ “Photo-Drama” na evaọ uwou isinima nana nọ Emọ-Uwuhrẹ Ebaibol na a wo oke yena

Ogbiku jọ nọ a re se Tim Dirks nọ ọ rẹ ta eme kpahe ifimu je kere ebe ọ ta nọ ifimu “Photo-Drama” na họ “ifimu ọsosuọ nọ a ru nọ u wo edo ikporakporo gbe ẹme, avọ iwoho ekọlọ iwoma nọ e riẹe.” Evaọ ifimu sa-sa nọ ahwo a ru no taure inievo na a te ti ru “Photo-Drama” na, a ru eware nana kpobi fihọ ọvuọvo rai oke ovona ha, maero kọ enọ a jọ ta kpahe Ebaibol. Yọ ọvuọvo ifimu yena ọ rrọ họ nọ ahwo nọ a rri rie a bu vi otu nọ o rri “Photo-Drama” na. Ahwo nọ a rri rie evaọ North America, Europe, Australia, gbe New Zealand a bu te ima izii (9,000,000) evaọ ukpe ọsosuọ nọ a ro siobọnoi.

Edẹ 11 amara Ọvo ọrọ ukpe 1914 o jọ orọ ọsosuọ nọ a ro rri ifimu ọ “Photo-Drama” na evaọ New York. Emerae ihrẹ nọ i lele i rie, Ẹmo Akpọ I o te du lahwe. Rekọ ahwo buobu wariẹ akpọ na họ a gbe je kokohọ rri ifimu ọ “Photo-Drama” na ghele, yọ abọ sa-sa riẹ nọ a jọ dhesẹ eghale nọ Uvie Ọghẹnẹ o te wha ze, e jẹ kẹ ahwo uduotahawọ. Evaọ ukpe 1914, oware ofa nọ a re ro wuhrẹ ahwo nọ u woma te ifimu ọ “Photo-Drama” na o jọ họ.