RĨU nĩ mĩaka 100 kuuma rĩrĩa thenema ya “Photo-Drama of Creation” yoonanirio rita rĩa mbere. Muoroto wayo warĩ gũtũma andũ magĩe na wĩtĩkio harĩ Bibilia. Tondũ ihinda-inĩ rĩu wĩtĩkio wa andũ aingĩ nĩ wathũkĩtio nĩ maũndũ ta, ũrutani wa atĩ andũ mooimanire na nũgũ, na atĩ Bibilia nĩ ng’ano cia marimũ, thenema ĩyo ya “Photo-Drama” nĩ yatũgagĩria Jehova arĩ Mũũmbi.

Mũrũ wa Ithe witũ Charles T. Russell, ũrĩa watongoragia Arutwo a Bibilia, nĩ aacaragia mũno njĩra ĩrĩa ĩngĩarĩ na moimĩrĩro mega makĩria ĩteithie andũ aingĩ makinyĩrũo nĩ ma cia Bibilia. Arutwo a Bibilia maakoretwo makĩhũthĩra mabuku kũhunjia kwa ihinda rĩa mĩaka makĩria ma 30. Nĩ gwakinyire hĩndĩ makĩona atĩ no mahũthĩre thenema ĩrĩ njĩra ĩngĩ njerũ ya kũhunjia.

Mĩaka-inĩ ya 1890, andũ nĩ meeroragĩra thenema citaarĩ na mĩgambo. Gũkinyĩria mĩaka-inĩ ya 1903, thĩinĩ wa kanitha ũmwe taũni-inĩ ya New York City, nĩ kuoonanĩtio thenema yarĩ na maũndũ ma ndini. Nĩ ũndũ ũcio, 1912 rĩrĩa Russell aambagĩrĩria kũhaarĩria thenema ya “Photo-Drama,” gũtiarĩ na ũthii mũnene wa na mbere harĩ ũthondeki wa thenema. Nĩ onire atĩ kũhũthĩra thenema ĩyo nĩ kũngĩamateithirie gũtheremia ma cia Bibilia na njĩra nene gũkĩra mabuku marĩ moiki.

Thenema ĩyo ya “Photo-Drama” yarĩ ya mathaa manana. Yagayanĩtio icunjĩ inya iria ciarĩ na mĩario mĩkuhĩ 96 ya Bibilia. Mĩario ĩyo yathomagwo nĩ mwaria ũmwe woĩkaine gũkorũo arĩ na mũgambo mwega mũno mahinda-inĩ macio. Icunjĩ nyingĩ cia thenema ĩyo ciatwaranaga na tũrwĩmbo tũtarĩ na ciugo. Ariũ a Ithe witũ marĩ na ũmenyeru maahũraga tũrwĩmbo twa kĩnanda, tũgwatarana na mũgambo wa mũndũ ũrĩa wathomaga mĩario ĩyo na ningĩ na mbica cia ng’ano cia Bibilia thĩinĩ wa thenema ĩyo.

Mbica nyingĩ cia thenema ĩyo cioimaga kũrĩ ahũũri a mbica cia biacara. Acori a mbica marĩ na ũmenyeru mũnene kuuma Philadelphia, New York, Paris, na London, maacoraga mbica icio icicio-inĩ. Ariũ a Ithe witũ kuuma Rũhonge-inĩ rwa Gũcora rwa Betheli o nao nĩ maarutaga wĩra mũingĩ wa gũcora, na kaingĩ nĩ maacenjagia icicio iria ciakua. Makĩria ma mbica  iria ciagũragwo, ariũ na aarĩ a Ithe witũ kuuma Betheli nĩ maahũragwo mbica marĩ taũni-inĩ ya Yonkers, New York, magĩthaaka icunjĩ cia Bibilia cia Iburahimu, Isaaka, na mũraika ũrĩa wagirĩrĩirie Iburahimu kũruta mũriũ wake igongona.—Kĩam. 22:9-12.

Mũndũ ũmwe maarutithanagia wĩra na Mũrũ wa Ithe Witũ Russell eerire andĩki a mohoro atĩ njĩra ĩyo, nĩ “ĩngĩagucĩrĩirie andũ ngiri nyingĩ mende ũhoro wa Bibilia gũkĩra njĩra ĩngĩ o yothe yahũthĩrĩtwo hau mbere gũtheremia maũndũ ma ndini.” Hihi atongoria a ndini nĩ maakenirio nĩ njĩra ĩyo njerũ ya gũcaria andũ aingĩ arĩa maarĩ na ng’aragu ya kĩĩroho? Aca. Atongoria a ndini iria ciĩĩtaga cia Gĩkristiano nĩ maamenereirie mũno thenema ĩyo ya “Photo-Drama.” Amwe o na nĩ maahũthagĩra njĩra cia ũrambu na cia ũtũrĩka nĩguo magirĩrĩrie andũ merorere. Kũrĩ hĩndĩ ĩmwe kĩama kĩa atongoria a ndini kĩabangire thitima ya kũrĩa thenema ĩyo yoonanagĩrio ĩrengwo.

O na kũrĩ ũguo, andũ aingĩ mũno nĩ maaiyũraga thĩinĩ wa nyũmba cia kuonanĩria thenema nĩguo merorere “Photo-Drama” hatarĩ marĩhi. Thenema ĩyo nĩ yoonanagio thĩinĩ wa taũni ta 80 o mũthenya thĩinĩ wa Amerika. Eroreri aingĩ nĩ maagegaga mũno tondũ rĩarĩ riita rĩao rĩa mbere kuona ‘thenema ĩrĩ na mũgambo.’ Mbica iria cioonanagio irũmanĩrĩire na ihenya nĩ ciateithagia andũ kuona gacui gagĩtũrĩkio kuuma itumbĩ-inĩ, na ningĩ makoona ihũa rĩgĩthundũra. Ũhoro ũrĩa woĩkaine hĩndĩ ĩyo wa sayanisi nĩ woonanagia ũũgĩ wa magegania wa Jehova. Nĩkĩo ta ũrĩa hagwetetwo kĩambĩrĩria-inĩ gĩa gĩcunjĩ gĩkĩ, rĩrĩa mwĩroreri ũmwe onire Mũrũ wa Ithe Witũ Russell thĩinĩ wa thenema ĩyo ya “Photo-Drama” akĩnyita andũ ũgeni merorere, oigire ũũ: “Ndietĩkagia ũcio nĩ mũrũ wa Ithe witũ Russell!”

Mwandĩki na mũtungi wa thenema wetagwo Tim Dirks oigire atĩ “Photo-Drama” “nĩyo yarĩ thenema ya mbere nene gũthakwo ĩrĩ na mbica na mĩgambo.” O na gũtuĩka nĩ kuoonanĩtio thenema ingĩ mbere ya “Photo-Drama,” gũtirĩ yoonanĩtio ĩrĩ na mbica na mĩgambo hamwe, na gũtirĩ yoonanĩtio ĩrĩ na ũhoro uumĩte Bibilia-inĩ. Mwaka wa mbere tu kuuma yambĩrĩria kuonanio, yeroreirũo nĩ andũ milioni kenda thĩinĩ wa America ya Rũgongo, Rũraya, Australia, na New Zealand. Gũtirĩ thenema ĩngĩ yeroreirũo nĩ andũ aingĩ ũguo hau mbere.

Thenema ĩyo yoonanirio rĩa mbere Janũarĩ 11, 1914, taũni-inĩ ya New York City. Thutha wa mĩeri mũgwanja, nĩ kwagĩire na Mbaara ya Mbere ya Thĩ ĩrĩa yarehire ũgarũrũku mũnene. O na kũrĩ ũguo, andũ aingĩ thĩinĩ wa thĩ, no maathiaga mbere na gũcemania makerorera “Photo-Drama.” Tondũ yarĩ na mbica thaka cioonanagia irathimo iria ikaarehwo nĩ Ũthamaki, nĩ yamomagĩrĩria. Hatarĩ nganja, thenema ya “Photo-Drama” yarĩ na ũguni mũnene mũno mwaka-inĩ wa 1914.