INALAD DAAN IRAN KOLEKSION MI

100 Taon ya Istorya na Pananisia

I-PLAY

“Mas kalupa ni nen Brother Russell ’tan ay nen say si Brother Russell ya mismo!”—Sakey ed saray akabantay ed “Photo-Drama” nen 1914.

SAYAN taon so koma 100 ya anibersaryo na unonan impangipalabas ed “Photo-Drama of Creation,” say agnalinglingwanan ya pelikulan ginawa pian ombiskeg so pananisia ed Biblia bilang Salita na Dios. Diad saman a panaon ya makapkapuy so pananisia na dakel a totoo lapud bangat ya ebolusyon, panagkritiko ed Biblia, tan panduaruwa, impakabat na “Photo-Drama” si Jehova bilang say Amalsa.

Si Charles T. Russell, ya angidaulo ed saray Estudyante na Biblia, et lanang ya manaanap na sankaepektiboan tan sankapelesan ya paraan pian nipaamtad dakel a totoo so katuaan a walad Biblia. Diad saman et masulok ya taloran dekada lan mangiimprinta iray Estudyante na Biblia na saray publikasyon. Balet natan et akanonot iray balon paraan—say pangusar na pelikula.

PANGIPULONG ED EBANGHELYO PANAMEGLEY NA PELIKULA

Nen 1890’s, wala la ray pelikulan anggapoy sound. Nen bandad gapo na 1903, walay pelikulan nipaakar ed relihyon ya impalabas diad sakey a simbaan ed New York City. Kanian kagapo-gapo ni labat na industriyay pelikula nen inggapo nen Russell so preparasyon parad “Photo-Drama” nen 1912. Naisip to ya diad satan et nipasabi ed totoo so katuaan ed Biblia diad paraan ya agnagawaan na niimprintan publikasyon.

Diad ami-amin et waloy oras so “Photo-Drama,” balet inapag ed apatiran parte. Kaibad satan so 96 ya antirikey a nirekord a paliwawa ed Biblia ya insalaysay na sikat ya espiker a kabkabat so boses to ed saman a panaon. Wala ray ombabansag ya klasikal a musika ed dakel ya eksena. Marundunong iran operator so mangipi-play ed akarekord iran boses tan musika diad phonograph, tan ibabansag day sounds ed saray de-kolor ya slides tan panangiyakto ed saray kabkabat ya istoryad Biblia.

“Impanengneng toy manlapud impamalsa na saray bitewen anggad maglorian panampot na Sanlibon Taon ya Uley na Kristo.”—F. Stuart Barnes, 14 años to nen 1914

Maslak ed saray eksena tan glass slides et ginawad saray commercial studio. Wala ray propesyonal ya artist ed Philadelphia, New York, Paris, tan London ya sansasakey dan impinta iray glass slides tan film. Dakel met so impinta na saramay mantratrabahod Art Room ed Bethel, ya sasalatan da ray aderal ya slides. Likud nid saramay eksenan ginawad commercial studio, nan-shooting met iray Bethelite diad Yonkers, New York, tan inyakto da iray karakter di Abraham, Isaac, tan samay anghel ya pinigilan toy Abraham ya ibagat so anak to.—Gen. 22:9-12.

Pinanbabansag na saray marundunong ya operator so impangipresenta na duaran milya ya film, 26 ya rekord ed phonograph, tan manga 500 ya glass slides—amin et dugaruga so timing to

Imbaga na kaiba nen Brother Russell ed saray reporter ya lapud sayan pelikula et “mas nasagyat ed Kasulatan so libo-libon totoo no ikomparad antokaman ya ginawa na relihyon nensaman.” Kasin naliketan iray lider na relihyon ed sayan balon paraan pian niiter so pankaukolan na saray totoon narasan ed espiritual? Aliwan ontan so agawa, ta kinondena na saray ministro na Kakristianoan so “Photo-Drama.” Angusar ni ra ingen na maamot odino arap-arapan iran paraan pian ag-itan nabantayan na publiko. Diad sakey ya pangipalabasan komon na satan et impapultot na asosasyon na saray ministro so koryenti.

Saray usherette ed saray kongregasyon et angiter na minilyon ya kopya na bokletan wala ray litrato ton nanlapud “Photo-Drama”

Saramay nambantay et inikdan met na “Pax” pin ya walay litrato ton ugaw ya Jesus. Ipapanonot na satan ya kaukolan ya magmaliw iran “anak na kareenan”

Anggaman ontan, siansia nin napapano na totoo iray teatro pian bantayan so “Photo-Drama” ya libre. Diad United States, nipapalabas so “Photo-Drama” ed anggad 80 ya syudad kada agew. Dakel ya akabantay so mankelaw ed anengneng dan pelikula ya ‘walay boses to.’ Lapud time-lapse photography et abantayan da so impusnak na siwsiw tan say balibalin imbuskag na rosas. Indanet na saray impormasyon ed science so makapadinayew ya karunongan nen Jehova. Singa abitlad gapo, nen anengneng na sakey a nambantay si Brother Russell ya mansasalita ed screen, imbaga ton ‘mas kalupa ni ’tan nen Brother Russell nen say si Brother Russell ya mismo!’

AGNAPARAAN ED SAMAN A PANAON

Unonan impalabas so “Photo-Drama” nen Enero 11, 1914, diad sayan balibalin teatro ed New York City ya diad saman a panaon et gawa ni na International Bible Students Association

Deneskribe na author tan film historian a si Tim Dirks so “Photo-Drama” ya “say sankaunaan ya pelikulan walay ombabansag ya sound (akarekord iran boses), onggagalaw iran litrato, tan makolor iran slides.” Wala la ray pelikulan angusar ed sarayan teknik antis na “Photo-Drama,” balet agda nausar ya amin ed saksakey ya pelikula, lalo la no Biblia so tema to. Tan anggapo lay miparad karakel na akabantay ed satan—ami-amin et manga siameran milyon diad North America, Europe, Australia, tan New Zealand diad unonan taon ni labat!

Unonan impalabas so “Photo-Drama” nen Enero 11, 1914, diad New York City. Kayari pitoran bulan sinmabi so Sankamundoan a Guerra I. Balet siansia nin oonla ray totoo pian manbantay na “Photo-Drama,” tan naliligliwa irad mararakep iran eksena na saray onsabin bendisyon na Panarian. Nen 1914, anggapo lan talagay arum ya pelikulan makapipara ed “Photo-Drama.”