TEIA te mataiti no te akamaaraanga i te 100 mataiti mua o te “Photo-Drama of Creation,” e tua teia tei akaariia mai na roto i te teata tei maaniia ei akaketaketa i te akarongo i roto i te Tuatua a te Atua, te Pipiria. I roto i tetai tuatau tei riro te irinaki i roto i te au mea tupu ua mai, te tu akaapaapa e te ekoko, ei takino i te akarongo o te manganui, kua rauka i te “Photo-Drama” i te akangateitei ia Iehova, Tei Anga mai i te au mea katoa.

Kare roa a Charles T. Russell, tei arataki i te Aronga Apii Pipiria, i akamutu ana i te kimi i tetai ravenga meitaki roa atu, e te viviki roa atu i te akatotoa i te tuatua mou o te Pipiria. Kua akamata ke ana te Aronga Apii Pipiria i te taangaanga i ta tatou au puka no tetai toru ngauru tuma mataiti. Teianei e ravenga ke mai ta ratou i kite​—e teata.

Akamataia te akaari i te teata muteki ki te katoatoa i te au mataiti o te 1890. I te akamataanga o te 1903, kua akaariia tetai teata akonoanga i ko i tetai are pure i New York. Te ou ua ra te angaanga taviri teata i te 1912, i akamata ai a Russell i te akapapa no te “Photo-Drama.” Kua kite aia e ka riro teia ravenga no te komunikeiti anga, ei akakite i te tuatua mou o te Pipiria na roto i te mataara te kare e rauka i te au puka anake ua i te rave.

E varu ora te roa i te teata “Photo-Drama,” e a tuanga me akaariia, e 96 apiianga Pipiria poto ua tei rekotiia, na tetai vaa tuatua kite meitaki i te tatau e te takataka meitaki tona reo, e tuatua mai. Kua kapitiia mai rai te akatangi imene ki roto i te au tuanga tukeke. Na te au taeake kua tereniia e akatangi mai i te rekoti o te reo e te imene i runga i te ponikarapu, e te akaaiteite i te reira kia tano te tangianga ki te tutu karakara, e te akatutuanga o te au tua Pipiria.

Te maataanga o te ripene teata e te au tutu karakara i runga i te au vaanga io, no ko mai i te au ngai taviri teata. Na te aronga kite i te taviri teata i Philadelphia, New York, Paris, e London, i toro tataki tai i te au tutu ki runga i te au vaanga io, e te au ripene teata. Na te au pupu angaanga i roto i te Pia Toro Tutu i Betela, i toro i te maataanga o te tutu, e i monomono i te au tutu tei kino. Kapiti atu ki te au ripene tei okoia  mai, kua neneiia tetai au mema o te pamiri Betela ki roto i te teata i Yonkers, tetai oire i New York, ia ratou e akatutu maira ia Aberahama, Isaaka, e te angera tei arai ia Aberahama kia kore e akaatinga i tana tamaiti.​—Gene. 22:9-12.

Akakite tetai oa o te Taeake Russell ki te nuti pepa e, ko teia ravenga “te ka akakeu i te inangaro o te tangata i roto i te au Tuatua Tapu, i runga roa atu i tetai ua atu mea tei raveia ana i te au tuatau i topa, i te akatotoa i te karere a te akonoanga.” Ka ariki ainei te au arataki akonoanga i tetai ravenga ou kia taeria te manganui e pongi maira i te pae vaerua? Kare, kua akaapa pakari te au orometua o Kerititome i te “Photo-Drama,” e kua kimi ratou i tetai au ravenga kikite e te akama kore, i te arai i te tangata kia kore takiri e kite i te reira. I ko i tetai ngai e akaariia ra te teata, kua maani tetai taokotaianga o te au orometua kia tamateia te uira.

Noatu ra, e ki ua ana te au are teata i te aronga akarakara i te “Photo-Drama” kare e tutaki. I Marike, taeria te 80 oire maata i te ra okotai, e akaariia ana te “Photo-Drama” i reira. Umere tikai te manganui ua atu o te aronga akarakara, i to ratou kite anga no te taime mua i te ‘teata ka akarongoia te komakoma.’ Na roto i te au tutu e akaari vivikiia maira tetai e tetai, kua akara ratou i te punua moa e paopao ra i te anga ua moa kia ngaa mai aia ki vao, e tetai tiare e puera marie ua maira. Kua akakite pu ua mai te kite taieni o taua tuatau ra i to Iehova pakari maata. Mei tei taikuia i te akamataanga, i te akara anga tetai tangata i te ­Taeake Russell e akamarama maira i te “Photo-Drama,” kua manako rai aia e, “a te Taeake Russell rai te Taeake Russell!”

Akataka mai a Tim Dirks, te tangata tata puka no runga i te tuatua enua o te angaanga maani teata e, ko te “Photo-Drama” te “teata mua tei kapitiia mai te au tuatua tei rekotiia, te ripene teata e oriori ra te tangata, e te tutu karakara.” Te au teata tei taviriia i mua ake i te “Photo-Drama,” kua taangaanga ana i teia au ravenga e toru, inara kare i rauka ana i te taangaanga i teia au ravenga pouroa i roto i te teata okotai, i tetai teata tikai e akaari maira i tetai tumu manako Pipiria. Kare okotai mei teia te maata i te aronga akarakara, tei taeria te iva mirioni​—i Marike Tokerau, Europa, Autireria, e Nu Tireni i roto i te mataiti mua!

Akaariia te “Photo-Drama” no te taime mua i roto ia Tianuare 11, 1914, i New York. E itu marama i muri mai, tupu te tumatetenga tei kapikiia e ko te Tamaki 1 o te Ao. Inara kua aere mai rai te au urupu takapini i teianei ao i te akarakara i te “Photo-Drama,” e kua rauka te pumaana i te akara anga i te au tutu manea o te au akameitakianga o te Patireia. Noatu eaa taau apinga ka akaaite atu i te mataiti 1914, ko te “Photo-Drama” rai te mea umeremere roa atu.