A TE tausaga tenei e fakamailoga ki ei te 100 tausaga mai te taimi muamua ne pei ei te “Photo-Drama of Creation,” se ata loa ne faite ke ati aka ei te fakatuanaki ki te Tusi Tapu e pelā me ko te Muna a te Atua. I te vaitaimi telā ne matafitafi ei te fakatuanaki o tino e tokouke ona ko te tali‵tonu ki te evolusione, te lasi o fakamaseiga, mo te fui tali‵tonu o tino, ne fakamaluga ne te “Photo-Drama” a Ieova e pelā me ko te Mafuaga.

Ne salasala faeloa a Siale. T. Lasalo, telā ne takitaki ne ia a Tino A‵koga ki te Tusi Tapu, ki te ‵toe auala magoi kae vave e mafai ei o fakasalalau a muna‵tonu mai te Tusi Tapu. E silia atu i te tolusefulu tausaga ne fakaaoga ei ne Tino A‵koga ki te Tusi Tapu a ‵tou tusi kolā ko oti ne ‵lomi. Kae nei, ko isi se mea fou ko mafaufau latou ki ei ​—ko ata fai‵pati.

I te 1890 o fano ki mua ne kamata o fakaasi atu ki tino a ata faitāga e seai ne leo. I te kamataga o te 1903, ne pei se ata fakalotu i se falesa i Niu Ioki. A te pisinisi fai ata fai‵pati koi kamatamata fua i te 1912 i te taimi ne loto toa ei a Lasalo o kamata a fakatokatokaga ki te “Photo Drama.” Ne iloa aka ne tou tagata me e mafai ne te ata tenei o fakaoko atu a muna‵tonu mai te Tusi Tapu i te auala telā e se mafai ne tusi o fai.

Ne masani o pei a te “Photo Drama” tenei e valu itula te leva i vaega e fa, e aofia i ei a lāuga toe‵toe faka-te-Tusi Tapu e 96 kolā e fai ne se failauga lauiloa kae gali tena leo i te vaitaimi tenā. E uke a pese mua e olo tasi mo ata e uke. Ne faka‵tagi ne tāgata apo a leo mo pese i mea puke leo, o fakafetaui a leo ki ata lanu‵lanu kolā e se gasue‵sue kae fai a tāga o tala lauiloa i te Tusi Tapu.

A te ukega o mea kolā ne fai ki ei te ata mo ata sē gasue‵sue e uke ne aumai mai i pisinisi fai ata. Ne fakalanu‵lanu ne tino ‵poto i te ‵lomi ata i Filatelafia, Niu Ioki, Paris, mo Lonitona a ata sē gasue‵sue mo ata fai‵pati. Ne fai foki ne te potukau ga‵lue i te Potu ‵Lomi  Ata o te Peteli a te lasiga o te pēniga o ata, kae sui faeloa a ata sē gasue‵sue kolā ko ma‵sei. I tafa o ata kolā ne ‵togi mai, ne puke foki a ata o tino o te Peteli kolā ne fai ne latou a vaega o Apelaamo, Isaako, mo te agelu telā ne taofi ne ia Apelaamo mai te ofo tonu atu o tena tama mo fai te taulaga i Yonkers, Niu Ioki.​—Kene. 22:9-12.

Ne fai atu se taugasoa o te Taina ko Lasalo ki te kau fakasalalau tala me i te auala tenei o fesokotakiga ka “fia‵fia malosi ei a te fia afe o tino ki te Tusi Tapu, e silia atu i so se mea telā ko oti ne fai mō te gasolo ki mua o mea fakalotu i taimi ko ‵teka.” E mata, ne fia‵fia a faifeau ki se taumafaiga fou penā ke fakaoko atu te munatonu ki te vaitino kolā e fia‵kai i te feitu faka-te-agaga? Ikai, me ne taku fakamasei ne faifeau o Fenua Lotu Kelisiano a te “Photo Drama,” ne fakaaoga foki ne nisi tino auala faitogafiti ke mo a e onoono a tino ki ei. I se koga e tasi, ne fai ne se potukau o faifeau ke tamate te iti.

E tigā te feitu tenā, ne ‵fonu eiloa te fale e fai ei a mea i tino e o‵mai o onoono i te “Photo Drama” kae seai se ‵togi. I te Iunaite Sitete, e nofo ki te 80 fa‵kai e fia‵fia ke pei ne latou te “Photo Drama” i aso takitasi. Ne ofo a te tokoukega o tino kolā ne ‵kilo ki ei me ko te taimi muamua ke lavea ne latou se ‘ata faipati.’ I te pukega o te ata ke gasuesue malielie, ne mafai ei o onoono latou ki se tamā moa e sikosiko te ufi o te fuamoa ke ulu mai a ia ki tua kae ne matala faka‵lei mai eiloa. Ne tavae ne fakamatalaga fakasaienisi i te vaitaimi tenā a te fakaofoofogia o te poto o Ieova. E pelā mo te mea ne taku mai i te kamataga, ne fai mai se tino e tokotasi telā ne kilokilo ki te ata o te Taina ko Lasalo e fakatomua mai ne ia te “Photo Drama,” i te failauga tenā “e pelā me ko kilo tonu eiloa koe ki a Lasalo!”

Ne fakamatala mai ne te tino tusitala ko Tim Dirks i te “Photo Drama” ko te “‵toe ata tāua eiloa ne pei telā e olo tasi mo leo, e gasue‵sue, kae fakaofoofogia a ‵lanu i ei.” Ne fakaaoga i ata mai mua atu o te “Photo Drama” a nisi auala konei kae e se ‵sae katoa i te taimi e tasi, maise eiloa māfai se ata faka-te-Tusi Tapu. Kae seai foki se ata ne tokouke ‵ki a tino i ei​—e nofo te aofaki ki se iva miliona i Amelika ki Saute, Eulopa, Ausetalia, mo Niu Sila i te tausaga muamua eiloa ne pei ei!

A te “Photo Drama” ne kamata o pei ki tino i a Ianuali 11, 1914, i New York City. E fitu masina mai tua ifo kae sae mai se fakalavelave telā ne taku fakamuli ifo me ko te Taua Muamua a te Lalolagi. Kae ne tumau eiloa a te vaitino e tokouke i te lalolagi o maopoopo fakatasi o onoono i te “Photo Drama,” e maua i ei a fakamafanafanaga mai i fakamanuiaga a te Malo i te taimi mai mua. Faitalia me se a te mea e faka‵tusa ne koe ki ei i te 1914, a te “Photo Drama” se fakatokaga fakaofoofogia eiloa.