UNYAMO ulo, o “Fotodrama da Criação” ya tẽlisa 100 canyamo, tunde eci ya lekisiwa onjanja yatete. Oyo, ya kuata ocimãho coku pamisa ekolelo liomanu Kembimbiliya okuti, olio Ondaka ya Suku. Kotembo yimue eci omanu valua va enda oku vetiyiwa oku tava kelongiso liokuti ovina via tukuluka ño, loku sepula ovina via sonehiwa, kuenda ekambo lioku kolela kovina via lulikiwa, kuenje, ekolelo liomanu valua lia honguele omo lialongiso aco. Pole, o “Fotodrama,” ya kuatisa omanu oku kũlĩha okuti, Yehova eye Ululiki.

Manji Charles T. Russell, una wa kuata ocikele coku songuila Vakuakulilongisa Embimbiliya, wa enda oku sandiliya olonjila via litepa, oco omanu va kũlĩhe ocili Cembimbiliya. Kotembo yaco, pa pitile ale ci pitahãla akũi atatu kanyamo tunde eci Vakuakulilongisa Embimbiliya va fetika oku kundila omanu lekuatiso lialivulu. Noke, va limbuka okuti, alitalatu a pondola oku kuatisa lonjanga omanu oku kuata ukũlĩhĩso Wondaka ya Suku.

Oku upisa kunyamo wo 1890, kua lingiwa esokiyo lioku lekisa komanu alitalatu vosinema. Kefetikilo liunyamo wo 1903, onembele yimue Volupale luo Nova Yorke, ya lekisa o filme yimue ya lombolola ovina viatiamẽla ketavo. Uloño woku lekisa alitalatu vosinema, wa fetika kunyamo wo 1912, eci manji Russell a kala oku pongiya o “Fotodrama.” Eye wa limbuka okuti, oku ci linga, ci pondola oku kuatisa lonjanga omanu oku kũlĩha ocili ci sangiwa Vembimbiliya okuti, oku va kundila lika lekuatiso lialivulu ci sule.

Kua lingiwile esokiyo lioku lekisa o “Fotodrama” vokuenda kuolowola ecelãla okuti, ya tepiwa volonepa vikuãla. Kuenje, kua yevalisiwa 96 kolonepa vitito violohundo viopiwa Vembimbiliya via ngalavaliwa londaka ya manji umue wa kũlĩhĩwile calua kotembo yaco. Volonepa viaco via ngalavaliwa, mua kongelele ovisikilo vimue via posoka. Osimbu manji umue wa loñoloha a sika ongalamafone, kua enda oku lekisiwa oviluvialuvia vi kuete avala a posoka, kuenda o filme yimue yi lombolola ovolandu Embimbiliya.

Olofilme vialua kumue lalitalatu aco, via enda oku landiwa volonjo violomĩlu. Kolofeka vimue ndeci ko Filipina, ko Nova Yorke, ko Paris, kuenda ko Londres, kua kala omanu vamue va loñolohele koku panga olofilme, kuenda alitalatu, lonjila yimue ya litepa. Ko Betele, kua kalavo vamanji va talavaya Voseketa yoku panga Alitalatu okuti, va kuatelevo uloño woku linga upange waco. Olonjanja vimue, va enda oku piñainya alitalatu a nyõleha oku lekisa olofilme viaco. Ndaño okuti vamanji va enda oku landa olofilme vimue, pole, vamanji vamue ko Betele, va enda oku upiwa alitalatu ocipepi locikanjo co Yonkers, volupale luo Nova Yorke. Osimbu vamanji vopiwa alitalatu aco, va linga ocindekaise ca Avirahama wa ambata omõlaye Isake, locimãho coku u ponda, oco a linge ocilumba. Pole, ungelo umue o tateka elinga liaco.—Efet. 22: 9-12.

Ekamba limue lia Manji Russell, lia sapela locisoko cimue covingungu viasapulo hati: “Oku lekisa olofilme vi kuete alitalatu, ci kuatisa omanu valua oku lekisa onjongole Kovisonehua, okuti ovoloño akuavo a kuamiwa latavo ci sule.” Anga hẽ asongui vatavo esanda va pandiya alikolisilo a vamanji oku kuatisa omanu valua va yonguile oku kuata ukũlĩhĩso Wondaka ya Suku? Sio, ka va ci lingile. Momo, asongui vosi Vatavo Esanda va sandiliya onjila yoku tateka oku lekisiwa kuo “Fotodrama.” Onjanja yimue, usongui umue wetavo liesanda, wa tepa olofiyu vi eca ocinyi oco omanu ka va ka tale o filme yaco.

Ndaño lovitangi viaco, pole, omanu valua veyile oku tala o “Fotodrama” ocali. Ci soka 80 kalupale kofeka yo Estados Unidos, omanu valua va tala o filme yo “Fotodrama.” Omanu vaco va komõha poku mola onjanja yatete ohundo va yeva ‘vo filme yaco.’ Ovina va tala lekuatiso lialitalatu, via va kuatisa oku tala ndomo omõla wosanji a kala oku tunda vesala, kuenda ndomo olonelẽho vi fetika oku telẽha. Ovolandu aco a situlula uloño u komohĩsa wa Yehova. Ndomo ca lomboluiwa kefetikilo liocipama cilo, omunu umue wa komõha, eci a mola manji Russell wa kala oku popia olondaka vioku fetika o “Fotodrama.” Kuenje, wa sima okuti, Manji Russel hayeko wa kala vo filme yaco.”

Ulume umue ukuoloño wolofilme o tukuiwa hati Tim Dirks, wa popia hati: “O Fotodrama, oyo o filme yatete ya lekisiwa lalitalatu okuti mu yevala olondaka, kuenda avala a litepa.” Ndaño okuti omanu va enda oku tala olofilme mua kongela ovoloño amue, pole, o “Fotodrama” ya litepele calua, momo ya lombolola ovina viatiamẽla Kembimbiliya. Handi vali, ya litepelevo lolofilme vikuavo, momo eci ya lekisiwa Konano yo Amerika, ko Europa, ko Australia, kuenda ko Nova Zelandia, vunyamo umosi, ya muiwa lolohuluwa ecea komanu!

O filme yo “Fotodrama” ya lekisiwa onjanja yatete volupale luo Nova Yorke, keteke 11, kosãi ya Susu, yunyamo wo 1914. Noke yolosãi epanduvali, kueya ocilunga cimue ci tukuiwa hati, Uyaki Watete wa Pita Voluali Luosi. Ndaño lovitangi viaco, pole, omanu kolonepa viosi violuali va amamako oku tala o “Fotodrama,” momo, ovina va mola viatiamẽla kasumũlũho Usoma wa Suku u ka nena, via va lembeleka calua. O “Fotodrama” ya lekisiwa kunyamo wo 1914, oyo lika ya lembeleka ovitima viomanu.