ṊAṄWAHA ndi ṅwaha wa vhu-100 tshee ha sumbedzwa lwa u tou thoma “Photo-Drama of Creation,” ine ya vha filimu ye ya itelwa u khwaṱhisa lutendo Ipfini ḽa Mudzimu, Bivhili. “Photo-Drama” yo imelela Yehova sa Musiki tshifhingani tsha musi lutendo lwa vhathu vhanzhi lwo tshinyadzwa nga pfunzo ya uri zwithu zwo sokou bvelela na u sasaladza Bivhili.

Charles T. Russell, we a vha e murangaphanḓa wa Vhagudi vha Bivhili, o vha a tshi dzula a tshi ṱoḓa nḓila dzi bvelelaho vhukuma na dzi ṱavhanyaho dza u phaḓaladza ngoho ya Bivhili. Vhagudi vha Bivhili vho fhedza miṅwaha i fhiraho mahumi mararu vha tshi khou shumisa khandiso dzashu. Zwino vho vha vha tshi ṱoḓa u shumisa nḓila ntswa: ine ya vha dzifilimu.

Nga vho-1890 vhathu vho thoma u sumbedzwa filimu dzi si na maipfi. Mathomoni a vho-1903, ho sumbedzwa filimu ya zwa vhurereli kha iṅwe kereke ya ngei Ḓoroboni ya New York. Ho vha hu si kale filimu dzo thoma musi Russell a tshi vha na tshivhindi a tshi thoma u lugiselela “Photo-Drama” nga 1912. O zwi ṱhogomela uri wonoyu mufuda wa vhudavhidzano wo vha u tshi ḓo ḓivhadza ngoho ya Bivhili u fhira dzikhandiso.

Filimu ya awara dza malo ya “Photo-Drama,” ye ya vha i tshi anzela u sumbedzwa nga zwipiḓa zwiṋa, yo vha i tshi sumbedza nyambo pfufhi dza 96 dza Bivhili dze dza vha dzi tshi anetshelwa nga tshiambi tshi ḓivheaho tshi re na ipfi ḽavhuḓi ḽa u rekhoda. Zwifanyiso zwinzhi zwo vha zwi tshi tshimbidzana na muzika wa classic. Vhahashu vha re na vhukoni vho vha vha tshi lidza rekhodo dza maipfi na muzika kha giramaphoni, vha tshi ita uri mubvumo, dzi-slide na filimu dza mafhungo a Bivhili o ḓoweleaho zwi tshimbidzane.

Vhunzhi ha dzifilimu na dzi-slide dza ngilasi zwo vha zwi tshi itwa zwitudio zwa shango. Vhomakone kha zwa u ola vha ngei Philadelphia, New York, Paris, na London vho tou ola dzi-slide dza ngilasi na dzifilimu, nga tshithihi nga tshithihi. Zwigwada zwa vhashumi Muhashoni wa Bethele wa Zwa U Ola zwo vha zwi tshi ita mushumo munzhi wa u ola, kanzhi zwi tshi lugisa dzi-slide dzo pwasheaho. Nga nnḓa ha dzi-slide dze dza tou rengwa, miraḓo ya muṱa wa Bethele yo fodiwa ngei  Yonkers, New York, he ha vha hu henefho tsini, i tshi khou tamba zwipiḓa zwa Abrahamu, Isaka na muruṅwa we a thivhela Abrahamu uri a si ite murwa wawe tshiṱhavhelo.—Gen. 22:9-12.

Iṅwe khonani ya Wahashu Russell yo vhudza vha zwa u anḓadza mafhungo uri enea maitele a vhudavhidzano o vha a tshi ḓo ita uri vhathu vhanzhi vha vhe na “dzangalelo kha Maṅwalo, [u fhira] naho tshi tshini tshe tsha itwa u itela u anḓadza zwithu zwa vhurereli tshifhingani tsho fhiraho.” Naa vhafunzi vho vha vha tshi ḓo khoḓa honovhu vhuḓidini vhuswa ha u swikelela vhathu vha re na nḓala ya lwa muya? Zwo fhambanaho na zwenezwo, vhafunzi vha ḽa Vhudzhagane vho sasaladza “Photo-Drama,” vha tshi ita na u shumisa maano a vhukwila a u thivhela vhathu uri vha songo i vhona. Huṅwe fhethu, vhafunzi vho ita uri muḓagasi u dzimiwe.

Naho zwo ralo, vhathu vho vha vha tshi ḓa nga vhunzhi dziholoni u itela u ṱalela “Photo-Drama” nga mahala. Kha ḽa United States, ḓuvha ḽiṅwe na ḽiṅwe ho vha hu tshi sumbedzwa “Photo-Drama” ḓoroboni dzi swikaho 80. Vhaṱaleli vhanzhi vho mangalaho vho vha vha tshi khou tou thoma u vhona ‘muvi u re na maipfi.’ Zwinepe zwo vhekanywaho nga tshifhinga zwi sumbedzwaho nga luvhilo, zwo ita uri vha kone u ṱalela tshikukwana tshi tshi bva nga ngomu ha gumba, na luvha ḽi tshi khou vulea. Mafhungo a lwa saintsi a misini yeneyo o sumbedza vhuṱali vhuhulwane ha Yehova. Samusi zwo bulwa mathomoni, musi muṅwe muṱaleli a tshi vhona Wahashu Russell kha tshikirini a tshi khou ambelela “Photo-Drama,” o amba uri, “Ngoho Wahashu Russell o tou bva o tou ralo!”

Tim Dirks, ane a vha muṅwali na muḓivhazwakale wa dzifilimu o ṱalusa “Photo-Drama” sa “filimu khulwane ine khayo mubvumo (maipfi o rekhodiwaho) wa tshimbidzana na zwifanyiso zwi tshimbi-tshimbilaho, na dzi-slide dza ngilasi dzi re na mivhala.” Filimu dze dza itwa nga phanḓa ha “Photo-Drama” dzo vha dzi tshi shumisa maṅwe a enea maitele, fhedzi dzi sa sumbedzi dzi-slide dzoṱhe nga tshifhinga tshithihi, zwihuluhulu dzine dza amba nga ha Bivhili. Nahone a hu na ye ya vha i na vhaṱaleli vhanzhi—vhane vha swika milioni dza ṱahe ngei Amerika Devhula, Yuropa, Australia, na New Zealand nga ṅwaha wa u tou thoma!

“Photo-Drama” yo sumbedzwa lwa u tou thoma nga ḽa 11 January, 1914, ngei Ḓoroboni ya New York. Nga murahu ha miṅwedzi ya sumbe ho mbo ḓi thoma Nndwa ya Shango ya U Thoma. Fhedzi magogo u mona na shango o bvela phanḓa a tshi kuvhangana u itela u ṱalela “Photo-Drama,” a tshi khuthadzwa nga zwifanyiso zwayo zwavhuḓi zwa phaṱhutshedzo dza Muvhuso dzine dza ḓo ḓa. Filimu ya “Photo-Drama” yo vha tshithu tshi swayeaho vhukuma nga 1914.