INI nga tuig amo an ika-100 nga anibersaryo han siyahan nga iginpasalida an “Photo-Drama of Creation,” usa nga maiha na nga salida nga gindisenyo ha pagparig-on han pagtoo nga an Biblia amo an Pulong han Dios. Ha mga panahon nga nagluya an pagtoo han damu tungod han katutdoan han ebolusyon, duro nga kritisismo, ngan mga pagruhaduha, an “Photo-Drama” nakabulig ha pagpamatuod nga hi Jehova amo an Maglalarang.

Hi Charles T. Russell, nga nanguna ha mga Estudyante han Biblia, padayon nga namiling hin pinakaepektibo ngan pinakamadagmit nga paagi basi maipasamwak an mga kamatuoran ha Biblia. Ha sulod hin sobra tulo ka dekada, epektibo nga gin-gagamit na han mga estudyante han Biblia an nakaimprinta nga mga publikasyon. Yana may bag-o nga butang nga nakadani han ira atensyon​—salida.

Han dekada 1890, siyahan nga iginpakita ha publiko an salida nga waray nagyayakan. Temprano han 1903, usa nga salida mahitungod ha relihiyon an iginpasalida ha usa nga singbahan ha New York City. Salit han 1912 han gintikangan ni Russel an pagpangandam para ha “Photo-Drama,”diri pa la maiha an industriya han pelikula. Nahunahuna niya nga maipapasamwak hini an kamatuoran ha Biblia ha paagi nga diri mahihimo han nakaimprinta nga mga publikasyon.

An walo ka oras nga “Photo-Drama,” nga kasagaran iginpapasalida ha upat ka bahin, may-ada 96 nga haglipot nga nakarekord nga pahayag mahitungod ha Biblia nga ginyakan hin usa nga mamumulong nga popular gud hadto an tingog. Damu nga eksena an ginduduyogan hin klasikal nga mga musika. Pinaagi han ponograpo, ginpapatokar han eksperto nga mga operator an nakarekord nga mga tingog ngan musika, igindudungan ito ha de-kolor nga mga slide ngan mga salida han igindrama nga pamilyar nga mga istorya ha Biblia.

Kadam-an han mga film footage ngan damu nga salaming nga slide an ginpalit tikang ha mga estudyo. An salaming nga mga slide ngan an mga film mano-mano ngan usa-usa nga gindudrowingan han propesyonal nga mga artist ha Philadelphia, New York, Paris, ngan London. An mga nagtatrabaho ha Art Room ha Bethel nabulig  liwat ha pagdrowing, kasagaran nga hira an nagliliwan han naruba nga mga slide. Labot la ha ginpalit nga mga film footage, an mga Bethelite ginkukuhaan liwat ha kahirani nga Yonkers, New York samtang nag-aakting hira sugad nga Abraham, Isaac, ngan an anghel nga nagpugong kan Abraham nga ighalad an iya anak.​—Gen. 22:9-12.

An usa nga kaupod ni Brother Russell nagsiring ha media nga pinaagi hini nga Photo-Drama, “yinukot an [magigin] interesado ha Kasuratan, labaw pa ha anoman nga nahitabo nga pag-uswag ha relihiyon.” Nalipay ba an mga klero hinin daku nga pangalimbasog basi mabuligan adton mga gutom ha espirituwal? Kabaliktaran an nahitabo. Ginpakaraot han mga ministro han Kakristianohan an “Photo-Drama” ngan an pipira gumamit pa ngani hin tuso o direkta nga mga pag-atake basi paundangon an pagpasalida hito. Ha usa nga lugar, iginpautod han usa nga grupo han mga ministro an suplay han koryente.

Bisan pa hito, an mga teatro napuno la gihapon hin magkirita han libre nga pasalida nga “Photo-Drama.” Ha United States, umabot hin 80 nga syudad an nagpapasalida hito kada adlaw. Damu han magkirita an siyahan pa la nga pakakakita hin salida nga may nagyayakan. Pinaagi han time-lapse photography, nakita nira an usa nga napusa nga bonay nga may ginawas nga piso ngan an maopay nga pagbuklad han usa nga bukad. An mga eksena may kalabotan ha syensya nagpabug-at han urusahon nga kinaadman ni Jehova. Sugad han gin-unabi ha tinikangan, han nakita hi Brother Russel ha screen samtang iginpapakilala an “Photo-Drama,” ginhunahuna han usa nga magkirita nga an nagyayakan baga hin ‘mas kanawong ni Brother Russel kay ha kan Brother Russel mismo!’

Iginhulagway han usa nga awtor ngan historyador ha salida nga hi Tim Dirks an “Photo Drama” sugad nga “an siyahan nga pinakahilaba nga pelikula nga gintarampo an sound (nakarekord nga pahayag), salida, ngan de-kolor nga mga slide.” Antes hito, an nahiuna nga mga salida gumamit han pipira hini nga paagi, kondi diri tarampo ha uusa la nga salida, labi na kon mahitungod ito ha Biblia. Ngan mas damu an nagkita ha Photo-Drama, nga ha kabug-osan inabot hin mga 9 ka milyon ha North America, Europe, Australia, ngan New Zealand ha siyahan la nga tuig nga iginpasalida ito!

An “Photo-Drama” siyahan nga iginpasalida han Enero 11, 1914, ha New York City. Pito ka bulan katapos hito, nahitabo an usa nga daku nga kasamok nga ha urhi gintawag nga Girra ha Kalibotan I. Kondi damu nga tawo ha bug-os nga kalibotan an padayon pa gihapon nga nagkakatirok basi magkita han “Photo-Drama,” nga nakaliaw ha ira tungod han mag-opay nga mga eksena mahitungod han tiarabot nga mga bendisyon han Ginhadian. Han tuig 1914, an “Photo-Drama” amo an pinakamaopay nga salida.