UKAMPIS walja religionanakat mayachthapit organizacionankirinakajja, janiw ukham amuyapkiti. Interfaith Youth Core organización uttʼayir Eboo Patel sat chachajj akham sänwa: “Kawkïr religionas jan khuyaptʼayasirïki [...,] oraqe jan qʼañuchasiñapatakis jan chʼamachki [...,] jan katoqtʼasirïki uk uñachtʼayita” sasa.

Budistanakasa, catoliconakasa hinduistanakasa ukat musulmananakasa, awisajj jaqen derechonakap arjjatañatakisa, pisinkirinakar yanaptʼañatakisa, jan waltʼayir minanakan jan trabajapjjañapatakisa ukat oraqe, uma, samana jan qʼañuchasiñapatakis mayachtʼasipjjarakïnwa. Ukatjja, walja religionanakajj amuykiptʼañatakisa parlakiptʼañatakis tantachasipjjarakïnwa. Ukat ukjja, fiestanak lurasa, velanak naktayasa, musicanak toktʼasa ukat oracionanak lurasaw uñachtʼayapjje.

¿Religionanakajj mayachtʼasisati jan waltʼäwinakap askichapjjaspa? ¿Diosajj ukhamatti sumankañ utjayaspa?

Walja religionanakat mayachthapit mä organizacionajja, 76 markanakanwa tantachasipjjta ukat 200 religionanakat jilaw mayachtʼasipjjta sasaw jachʼañchtʼasi. Jupanakajj “sapüru ukat wiñayatak maynit maynikam yanaptʼasiñatakiw chʼamachasiñäni” sasaw amtawayapjje. Ukampis uka amtapajj janipuniw phoqasirjamäkiti. Amuytʼañataki, uka organización uttʼayirinakan arunakaparjamajja, yaqhep religionanakaru gruponakaru chuym jan ustʼayañatakejj wali amuyumpiw leyinakap qellqawayapjjäna. ¿Kunatsa? Kunattejj janiw taqenipunejj Diosan sutip uka documentonakan uñstañap munapkänti. Ukatwa Diosat jan aytasjjañ amtawayapjjäna.

Diosat jan parlasjjaspa ukhajja, ¿religión utjañapajj wakisiskaspati? ¿Uka mayachtʼat religionanakajj janit jaqenakar yanaptʼir mayni organizacionanakjamäkaraki? Ukatwa qalltan parlaniwayktan uka organizacionajj religionat jan uñtʼatäpkiti, jan ukasti jupanakkam maynit maynikam yanaptʼasiñatak organizacionäpkaspas ukham uñtʼatakïpjje.

Religionanak mayachtʼañatak chʼamañchir Dalai Lama sat chachajj akham siwa: “Taqe religionanakaw munasiñata, khuyapayasiñata ukat perdonasiñat parlapjje. Ukat ukham suma jaqëñajj wali wakiskiriwa” sasa.

Cheqas munasiñasa, khuyapayasiñasa, perdonasirïñasa wali wakiskiriwa. Jesús pachpaw wali uñtʼat arstʼäwipan akham säna: “Kunjämtï jumanakajj  jaqenakampi uñjatäñ munapktas ukhamarak jumanakajj jupanakar uñjapjjam” sasa (Mateo 7:12). Ukampis ¿cheqpach religionajj ukanak phoqañapakit wakisispa?

Apóstol Pablon arunakaparjamajja, uka tiempon waljaniw Diosar serviñ munapjjäna, ukampis ‘jupanakan Diosar munañajj janiw cheqpach amuytʼañjjankänti’. ¿Kunatsa? “Jupanakan munañanakaparjamakiw” Diosampejj katoqayasiñ munapjjäna (Romanos 10:2, 3). Ukat kuntï Diosajj jupanakar maykän ukjja janirakiw amuyapkänti, ukhamajj chʼamachasitapasa iyawsäwipasa inamayakïnwa (Mateo 7:21-23).

Jesusajj akham sänwa: “Kusisiñanïpjjew sumankayirinakajja” sasa (Mateo 5:9). Jesusajj kuntï yatiykäna ukarjamaw sarnaqäna, chʼajjwäwinak jan utjañapatakiw chʼamachasïna ukat sumankañ arunakwa taqenir yatiyäna (Mateo 26:52). Jupar istʼapkäna ukanakajj mä wawakiw munasiñampi kusisita jakasipjjäna (Colosenses 3:14). Ukampis ¿Jesusajj jaqenakaru mayachtʼañataki ukat sumankañ utjañapatakikit chʼamachasïna? ¿Yaqha religionanakampejj mayachasïnti?

Fariseonakana ukat saduceonakan pʼeqtʼirinakapajj jan sinttʼasisaw Jesusarojj arknaqapjjäna, ukat jiwayañ kunwa munapjjäna. Ukatwa Jesusajj “jupanakajj juykhu irpirinakäpjjewa” sasin arkirinakapar säna (Mateo 15:14). Ukhamajja, Jesusajj janiw jupanakampi mayachasiñ munkänti.

Walja maranak qhepatjja, Greciankiri Corinto markanwa mä cristian tamajj uttʼayasïna. Uka markanjja, kunayman markanakat jutïr jaqenaka ukat walja religionanakaw utjäna ¿Kunjamsa cristianonakajj uka taypin sarnaqapjjañapäna? Apóstol Pablojj akham sasaw jupanakar qellqäna: “Jan jumanakajj Tatitur jan iyawsirinakampejj chikachasipjjamti” sasa. Ukat akham sasaw amuytʼayarakïna: “¿Kunjämaraki Cristompi Supayampisti suman sarnaqasipjjaspasti? Jan ukajj ¿kunjämaraki mä iyawsiristi mä jan iyawsirimpejj chikachasispasti?” sasa. Ukat akham ewjjtʼarakïna: “Mistunjjapjjam jupanak taypita, jupanakat jitheqtapjjarakim” sasa (2 Corintios 6:14, 15, 17).

Ukhamasti, Bibliajj janiw taqe religionanakan mayachtʼasiñap maykiti. Inas akham jisktʼasta: “¿Kunjamataraki taqenisti mayachtʼat jakassnasti?” sasa.

Mä 15 markanakaw mayachtʼasisin Estación Espacial Internacional satäkis uk alajjpachan lurawayapjje, ukasti wali muspharkañawa. Kunjamsa lurasini ukanakat jan mä amtar puripkaspäna ukhajja, ¿uka Estación Espacial Internacional satäkis ukajj lurasispänti?

Walja religionanakat mayachthapit organizacionajj niya ukhamwa jikjjatasiraki. Maynit maynikam yanaptʼasiñasawa, respetasiñasawa sapkchisa, kunjamatsa mä wawaki Diosar servipjjaspa uka toqet janiw ni mä amtarus purirjamäpkiti. Ukatwa qʼoma sarnaqañ toqetsa, Diosar yupaychañ toqetsa mayj mayja amuyasin chʼajjwapjje.

Ukampis kuntï Diosajj munki ukajj Bibliankiwa, ukaw Jupar serviñatakisa, sum jakasiñatakis yanaptʼistu. Ukarjam sarnaqerinakajja, walja askinakwa jikjjatapjje, yaqha markatäpchisa yaqha religionatsa jutapkchejja mayachtʼatäpjjewa, ukat Diosar mayachtʼata serviñwa yateqawayapjje. Uka toqet Diosajj akham sänwa: ‘Taqe markanakaruw mä qʼoma aru churä ukhamat mä wawaki Diosar servipjjañapataki’ sasa. Ukhamajja, taqeni mä qʼoma aru parlapjjatapata, mä arunjja, Diosan arunakaparjam sarnaqapjjatap laykuw mayachtʼatäpjje (Sofonías 3:9, NM; Isaías 2:2-4).

Jehová Diosan Qhanañchirinakapajja, jupanakampi Tantachasiñ Utapan tantachtʼasiñamatakiw jawstʼapjjtam. Ukhamat kunjamsa mä wawaki mayachtʼatäpjje uk juma pachpa uñjañamataki (Salmo 133:1).