IWE nge, a sókkóló meefien chókkewe mi álisatá chiechifengenin sókkópaten lamalam. Eboo Patel, ewe chón poputááni ewe mwicheich itan Interfaith Youth Core (Chiechifengenin Sáráféén Sókkópaten Lamalam), a erá pwe ese wor eú lamalam “ese aúcheani ewe napanap tong . . . ese ekieki usun túmúnúéchún fénú . . . ese aúcheani awasélaéchú aramas.”

Ewer fán ekkóch, chón ekkewe lamalamen Buddha, Katolik, Pirostan, Hindu, Muslim me pwal ekkóch, ra achocho le angangfengen pwe repwe ataweei mwelele, campaign ren túmúnún aramas seni eriáfféú mwáál, ren fférún allúk epwe pinei ireirelóón pakutang fán pwúl, are ren túmúnún fénú me sáát me masouer kewe. Ekkewe sókkópaten lamalam ra mwichfengen pwe repwe alapaaló ar apéchékkúlafengeniir me weweitifengeniir. Ra férifengeni apwapwaan ar kewe lúkú mi sókkópat, ren ar mwichfengen, kél, iótek, ettina kantel me metakkan.

Án ekkewe lamalam chiechifengen, ina met epwe ataweei tipefesen lefilen lamalam? Itá án ekkewe lamalam chiechifengen, ina alen án Kot epwe atoto ewe sókkun fénúfan mi múrinné?

Eú watteen mwicheich fán iten álillisfengenin ekkewe sókkópaten lamalam, a erá pwe ekkewe chón fiti ena mwicheich ra feito seni 200 som sókkun lamalam lón 76 fénú. A apasa pwe ra achocho le “ápéchékkúla án sókkópaten lamalam angangfengen, ewe sókkun angangfengen epwe nómottam me fiffis iteiten rán.” Nge ena mettóch a weires an epwe pwénútá. Áwewe chék, chón túmúnú ena mwicheich ra erá pwe ra fókkun túmúnúéchú met sókkun kapas repwe néúnéú lupwen ra makkeei ar kewe allúk pwe rete asonga ekkewe sókkópaten lamalam ra sainei ena taropwe. Pwata? Áwewe chék, ra tipefesen ika epwe mak ewe kapas Kot lón néúr na taropwe. Iwe, ra apwúngaló ar resap waalong ewe kapas Kot are fós usun lón néúr na taropwe.

Iwe, ika rese fós usun Kot, epwe met lamoten án emén lúkú? Pwal och, ifa usun ena mwicheichen sókkópaten lamalam a sókko seni ekkewe sókkun mwicheich ra kan achocho le álisi ekkewe mi osupwang lón pekin aion? Ina popun, ena mwicheich a áweweei pwe esap iir eú mwicheichen lamalam, nge fen eú sókkun mwicheich mi kan eririfengeni aramas.

Dalai Lama, emén mi iteféúló chón álisatá chiechifengenin sókkópaten lamalam, a apasa: “Meinisin ekkewe eérenien lamalam mi chéúló wóón fénúfan, a chék léllé met ra menlapei. Ra menlapei tong, kirekiréch me omusaaló tipis.” A pwal erá: “Ewe mettóch mi lamot,  ina ach sipwe pwáppwáratá ekkena napanap lón manawach iteiten rán.”

Pwúngún pwe ekkena napanap tong, kirekiréch me omusaaló tipis, ra fókkun aúchea. Iei eú allúk mi iteféúló Jesus a ngeni aramas: “Oupwe föri ngeni aramas usun mine oua mochen repwe föri ngenikemi.” (Mateus 7:12) Nge itá mi pwúng pwe lúkú mi enlet a chék wewe ngeni án emén ápéchékkúla féffér mi múrinné?

Iei met aposel Paulus a erá usun chómmóng aramas mi angang ngeni Kot lón an we fansoun: “Üa tongeni pwärätä usur, pwe ra fokun tiliken le angang ngeni Kot, nge ar tiliken le angang esap longolong won ar silei usun mine a let.” Pwata? “Resap silei usun mine Kot a föri, pwe aramas repwe küna pwüng me ren, nge ra fen sotuni usun ar repwe küna püsin ar pwüng.” (Rom 10:2, 3) Pokiten ese nóm rer ewe sile mi pwúng ren met Kot a mochen repwe féri, iwe a chék lamotongaw ar tinikken me lúkú.​—Mateus 7:21-23.

Jesus a erá: “Ra feiöch chon afisätä kinamwe.” (Mateus 5:9) Jesus a apwénúetá met a eáni afalafal ren an pesei aramas ar resap eáni féfférún akkachofesá me a uwei pwóróusen kinamwe ngeni aramas seni sókkópaten lamalam. (Mateus 26:52) Chókkewe mi etiwa minne a eáni afalafal ra chóni ewe mwichen aramas mi pinúkfengen ren ewe ririin tong mi fókkun péchékkúl. (Kolose 3:14) Nge, itá Jesus a chék achocho le eririfengeni aramas mi sókkópat nónnómun manawer pwe epwe wor kinamwefengen lefiler? Jesus a pwal fiti án ekkewe ekkóch aramas fel lón pwisin ar lamalam?

Néúwisin lón ekkewe pekin lamalamen Farisi me Satusi ra fókkun oput Jesus, ra pwal mwo nge kútta atun ar repwe nieló i. Met Jesus a féri? Jesus a ereni néún kewe chón káé: “Ousap ekieki usur! Ir chon chun.” (Mateus 15:14) Jesus ese mochen repwe chiechifengen me chókkana lón pekin lúkú.

Mwirin och fansoun, a poputá eú mwichefelin Chón Kraist lón Kriis, lón ewe telinimw Korint. Ina eú telinimw mi kon iteféúló ren chómmóngun lamalam me sókkópaten aramasen lón. Met ekkewe Chón Kraist lón ena leeni repwe féri? Iei met aposel Paulus a makkeei ngeniir: “Ousap rifengenikemi me chokewe resap lükü Kot.” Pwata? Paulus a áweweei: “Ifa usun än Kraist me Satan repwe tongeni tipeeufengen? Ika met eman chon lükü Kot epwe eänifengeni me eman esap lükü?” Mwirin, a ngeniir ei éúréúr: “Oupwe towu seniir o aimwükemiila seniir.”​—2 Korint 6:14, 15, 17.

A ffat pwe ewe Paipel ese tipeeú ngeni án sókkópaten lamalam repwe chiechifengen. Nge neman kopwe ekieki, ‘Iwe, ifa usun an epwe wor wesewesen tipeeúfengen lefilen aramas?’

Mi wor efóch watteen spaceship fán láng mi amwarar itan International Space Station mi pwellifeili fénúfan. Engol me nimu som fénú ra álillisfengen le féri. Met meefiom, ena angang epwe tongeni pwénútá ika ekkena sókkópaten fénú rese etipeeúfengen wóón anapanapan are eú minen kaúk repwe fiti?

Ina met a pwal fis iei ren ekkewe mwicheichen sókkópaten lamalam mi chiechifengen. Inaamwo ika ra kan apéchékkúla ar repwe álillisfengen me súfélfengen, nge rese tongeni tipeeúfengen wóón ewe minen kaúk repwe áeá ren minne repwe lúkú. Ina popun, lúkúen eú me eú lamalam ren minne mi pwúng me mwáál, me ar kewe afalafal a chúen etipefeseni aramas.

A mak lón ewe Paipel án Kot kewe allúk, iir ra usun chék ewe minen kaúk. Sia tongeni manaweni manawach me ren met Paipel a apasa. Chókkewe mi etiwa met Paipel a apasa ra oturawu seni letiper ar lifilifil ngeni aramas mi sókkóló ar lewo are ar lamalam me ra káé ifa usun repwe tipeeúfengen me kinamwefengen. Kot a fen oesini usun ena mettóch, a erá: “Mwirin, upwe siwili fósun chón ekkewe mwú ngeni eú fós mi limeliméch, pwe iir meinisin repwe kéri iten Jiowa, o angang ngeni fán tipeeú.” A wor tipeeúfengen lupwen aramas ra eáni ewe “fós mi limeliméch,” án Kot kewe allúk ren ifa usun sipwe fel ngeni.​—Sefanaia 3:9, NW; Aisea 2:2-4.

Chón Pwáraatá Jiowa ra fókkun etiwok óm kopwe feito ngeni ar we Leenien Mwich mi kkan ngeni leeniom. Me ikena ie, kopwe pwisin kúna amwararen ar nónnóm fán tipeeú me kinamwe.​—Kölfel 133:1.