SINEMBARGO, esnan cu ta partidario di union entre tur religion tin un punto di bista full diferente. E fundador di e organisacion Interfaith Youth Core, Eboo Patel a puntra: “Bisa mi cua religion no ta haya cu compasion ta algo importante ..., no ta interesa den cuida medioambiente ..., no ta interesa den mustra hospitalidad.”

Si, tanto budista, catolico, protestant, hindu, moslim, como hopi otro religion a yega di uni forsa pa combati pobreza, lucha pa derechonan humano y pa prohibi uzo di mina (explosivo dera bou di tera) of hala atencion na problemanan di medioambiente. Varios religion ta bin hunto pa busca manera pa compronde otro mihor y pa comparti nan ideanan cu otro. Nan ta celebra nan union mediante ceremonia cu bela, fiesta, musica, oracion y otro actividadnan.

E religionnan por soluciona nan conflictonan door di uni cu otro? Esaki ta e manera cu Dios kier haci e mundo un mihor luga pa biba?

Un di e organisacionnan di mas grandi cu ta promove union entre tur religion ta gaba cu e ta activo den 76 pais y cu su miembronan ta representa mas cu 200 religion. Su meta ta “pa promove cooperacion duradero y riba un base diario entre tur e religionnan.” Pero, no ta facil pa logra esey. Por ehempel, segun e fundadornan di e organisacion, nan mester a formula nan statuutnan di tal manera pa no ofende e tantisimo religionnan cu a firma e documento. Dicon? Un motibo ta cu no ta nan tur tabata di acuerdo pa menciona Dios den e documento. Pesey, nan a evita di referi na Dios sea directamente of indirectamente.

Si nan ta laga Dios keda afo, anto ta kico ta e diferencia entre un organisacion di union entre tur religion y un organisacion caritativo? Ta pesey e organisacion di union entre tur religion ya menciona ta bisa cu e no ta un entidad religioso, sino cu e ta un organisacion cu ta promove cooperacion.

E Dalai Lama, kende ta un personahe bon conoci pa e echo cu e ta promove union entre tur religion, a bisa: “Tur religion principal basicamente tin e mesun mensahe: pa mustra amor, compasion y pa pordona.” El a bisa tambe: “E cos importante ta cu e cualidadnan aki mester forma parti di nos bida di tur dia.”

Si, ta sumamente importante pa mustra amor, compasion y pa pordona. Hesus a duna nos un siñansa universal cu ta bisa: “Tur loke boso kier pa hende haci cu boso, boso tambe mester haci cu  nan.” (Mateo 7:12) Pero esey ta e unico cos cu bo ta spera di e religion berdadero? Esta cu e mester djis promove loke ta bon?

Den tempo di apostel Pablo, tabatin hopi hende cu tabata bisa cu nan ta sirbi Dios. Pero Pablo a bisa tocante nan: “Mi ta duna testimonio cu nan tin celo pa sirbi Dios, ma no segun conocemento exacto.” Kico tabata e problema? Pablo a sigui bisa: “Pasobra como cu nan no sa a base di kico Dios ta considera un hende husto, nan ta trata di demostra na nan manera cu nan ta husto.” (Romanonan 10:2, 3) Como cu nan no tabata sa exactamente kico Dios tabata kier pa nan haci, nan celo—y fe—tabata envano.—Mateo 7:21-23.

Hesus a bisa: “Feliz ta esnan pacifico.” (Mateo 5:9) Hesus a anima hende pa no uza violencia y a predica un mensahe di paz na hende di diferente religion. Y e mes tambe a practica loke el a predica. (Mateo 26:52) Esnan cu a acepta su mensahe a bira parti di un hermandad cu ta uni den un laso inkebrantabel di amor. (Colosensenan 3:14) Pero Hesus su meta tabata simplemente pa promove cooperacion entre hende di diferente religion pa asina nan por biba na paz cu otro? Hesus a uni cu otro hende den nan actividadnan religioso?

E lidernan religioso di e secta di e fariseonan y di e saduceonan a persigui Hesus cruelmente y hasta a busca manera pa mat’e. Con el a reacciona? Hesus a bisa su discipelnan: “Laga nan. Ta guia ciego nan ta.” (Mateo 15:14) Pues, Hesus no a promove union religioso cu e tipo di hendenan ey.

Poco tempo despues, un congregacion cristian a keda estableci na Corintio (Grecia). E ciudad ey tabata bon conoci pa su gran variedad di religion y cultura. Con e cristiannan di e ciudad ey mester a comporta nan mes den un ambiente asina? Apostel Pablo a mustra claramente cu nan no mester a participa den adoracion hunto cu otro hende. El a bisa: “Pasobra ki relacion husticia tin cu maldad? Of kico luz tin en comun cu scuridad? Ademas, ki harmonia tin entre Cristo y Belial [of, Satanas]?” Despues el a conseha nan: “Pesey, sali for di meymey di nan, y separa boso.”—2 Corintionan 6:14, 15, 17.

Pues, ta bisto cu Bijbel ta contra di union entre tur religion. Pero kisas bo ta puntra bo mes, ‘ta con anto hende por logra berdadero union?’

Mas o menos 15 nacion a uni hunto pa traha e International Space Station, un maraviya di tecnologia cu ta draai rond di planeta Tera. Bo ta kere cu e nacionnan ey lo a logra esey si nan no tabata di acuerdo cu otro encuanto ki diseño of mapa pa uza?

Basicamente, bo por compara esey cu e situacion di organisacionnan den nos tempo cu kier logra union entre tur religion. Aunke nan ta boga pa cooperacion y respet, toch nan no ta di acuerdo cu otro na moda di papia encuanto ki mapa pa uza como base pa nan fe. Como resultado, nan ta mas dividi cu nunca den asunto di doctrina y moralidad.

Bijbel ta contene Dios su normanan, cu ta manera e instruccionnan cu tin riba un mapa. Si nos laga e normanan ey guia nos, nos lo tin un mihor bida. Hende cu ta aplica loke Bijbel ta bisa ta vence prehuicio racial y religioso y ta siña traha hunto den paz y harmonia. Dios a profetisa esey na e siguiente manera: “Lo mi duna e pueblonan lipnan purifica, pa nan tur por invoca e nomber di SEÑOR, pa sirbie den un acuerdo.” (Sofonias 3:9) Na e idioma original “lipnan purifica” ta referi na un idioma puro, esta, Dios su normanan eleva di adoracion. Ta e idioma puro aki ta uni hende.—Isaias 2:2-4.

Testigonan di Jehova ta invita bo cordialmente pa bin bishita nan na un Salon di Reino cerca di bo cas pa bo mes mira e paz y harmonia remarcabel cu ta reina entre nan.—Salmo 133:1.