RELIGIONKUNATA hukllachay munaqkunan ichaqa huknirayta yuyaykunku. Eboo Patel runan huk institucionta hatarichirqan religionkunata hukllachananpaq, paymi nin: “Llapa religionkunan khuyapayayta [...,] yanapanakuyta [...,] kay pacha cuidaytapas yachachinku”, nispa.

Chay runaq nisqanman hina mayninpin budismo, católica, protestante, hinduismo, musulmán religionkunaqa hukllachakurqanku wakchayayta tukuchinankupaq, llapa runa derechoyoq kanankupaq, campokunapi bombakunata mana churanankupaq, hallp’a qhellichaytapas tukuchinankupaq. Huñunakuytapas ruwarqanku religionkuna parlarinankupaq, ruwallarqankutaq fiestakunata, chaypin llapanku velakunata rawrachirqanku, takirqanku, rezarqanku ima.

¿Atinkumanchu religionkuna hukllachakuyta? ¿Chaywanchu Dios kay pachaman allin kawsayta apamunqa?

Huk institucionmi willan 76 nacionkunapi 200 más religionkuna hukllachasqankuta. Paykunan ninku: “Llapa religionkuna yanapanakunankuta munayku”, nispa; chay ruwaymi ichaqa sasa karqan. Kay institucionta ruwaqkunaqa huk documentopi kamachikuykunata qelqashaqtinkun allinta yuyaykuspa ruwananku karqan. ¿Imaraykun? Religionkunata, huch’uy t’aqa religionkunatapas mana phiñachinankurayku. Astawanmi phiñakurqanku documentopi Diosta churayta munaqtinku. Chaymi chay documentopi Diosta mana churarqankuchu.

Manataq Diosmanta rimakunñachu chayqa, ¿imapaqñataq religionkunari hukllachakunkuman? ¿Manachu kaqlla kashan kay pachapi yanapakuq institucionkunawan? Chaychá kay institucionqa mana religionmanta institucion hinachu qhawarikun, aswanpas runakunata hukllachanapaq institucion hinan.

Dalai Lama sutiyoq runaqa munanmi religionkuna hukllachakunankuta, paymi nin: “Llapa religionkuna yachachinku munanakuyta, khuyapayanakuyta, pampachanakuyta ima. Chayman hina kawsayqa aswan importante imamantapas”, nispa.

Munanakuspa, khuyapayanakuspa, pampachanakuspa kawsayqa allinmi. Jesuspas nirqanmi:  “Imaynatachus runakunaq ruwanasuykichista munankichis, chhaynallatataq qankunapas paykunata ruwaychis”, nispa (Mateo 7:12). Ichaqa, ¿chayllatachu cheqaq religión yachachinan?

Apóstol Pabloq tiempopin askha runakuna Dios serviyta munarqanku, ichaqa manan paypa munasqanman hinachu servirqanku. Chaymi chay runakuna ‘imaynatachus Diosqa runata chaninchasqanta mana yachaspa, paykunaqa munayninkuman hina chaninchakuyta munarqanku’ (Romanos 10:2, 3). Diospi iñisqanku, payta serviy munasqankupas yanqapaqmi karqan, ¿imarayku? Diospa munayninta mana yachasqankurayku (Mateo 7:21-23).

Jesusmi nirqan: “Kusisamiyoqmi thak-kaypi kawsanapaq allipunachiqkunaqa”, nispa (Mateo 5:9). Jesusqa imaymana religionniyoq runakunatan yachachirqan thakpi kawsanankupaq, yachachisqanman hinataqmi kawsarqanpas (Mateo 26:52). Jesuspa yachachisqanta uyariqkunaqa huk familia hinan munanakuspa kawsarqanku (Colosenses 3:14). Ichaqa, ¿runakuna thakpi kawsanallankutachu Jesús munarqan? ¿Hukllachakurqanchu Jesús huk religionkunaman?

Fariseo, saduceo religionkunapi umalliqkunan Jesusta qatiykachaspa wañuchiyta munarqanku. ¿Imatan Jesús ruwarqan? Qatikuqninkunata nirqan: “Hina kashachun paykunaqa, ñawsata pusaqkunaqa ñawsallataqmi kanku”, nispa (Mateo 15:14). Jesusqa manapunin paykunawan hukllachakuyta munarqanchu.

Askha watakuna qhepamanmi Corinto llaqtapi cristianokuna huk iñiq t’aqata qallarichirqanku, chay llaqtapiqa askha religionkuna karqan imaymana costumbreyoq. Chhayna runakuna ukhupi, ¿imaynatan cristianokuna kawsananku karqan? Apóstol Pablon cartanpi nirqan chaypi kaq religionkunawan ama hukllachakunankupaq, nirqanmi: “Chaninkayqa mana chanin-kaywanqa manan hukllachakunmanchu. K’anchayqa laqhayaqwanqa manan tupachinkumanchu. Cristowan Satanaswanqa manan sonqota tupachinkumanchu”, nispa. Chaymi cristianokunata nirqan: “Paykuna ukhumanta lloqsiychis, paykunamanta t’aqakuychis”, nispa (2 Corintios 6:14, 15, 17).

Qhawarisqanchis hina Bibliaqa manan religionkuna hukllachakunantachu yachachin. Chhaynaqa yaqapaschá tapukunki: “¿Imaynapitaq runakunari hukllachakunkuman?”, nispa.

Wasita hatarichinapaqqa askha llank’aqkunata necesitakun. Sichus llank’aqkuna mana kaq planollatachu utilizanqaku chayqa, manan wasi hatarichiyta atinqakuchu.

Religionkunata hukllachayta munaq institucionkunaqa chhaynapin tarikunku. ¿Imarayku? Religionkunaqa yanapanakuymanta respetanakuymanta rimanku chaypas, manan acuerdopi churakunkuchu Diosta imayna servinamanta imayna kawsanamantapas.

Bibliapin kashan Diospa kamachikuyninkuna, chaykuna yanapawanchis Diosta servinanchispaq allinta kawsanapaqpas. Chayman hina kawsaqkunataqa manañan religionpas nitaq huk razamanta kasqankupas t’aqanachinchu, aswanpas huk nisqallan llank’anku. Diosqa willarqanña chhayna kawsanankuta, nirqanmi: “Suyukunaq sonqonta mosoqyachisaq, hinan llapallan ñoqa Señor Diosmanta mañakamuwanqaku, llapallan huk-nisqalla serviwanqaku”, nispa. Diospa kamachikuyninkunata kasukusqankuraykun huk nisqalla kawsanku (Sofonías 3:9; Isaías 2:2-4).

Jehová Diospa testigonkunaqa huk nisqallan thakpi kawsanku. Huñunakunanku Wasiman rispa kikiykipuni chayta rikumuwaq (Salmo 133:1).