YE OKO, azo so ayeda na tënë ti sarango beoko ti abungbi ti Nzapa abâ ti ala ye ni tongaso ape. Pakara Eboo Patel, so azia na sese mbeni bungbi ti sarango beoko ti abungbi ti Nzapa, atene: “Fa na mbi mbeni bungbi ti Nzapa so ayeke bâ mawa ti zo ape . . . , so tënë ti ngu na gbako na anyama agbu bê ti lo ape . . . , so ayeke mû ye na azo ape.”

Biani, a si ka so aBouddhiste, aCatholique, aProtestant, aHindou, aMusulman na ambeni mingi abungbi tere ti tiri na yere, ti bâ tënë ti droit ti azo, ti kanga lege na sarango kusala na asioni lê ti ngombe wala ti gboto lê na ndo ti tënë ti ngu na gbako. Mingi ni ka, atënë ti ala aluti na ndo ti ye so ala lingbi ti sara ti mä tere na popo ti ala nga ti hinga ye so ala doit ti sara. Ti fa angobo nde nde so ayeke na popo ti ala, ala yeke sara ka ambeni matanga so na yâ ni ala yeke zö abougie dä, ala yeke he abia, ala yeke sambela nga ala yeke sara ambeni ye nde.

Sarango beoko ti abungbi ti Nzapa la ayeke yorö ti akpale so ayeke na popo ti atënë ti mabe ti ala? A yeke ye so bê ti Nzapa aye la ti tene dunia aga nzoni?

Mbeni oko ti akota bungbi ni apika kate atene so amembre ti yâ ni ayeke ti abungbi ti Nzapa ahon 200 tongaso nga ala yeke na yâ ti akodoro 76. Bungbi ni so atene so nda ti bungbingo tere ti ala ni ayeke ti “sara si beoko ti abungbi ti Nzapa angbâ lakue ti maï.” Me, na bango ni, tënë ni so ayeke gi tënë ti yanga senge. Na tapande, ambeni zo ni so ayeke bâ lege ti abungbi ni atene so a sû atënë ti yâ ti ambeti ti ala ni na hange mingi, si bê ti ambeni bungbi ti Nzapa so asû maboko ti ala na gbe ni ason pëpe. Raison ni ayeke nyen? Na tapande, ambeni na popo ti ala aye ti tene a zia tënë ti Nzapa na yâ ti mbeti ni, me ambeni ake. A sara si mango tere ayeke na popo ti ala ape. Tongaso, ala kpe ti sara tënë ti Nzapa na yâ ti mbeti ni.

Tongana a zi Nzapa na yâ ni, ka nda ti sarango beoko ni so ayeke so wa? Nga, mara ti bungbingo tere ti abungbi ti Nzapa ni so ahon tere na asenge bungbi so azo asigigi na ni ti mû maboko na azo so ayeke na yâ ti akpale tongana nyen? Ndani la kota bungbi ni so e sara tënë ni fade, lo wani lo tene so lo yeke gi pëpe ti maï tënë ti Nzapa, me lo yeke gi ti maï tënë ti mango tere na popo ti abungbi ti Nzapa.

Dalaï-lama, mbeni zo so aye tënë ti sarango beoko ti abungbi ti Nzapa, atene: “Fango ye ti akota bungbi ti Nzapa kue aluti na ndo ti même tënë, so ayeke ti ndoye zo, ti bâ mawa ti zo nga ti pardone zo.” Lo kiri lo tene: “Kota ye ni ayeke ti tene na yâ ti gigi  ti e ti lango oko oko e duti na amara ti sarango ye ni so.”

Tâ tënë, asarango ye tongana ndoye, bango mawa ti zo nga na pardon ayeke biani akota ye. Na yâ ti mbeni ndia so azo ahinga ni mingi, Jésus atene: “Ye kue so ala ye azo asara na ala, a lingbi ala sara na azo ni nga.” (Matthieu 7:12). Me, tâ mabe ayeke gi mbeni ye so ayeke pusu azo ti sara gi ye ti nzoni, awe?

Lani, bazengele Paul asara tënë na ndo ti mingi ti azo so atene ala yeke voro Nzapa, lo tene: “Mbi yeke tene tënë ti ala, so ala yapu na kusala ti Nzapa, me a yeke na lege ti tâ hingango ye pëpe.” Ngbanga ti nyen? Paul akiri atene a yeke “ngbanga ti so ala hinga mbilimbili ti Nzapa pëpe, na ala yeke gi ti zia na sese mbilimbili ti ala wani.” (aRomain 10:2, 3). Teti so ala yeke pëpe na tâ hingango ye na ndo ti ye so Nzapa aku na mbage ti ala ti sara, kusala so ala yeke sara na yapungo tere nga na mabe ayeke gi senge ye.—Matthieu 7:21-23.

Jésus atene: “Ngia ayeke na ala so asara si siriri amaï.” (Matthieu 5:9). Lani, Jésus asara ye alingbi na aye so lo fa. Na tapande, lo wa azo ti sara ye ti ngangu na amba ti ala ape, nga lo fa tënë ti siriri na azo atâa ala yeke voro anzapa wa (Matthieu 26:52). Azo so ayeda lani na fango ye ti lo ni alï na yâ ti mbeni songo ti ndoye so a lingbi ti fâ yâ ni lâ oko ape (aColossien 3:14). Me ye so Jésus aye lani ayeke gi ti maï tënë ti mango tere na popo ti azo nde nde si ala duti na siriri? Lo yôro tere ti lo na yâ ti abungbi ti nzapa ni ti sara aye ti ala ni?

Lani, akota zo ti nzapa ti aJuif, so a iri ala aFarizien nga na aSadducéen ake tâ Jésus na bê oko, na ala gi même ti fâ lo. Jésus asara nyen? Lo tene na adisciple ti lo, lo tene: “Ala zia aFarizien so. Ala yeke awaziba so ayeke fa lege na amba ti ala.” (Matthieu 15:14). Jésus ake lani ti sara beoko na amara ti azo tongaso.

Ambeni ngu na pekoni, mbeni congrégation ti aChrétien abâ gigi na Corinthe, mbeni kota gbata ti Grèce. Na yâ ti gbata so abungbi ti Nzapa ayeke mingi. A-Chrétien so ayeke kâ ayeke sara tongana nyen na mara ti ndo tongaso? Bazengele Paul atene na ala: “Ala bungbi oko pëpe na azo so amä na bê pëpe na gbe ti joug oko.” Ndali ti nyen? Paul akiri atene: “Mango tere wa si atingbi Christ na Bélial [wala Satan]? Wala nyen si abungbi zo so amä na bê na zo so amä na bê pëpe?” Na pekoni, lo mû wango so, lo tene: “Tongaso ala sigigi na popo ti azo ni, ala duti nde.”—2 aCorinthien 6:14, 15, 17.

A yeke polele so Bible ake tënë ti sarango beoko ti abungbi ti Nzapa. Me, peut-être mo hunda tere ti mo, mo tene: ‘Ka azo ayeke sara tongana nyen ti tene tâ sarango beoko aduti na popo ti ala?’

Akodoro 15 tongaso abungbi tere ti leke mbeni ngangu satélite so ayeke ngoro na tere ti sese ti tokua asango. Mo pensé tongana ala mä tere pëpe na ndo ti plan ti kua ni, kua ti ala ni ayeke ga nzoni?

A yeke ye so asi laso na abungbi ti sarango beoko ti abungbi ti Nzapa la. Atâa so ala yeke yâ na nduzu tënë ti nengo mba nga na ti sarango kusala maboko na maboko, tâ mango tere na popo ti ala ayeke ti lo dä ape na ndo ti tënë ti mabe. Ye so asara si kangbi angbâ lakue na popo ti ala na ndo ti tënë ti sarango ye nga na atënë ti mabe ti ala.

Na yâ ti Bible, e yeke wara andia ti Nzapa so ayeke tongana ye so ayeke fa lege na e. Tongana e sara ye alingbi na aye so Bible atene, gigi ti e ayeke ga nzoni. Azo so asara ye alingbi na ni azia ti ke zo senge senge ndali ti mara ti lo wala ndali ti bungbi ti Nzapa ti lo. Nga, ala manda ti sara kua na yâ ti siriri nga na beoko. Nzapa atene lani, atene: “Fade mbi sara [si azo atene yanga ti kodoro so ayeke tâ nzoni ni, FD] si ala lingbi di iri ti L’Éternel na ala sara na lo na beoko.” “Yanga ti kodoro so ayeke tâ nzoni ni,” so ti tene ndia so Nzapa amû na ndo ti vorongo lo la ayeke ga na beoko na popo ti azo.—Sophonie 3:9; Ésaïe 2:2-4.

A-Témoin ti Jéhovah ayeke na ngia ti tisa mo ti gue na Da ti Royaume so ayeke nduru na mo ti bâ na lê ti mo wani tâ siriri nga na beoko so ayeke na popo ti ala.—Psaume 133:1.