JESÚS heʼi vaʼekue peteĩ kuimbaʼe omoirũsévape chupe: “Terehóntena nde rógape ne hentekuéra rendápe, ha emombeʼu chupekuéra opa mbaʼe Jehová ojapo vaʼekue nderehe ha mbaʼéichapa ndeporiahuvereko”. Upérõ, amalisia oĩ kuri hikuái peteĩ siuda héravape Gadara, opytáva suréste gotyo mar de Galilea ypýpe. Umi mbaʼe heʼi vaʼekuére, Jesús ohechauka oikuaa porãha yvyporakuérape: haʼe oikuaa opavave ñamombeʼuseha ñane hentekuérape umi mbaʼe porã ñaaprendéva (Mar. 5:19).

Koʼag̃aite peve entéronte ojepokuaa omombeʼu ihentekuérape umi mbaʼe iñimportánteva. Upéicha rupi, oĩ jave peteĩ oñepyrũva oservi Jehovápe omombeʼuseterei ihentekuérape umi mbaʼe oaprendéva. Péro, ¿mbaʼéichapa jajapo vaʼerã upéva? ¿Mbaʼéichapa ikatu ñaipytyvõ ñane héntepe oservi hag̃ua Jehovápe oiméramo oreko ótra rrelihión, térã ndojeroviái voi Ñandejárare? La Bíbliape oĩ heta konsého ikatúva ñanepytyvõ.

Síglo primérope, Andrés oikuaárõ guare Jesús haʼeha pe Mesías, ¿mávape raẽvetépa omombeʼu? “Ñepyrũrã haʼe otopa iñermáno Simón rehe, ha heʼi chupe: ‘Rotopa pe Mesíaspe’ (heʼiséva Cristo).” Upéi oraha Simón Pédrope Jesús rendápe omoirũ hag̃ua avei chupe (Juan 1:35-42).

Ohasa rire seis áñorupi, Pedro oĩrõ guare peteĩ siuda héravape Jope, oñemanda chupe oho hag̃ua nórte gotyo, Cesaréape, ovisita hag̃ua peteĩ ofisiál ehersitopeguápe hérava Cornelio. Og̃uahẽvo upépe, ¿mávarepa otopa? La Biblia heʼi: “Upépe ohaʼarõma chupekuéra Cornelio, haʼe ombyatýma ihénte ha umi iñamigoitépe”. Péicha Cornelio omeʼẽ  oportunida ifamiliakuérape ohendu hag̃ua Pédrope ha odesidi hag̃ua ijeheguiete oservítapa Ñandejárape (Hech. 10:22-33).

¿Mbaʼépa ikatu ñaaprende Andrés ha Cornelio ehémplogui?

Andrés ha Cornelio oñehaʼã vaʼekue oipytyvõ ihentekuérape. Andrés ogueraha voi iñermánope Jesús rendápe, Cornelio katu ombyatypaite ifamiliakuérape ohendu hag̃ua Pédrope. Péro haʼekuéra ndojopýi ihentekuérape oservi hag̃ua Ñandejárape. ¿Mbaʼépa ñanemboʼe upéva? ¿Mbaʼéichapa ikatu jasegi iñehemplokuéra? Ikatu ñamombeʼu peteĩ mbaʼe ointeresátava chupekuéra, avei jahekakuaa oportunida ñañemongeta hag̃ua la Bíbliare térã ikatu voi ñapresenta chupekuéra ambue ermánope. Péro ñanemanduʼa vaʼerã ndovaleiha jajopy ni ñamoñeñandu vai ñane hentekuérape, jaheja vaʼerã haʼekueraite todesidi. Jahechamína mbaʼéichapa ikatu ñanepytyvõ Jürgen ha Petra ehémplo, haʼekuéra peteĩ matrimónio oikóva Alemániape.

Petra oñepyrũ vaʼekue ostudia la Biblia umi testígo de Jehovándi ha upéi ojevautisa. Iména Jürgen katu haʼe vaʼekue peteĩ ofisiál ehersitopegua, ha ñepyrũrã ndogustaiete chupe hembireko odesidíva. Péro tiémpo rire, haʼe ohechakuaa umi testígo de Jehová omboʼeha pe añetegua. Upévare ostudia avei la Biblia ha ojevautisa, koʼág̃a katu oservi ansiánoramo peteĩ kongregasiónpe. ¿Mbaʼépa heʼi Jürgen ikatuha jajapo ñaipytyvõ hag̃ua ñane héntepe oservi hag̃ua Jehovápe?

Jürgen heʼi: “Ani rejopy chupekuéra oasepta hag̃ua umi mbaʼe regueroviáva, ni remyesakãse hetaiterei mbaʼe una vépe. Upéicha rembyajúta chupekuéra ha oñemomombyrýta ndehegui. Iporãvéta mbeguekatúpente ñañotỹ jahávo pe semílla ikorasõmekuéra. Avei ñapresentakuaa chupekuéra ermáno ijavegua térã umi ojepokuaavétavare. Upéva tuicha oipytyvõta chupekuéra”.

Apóstol Pedro ha avei Cornelio familiakuéra pyaʼe oasepta kuri pe añetegua. Péro síglo primérope, oĩ vaʼekue avei hasýpe ojedesidíva oservi Ñandejárape.

Jesús oĩ aja ko yvy ape ári heta ipariénte ojerovia vaʼekue hese, por ehémplo apóstol Santiago ha Juan, haʼekuéra amalisia iprímo ha isykuéra Salomé Jesús tia. La Bíbliape heʼi oĩ hague ‘heta kuña oiporúva imbaʼerepy’ oñatende hag̃ua Jesús ha ijapostolkuérare, ha amalisia Salomé oĩ vaʼekue umíva apytépe (Luc. 8:1-3).

Péro oĩ vaʼekue avei ihentekuéra apytépe ndojeroviáiva hese ñepyrũrã. Peteĩ jey, ohasa rire un áño Jesús ojevautisa hague, heta hénte oñembyaty peteĩ ógape ohendu hag̃ua chupe. La Biblia heʼi: “Oikuaávo upéva Jesús hentekuéra ou ogueraha hag̃ua chupe, heʼígui hikuái: ‘Itavyraíma ningo’”. Upéi, tiémpo rire iñermanokuéra oporandúrõ guare chupe moõpa ohóta, haʼe oñembotavýnte chuguikuéra. ¿Mbaʼérepa? ‘Iñermanokuéra ndojeroviái rupi hese.’ (Mar. 3:21; Juan 7:5.)

¿Mbaʼépa ikatu ñaaprende Jesús otrata lájagui ihentekuérape? Haʼe ndaipochýi heʼírõ guare hese hikuái itavyraimaha. Ha ndahaʼéi upévante, oñemoingove jey rire chupe ojehechauka iñermáno Santiágope ha omokyreʼỹ chupe, upéva oiméne  oipytyvõ raʼe Santiago ha umi ótro iñermánope oguerovia hag̃ua Jesús haʼeha pe Mesías. Haʼekuéra orresivi kuri espíritu sánto oñembyatýrõ guare umi apóstol ha ambue disípulondi peteĩ óga oĩvape Jerusalénpe. Tiémpo rire, iñermáno Santiago ha Júdaspe oñemeʼẽ heta rresponsavilida iñimportánteva (Hech. 1:12-14; 2:1-4; 1 Cor. 15:7).

Síglo primérope oiko haguéicha, koʼág̃arupi avei oĩ oikotevẽva tiémpo ojedesidi hag̃ua oservi Ñandejárape. Por ehémplo, Roswitha haʼe vaʼekue peteĩ katólika mbarete iménagui oikórõ guare Testígo áño 1978-pe. Haʼe ipyʼaite guive opensa oĩ porãha umi mbaʼe ogueroviáva ha ndogustaiete chupe iména odesidíva. Péro tiémpo rire okambiamiéma opensa lája ha mbeguekatúpe ohechakuaa umi Testígo omboʼeha pe añetegua, upévare ojevautisa áño 2003-pe. ¿Mbaʼépa omomýi chupe okambia hag̃ua? Iména akóinte otrata porã chupe. Por ehémplo, Roswitha otrata vai jave chupe haʼe arakaʼeve ndaipochýiva, oipytyvõ guei hembirekópe okambia hag̃ua opensa lája. ¿Mbaʼe konséhopa omeʼẽ Roswitha? “Heta mbaʼe ikatu jahupyty akóinte ñanepasiénsiaramo.”

Monika ojevautisa 1974-pe, ha mokõi imembýgui oiko avei Testígo diez áño haguépe. Iména Hans arakaʼeve noñemoĩri hesekuéra, upéicharõ jepe áño 2006-pe ae ojevautisa. ¿Mbaʼe konséhopa omeʼẽ ko família? “Akóinte peneñeʼẽrendu vaʼerã Jehovápe ha ani peheja mbaʼeve omokangy pende jerovia.” Monika ha imembykuéra ohechauka meme vaʼekue ohayhuha Hánspe, ha upéva tuicha oipytyvõ chupe. Haʼekuéra núnka ndoperdéi la esperánsa, siémpre opensa hikuái Hans ikatuha avei oservi Jehovápe.

Peteĩ jey Jesús ombojoja pe añetegua “y oporomoingovévare opa ára g̃uarã” (Juan 4:13, 14). Ñande avei jaipota ombopiroʼy ñane hentekuérape pe y oporomoingovéva. Péro ani jajapura ha una vépe ñamombeʼupase umi mbaʼe jagueroviáva. Iporãvéta mbeguekatúpe ñañeʼẽ hendivekuéra, péicha pe añetegua ombopiroʼýta chupekuéra. La Biblia ningo heʼi voi ‘hekojojáva ojepyʼamongeta raẽ ombohovái hag̃ua’, avei heʼi “pe iñarandúva oñatende heʼítavare, ha pyʼaguapýpe porãnte oñeʼẽ”. ¿Mbaʼéichapa ikatu jajapo koʼã téxtope heʼíva? (Prov. 15:28; 16:23 NM.)

Peteĩ tembireko oipotáva iména oikuaa pe añetegua “ojepyʼamongeta raẽ ombohovái hag̃ua”, oñatende porã heʼítavare ha ndojapurái oñeʼẽ hag̃ua. Avei ndohechaukái iménape haʼe oikuaaveha chugui ni ojapo porãveha opa mbaʼe, upéicharõmante umi mbaʼe heʼíva omokyreʼỹta iménape ha oikóta hikuái pyʼaguapýpe. Pe tembireko iñarandúva iporã oñeporandu: “¿Mbaʼe moméntopepa che ména itrankilove roñemongeta hag̃ua? ¿Mbaʼe mbaʼérehepa haʼe oñeʼẽse? ¿Mbaʼépa oleese? ¿Ogustápa chupe siénsia, polítika térã depórte? ¿Mbaʼépa ikatu ajapo oñeinteresa hag̃ua la Bíbliare amoñeñandu vaiʼỹre chupe?”.

Péro ñag̃uahẽ hag̃ua ñane hentekuéra korasõme ndahaʼéi ñamombeʼúnte vaʼerã chupekuéra umi mbaʼe jagueroviáva, tekotevẽ avei ñande voi jajapo umi mbaʼe jaʼéva.

Jürgen heʼi: “Akóinte jajapóramo umi konsého oĩva la Bíbliape, ñane hentekuéra ndahaʼéiva Testígo ohechakuaáta ñanediferenteha ha iporãha umi mbaʼe jagueroviáva, ndeʼíriramo jepe ñandéve mbaʼeve”. Hans, ojevautisa vaʼekue treinta áño hembireko ojevautisa rire, heʼi avei: “Jajeporta vaʼerã hekopete, péicha ñane hentekuéra ohechakuaáta la Biblia omboʼéva tuicha ñanepytyvõha”. Haʼekuéra ohechakuaa vaʼerã jastudia rupi la Biblia ñanediferenteha, péro ndahaʼéi ivaiarã, síno jajapo hag̃ua iporãva.

Apóstol Pedro omeʼẽ vaʼekue konsého iporãva umi kristiána orekóvape iména ndoservíriva Jehovápe. “Peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi. Upéva oikóta haʼekuéra ohechágui mbaʼéichapa penderekopotĩ ha perrespeta chupekuéra pende pyʼaite guive. Peñemoporã jave, ani pepenaiterei pene píntare, ani petrensa pene akãrague ni peiporu aláha de  óro, ni ao hepyetereíva. Iñimportanteve hína pemoporã perekóva pende pyʼapýpe, peñehaʼãvo peneakãguapy ha ani pendepochy rei. Koʼãichagua adórno ndaikatúi oñembyai ha ovaleterei Ñandejára renondépe” (1 Ped. 3:1-4).

Apóstol Pedro heʼi vaʼekue peteĩ tembireko oservíva Ñandejárape, ikatuha og̃uahẽ iména korasõme ojeportáramo hekopete. Upéicha oñehaʼã vaʼekue ojapo Christa ojevautisa guive áño 1972-pe. Iména ostudia vaʼekue Testigokuérandi, péro ndojedesidíri oservi Jehovápe. Oho mimi rreunionhápe ha ojogueraha porã ermanokuérandi, péro haʼekuéra ndojopýi chupe okambia hag̃ua opensa lája. ¿Mbaʼépa oñehaʼã ojapo Christa og̃uahẽ hag̃ua iména korasõme?

Christa omombeʼu: “Che ajedesidíma cheñeʼẽrendu Jehovápe ha avei ajeporta hekopete, péicha ‘haʼeʼỹre mbaʼeve’ ikatu aipytyvõ chupe oservi hag̃ua Ñandejárape. Ha noñemoĩriramo la Biblia heʼívare, añehaʼãmbaite ambojerovia chupe ikatúvape guive. Avei siémpre arrespeta umi mbaʼe haʼe odesidíva, ha aheja Jehová pópe opa mbaʼe”.

Christa ehémplo ohechauka porã iñimportanteha ñanembaʼerechakuaa. Haʼe ombaʼapo jejopy Jehová servísiope, ndofaltái rreunionhápe ha osẽ meme predikasiónpe. Péro avei oñatende porã iménare ha ohechakuaa tekotevẽha omokunuʼũ ha odedika chupe tiémpo. Enterove ñañehaʼã vaʼerã ñanembaʼerechakuaa ñane hentekuéra ndahaʼéivandi Testígo. La Biblia heʼi ‘opa mbaʼerã oĩha peteĩ tiémpo’ (Ecl. 3:1). Upévare tekotevẽ jahasa tiémpo ñane hentekuérandi, koʼýte ñane ména térã ñane rembirekóndi, upéva ñanepytyvõta ñañomongeta porãve hag̃ua hendivekuéra, avei pono ñane rembiayhu oñeñandu haʼeño, ou iselóso térã opensa ñamboykeha chupe.

Holger túva ningo ojevautisa vaʼekue veinte áño ojevautisa rire ifamiliakuéra, Holger heʼi: “Tekotevẽterei ñane hénte oikuaa jahayhuha chupekuéra ha avei akóinte ñañemboʼe vaʼerã hesekuéra”. Christa katu heʼi: “Arakaʼeve ndaperdemoʼãi la esperánsa che ména algún día chemoirũtaha avei roservi hag̃ua oñondive Jehovápe”. Upéicharõ, núnka nañapensái vaʼerã ñane hentekuéragui ndoikomoʼãiha voi Testígo, upéva rangue nañañentregái vaʼerã ha jasegi ñañehaʼã hesehapekuéra.

Ñande jajogueraha porãse ñane parientekuérandi, avei jaipota oikuaa pe añetegua ha og̃uahẽ ikorasõmekuéra la Biblia omboʼéva. Péro nañanderesaráiri vaʼerã tekotevẽha jajapo upéva ‘pyʼaporãme ha jahechauka jarrespetaha [chupekuéra] ñande pyʼaite guive’ (1 Ped. 3:15).