GALILEA GOHUNA ena sautist kahana hanua ladana Gadara ai, Iesu be ia murinai ia ura raka tauna ta dekenai ia gwau: “Emu varavara dekenai oi lao, bona Iehova ena hebogahisi bona oi dekenai ia karaia gaudia ibounai be idia dekenai oi gwauraia.” Iesu ena hereva ese ia hahedinaraia, ia be taunimanima edia kara badana ta ia lalopararalaia: Idia ura mai anina bada gaudia be edia varavara ida idia herevalaia.​—Mar. 5:19.

Hari, ena be haida be unai bamona idia karaia lasi, to tano momo ai taunimanima ese mai anina bada gaudia be edia varavara ida idia herevalaia. Unai dainai, ta be Dirava momokanina, Iehova, tomadiho henia tauna ai ia lao neganai, ia ura ena varavara dekenai unai ia herevalaia. To, edena dala ai do ia karaia? Herevana edia tomadiho be idau o Dirava idia abidadama henia lasi, to edena dala ai edia lalona ia veria diba? Baibel ai hakaua hereva namodia idia noho.

Aposetolo edia negai, Andrea ia hamomokania Iesu be Mesia. Ia ese unai sivarai be daika dekenai ia gwauraia? “Ia ese ena tadikaka Simona ia davaria guna bona ia dekenai ia gwau: ‘Ai be Mesia (anina be Keriso) ai davaria vadaeni.’” (Ioa. 1:41) Andrea ese Petero be Iesu dekenai ia abia lao, unai amo dala ia kehoa Petero be Iesu ena aposetolo tauna ai ia lao totona.​—Ioa. 1:35-42.

Lagani siks murinai, Petero be Iopa ai ia noho neganai, tatau haida ese idia boiria Kaisarea do ia lao bona ami ofesa tauna Korenelio do ia vadivadi henia. Korenelio ena ruma ai Petero be daidia ia davaria? Baibel ia gwau: “Korenelio be idia [Petero bona ia idia bamoa taudia] ia naria noho bona ena varavara bona tura korikoridia ia boiria hebou.” Korenelio ese dala ia karaia ena varavara ese Petero ena hereva idia kamonai totona, bona idia kamonai gaudia hegeregerena abia hidi do idia karaia.​—Kara 10:22-33.

 Andrea bona Korenelio ese edia varavara idia kara henia dalana amo dahaka ita dibaia?

Idia ruaosi be dala idia karaia idia dibaia gaudia be edia varavara ese do idia dibaia danu. Andrea ese Petero be Iesu dekenai ia abia lao, bona Korenelio ese ena varavara ia boiridia Petero ena hereva idia kamonai totona. To, Andrea bona Korenelio ese edia varavara idia doria lasi, o koikoi dalanai idia veridia lasi Iesu ena murinai idia raka totona. Unai sivarai amo dahaka ita dibaia? Namona be idia ita tohotohoa. Reana ita dibaia gaudia be eda varavara ida ita herevalaia diba, unai amo dala ita kehoa Baibel ena hereva momokani bona eda Keristani tadikaka taihu idia dibaia totona. Idia ta ta be mai edia maoro sibona edia abia hidi idia karaia totona, unai dainai namona be idia ita matauraia bona ita doria lasi. Iseda varavara ita durudia totona, Germany ai Jürgen bona ena adavana Petra edia haheitalai mani ita laloa.

Petra be Iehova ena Witnes taudia ida Baibel ia stadilaia bona gabeai bapatiso ia abia. Unai negai, iena adavana Jürgen be ami ofesa ta. Matamanai, Jürgen be Petra dekenai ia moale lasi. To, gabeai ia laloparara Witnes taudia be Baibel ena hereva momokani idia harorolaia. Unai dainai, Iehova dekenai ena mauri ia gwauhamatalaia, bona hari ia be elda tauna ta. Ena be eda varavara edia tomadiho be idau, to edia lalona do ita veria totona, Jürgen be dahaka sisiba ia henia?

Jürgen ia gwau: “Bema eda varavara ta ia ura lasi ia ida Baibel ita herevalaia, vadaeni namo lasi ia ita doria. Badina unai ese edia lalona do ia ha-aukaia, bona hereva momokani do idia abia dae lasi. To, hua haida lalonai nega ta ta ai mai hemataurai ida Baibel ena hereva ita herevalaia. Dala namona ta be eda varavara ita abia lao​—reana edia mauri lagani o edia ura gaudia be tamona—​Keristani tadikaka taihu idia hedavari henidia totona. Unai dala amo idia ita diba namonamo bona ita durua diba.”

Aposetolo Petero bona Korenelio ena varavara taudia be Baibel ena hereva idia abia dae haraga. To, haida be nega daudau murinai hereva momokani idia abia dae.

Iesu be tanobada ai ena gaukara ia hamatamaia neganai, ena varavara haida ese ia idia abidadama henia. Hegeregere, reana aposetolo Iamesi bona Ioane be Iesu ena kasin bona edia sinana, Salome be Iesu ena lalana. Salome bona ‘hahine ma haida, be edia kohu idia gaukaralaia Iesu bona ena hahediba taudia idia durua totona.’​—Luka 8:1-3.

To, Iesu ena varavara haida be ia idia abidadama henia haraga lasi. Hegeregere, Iesu ia bapatiso bona lagani ta murinai, hutuma be ruma ta dekenai idia haboua iena hereva idia kamonai totona. To, “iena varavara be unai idia kamonai neganai, idia lao ia idia dogoatao totona, idia gwau: ‘Ia be ia kavakava vadaeni.’” Gabeai, Iesu ena tadikaka be iena laolao idia herevalaia neganai, Iesu be idia ia haere henia lasi. Dahaka dainai? Badina “ena tadikaka ese ia idia abidadama henia lasi.”​—Mar. 3:21; Ioa. 7:5.

Iesu ese ena varavara ia kara henia dalana amo dahaka ita dibaia? Haida idia gwau Iesu be kavakava, to ia badu lasi. Danu, Iesu ia mase bona ia toreisi lou murinai, iena varavara hagoadaia totona iena tadina Iamesi dekenai ia hedinarai. Unai ese Iamesi sibona lasi, to ena tadikaka ma haida ia durudia unai amo idia abia dae momokani, Iesu be Mesia. Unai dainai idia, aposetolo taudia bona ma haida be Ierusalema ai ruma ta ena atai daiutuna lalonai idia hebou neganai, lauma helaga ese idia ibounai ia horoa. Gabeai,  Iesu ena tadina Iamesi bona Iuda be maduna idauidau idia huaia danu.​—Kara 1:12-14; 2:1-4; 1 Kor. 15:7.

Aposetolo edia nega bamona, hari varavara haida be nega daudau murinai mauri dalana idia abia hidi. Hegeregere, Roswitha ena sivarai mani oi laloa. Lagani 1978 ai, ena adavana ia bapatiso bona Iehova ena Witnes tauna ta ai ia lao neganai, Roswitha be Roma Katolik dubu ia lao noho. Ia be ena tomadiho ia badinaia auka dainai, matamanai ena adavana ia badu henia. To, lagani haida murinai, iena badu karana ia hadokoa bona ia laloparara Witnes taudia be hereva momokani idia hadibaia. Lagani 2003 ai, Roswitha ia bapatiso. Dahaka ese ia durua ena lalohadai ia haidaua totona? Roswitha ena adavana be iena kara dainai ia badu lasi, to nega ia henia Roswitha ena lalohadai ia haidaua totona. Roswitha ena sisiba be dahaka? “Bema oi haheauka bona haheauka noho, namo bada do oi davaria.”

Monika be lagani 1974 ai ia bapatiso, bona lagani 10 bamona murinai ena natuna memerodia rua danu be Witnes taudia ai idia lao. Ena be ena adavana Hans be idia ia dagedage henia lasi, to ia be vanegai sibona lagani 2006 ai bapatiso ia abia. Unai famili edia sisiba be dahaka? Idia gwau: “Namona be Iehova ita badinaia noho, bona namo lasi ita abidadama henia gaudia ita dadaraia.” Monika bona ena natudia ese hanaihanai Hans idia hamaoroa, ia idia lalokau henia. Bona idia abia dae momokani, nega ta ia be Witnes tauna ai do ia lao.

Iesu ia gwau hereva momokani be mauri hanaihanai ia henia ranu hegeregerena. (Ioa. 4:13, 14) Ita ura eda varavara ese hereva momokani ena ranu goevana bona namona idia inua. To, ita ura lasi idia dekenai ranu bada herea ita henia haraga bena idia maloa. Idia dekenai eda abidadama ita herevalaia dalana amo idia ese unai ranu do idia moalelaia o do idia maloa. Baibel ia gwau, “kara maoromaoro taudia ese, haere idia henia neganai idia laloa namonamo guna” bona “aonega tauna ena kudouna ese, iena hereva ia hamaoromaoroa noho, bona iena hereva ese, iena diba idia habadaia noho.” Edena dala ai unai sisiba ita badinaia diba?​—Aon. 15:28; 16:23.

Reana taihu ta be do ia ura ena adavana dekenai hereva momokani ia herevalaia. Bema ‘haere ia henia totona ia laloa namonamo guna,’ ia be hereva namodia do ia abia hidi, bona do ia hereva haraga lasi. Namo lasi ia heagi bona ia laloa ena tau ia hereaia. Ena hereva namodia ese adavana lalona do ia hamoalea bona maino do ia havaraia. Edena nega be nega namona ena adavana ia hereva henia totona? Ena adavana be dahaka topik ia ura herevalaia o duahia? Ia be saiens, politik o spot gadara ia ura henia, a? Edena dala ai taihu ese Baibel do ia herevalaia, to adavana ena hemami bona lalohadai ia matauraia danu? Bema taihu ese unai gaudia ia lalohadailaia guna, unai ese ia do ia durua mai aonega ida ia hereva bona kara totona.

To, Witnes lasi famili tauna ta ena lalona veria totona, nega ta ta ai Baibel ena hereva momokani ita herevalaia sibona be hegeregere lasi. Namona be kara amo ita hahedinaraia danu.

Matamanai ita herevalaia tadikaka Jürgen, ia gwau: “Namona be hanaihanai iseda mauri lalonai, Baibel ena hakaua herevadia ita badinaia. Ena be iseda varavara ese unai kara ia itaia bona do ia hereva lasi, to unai ese iena lalona do ia veria.” Hans be unai hereva ia abia dae danu. Ena adavana Monika ia bapatiso guna, to Hans be lagani 30 murinai ia bapatiso. Ia gwau: “Keristani kara namodia ita hahedinaraia be mai anina bada, unai ese eda varavara ia durua unai amo do ia itaia hereva momokani ese iseda mauri ia hanamoa.” Namona be eda varavara ese eda kara toadia amo do idia itaia ita be ma haida amo ita idau. Namona be eda kara do idia namo bona helaga be gau badana.

Aposetolo Petero ese Keristani taihu​—edia adavana be Witnes lasi—​dekenai mai anina bada sisiba ia henia. Ia gwau: “Unai hegeregerena, umui hahine taudia e, emui adavadia henunai do umui noho. Bona bema idia haida be Dirava ena hereva idia badinaia lasi, vadaeni ena be hereva ta umui gwauraia lasi, to emui kara amo idia be abidadama taudia ai idia lao diba, badina emui kara goeva bona hemataurai bada karana idia itaia. Namo lasi emui hairai be murimuri ai sibona, hegeregere huina umui pania, golo heraheradia umui atoa eiava dabua namodia umui hahedokilaia. To namona be emui hairai be  emui kudouna ai ia noho gauna, hegeregere lalomanau bona dagedage lasi karadia be dabua bamona do umui hahedokilaia, unai be idia dika diba lasi gaudia, bona unai be mai anina bada Dirava ena matanai.”​—1 Pet. 3:1-4.

Petero ia gwau hahine ena kara namona ese tau ena lalona ia veria diba. Christa be lagani 1972 ai ia bapatiso murinai, unai siri ena hereva ia badinaia noho badina ia ura ena adavana ena lalona ia veria. Ena be guna iena adavana ese Witnes taudia ida Baibel ia stadilaia, to hereva momokani ia abia dae lasi. Ia be kongrigeisen heboudia ia lao bona tadikaka taihu be ia idia diba. Idia laloparara ia be mai ena maoro sibona ese abia hidi ia karaia totona. Edena dala ai Christa ese ena adavana ena lalona ia veria?

Christa ia gwau: “Egu lalona lau hadaia Iehova ena dala do lau badinaia noho. Danu, lau ese ‘hereva ta lau gwauraia lasi’ to egu kara namodia amo egu adavana ena lalona lau veria toho. Bema ia ura do lau karaia gaudia be Baibel ena taravatu idia utua lasi, vadaeni iena ura hegeregerena lau karaia. Bona danu, iena ura lau matauraia bona gau ibounai be Iehova ena imana dekenai lau rakatania.”

Christa ena haheitalai ese ita ia hadibaia, ita noho hegaegae eda ura gaudia haida ita haidaua totona. Ia ese tomadiho karadia ia goadalaia noho, hegeregere hanaihanai hebou ia lao bona haroro gaukara ia goadalaia. To, ia laloparara iena adavana do ia lalokau henia, ia totona nega do ia atoa bona ena ura gaudia ia karaia be maoro. Witnes lasi varavara ita kara henidia neganai, namona be edia ura bona lalohadai ita lalopararalaia bona ita abia dae. Baibel ia gwau: “Idia vara gaudia ibounai be mai edia nega korikori.” Anina be eda famili taudia, hegeregere Witnes lasi adavana ida ita herevahereva totona, nega do ita atoa. Ia ida ita noho hebou neganai, ita herevahereva diba. Sivarai momo ese idia hahedinaraia, unai bamona herevahereva karana ese Witnes lasi adavana ia durua, unai amo do ia mama lasi, o sibona ia noho dainai do ia lalohisihisi lasi.​—Had. 3:1.

Holger bona ena famili taudia haida idia bapatiso guna, bena lagani 20 murinai edia tamana ia bapatiso. Holger ia gwau: “Mai anina bada gauna be do ita hahedinaraia iseda varavara ita lalokau henia bona ia totona ita guriguri noho.” Christa ia gwau, ia be ‘do ia haheauka noho ela bona ena adavana be Iehova ena kahanai do ia gini, bona hereva momokani do ia abia dae.’ Namona be ita abia dae momokani eda varavara be gabeai Witnes tauna ai do ia lao.

Iseda ura badana be eda hetura karana eda varavara ida do ia goada, dala do ita kehoa hereva momokani idia diba totona, bona Baibel ena hereva amo edia lalona ita veria. Namona be gau ibounai be “mai manau bona hemataurai bada ida” ita karaia.​—1 Pet. 3:15.