JESUS KRISTUSA kwa tente asi: “Zende kembo kovakweni, o ka va tantere sikururugana esi ana ku ruganene Hompa, nomu ana ku fire nkenda.” Posiruwo oso age moGadara, kombindakano-tokero zefuta lyaGalireya apa ga uyungire nomugara ogu ga here kukara murongwa gwendi. Nonkango daJesus kwa likidire asi age kukwata egano malizuvho govantu, eharo lyawo lyokuhara kutantera ko vekoro lyawo yininke yomulyo meparu.—Mar. 5:19.

Naina ose kumona eharo eli movantu, ano monompo dimwe kulimonenena unene kupitakana nonkwawo. Apa muntu a ya kara mukareli gwaKarunga, Jehova, age kuhara kutantera ko vekoro lyendi kuhamena epuro lyendi lyepe. Nye ngapi omu nayi rugana? Ngapi omu na guma nomutjima dava vekoro lyendi ava va hamena koukarelikarunga nawopeke? Bibeli kugava mavyukiso gomawa, omu no yi rugana.

Mosiruwo saJohanesa Mukuhwi, Andiliyasa yige ga hovere kudimburura Jesus ngaMesiyasa. Yilye ga hovere kukatantera ko? “Age kwa hovere kugwanekera namukurwendi Simoni, makura ta mu tantere asi: ‘Ose tuna gwana Mesiyasa.’ (Kuninka asi Kristusa, Mugwavekwa).” Makura Andiliyasa ta twara Peturusa kwaJesus mokumupa mpito a kare murongwa gwaJesus.—Joh. 1:35-42.

Konyima zonomvhura ntazimwe apa Peturusa ga kere moJopa, kwa mu zigidire a ze korwaMuzogo gwaKesareya a ka dingure embo lyaKoroneliusa, mupitisili govakwayita. Wolye ga ka gwene vana pongo membo lyaKoroneliusa? “Koroneliusa kwa ka mu gwana ana va ndindire, age ana zigida vekoro lyendi novakwawo vene-vene.” Koroneliusa kwa pere mpito vekoro lyendi va zuvhe mbudi ezi ga va  simbilire Peturusa nokutulisa po matokoro kuliza neyi va zuvhire.—Yirug. 10:22-33.

Yisinke natu lirongera ko kwaAndiliyasa naKoroneliusa monkedi omu va tekwire vekoro lyawo?

Andiliyasa naKoroneliusa kwa rugene ko yuma. Andiliyasa mwene ga divisire Peturusa kwaJesus, ntani Koroneliusa kwa pongekere vekoro lyendi yipo va ya zuvhe nonkango edi ga uyungire Peturusa. Nye Andiliyasa naKoroneliusa kapi va sininikire vekoro lyawo mokukara vasikuli vaKristusa. Yisinke natu lirongera ko? Nose kuvhura kurugana yokulifana. Nose kuvhura kuzogera nekoro lyetu ntani nokutulisa po nompito yipo va dive usili woBibeli ndi vapuli vakwetetu. Nye simpe twa hepa kufumadeka umanguruki wawo wokutulisa po matokoro nokudira kuvasininika. Mokukwata egano omu natu vhura kuvatera vekoro lyetu, tu tarurureni sihonena saJürgen naPetra, valikwali womoNdovesiranda.

Petra kwa lirongere Bibeli noNombangi daJehova ano konyima ta ya gwana ekuho. Mugara gwendi, Jürgen, kwa kere mupitisili govakwayita. Pomuhowo, Jürgen kapi lya mu hafesere etokoro lyamukadendi. Nye mwaza siruwo, ga ya dimbwilire asi Nombangi kuzuvhisa usili womoBibeli. Nage yipo ga ligeve kwaJehova, ano ngesi age mukuronambunga mombungakriste zawo. Mapukururo musinke ana kugava kuhamena kuguma nomutjima dovanekoro wovahapuli?

Jürgen kwa tanta asi: “Twa ha sininika vekoro lyetu mokutambura usili. Eyi kuvhura kuvanyegenyesa. Mwaza siruwo, ayo nayi wapa kuuyunga nawo monkedi zongwa kanunu-kanunu. Ayo hena ya wapa tu divise vekoro lyetu kovapuli vakwetetu vepupi lyawo ava va hara yininke eyi va hara. Kurugana eyi kuvhura kuvaninkisa va lizuvhe asi twa va hara.”

Mupositoli Peturusa nekoro lyaKoroneliusa kwa tambwire usimbu mbudi zongwa. Vamwe womosiruwo sina kwa gusire siruwo mokutambura usili.

Sinzi sekoro lyaJesus kwa tulire epuro mwendi apa nga zuvhisa. Pasihonena, ayo kumoneka asi mupositoli Jakopo naJohanesa kwa kere vamumbyagona vaJesus, ano Sarome kwa kere ozinagona. Nampo nage kwa kere gumwe govakadi vamwe ‘wovanzi ava ngava kwafa [Jesus novapositoli] nemona lyawo.’—Ruk. 8:1-3.

Nye vamwe vekoro lyaJesus kapi va tulire epuro mwendi apa nga zuvhisa. Pasihonena, konyima zomvhura zimwe kutunda apa Jesus ga gwene ekuho, mbunga zovantu kwa ya pongere monzugo mokuyapurakena kwaJesus. “Apa va yi zuvhire vezimo lyendi, tava pwaga va ka mu kwate, yeeyi awo kwa tanta asi: ‘Ana piyagana.’” Konyima, apa vamumbya vaJesus va mu pulire kuhamena rugendo rwendi, age kapi ngava pere elimbururo lyokuvyukilira. Morwasinke? “Yeeyi novamumbya vendi si kapi va mu pulire.”—Mar. 3:21; Joh. 7:5.

Yisinke natu lirongera ko kwaJesus monkedi omu ga tekwire vekoro lyendi? Age kapi ga handukire apa vamwe va mu ninkire asi ana piyagana. Nampili konyima zokumudipaga nokumuvhumbura, Jesus ga geve ekorangedo kekoro lyendi apa ga monekerere mumbyendi Jakopo. Emoneko lyendi kapi lya vaterere tupu Jakopo nye novamumbya vamwe vaJesus va pure asi age sili Mesiyasa. Yipo nye, nawo va ya kere kumwe novapositoli  navamwe ava va ya kere konzugo zekeguru moJerusarema ntani nokugwana mpepo zokupongoka. Mwaza siruwo, Jakopo naJuda, vamumbya vaJesus, va ya haferere yitumbukira yoyiwa.—Yirug. 1:12-14; 2:1-4; 1 Kol. 15:7.

Ngwendi mosiruwo sina, naina vanekoro vamwe va hepa siruwo sosire komeho va ka tambure usili. Pasihonena, Roswitha, age kwa kere Mukatolika gomupampi apa mugara gwendi ga gwene ekuho ngagumwe ngoNombangi daJehova momvhura 1978. Morwa epuliro lyendi, Roswitha pomuhowo nga rwanesa mugara gwendi. Nye mwaza nomvhura, erwaneso lyendi kwa ya sesupire ntani ga ya dimbwilire asi Nombangi kuronga usili. Momvhura 2003 yipo ga gwene ekuho. Yisinke ya mu ninkisire a rundurure nkareso zendi? Mevango lyokuhandukira Roswitha morwa erwaneso lyendi, mugara ngwendi kwa mu pere mpito a rundurure mutaro gwendi. Epukururo musinke ga gava Roswitha? “Kuvhura yi ku tompoke nsene o kara nelididimiko, ntani o twikire ngorooro kukara nalyo.”

Monika kwa gwene ekuho 1974, ano vana vendi wovagara kwa ya kere Nombangi konyima zonomvhura murongo. Nampili ngomu mugara gwendi Hans ga dilire kumurwanesa, nye dogoro momvhura 2006 yipo ga ya gwene ekuho. Epukururo musinke va geve vekoro lyendi? “Kwaterera ngorooro koulimburukwi woge kwaJehova, ntani wa ha teza po epuro lyoge.” Yosili, ayo kwa kere nomulyo mokutwikira kulikida eharo lyawo kwaHans. Awo va kere nehuguvaro asi nga tambura tupu usili.

Sikando simwe, Jesus kwa singwenene asi mbudi zousili kwa fana gwendi runone romema gokuvhira mwenyo gwanarunye. (Joh. 4:13, 14) Ose tuna hara vekoro lyetu va gwane etendeko pokunwa mema gomatenda gomawa gousili. Nye hena, kapi tuna hara ga va rwame morwa kuvanwisa gomanzi posikando simwe tupu. Mokuninka asi ga va tendeke ndi ga va rwame kwa korera omu tuna kuvafatwilira epuro lyetu. Bibeli kutanta asi ‘vantu wovawa kuhova tanko kugazara, ntani vana kulimburura’ ntani hena asi “vantu wonondunge kuhova kugazara, ntani vana kuuyunga; makura eyi vana kuuyunga kuyihuguvara unene.” Ngapi natu vhura kutura pasirugana epukururo eli?—Yis. 15:28; 16:23.

Mukadikwara kuvhura a hare kufatwilira yendi eyi ga pura. Nsene a ‘gazara ntani ana kulimburura,’ age nga horowora nawa nonkango ntani kapi nga genderera kulimburura. Age kapi nga likida nkareso zokulihungameka mwene ndi a lizerure. Nonkango dendi donongwa kuvhura di tendeke nokureta mbili. Siruwo musinke sosiwa na zogera nayendi? Yirongwa musinke yoyiwa ga hara kuresa ndi eyi a hafere kuzogera nayendi? Age kwa hara unsitwe ndi upolitika ndi maudano? Ngapi omu mukadi na pindura eharo lyayendi koBibeli nokufumadeka malizuvho ntani nomagano gendi? Mokuteda ko komapuro aga ngayi mu vatera a hove tanko kugazara ntani ana kuuyunga.

Kuguma mutjima gomunekoro ga hana asi Mbangi kapi ya kwatera mo tupu kufaturura eyi twa pura. Eyi atu uyunga ya hepa kuliza nonkareso zetu.

Jürgen, ogu tuna tumbura pomuhowo kwa faturura asi: “Kara nkenye apa nonkareso zongwa mokusikisa mo nompango doBibeli meparu lyankenye ezuva. Eyi kuna kara nkedi zongwa zokuvatera vanekero va gazadare ko nokudimburura yuma, nampili va dire kuyitambura.” Hans, ogu ga gwene ekuho konyara nomvhura 30 konyima zekuho lyamukadendi kwa yi kwatesa ko asi: “Nkareso zoVakriste zongwa mulyo, morwa kuninkisa vanekoro va dimburure omu usili wa rundurura eparu lyoge.” Vekoro lyetu va hepa kumona omu epuro lyetu lya lisiga kwava wopeke kupitira moyikara yetu yoyiwa.

Mupositoli Peturusa kwa geve epukururo lyewa kovakadi ava va kara novagara wovahapuli pokutanta asi: “Omu limburukwe kovagara veni, asi vamwe mo ava va dira kupura nonkango daKarunga, ngayi va tezwilise po yikara yovakadi vawo, awo va hana kuuyunga, nsene va mona ukuhuki netjirokarunga lyeni. Maliwapaiko geni ga ha kara gokontunda tupu: malitakero gonohuki nomalitjapero  geyi yondiro gokorutu, nondwarera. Nye maliwapaiko geni ga kare gomuntu gomonda newapo eli lya hana kupwa lyompepo za tenda zombili. Yigo ga fumana po kosipara saKarunga.”—1 Pet. 3:1-4.

Peturusa kwa tjenge asi mugara vhura kumutezwilisa yikara yamukadendi. Mokukwama mpango ozo, munazinyetukadi Christa kuna kuhetekera ko kuguma mutjima gwayendi kupitira moyikara yendi kutunda tupu apa ga gwene ekuho 1972. Nampili ngomu mugara gwendi posiruwo simwe nga lirongo noNombangi, simpe kapi ga tambura usili. Age nga zi pamwe komapongo ntani nokulidiva nava va kara mombungakriste. Nye awo kufumadeka umanguruki wendi wokutura po matokoro. Ngapi omu Christa ga hetekera ko kuguma mutjima gwayendi?

“Ame kuna tokomene kukwaterera kweyi ga harera nge Jehova. Posiruwo sooso, ame kuhetekera ko kutezwilisa yange kupitira monkareso zange zongwa ‘na hana kuuyunga.’ Apa a pura nge ni rugane yuma yongandi, ame kuyirugana nsene kapi yina kulilimba nonompango doBibeli. Ntani ame kufumadeka umangurukwi wendi wokutulisa po matokoro ntani nokusiga yininke momawoko gaJehova.”

Ukaro waChrista kulikida mulyo gokugazadara ko kuliza noukaro. Age kwa kwaterera kelikwamo lyendi lyeyi yopampepo, kukwatera mo kuza nkenye apa komapongo nokulihameka mo unene mosirugana sokuzuvhisa. Nye nampili ngoso, age ga kwata egano asi mugara gwendi ya mu tumbukira yokumulikida eharo nokumupa siruwo nokumupakera mbili. Kugazadara ko kuliza noukaro ntani nokukwata egano mulyo unene kwetu ose ava twa kara novanekoro wovahapuli. Bibeli kufaturura asi: ‘Nayinye eyi ayi horoka, kuhoroka posiruwo’ sokuwapera. Eyi kwa kwatera mo siruwo sokukara kumwe nepata lyoge, unene po mulikwali goge, ogu ga kara nepuliro lyapeke. Nsene mu kara kumwe ngomu kara neuyungokumwe lyewa. Yihorokwa kulikida asi euyungokumwe lyewa kugusa po malizuvho gomukuma ndi esupa.—Muud. 3:1.

Holger, ogu oguhwe va gwene ekuho nomvhura 20 konyima zapa vemepata va gwene ekuho, kwa tanta asi: “Ayo kwa kara nomulyo mokulikida asi twa hara vemepata lyetu ntani nokuvakanderera po.” Christa kwa gweda ko asi ‘ame kwa kara nehuguvaro asi ezuva limwe yange nga tambura usili nokukarera Jehova.’ Twa hepa kukara nomutaro gomuwa kovanekoro vetu wovahapuli nokuhuguvara asi ngava tambura usili.

Sitambo setu sokutulisa po elikwatakano lyewa nekoro lyetu pokuvapa mpito zokudimburura usili ntani nokuguma nomutjima dawo nombudi zomoBibeli. Ano mwanayinye eyi atu rugana atu ‘yi ruganeni nombili nefumadeko.’—1 Pet. 3:15, 16.