Yesu Kristo akagira ati: “Otaahe owaanyu omuri bagyenzi baawe, obagambire ebi [Yehova] akukoreire ku biri bikuru, n’oku akusaasiire.” Obu yaagamba ebi naabaasa kuba yaabaire ari omuri Gadara, omu bukiizi-bwa-bumosho bw’Enyanja ya Galilaaya, kandi akaba naagamba n’omushaija owaabaire naayenda kuba omukuratsi we. Ebigambo bya Yesu nibyoreka ngu akaba naayetegyereza gye entwaza y’abantu ngu nibakunda kugambira abanyabuzaare baabo ebyabashemeza.—Mako 5:19.

Kandi eki nikikira n’okubaho obunaku obu omu bicweka bingi, n’obu obundi kirikukira kubaho omu bicweka ebimwe kukira ebindi. N’ahabw’ekyo, omuntu ku arikutandika kuramya Yehova Ruhanga, naaba aine ekihika ky’okugambira abanyabuzaare be aha nyikiriza ye ensya. Kwonka shi ekyo nitubaasa kukikora tuta? Nitubaasa kuhika tuta abanyabuzaare baitu aha mutima abaine enyikiriza endiijo nari baaba bataine ki barikwikiririzamu? Baibuli neeha obuhabuzi burungi, oburikukora.

Omu kyasha ky’okubanza, Anderea akaba ari omwe ahari abo abaabandize kumanya ngu Yesu niiwe Mesia. N’oha ou yaagambiire ahonaaho ku yaakimanyire? ‘Anderea, murumuna wa Simooni Petero, akabanza kusherura mukuru we Simooni, yaamugira ati: Tureebire Mesia, (amakuru gakyo ngu Kristo).’ Anderea akahitsya Petero ahari Yesu, kandi Petero yaatunga omugisha gw’okuba omwegi wa Yesu.—Yohaana 1:35-42.

Bwanyima y’emyaka mukaaga obu Petero yaabaire naatuura omuri Yoopa, akeetwa kuza Kaisarea kutaayaayira Koruneelio, omuserukare Omurooma. Ni baahi abu Petero yaashangire omu nju? ‘Koruneelio akaba ategyereize Petero n’abu yaabaire aine, kandi akaba yaaherize kweta abanyabuzaare na banywani be buzima.’ N’ahabw’ekyo Koruneelio akaha ab’eka ye n’abanyabuzaare omugisha gw’okuhurikiza eki Petero yaabaire naagamba kubaasa kwecweramu.—Ebyakozirwe 10:22-33.

Nitubaasa kwegyera ki ahari Anderea na Koruneelio oku baatwariize abanyabuzaare baabo?

Anderea na Koruneelio bombi bakagira eki baakora. Anderea akanjura Petero ahari Yesu, kandi Koruneelio akakora entebeekanisa kugira ngu abanyabuzaare be babaase kuhuurira eki Petero yaabaire naaza kugamba. Kwonka Anderea na Koruneelio tibaragyemesereize abanyabuzaare baabo kuba abakuratsi ba Kristo. Hariho enshonga y’okwega omuri eki? Naitwe nitubaasa kukora nikyo kimwe. Nitubaasa kugambiraho abanyabuzaare baitu ebi turikwega omu Baibuli nari kuteeraho kusherura oburyo burungi bw’okubabaasisa kwega amazima kuruga aha b’eishe-emwe. Kwonka nituguma nitwijuka ngu baine obugabe bwabo bw’okwecweramu, n’ahabw’ekyo nitwetantara kubagyemesereza. Kworeka oku turikubaasa kuhwera abanyabuzaare baitu, yetegyereze eky’okureeberaho ky’omushaija n’omukazi we Jürgen na Petra, kuruga Germany.

Abajurizi ba Yehova bakeegyesa Petra Baibuli, bwanyima yaabatizibwa. Iba Jürgen akaba ari omuserukare omu mahe. Omu kubanza, Jürgen tikiramushemeize kureeba eki omukazi we yaacwiremu kukora. Kwonka bwanyima y’obwire, akeetegyereza ngu Abajurizi ba Yehova nibeegyesa amazima. Nawe akeehayo ahari Yehova yaabatizibwa, kandi hati n’omureeberezi omu kibiina. Ni buhabuzi ki obu arikuha aha bikwatiraine n’okuhika aha mutima gw’omunyabuzaare otari mu mazima?

Jürgen naagira ati: “Titushemereire kubagyemesereza nari buri kaire kuguma nitubagambira aha by’omwoyo. Ekyo nikibaasa kubareetera kwangira kimwe kwega amazima. Kwonka nikibaasa kubahwera twaguma nitubagambiraho kakye-kakye. Ni kirungi kukora entebeekanisa kugira ngu abanyabuzaare babaase kwega n’ab’eishe-emwe omu kibiina ab’orwingano rwabo nari abarikukunda ebirikushushana. Ekyo nikibaasa kubahwera.”

Entumwa Petero n’abanyabuzaare ba Koruneelio bakagira eki baakora ahonaaho aha ki baayegire omu Baibuli. Abandi omu kyasha ky’okubanza abaayegire amazima bakaba nibenda obwire bwingi kucwamu.

Bamwe aha banyabuzaare ba Yesu bakamwikiririzamu omu buheereza bwe. Nk’eky’okureeberaho, entumwa Yohaana na Yakobo nibabaasa kuba baabaire baine obuzaare na Yesu, nikyo kimwe na nyinabo, Salome. Omukazi ogwo naabaasa kuba yaabaire ari “n’abandi baingi abaabaire nibabahwera [Yesu n’entumwa] n’ebintu byabo.”—Luka 8:1-3.

Abanyabuzaare ba Yesu abandi tibarahikire nibamwikiririzamu ahonaaho. Nk’eky’okureeberaho, bwanyima y’omwaka nka gumwe Yesu aherize kubatizibwa, abantu baingi bakaija kuhurira ebi arikugamba omu nju. Kwonka abanyabuzaare be “ku baakihuriire, baashohora kumukwata, ahabw’okuba bakagira ngu, agwire eiraro.” Bwanyima y’akaire, beene ishe ku baamubuurize ahu arikwenda kuza, akanga kubagambira. Ahabw’enki? Ahakuba “abarumuna abo tibaramwikiriize.”—Mako 3:21; Yohaana 7:5.

Oku Yesu yaatwariize abanyabuzaare be nitukyegyeraho ki? Bamwe aharibo ku baagizire ngu agwire eiraro, taragizire kiniga. Yesu bwanyima y’okwitwa kandi akazooka, akongyera kugumya abanyabuzaare be arikweyoreka omurumuna Yakobo. Eki nikibaasa kuba kyahigire Yakobo n’abarumuna abandi kuhamya ngu Yesu niwe Mesia. Bwanyima bakaba bari n’entumwa ezindi omu kishengye ky’ahaiguru omuri Yerusaalemu, kandi bakashukwaho omwoyo gurikwera. Ku hahingwireho obwire, Yakobo n’omurumuna ondiijo Yuda bakaheebwa obujunaanizibwa omu kibiina.—Ebyakozirwe 1:12-14; 2:1-4; 1 Kor. 15:7.

Nk’oku kyabaire kiri omu kyasha ky’okubanza, abanyabuzaare abamwe nikibeetengyesa obwire kubaasa kuza omu muhanda ogurikuhitsya omu magara. Nk’eky’okureeberaho, teekateeka aha Roswitha, owaabaire ari Omukaturiki obu iba yaabatizibwa akaba Omujurizi wa Yehova omuri 1978. Omu kubanza ahabw’ebi yaabaire naikiriza akahiiganisa iba. Bwanyima y’emyaka mingi, mporampora akarekyera aho kuhiiganisa iba ku yaareebire ngu Abajurizi ba Yehova nibeegyesa amazima. Omu mwaka gwa 2003 nawe akabatizibwa. Niki ekyamuhweraire kukora empinduka? Omu mwanya gw’okuguubwa kubi ahabw’omukazi we kumuhakanisa omu kubanza, mporampora akahwera Roswitha kuhindura aha miteekateekyere ye. Ni buhabuzi ki obu arikutuha? “Okugumisiriza nikurugamu ebirungi bingi n’ahabw’ekyo ka tugire okugumisiriza.”

Monika akabatizibwa 1974, kandi abatabani babiri bakabatizibwa bwanyima y’emyaka nka ikumi. Kandi iba Hans, n’obu atarahakaniise ebi barikwikiriza akaija kubatizibwa omu 2006. Mbwenu kurugiirira aha byabaireho naaha buhabuzi ki? “Hamira ahari Yehova, n’emisingye ye, kyahika aha bibuuzo ebirikukwata aha kwikiriza kwawe.” Hatariho kubangaanisa, kikaba kiri kikuru kuguma nibahamiza Hans ngu nibamukunda. Kandi bakaguma baine amatsiko ngu naija kurugaho naikiriza amazima.

Rimwe Yesu akagyeragyeranisa amazima n’amaizi agarikuha amagara agatahwaho. (Yohaana 4:13, 14) Nitwenda ngu abanyabuzaare baitu baruhuurwe amaizi agarikufuka kandi amarungi. Buzima, titurikwenda kubaha amaizi maingi gakabaakaana. Abanyabuzaare baitu nitubaasa kubaruhuura nari tubareetere kwakaanwa kurugiirira aha ku turikubashoboororera. Baibuli neegira eti: “Omutima gw’ohikiriire guteekateeka oku araagarukyemu,” kandi neegaruka egira eti: “Omutima gw’omunyabwengye guhindura emigambire ye okuba ehikire, kandi gumwongyera kugamba ebirikwikirizisa abantu.” Nitubaasa kugyendera tuta aha buhabuzi obu?—Enf. 15:28; 16:23.

Omukazi naabaasa kuba naayenda kushoboorora iba ebi arikwikiriza. ‘Yaateekateeka atakagarukiremu,’ naija kugamba arikwegyendesereza. Tashemereire kugamba nk’orikweta ahaiguru y’abandi nari kugira ngu niwe ahikire. Ebi arikugamba nibibaasa kuruhuura kandi bireeteho obusingye. Ni ryari obu iba arikubaasa kworoberwa kugamba nawe kandi aikaikaine? Naakunda kugamba ahari ki nari kushoma ahari ki? Naakunda ebirikukwata aha saayansi, eby’obutegyeki nari eby’emizaano? Naabaasa kukora ki kumureetera kugira ekihika ky’okumanya eki Baibuli erikwegyesa, kandi akooreka ngu naaha ekitiinisa enyehurira ze n’ebiteekateeko bye? Yaateekateeka aha bibuuzo ebyo nikibaasa kumuhwera kugamba arikwegyendesereza.

Okuhika aha mutima g’omunyabuzaare otari Mujurizi wa Yehova tikirikumanyisa okushoboorora amazima mporampora kyonka. Ebi turikugamba biine kushagikwa ebikorwa byaitu kumara obwire buraingwa.

Jürgen, owaaba yaagambirweho naagira ati: “Guma noogyendera aha mitindo ya Baibuli buri izooba. Ogwo n’omuringo murungi munonga ogurikubareetera kumanya amazima, n’obu baakuba batakyorekire butunu.” Hans, nawe owaabatiziibwe haihi emyaka 30 bwanyima y’omukazi we, naagira ngu ekyo kihikire. “Oine kuba Omukristaayo orikutwaza gye, kugira ngu omunyabuzaare areebe oku amazima gakuhweraire.” Abanyabuzaare baitu baine kureeba ngu okwikiriza kwaitu nikutureetera kuba ab’omutaano omu muringo murungi, beitu ti omu muringo mubi.

Entumwa Petero akaha abakazi obuhabuzi burungi abaine baibabo abatari mu mazima: “Mworobere mutyo baabaroimwe, ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire, ahabw’okureeba emitwarize yaanyu mirungi ey’okutiina Ruhanga. Okwecuma kwanyu kurekye kuba okw’aha ruguru, okw’okutsiba eishokye, n’okujwara eby’ezaabu, n’okujwara ebijwaro ebiragaize aha bigyere, kureka okwecuma kwanyu kube okw’omunda omu mutima, okwekijwaro ekitasiisikara eky’omwoyo omucureezi ogutuurize ogw’obuguzi bwingi omu maisho ga Ruhanga.”—1 Pet. 3:1-4.

Petero akahandiika ngu omushaija naabaasa kukunda amazima ahabw’emitwarize mirungi y’omukazi we. Munyaanyazi-itwe Christa aine obuhabuzi obwo omu biteekateeko, agumiizemu naateeraho kuhika aha mutima gwa iba arikutwaza gye kuruga obu yaabatizibwa omu 1972. Abajurizi ba Yehova bakaba baayegyeiseho iba, kwonka nabwo takahindwire amazima age. Naija omu nteerane ezimwe kandi naakwatanisa gye n’ab’eishe-emwe omu kibiina. Kandi nabo nibaha obugabe bwe bw’okwecweramu ekitiinisa batarikumugyemesereza. Mbwenu shi Christa naateeraho ata kumuhika aha mutima?

“Mmaririire kuhamira aha muhanda ogu Yehova arikwenda ngu ntooremu. Kandi, niinteeraho kugira emitwarize mirungi kukundisa ibanyi amazima ‘ntaine kigambo kyona’ eki ngambire. Niinteeraho kukora eki arikushaba kyona kyaba kitarikuhenda emisingye ya Baibuli. Kandi hatariho kubangaanisa nimutsigira obugabe bwe obw’okwecweramu, reero ebindi mbitsigira Yehova.”

Eki Christa acwiremu kukora nikyoreka obukuru bw’okuguma oyeteekateekire kuhinduramu ahu kirikwetengyesa. Naakuratira entebeekanisa ye ey’eby’omwoyo, aguma naaza omu nteerane obutoosha n’omu kubuurira. Kwonka naakoresa okwetegyereza, arikumanya ngu aine kugirira iba obwire, kandi akamufaho. Okuba oyeteekateekire kuhinduramu n’okukoresa okwetegyereza ni kirungi waaba noohwera abanyabuzaare. Baibuli neeshoboorora eti: “Buri kintu kiine” obwire bwakyo. Eki nikitwariramu obwire obu turikumara n’abanyabuzaare baitu, okukira munonga abu turi nabo omu bushwere abatari mu mazima. Twamara nabo obwire nikituhwera kugaaniira nabo. Obuhame nibworeka ngu okugaaniira nikubahwera kutagira ihamba, kwehurira nk’abatsigirweho nari okugira ihari.—Mub. 3:1.

“Ni kikuru kworeka ab’eka yaitu ngu nitubakunda kandi ngu nitubashabira,” nikwo Holger arikugira. Abandi omu ka ku baabatiziibwe hakahinguraho emyaka 20 ishe kubaasa kubatizibwa. Christa naayongyeraho ngu ‘tarikwija kuhwa amatsiko ngu iba naija kucwamu kuza aha rubaju rwa Yehova aikirize amazima.’ Tushemereire kuguma twine emiteekateekyere mirungi aha banyabuzaare baitu abatari mu mazima tutarikuhwa amatsiko.

Ekigyendererwa kyaitu n’okuguma nitukwatanisa nabo, kubahwera kumanya amazima, kandi tukabahika aha mutima n’obutumwa bwa Baibuli. Twaba nitubashoboororera nitukikora twine ‘obucureezi n’okutiina Ruhanga.’—1 Pet. 3:15.