JESUSQA Gerasa llaqtapin kashanman karqan, Galilea lamar qochaq ura ladonpi. Chaypin qatikuqnin kayta munaq runata nirqan: “Wasiykita ripuspa familiaykikunaman willamuy Señor Diospa imaymana ruwapusqasuykita khuyapayasqasuykitawan”, nispa. Chay nisqanwanmi Jesusqa sut’ita rikuchirqan imakunapas kusichiwasqanchista familianchisman willakuy munasqanchista (Mar. 5:19).

Chhayna kasqanchisraykun pipas Jehová Diospa kamachin kapuspaqa, llapa familianman willan Diospi iñisqanta. Ichaqa, ¿imaynatan rimapayananchis? ¿Imaynatan huk religionniyoq otaq Diospi mana iñiq familianchispa sonqonman chayasunman? Bibliapin askha yanapaykunata tarisun.

Andresmi ñawpaqtaqa sut’ita repararqan Jesusqa Mesías kasqanta. ¿Pimanmi ñawpaqta willarqan? Biblian nin: “Andresmi ñawpaqta tarirqan wawqen Simonta, hinaspa nirqan: Mesiastan tarimuyku”, nispa. Hinan Pedrota Jesusman pusarqan, chhaynapin yanaparqan wawqenpas Jesuspa qatikuqnin kananpaq (Juan 1:35-42).

Soqta wata qhepamantaq Pedroqa Jope llaqtapi kasharqan, chaypin invitasqa karqan Cesarea llaqtapi capitán Cornelioq wasinman rinanpaq. ¿Pikunatan chaypi tarirqan? Biblian nin: “Chaypin Cornelioqa paykunata suyasharqan, familianta munasqan amigonkunatawan huñuykuspa”, nispa. Chay hinapin Cornelio familianta yanaparqan Pedroq willasqanta uyarinankupaq, paykunallamanta decidinankupaqpas (Hech. 10:22-33).

¿Imatan yachasunman Andrespas Corneliopas imaynata familianta yanapasqankumanta?

 Andrespas Corneliopas kallpachakurqankun familiankuta yanapanankupaq. Andresqa pay kikinmi wawqenta pusarqan Jesusta reqsinanpaq, Corneliotaq familianta huñurqan Pedrota uyarinankupaq. Ichaqa manan mayqenninkupas familianta mat’ipayarqanchu cristiano kapunankupaq. ¿Imatan paykunamanta yachasunman? ¿Imaynatan paykuna hina mana iñiq familianchista yanapasunman? Yaqapaschá rimapayasunman imakuna yachamusqanchismanta, Bibliamantataq pisi-pisimanta rimapayasunman otaq huk iñiqmasinchiskunawan reqsinachisunman. Ichaqa manan hayk’aqpas paykunata mat’ipayanachu, aswanpas respetananchismi ima decidisqankutapas. ¿Imaynatan chayta ruwasunman? Qhawarisun Alemania nacionmanta Jürgen, Petra casarasqa iñiqmasikunamanta.

Petraqa Jehová Diospa testigonkunawan Bibliata estudiaspan bautizakapurqan, qosanqa ejercitomanta oficialmi karqan, manataqmi kusikurqanchu Petraq bautizakusqanwan. Tiempowanmi ichaqa repararqan Testigokunaqa cheqaq kaqta Bibliamanta yachachisqankuta, chaymi paypas bautizakapurqan, iñiq t’aqapitaq umalli kashan. ¿Imaynatan huk religionniyoq familiakunaq sonqonman chayasunman? ¿Ima ninmi Jürgen?

Paymi nin: “Sichus nishuta Bibliamanta rimapayanki mat’ipayankitaq chayman hina kawsananpaq chayqa astawanmi karunchakunqa. Aswan allinqa kanman unay-unaymanta rimapayaymi. Hinaspapas wiñaymasin iñiqkunawan otaq paypa ruway munasqanta ruwaq iñiqkunawanmi reqsinachina. Chhaynapin entiendenakunqaku”, nispa.

Apóstol Pedropas Cornelioq familianpas kaqpachan iñipurqanku, wakin runakunan ichaqa tiempowanña iñipurqanku.

Jesús predicashaqtinqa askhan familianmanta paypi iñirqanku. Wakinmi karqanku Salomeq wawankuna Santiagowan Juanwan, paykunaqa primonkunan kanman karqan. Yaqapaschá Salomeqa Bibliaq nisqan hina ‘askha warmikuna’ ukhupi kasharqan, “paykunan kaqninkuwan Jesusta yachachisqankunatawan yanapaspa servirqanku” (Luc. 8:1-3).

Ichaqa Jesuspa wakin familianqa manan kaqpachachu paypi iñirqanku. Bautizakusqanmanta huk wata qhepamanmi huk wasipi askha runakuna huñukurqanku yachachisqanta uyarinankupaq. “Jesuspa familiantaq chayta uyarispa, payta pusapunankupaq hamurqanku, ‘manan yuyayninpichu kashan’ nispa”. Huk kutintaq, wawqenkuna nirqanku mayman rinanta, paytaq mana sut’itachu kutichirqan. ¿Imarayku? Wawqenkuna paypi mana iñisqankurayku (Mar. 3:21, NM; Juan 7:5).

¿Imatan yachanchis imaynata Jesús mana iñiq familianwan kawsasqanmanta? Payqa manan familianwan phiñakurqanchu “manan yuyayninpichu kashan” niqtinkupas. Kawsarimpusqan qhepamanpas familiantan kallpacharqan. Chaymi wawqen Santiagoman rikhurirqan, chaytaqmi Santiagotapas huk wawqenkunatapas kallpachanman karqan Jesusqa Mesiaspuni kasqanpi iñinankupaq. Chaychá paykunaqa Jerusalenpi kasharqanku apostolkunawan huk hunt’aq iñiqkunawan kuska, chaypin Jehová Dios santo espiritunta  paykunaman qorqan. Qhepamantaq Jesuspa wawqen Judas allin llank’aykunata chaskirqan Santiagowan kuska (Hech. 1:12-14; 2:1-4; 1 Cor. 15:7).

Kunanpas Jesuspa tiemponpi runakuna hinan, wakin familianchiskunaqa tiempowanña decidinku wiñay kawsay ñanpi purinankupaq. Roswitha sutiyoq iñiqmasin católica karqan, qosantaq ichaqa 1978 watapi Jehová Diospa testigon kapurqan. Roswithaqa manan allinpaqchu qhawarirqan qosan huk religionniyoq kapusqanta. Ichaqa watakunaq pasasqanman hinan sonqon llamp’uyapurqan. Pisi-pisimantan repararqan Testigokunaqa cheqaqkaqta yachachisqankuta, chaymi 2003 watapi bautizakapurqan. ¿Imaraykun cambiapurqan ñawpaqpi yuyaykusqanta? Qosanpa imayna kawsasqanta qhawarisqanraykun. Mana allintaña qosanta tratarqan chaypas qosanqa manas phiñakuqchu, aswanpas sumaqtas kutichiq cambiananpaq hina. ¿Imaninmi kunan Roswitha? Paymi nin: “Tukuy tiempo pacienciakuychis”, nispa.

Monika iñiqmasin 1974 watapi bautizakurqan, iskay wawankunataq chunka wata qhepaman, qosantaqmi 2006 watapiña. Hansqa manan bautizakuypi yuyaykurqanchu manaña hark’akurqanchu esposan huk religionniyoq kananta chaypas. Kunanmi paykuna ninku: “Jehová Diosman hunt’aq sonqollapuni kaychis, amataq hayk’aqpas iñiyniykichismanta iskayaychischu”, nispa. Hinaspapas familianpa munakuyninta rikusqanmi Hansta kallpacharqan. Paykunaqa yuyaykurqankupunin qhepaman Diospi iñinanta.

Allin willakuykunatan Jesús tupanachirqan wiñay kawsayta qoq unuwan (Juan 4:13, 14). Ñoqanchispas munanchismi chay unuta familianchiskuna ukyananta. Ichaqa manan chay unutaqa heq’epanankukamachu qona. Iñiyninchismanta imaynata rimapayasqanchismantan kanqa chay unuwan thasnuykusqa kasqanku. Biblian nin: “Chanin runaqa allintan yuyaykun kutichinanpaq”, nispa. Nillantaqmi: “Yachayniyoqqa allin chayasqatan riman, rimasqankunaqa aswantan creechin”, nispa. ¿Imaynatan chay yuyaychaykunaman hina kawsasunman? (Prov. 15:28; 16:23.)

Sichus huk esposa munan qosan iñinanta chayqa ‘allintan yuyaykunan kutichinanpaq’. Arí, allintan akllanan ima simikunawan rimapayananpaq, manataqmi usqhayqa rimananchu. Manan hayk’aqpas aswan allinpaqqa qhawarikunanchu. Aswanpas allinta yuyaykuspa rimasqanwanmi qosanta kallpachanqa, chay hinapitaq thakpi kawsanqaku. ‘Allin chayasqata rimananpaqtaqmi’ esposaqa tapukunan: “¿Ima ratopin qosayta rimapayayman? ¿Imakunamantan rimayta munan? ¿Imakunatan leen? ¿Cienciamanta, politicamanta otaq pukllaymantachu rimayta munan? ¿Imaynatan yuyaykusqanta respetaspalla yanapayman Bibliaq yachachisqanta uyarikunanpaq?”, nispa.

Ichaqa, mana iñiq familianchispa sonqonman chayanapaqqa manan rimapayanallachu, aswanpas kallpachakunanchismi rimasqanchisman hina ruwanapaq.

Jürgen nin: “Bibliapi yachachikuykunaman hinan sapa p’unchay kawsananchis, chhaynapin familianchisqa reparanqa rimasqanchisman hinapuni kawsasqanchista”, nispa. Esposanpa bautizakusqanmanta 30 wata qhepata bautizakuq Hanspas ninmi: “Cristiano hinapunin kawsananchis. Chay hinapin mana iñiq familianchis rikunqa Diosmanta yachasqanchis allinninchispaq kasqanta”, nispa. Huknirayña kanchis chaypas familianchisqa allintan reparanan Bibliamanta yachasqanchis allinninchispaq kasqanta.

Apóstol Pedron mana iñiq qosayoq cristianakunaman kay yuyaychayta qorqan: “Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch’uya kawsasqanta manchakuyniyoq kasqanta, sumaq respetowan kawsasqanta rikuspa ima. Sumaqchakuyniykichisqa ama hawaman rikukuqllachu kachun, chukcha ñaqch’akuyniykichispas ama k’achanchasqachu kachun, ama qoriwan k’achanchasqachu, amataq p’achallaykichischu sumaqchasqa kachun, aswanpas sonqoykichis sumaqchasqaqa kachun llamp’u  sonqo-kaywan, sumaq sonqo-kaywan. Chay hina sumaqchakuymi mana tukukuqqa, Diospa ñawpaqenpipas ancha chaniyoqqa”, nispa (1 Ped. 3:1-4).

Pedroq nisqan hina, casarasqa cristianaqa ruwayninwanmi mana iñiq qosanpa sonqonman chayanman. Chayta ruwananpaqmi Christa kallpachakushan 1972 watapi bautizakusqanmantapacha. Qosanqa Testigokunawanmi ñawpaqpi estudiarqan, chaywanpas manaraqmi bautizakunchu. Mayninpiqa huñunakuykunamanpas rinmi, iñiqkunawanpas allinpin kawsan, paykunan ichaqa mana mat’ipayankuchu bautizakunanpaq. ¿Imatan Christa ruwashan qosanpa sonqonman chayananpaq?

Paymi nin: “Jehová Diospa kamachikuynintaqa kasukushallasaqmi. Hinaspapas kawsayniywanmi qosayta yanapayta munani, ‘mana rimapayasqallay’ Diospi iñipunanpaq. Sichus qosaypa ima kamachiwasqanpas mana Diospa contranpichu kashan chayqa kasukullanin. Manataqmi mat’ipayanichu aswanpas payllamanta iñinantan suyashani, Jehová Diospitaqmi confiani”, nispa.

Christaq nisqan hina, atikuqtinqa paykunaq kamachisqantan ruwana, manataqmi sinchitaqa mat’ipayanachu. Christaqa tukuy atisqantan Diospaq llank’an, huñunakuyman rispa predicaspa ima. Ichaqa allintan entienden qosan imakuna necesitasqanta, qosanqa necesitanmi munakuyninta, tiemponta, atiendenanta ima. Ñoqanchispas mana iñiq familianchiswanqa chhaynan kananchis. Biblian nin: “Imaymanapaqmi tiempo kan”, nispa. Chaymi paykunawan kuska kananchis, astawanqa qosanchis otaq esposanchis kaqtin. Paykunawan kuska kasun chayqa sumaqtan parlarisun, manataqmi wikch’usqachu nitaq mana munasqa hinachu sientekunqaku (Ecl. 3:1).

Holger Iñiqmasiq taytanmi llapa familiankumantapas 20 wata qhepamanña bautizakurqan. Holgermi nin: “Mana iñiq familianchisqa reparananmi munakusqanchista hinaspapas paykunapaqmi mañapuna”, nispa. Christa iñiqmasitaq nin: “Manan hayk’aqpas sayk’usaqchu qosaypa bautizakunanta suyaspaqa”, nispa. Ñoqanchispas mana sayk’uspan suyananchis familianchiskunapas Diospi iñinanta.

Familianchiswanqa sumaqtan kawsananchis, yanapanan Diosta reqsinankupaq, sonqonkuman chayaqtataqmi rimapayananchis. Hinaspapas ‘llamp’u sonqowan respetowanmi’ paykunata qhawarinanchis (1 Ped. 3:15).