1. ¿Kuna uñachtʼäwsa Jesusajj jaytawayistu?

MUNAÑANAKAS maysar apanukuñasatakiw Jesusajj mä uñachtʼäwi jaytawayistu. Diosan munañap lurañatakejja, Jesusajj munañanakapsa ukat sum jakasiñsa maysaruw apanuküna (Juan 5:30). Jiwañkamaw Diosar serviwayäna, ukhamatwa munañanakap apanukurïtap uñachtʼayawayistu (Fili. 2:8).

2. ¿Kunjamsa munañanakas maysar apanukurïtas uñachtʼaysna, ukat kunatsa?

² Jesusan arkirinakapjamajja, ukhamarakiw munañanakas maysar apanukuñasa. ¿Kunjamsa uk lursna? Munañanakas thaqañat sipansa, mayninakan askip thaqañatakiw chʼamachasiñasa. Mä arunjja, janiw jiwasatakik kuns munirïñasäkiti (Mateo 16:24 liytʼañataki). Ukham chuymanïñäni ukhajja, kuntï munktan uk thaqañat sipansa, mayninakan askip thaqañasatakiw chʼamachasiñäni (Fili. 2:3, 4). Diosar yupaychañatakejj munañanakas maysar apanukuñaw wakisi sasaw Jesusajj yatichäna. Jiwasatï ukham lurañäni ukhajja, munasirïtaswa uñachtʼayañäni. Cheqpach cristianonakajj munasirit uñtʼatätanwa. Ukhamajj munasiñajja, munañanakas maysar apanukuñatakiw yanaptʼistu (Juan 13:34, 35). Oraqpachankir jilat kullakanakasajj ukham chuymanïpjjewa. Jupanak taypinkasajj walja bendicionanakwa katoqtanjja.

3. Munañanakas maysar apanukurïñ chuymanïtasjja, ¿kunas jan waltʼayaspa?

 ³ Ukhamajja, munañanakas maysar apanukurïñ chuymanïtasarojj mayni pachpatak munirïñaw jan waltʼayaspa. Adanampi Evampit amtañäni, jupanakajj ukhaman uñjasipjjäna. Evajj Diosjamäñwa munäna. Adanasti Evamp chikäskakiñwa munarakïna, ukatwa Diosar jan istʼkänti (Gén. 3:5, 6). Supayaw jupanakarojj cheqa yupaychäwit ukham jitheqtayäna, ukhat aksaruw jaqenakarojj jupanakan askinakap thaqapjjañapatakejj nuktʼaskaki. Jesusarus ukhaman uñjasiyañwa munäna (Mat. 4:1-9). Jichhürunakanjja, Supayajj walja jaqenakaruw sipitapar jaltʼayi, ukat jupanakan munañanakap thaqapjjañapatakiw chʼamañcharaki. Akapachanjja, jaqenakajj jupanakatakikiw taqe kuns munasipki, jiwasajj janipun jupanakat yateqasipjjañäniti (Efe. 2:2).

4. 1) ¿Jiwasatakik kuns munirïñjja apanuksnati? Uk qhanañchtʼam. 2) ¿Kuna jisktʼanakarus qhanañchaskañäni?

⁴ Maynitakik taqe kuns munañajja, sarromp sasispawa. Mä fierro anqar jaytjsna ukat janirak yäqksnati ukhajja, saruntaspawa, ukat janiw kunatakis walëjjaspati. Jiwasampejj ukhamarakiw pasaspa. Cheqas jiwasajj pantjasir jaqëtanwa. Ukat kun munañas chuymasan utjakipuniwa, ukatwa chuymasajj kunjamäskisa uk sum uñjañasa ukat janirakiw jiwasatakik taqe kun munañampejj apnaqayasiñasäkiti (1 Cor. 9:26, 27). ¿Jiwasatakik taqe kuns munirïtanti janicha uk kunjamatsa yatsna? Ukat ¿kunjamsa munañanakas maysar apanukutas uñachtʼaysna?

5. 1) ¿Kunjamanakatsa Bibliajj mä espejor uñtatajja? (7 janankir foto uñjjattʼam.) 2) Kunjamäsktansa uk Bibliarjam uñakipasisajja, ¿kunsa janejj lurañasäki?

⁵ Kunjamtï mä espejojj kunjamäsktansa uk yatiñatak yanaptʼkistojja, ukhamarakiw Bibliajj chuymasan kunjamäsktansa uk yatiñataki ukat kuna jan walinakatï utjkistu uk cheqañchañatak yanaptʼistu (Santiago 1:22-25 liytʼañataki). Ukampis kunjamäsktansa uk yatiñatakejj espejot sum uñkattʼasiñasawa. Amuytʼañataki, espejot jan sum uñkataskañäni ukhajja, kunjamäsktansa uk janiw yatisksnati. Ukhamaraki, janitï espejo nayraqatar saytʼaskañäni ukhajja, yaqharukiw espejon uñjsna. Ukhamajj jiwasatakik kuns munirïtanti janicha uk yatiñatakejja, janiw aleq ukhamak Biblia liyiñasäkiti, janirakiw yaqhanakar juchañchañatakikis liyiñasäkiti.

6. ¿Kunjamsa ‘Diosan leyiparjam’ sarnaqaskaksna?

⁶ Sapüruw jan jaytasa Biblia liyisksna, ukampis jiwasatakik kuns munirïñajj chuymasan jiltaskatap janiw amuyksnati. Amuytʼañäni, Santiagojj espejot uñkatasir mä jaqetwa parläna. Santiagojj akham sänwa: “Ukapachajj uñkattʼasiwa kunjämäkitejj uka” sasa. “Uñkattʼasiwa” sasinjja, uka jaqejj sum uñkattʼasïna sañwa Santiagojj munäna. Ukampis ¿kunsa uka chachajj jan lurkäna? Qellqatajj akham saskakiwa: “Sarjjasinjja armtʼasjjewa kunjämäkäntejj ukjja” sasa. Cheqas uka chachajj espejot uñkatasisin jan ukarjam askichtʼasiwayasaw sarjjäna. Ukampis nayrar sartir mä chachajj janiw ‘Diosan leyipak amuytʼkiti’ jan ukasti ‘ukarjamaw sarnaqaraki’. Diosan leyinakap jaytañat sipansa, ukarjam phoqañatakiw chʼamachasi. Jesusajj akham sarakïnwa: “Jumanakatejj cheqpach saytʼapjjäta kuntejj sapjjsma ukhamarjama ukkhajja, nayan cheqpacha discipulonakajjaw tukupjjäta” sasa (Juan 8:31).

7. ¿Kunjamsa Bibliajj jiwasatakik kuns munirïñaru saykatañatakejj yanaptʼistaspa?

⁷ Ukhamasti, jiwasatakik kuns munirïñar kunatï apkistu ukar saykatañatakejja, nayraqat wali amuyumpiw Biblia liyiñasa. Ukaw kunanakan chʼamachasiñasas wakisi uk amuyañatak yanaptʼistaspa. Ukampis janiw ukak lurañasäkiti. Jan ukasti uka toqet jukʼamp yatichäwinakwa thaqañasa. Biblian utjki uka sarnaqäwinakat sum amuytʼañäni ukhajja, jiwasas ukankksna ukham amuyañasa, ukat akham jisktʼasiñasarakiwa: “¿Ukhaman uñjasisajj kunsa  luririskayätjja? ¿Kunatï askïki ukti luririskayätjja?”. Ukatjja, kuntï liytʼaniwayktan uk lupʼisajja, ukarjam sarnaqañatakiw chʼamachasiñasa (Mat. 7:24, 25). Kunjamsa Saúl reyina ukat apóstol Pedron sarnaqäwipajj munañanakas maysar apanukus Diosar serviñatak yanaptʼistaspa, uk jichhajj yatjjatañäni.

8. ¿Kunjam chuymampis Saúl reyejj apnaqañ qalltäna, ukat kunjamsa uk uñachtʼayäna?

⁸ Kunatï Saúl reyir paskäna ukajja, amuyasiñasatakiw yanaptʼistu. Saulajj altʼat chuymampiw Israel mark apnaqañ qalltäna (1 Sam. 9:21). Reyïkchïna ukhasa, apnaqañapatak uttʼayatäkäna uka contra parlir israelitanakarojj janiw juchañchkänti (1 Sam. 10:27). Ukhamaraki, Saúl reyejj Israel markar amonitanakamp chʼajjwañatak pʼeqtʼkäna ukhajja, Diosan qollan ajayupampiw irpayasïna, ukat ukham atipjasajj janiw jupak jachʼañchayaskänti, jan ukasti Jehová Diosaruw jachʼañchayäna (1 Sam. 11:6, 11-13). Ukampis qhepatjja, munañanakap maysar apanukuñat sipansa, jupatakik taqe kuns munañampiw apayasjjäna.

9. ¿Kunatsa Saúl reyejj jupatakik kuns muniriru tuküna?

⁹ Kunjamtï fierrojj saruntkejja, ukhamwa Saúl reyejj jachʼa jachʼa tukuñampi ukat jupatakik kuns munirïñamp qhepat apayasïna. Amalecitanakar atipjkäna ukhajja, Jehová Diosar istʼañat sipansa, jupan munañanakapakwa nayrar usküna. Kuntï Jehová Diosajj tʼunjapjjañapatak siskän uk istʼañat sipansa, kunanakatï wali askïkäna ukwa apasinïna. Ukat jachʼa jachʼa tukusaw jupar uñtasit mä monumento lurayasïna (1 Sam. 15:3, 9, 12). Ukat kunapachatï Samuelojj janiw Jehová Diosar istʼktati sasin Saular siskäna ukhajja, janis kuna juchanïkaspa ukham Saulajj tuküna. Kuntï phoqkäna ukakwa aytasïna ukat kunantï pantjaskäna ukanakatjj mayninakaruw juchañchäna (1 Sam. 15:16-21). Saulajj Jehová Diosamp sum apasiñat sipansa, kunsa jaqenakajj jupat amuyapjjani ukatakwa llakisïna, cheqas ukaruw jachʼa jachʼa tukurïñajj apäna (1 Sam. 15:30). Munañanakas maysar apanukus Diosar serviskakiñatakejja, ¿kunjamsa Saúl reyin sarnaqäwipajj mä espejökaspas ukham yanaptʼistaspa?

10, 11. 1) ¿Kunsa Saúl reyin jan wali sarnaqäwipajj yatichistu? 2) Kunatï Saular jan walir purtʼasiykän ukarojja, ¿kunjamatsa jan purtʼasksna?

¹⁰ Nayraqatjja, Saulan jan wali sarnaqäwipajj jan jiwaspachpar confiyasiñwa yatichistu. Jiwasatï nayrajj munañanakas maysar apanukus Diosar loqtchiyätanjja, jutïrin ukhamäskakïwa sasin janiw amuyañasäkiti (1 Tim. 4:10). Ak amtapjjapuniñäni, uka reyejj qalltan sumaw jikjjatasïna ukat mä qawqha tiempojj Diosampejj sumwa apasirakïna. Ukampis jupatakik kuns munirïñampiw apayasjjäna. Ukatsti, jan istʼasirïtapatjja Jehová Diosajj janiw askit uñj-jjänti.

¹¹ Ukat Saúl reyit akwa yateqaraksna, kunantï walikïsktan ukanak uñjasajj janiw walikïsktwa sañasäkiti ukat janirakiw kunanakantï chʼamachasiñasajj wakiski uk ukhamak uñjañasäkiti. Ukham lursna ukhajja, machaq isiksa espejot uñkatasksna ukat ajanusan mä cheq qʼañüskatap janis uñjksna ukamp sasispawa. Janis Sauljam jachʼa jachʼa tukurïkstanjja, jupjam jan tukuñatakejj amuyasiñasawa. Kunapachatï ewjjtʼanak katoqkañäni ukhajja, taqe chuyma istʼañasa, jan wali luratanakasajj janis kunäkaspa ukhamjja janiw amuyañasäkiti, ni yaqhanakarus juchañchañasäkiti. Saúl reyjam lurañat sipansa, ewjjtʼanak katoqtʼasiñasawa (Salmo 141:5 liytʼañataki).

12. ¿Kunjamsa munañanakas maysar apanukuñajj jachʼa juchar purtʼaskañäni ukhajj yanaptʼistaspa?

¹² Ukampis ¿jachʼa juchar purtʼasisajj kuns lurañasa? Saúl reyejj sum uñjatañwa munäna, ukaw Jehová Diosamp wasitat sum apasiñ jarktʼäna. Janipun ukhamäpjjañäniti. Ukampis munañanakas maysar apanukus Jehová Diosar serviskakiñänejja, jaqenakajj nayat kamsapkakini sasin jan amuyañataki ukat yanaptʼa thaqañatakiw yanaptʼistani (Pro. 28:13;  Sant. 5:14-16). Amuytʼañataki, mä jilatajj 12 maranïkäna ukhaw pornografía sat qʼañu luräwinak uñchʼukiñ qalltäna, ukat tunka mara jilaw jamasat ukham uñchʼukiskakïna. Jupajj akham siwa: “Warmijaru ukat irpir chuymaninakar uka toqet yatiyañajj wali chʼamänwa. Ukampis uk yatiyasajja, mä jathi qʼepsa apaqaskirista ukhamaw jikjjatasta. Kunapachatï irpir chuymaninakan yanapiripjam jan irnaqtʼjjayäta ukhajja, yaqhep amigonakajajj chuym ustʼayasipjjäna, jupanakar jan walsa lurkirista ukham amuyasipjjäna. Ukhamäkchi ukasa, pornografía uñchʼukkayäta ukat sipansa, Jehová Diosajj kuntï jichhajj lurkta uk wali askit uñjatapwa amuyasta, kuntï Jupajj amuyki ukaw natakejj jukʼamp askejja” sasa.

13, 14. Pedrojj jupatakik taqe kuns munirïñampiw apayasïna, ¿kunjamatsa uk yattanjja?

¹³ Pedrojja, Jesusamp yatichatäkäna ukhajj munañanakap maysar apanukutapwa uñachtʼayäna (Luc. 5:3-11). Ukhamäkchïnsa, jupatakik kuns munirïñwa apanukuñapäna. Amuytʼañataki, kunapachatï Santiagosa Juanasa Jesusamp chika Diosan Reinopan qontʼasiñ munapjjatap Pedrojj yatïna ukhajja, wal colertʼasïna. Ukan qontʼasiñajj juparus waktʼkaspa ukham inas amuychïna, kunattejj juparuw Jesusajj mä wakiskir luräwi katoqäta sasin säna (Mat. 16:18, 19). Ukhamäkchïnsa, Jesusajj Santiagorusa, Juanarusa, Pedrorusa, mayni apostolonakarus akham sasaw ewjjtʼäna: ‘janiw jumanakatakik kuns munapjjañamäkiti, janirakiw mayninakjjarojj ‘munañanïpkasmasa’ ukham tukupjjañamäkiti’ sasa (Mar. 10:35-45).

¹⁴ Pedrojj cheqañchatas uñjaskchïnjja, qhepat jupatakik kuns munañampejj wasitampiw apayasïna. Taqeniw mä tiempon jaytjapjjetäta sasin Jesusajj apostolonakapar siskäna ukhajja, Pedrojj janipuniw nayajj jaytkämati sasinwa mayninakar jiskʼachasin jachʼañchasïna (Mat. 26:31-33). Janiw jupa pachpar confiyasiñapäkänti, kunattejj uka pachpa arumaw jupajj arup jan phoqkänti. Jan walit jarkʼaqasiñatakejja, Pedrojj kimsa kutiw Jesusar jan uñtʼir tuküna (Mat. 26:69-75).

15. ¿Kunatsa Pedron sarnaqäwipajj yateqaskayajja?

¹⁵ Pedron chʼamachasitapajj jiwasar wal yanaptʼistaspa. Wal chʼamachasisina ukat qollan  ajayumpi yanaptʼayasisinjja, jupatakik taqe kuns munañarojj atipänwa. Ukatjja, munañapamp jan apayasiñataki ukat taqe chuyma munasiñatakiw chʼamachasïna (Gál. 5:22, 23). Pantjaskän ukanakat sipansa, jukʼamp jachʼa yantʼanakaruw Pedrojj saykatäna. Amuytʼañataki, apóstol Pablojj taqen uñjkat cheqañchkäna ukhajja, Pedrojj altʼat chuymanïtapwa uñachtʼayäna (Gál. 2:11-14). Uka cheqañchatapajj jaqenakampiw phenqʼar puriyitu sasin janiw chuyma ustʼayaskänti. Jan ukasti munat jilaparjamaw uñjaskakïna (2 Ped. 3:15). Pedron sarnaqäwipaw munañanakas maysar apanukus Diosar serviskakiñatak yanaptʼistaspa.

16. ¿Kunjamsa jan walinakan uñjasktan ukhajj munañanakas maysar apanukutas uñachtʼaysna?

¹⁶ Jan walinakan uñjaskasajj kuns lurtan uk amuytʼam. Pedrosa ukat mayni apostolonakas Diosan arunakap yatiyapjjatapat carcelan jistʼantata jawqʼjjata uñjasipkäna ukhajja, “Diosajj jiwasanakarojj walikwa ajllisistojja akham [Jesusan] sutip layku tʼaqhesiñasatakejja” sasaw kusisipjjäna (Hech. 5:41). Arknaqat uñjaskañäni ukhaw Pedrot yateqasiñäni, ukatjja Jesusjamarakiw munañanakas maysar apanukusina sarnaqañäni (1 Pedro 2:20, 21 liytʼañataki). Kunapachatï irpir chuymaninakat cheqañchäwi katoqkañäni ukhaw ukham amuyañajj yanaptʼistaspa. Chuym ustʼayasiñat sipansa Pedrot yateqasiñäni (Ecl. 7:9).

17, 18. 1) Diosar jukʼamp serviñ munatas toqetjja, ¿kunsa jisktʼasiñasa? 2) Chuymasantï jiwasatakik kuns munaskatas amuyastan ukhajja, ¿kunsa lurañasa?

¹⁷ Pedron sarnaqäwipajj Diosar jukʼamp serviñ amtañatakiw yanaptʼarakistaspa. Uka amtanak phoqañatak chʼamachasisaw munañanakas maysar apanukutas uñachtʼaysna. Ukampis amuyasiñasawa, janipuniw wali aytatäñsa munksna ukham tukuñasäkiti. Akhamwa jisktʼasiñasa: “¿Kunatsa Jehová Diosar jukʼamp serviñ muntjja? ¿Kunjamtï Santiagosa ukat Juanasa wali aytatäña ukat mayninakjjar munañanïña munapkäna ukhamarakti Jehová Diosar jukʼamp serviñ munatajajj tukuspa?” sasa.

¹⁸ Chuymasantï jiwasatakik kuns munaskatas amuyastan ukhajja, Jehová Diosaruw kuntï amuyktan ukat chuymasan munktan uk cheqañchañapatak mayiñasa. Ukat jiwas pachpar jachʼañchasiñat sipansa, Jehová Diosar jachʼañchañatakiw chʼamachasiñasa (Sal. 86:11). Ukat kunatï wali aytatäñar jan tukuykistaspa ukwa amtsna. Amuytʼañataki, qollan ajayun achupat kawkïriy jiwasatak chʼamächi uk uñachtʼayañatakiw chʼamachassna. Jan ukajj tantachäwin arstʼañajj waktʼkistu ukan arstʼañatak sumwa wakichtʼassna, ukampis Tantachasiñ Uta qʼomachañ jan askit uñjksna ukhajja, Romanos 12:16 qellqatan jikjjataski uka ewjjtʼarjam lurañatakiw amtañasa (liytʼañataki).

19. Bibliamp mä espejökaspas ukham uñakiptʼasis jiwasan jan walinak uñjañäni ukhajja, ¿kunsa jan aynachtʼañasatak lurañasa?

¹⁹ Bibliamp mä espejökaspas ukham sum uñakiptʼassna ukat chʼamachasiñas wakisitapa amuysna ukhajja, inas aynachtʼat jikjjatassna, ukajj inas jiwasatakik kuns munirïñächispa. Ukhamantï uñjasiñäni ukhajja, Santiagojj nayrar sartir jaqet parlkäna uka toqetwa amtañasa. Uka sarnaqäwit parlkäna ukhajja, janiw uka jaqen qawqha tiempotsa uka jan waltʼäwinak askichi uk qhanañchkänti ni kunanakantï jan walïki uk taqpach askichatapsa qhanañchkänti, jan ukasti Diosan leyiparjam sarnaqañatakiw chʼamachasi sasaw Santiagojj säna (Sant. 1:25). Uka chachajj kuntï espejon uñkataskäna ukwa amtäna ukat jan ukhamäñatakiw chʼamachasïna. ¿Kuns yateqsna? Janiw kunatakis askïkti sasajj janiw amuyañasäkiti ukat janirakiw sints jachʼañchasiñasäkiti ni pantjasitanakasampis aynachtʼañasäkiti (Eclesiastés 7:20 liytʼañataki). Diosan leyiparjam sarnaqañataki ukat munañanakas maysar apanukus Diosar serviñatak chʼamachasiskakiñäni. Kunjamtï Jehová Diosajj walja jilat kullakanakar yanaptʼawaykejja, ukhamwa jiwasar yanaptʼañ munarakistu. Jupanakajj pantjasirïpkchi ukasa Diosamp askit uñjatäpjjewa ukat bendición katoqapjjarakiwa.