1. Edena dala ai Iesu ese sibona ena ura dadaraia karana ia hahedinaraia goevagoeva?

 IESU be tanobada ai ia noho neganai, sibona ena ura dadaraia karana ia hahedinaraia goevagoeva. Dirava ena ura ia atoa guna, to sibona ena ura bona namo ia laloa bada lasi. (Ioa. 5:30) Iesu ia gini goada ela bona hisihisi auna dekenai idia hamasea. Unai ese ia hamomokania ia be sibona ena ura ia dadaraia, ma haida ia durua totona.—Fili. 2:8.

2. Edena dala ai sibona eda ura dadaraia karana ita hahedinaraia diba? Dahaka dainai unai ita karaia be namo?

² Ita be Iesu ena murinai ita raka taudia dainai, ita danu be sibona eda ura ita dadaraia be namo. Sibona ena ura dadaraia karana ena anina be dahaka? Ena anina be, ta be mai ena ura ida sibona ena namo ia dadaraia, unai amo ma haida ia durua diba. Unai be sibona laloa bada karana amo ia idau. (Mataio 16:24 duahia.) Bema sibona eda ura ita laloa bada lasi, unai ese ita do ia durua ma haida edia namo ita atoa guna totona. (Fili. 2:3, 4) Iesu ia gwau unai be iseda tomadiho karana badana, badina Keristani lalokauna ese ita ia veria sibona eda ura ita dadaraia lalokauna ita hahedinaraia totona. Taunimanima ibounai idia diba, Iesu ena murinai idia raka taudia be lalokau idia hahedinaraia. (Ioa. 13:34, 35) Danu, tanobada hegegemadai tadikaka oreana lalonai, ita ibounai be sibona eda ura dadaraia karana ita hahedinaraia dainai, hahenamo momo ita moalelaia!

3. Sibona ena ura dadaraia karana be edena kara ese ia hadikaia diba?

³ To, sibona eda ura dadaraia karana be kara ma ta ese ia  hadikaia diba. Unai be sibona eda namo laloa bada karana. Mani Adamu bona Heva ese sibona ena namo laloa bada karana idia hahedinaraia dalana ita herevalaia. Heva be sibona ia laloa bada dainai, ia ura Dirava bamona do ia lao. Adamu danu be sibona ia laloa bada, badina ia ura Heva ia hamoalea. (Gen. 3:5, 6) Diabolo ese Adamu bona Heva be tomadiho momokani amo ia hakaua siri murinai, ia ese taunimanima ia dibagania sibona edia namo idia laloa bada totona. Iesu ia dibagania neganai, unai tarapu ia gaukaralaia danu. (Mat. 4:1-9) Hari, Satani be taunimanima momo ia hakaua kerere, bona idia ia veria sibona edia namo idia laloa bada totona. Unai kara dekenai ita naria namonamo be gau badana, badina iseda kara namodia ia hadikaia diba.—Efe. 2:2.

4. (a) Sibona eda namo laloa bada karana ita kokia diba, a? Herevalaia. (b) Edena henanadai do ita herevalaidia?

⁴ Sibona ena namo laloa bada karana be rasta ida ita hahegeregerea diba. Bema auri ta be nega daudau lalonai medu bona dina dekenai ita rakatania, rasta ia vara diba. Bema rasta ita itaia to gau ta ita karaia lasi, do ia bada ia lao bona auri do ia hadikaia. Unai hegeregerena, ena be eda kara dika bona sibona eda namo laloa bada karana ita kokia diba lasi, to namona be ita hekwarahi unai kara ita dadaraidia totona. Badina bema ita naria namonamo lasi, unai ese sibona eda ura dadaraia karana do ia hadikaia. (1 Kor. 9:26, 27) Edena dala ai do ita diba ita be sibona eda namo ita laloa? Bona edena dala ai sibona eda ura dadaraia karana ita goadalaia diba?

5. (a) Edena dala ai Baibel be hevarivari bamona? (Laulau ginigunana itaia.) (b) Baibel amo sibona ita sekea neganai, edena kara ita dadaraia be namo?

⁵ Ita ese hevarivari ita gaukaralaia eda toana ita sekea totona, unai hegeregerena Baibel ita gaukaralaia diba eda lalona ita sekea bona kerere gaudia ita hamaoromaoroa totona. (Iamesi 1:22-25 duahia.) Bema hevarivari ita gaukaralaia namonamo, ita do ia durua eda toana ita hanamoa totona. Hegeregere, bema hevarivari ita itaia bona ita raka siri haraga, reana iseda toana ia hadikaia gauna ta do ita itaia lasi. Eiava bema saidi ai ita gini bona hevarivari ita itaia, reana ma ta ena laulau do ita itaia. Unai hegeregerena, Baibel amo sibona ita sekea diba bema ita be sibona eda namo laloa bada karana ita hahedinaraia o lasi. To, namo lasi Baibel ita duahia kava, o ita gaukaralaia ma haida edia kerere ita hahedinaraia totona.

6. Edena dala ai taravatu goevadaena ita “badinaia noho” diba?

⁶ Ena be dina ta ta ai Dirava ena Hereva ita duahia, to reana do ita itaia lasi ita be sibona eda namo laloa bada karana ita hahedinaraia noho. Edena dala ai unai ia vara diba? Iamesi ese hevarivari ai “sibona ia itaia” tauna ena haheitalai ia gwauraia. Ia ese Greek herevana ta ia gaukaralaia, ena anina be “itaia namonamo” karana. To, unai tau ena hekwakwanai be dahaka? Iamesi ma ia gwau: “Ia lao bona maoromaoro ia laloaboio ia be edena bamona tauna.” Oibe, unai tauna be hevarivari ia itaia, to gau ta ia karaia lasi bona ia raka siri. To, Iamesi ia gwau, ia moale tauna be “taravatu goevadaena . . . ia itaia noho bona ia badinaia noho.” Anina be ia ese Baibel ena taravatu goevadaena ia rakatania lasi, to ena hadibaia herevadia ia badinaia noho. Iesu danu ia gwau: “Bema egu hereva umui badinaia, umui be momokani egu hahediba taudia.”—Ioa. 8:31.

7. Edena dala ai Baibel amo ita sekea diba, bema ita be sibona eda namo ita laloa bada o lasi?

⁷ Sibona emu namo laloa bada karana oi dadaraia totona, Baibel oi duahia namonamo be gau badana. Unai ese oi do ia durua emu kara oi hanamoa totona. To unai  sibona lasi, namona be orea ese ia halasia buka bona magasin oi stadilaia namonamo. Baibel ena sivarai ta oi duahia neganai, namona be oi laloa oi be unai sivarai lalonai oi noho bamona. Sibona oi nanadaia: ‘Bema unai be lau dekenai ia vara, dahaka do lau karaia? Dala maorona do lau badinaia, a?’ Gau badana be oi duahia gauna oi laloa dobu murinai, oi hekwarahi oi badinaia totona. (Mat. 7:24, 25) Mani ita itaia edena dala ai King Saulo bona aposetolo Petero edia sivarai ese ita idia durua, sibona eda ura dadaraia karana ita habadaia totona.

8. Saulo ia lohia matamaia neganai, edena kara ia hahedinaraia?

⁸ King Saulo ena sivarai amo ita dibaia gauna be inai: Bema ita naria namonamo lasi, sibona eda namo do ita laloa bada bona ma haida edia namo do ita laloa lasi. Saulo ia lohia matamaia neganai, ia manau bona ma haida edia namo ia laloa bada. (1 Sam. 9:21) Dirava ese Saulo dekenai king dagina ia henia neganai, Israela taudia idia maumau, to Saulo ese idia ia panisia lasi. (1 Sam. 10:27) King Saulo ese Dirava ena lauma ena hakaua dalana ia badinaia dainai, Israela taudia be Amono taudia idia tuari henia neganai, idia kwalimu. Unai murinai, Saulo ese mai manau ida Iehova ena ladana ia hanamoa.—1 Sam. 11:6, 11-13.

9. Edena dala ai Saulo be sibona ena namo ia laloa bada?

⁹ Gabeai, Saulo be sibona ena namo ia laloa bona ia hekokoroku, auri ai rasta ia vara bamona. Tuari ai Amaleka taudia ia halusia murinai, ia be sibona ena ura ia atoa guna, to Iehova ia badinaia lasi. Ia mataganigani dainai Dirava ese ia hamaoroa do ia hamasea gaudia ia abia mauri. Danu, Saulo be ia hekokoroku bona sibona ena ladana abia isi totona, idia koroa nadina ta ia haginia. (1 Sam. 15:3, 9, 12) Peroveta tauna Samuela ese Saulo ia hamaoroa Iehova be ia dekenai ia moale lasi neganai, Saulo be ekskius ia karaia bona ia gwau ia ese Dirava ena hahegani ibounai ia badinaia, bona ma haida dekenai bleim ia henia. (1 Sam. 15:16-21) Saulo be ia hekokoroku dainai sibona ena ladana ia laloa bada, to ena hetura karana Dirava ida ia laloa bada lasi. (1 Sam. 15:30) Edena dala ai Saulo ena sivarai be hevarivari bamona ita gaukaralaia diba, unai amo ita ese sibona eda ladana ita laloa bada lasi, to ma haida edia namo ita atoa guna?

10, 11. (a) Saulo ena haheitalai amo dahaka ita dibaia? (b) Edena dala ai Saulo ese ia badinaia dala kererena ita dadaraia diba?

¹⁰ Saulo ena sivarai amo ita dibaia gauna ginigunana be, sibona eda diba dekenai do ita tabekau lasi. Sibona eda ura dadaraia karana be ia vara kava lasi, unai dainai namona be hanaihanai ita hekwarahi unai kara ita hahedinaraia totona. (1 Tim. 4:10) Laloatao, matamanai Saulo be kara namo ia hahedinaraia dainai, Dirava ese ia lalonamo henia. To, Saulo be sibona ena namo laloa bada lalohadaina ia abia neganai, ia dadaraia lasi. Unai dainai Dirava ese ia dadaraia.

¹¹ Gau iharuana be, namo lasi ita manadalaia kara namodia sibona ita karaia noho, to do ita hekwarahi eda kara ma haida ita hanamoa totona. Unai be hegeregere, hevarivari ai iseda dabua matamatana ita itaia bona moalelaia, to iseda vairanai idia noho miro ita itaia lasi. Ena be Saulo ena hekokoroku karana ita tohotohoa lasi, to namona be ita gaukara goada Saulo ese ia badinaia dala kererena ita dadaraia totona. Danu, bema elda taudia ese ita idia sisiba henia, namo lasi ekskius idauidau ita gwauraia, o ma ta dekenai bleim ita henia. Namona be elda edia sisiba ita abia dae.—Salamo 141:5 duahia.

12. Bema kerere badana ta ita karaia, edena dala ai sibona eda ura dadaraia karana ese ita do ia durua?

¹² To, bema kerere badana ta ita karaia be  edena bamona? Saulo be sibona ena ladana ia laloa bada dainai, ena hetura karana Iehova ida ia hanamoa lou lasi. To, sibona eda ura dadaraia karana ese ita do ia durua eda ladana ita laloa bada lasi, bona elda amo heduru do ita tahua. (Aon. 28:13; Iam. 5:14-16.) Hegeregere, tadikaka ta be ena mauri lagani 12 neganai ponografi ia itaia matamaia, bona lagani 10 mai kahana lalonai hehuni dalanai unai ia karaia. Ia gwau: “Egu adavana bona elda taudia dekenai unai lau herevalaia be auka. To, unai lau gwauraia hedinarai dainai, hari lau mamia egu pagana amo gau metauna ta idia kokia bamona. Egu hesiai maduna idia kokia neganai, egu turadia haida be lau dekenai idia lalohisihisi. To, lau diba Iehova be hari egu hesiai gaukara ia moalelaia, bona iena lalohadai lau laloa bada.”

13, 14. Edena dala ai Petero be sibona ena namo ia laloa bada?

¹³ Aposetolo Petero be Iesu ese ia hadibaia negana lalonai, sibona ena ura dadaraia karana ia hahedinaraia. (Luka 5:3-11) To, ia hekwarahi sibona ena namo laloa bada karana ia dadaraia totona. Hegeregere, aposetolo Iamesi bona Ioane be Basileia lalonai dagi bada idia abia totona Iesu idia noia neganai, Petero ia badu. Reana Petero ia laloa ia ese unai dagi ta do ia abia, badina Iesu ese ia hamaoroa ia be gaukara badana ta do ia karaia. (Mat. 16:18, 19) Iesu ese Iamesi, Ioane, Petero bona aposetolo taudia ma haida ia sisiba henidia, sibona edia namo do idia laloa bada lasi, bona namo lasi idia laloa idia ese edia tadikaka idia hereaia.—Mar. 10:35-45.

¹⁴ Ena be Iesu ese Petero ia durua, to Petero be sibona ena namo laloa bada karana ia hahedinaraia noho. Iesu ese aposetolo taudia ia hamaoroa idia be ia amo do idia heau neganai, Petero ese sibona ia abia isi bona ia gwau haida be do idia moru, to ia be do ia moru lasi. (Mat. 26:31-33) To, Petero be sibona ena diba dekenai ia tabekau be namo lasi, badina unai hanuaboi ai ia be sibona ena namo ia laloa bona nega toi Iesu ia gorea.—Mat. 26:69-75.

15. Dahaka dainai Petero ena haheitalai ese ita ia durua diba?

 ¹⁵ Ena be Petero be nega haida ia moru, to ena haheitalai ese ita ia hagoadaia danu. Gabeai, Dirava ena lauma helaga ena heduru dainai, Petero ia gaukara goada sibona ena kara ia biagua bona sibona ena ura dadaraia lalokauna ia hahedinaraia. (Gal. 5:22, 23) Ia ese gabeai hahetoho badadia ma haida ia haheaukalaia. Hegeregere, Paulo ese ma haida vairanai Petero ia hereva auka henia neganai, Petero be ia manau. (Gal. 2:11-14) Petero ia badu lasi, bona ia laloa lasi Paulo ese iena ladana ia hadikaia. To, Petero ia hahedinaraia ia ese Paulo ia lalokau henia. (2 Pet. 3:15) Iena haheitalai ese ita ia durua sibona eda ura ita dadaraia totona.

16. Dagedage negadiai, edena dala ai sibona eda ura dadaraia karana ita hahedinaraia diba?

¹⁶ Dagedage idia vara neganai, dahaka do oi karaia? Petero bona aposetolo taudia be edia haroro gaukara dainai dibura ruma ai idia atodia bona idia dadabadia neganai, idia moale “badina Dirava ia laloa idia hegeregere Iesu ena ladana dainai hemarai idia abia totona.” (Kara 5:41) Dagedage oi davaria negadiai, unai be nega namona Petero oi tohotohoa bona Iesu bamona sibona emu ura oi dadaraia. (1 Petero 2:20, 21 duahia.) Danu, unai kara ese oi do ia durua elda taudia edia sisiba oi abia dae totona. Namona be Petero ena haheitalai oi tohotohoa bona oi badu lasi.—Had. 7:9.

17, 18. (a) Iseda tahua gaudia ita ura abia hidi neganai, dahaka henanadai ita laloa be namo? (b) Bema ita itaia ita be sibona eda namo laloa bada karana ita hahedinaraia, dahaka ita karaia be namo?

¹⁷ Iehova oi hesiai henia totona tahua gaudia oi ura abia hidi neganai, Petero ena haheitalai ese oi ia durua diba. Unai tahua gaudia oi hagugurua totona, sibona emu ura oi dadaraia be gau badana. To, namona be oi naria namonamo: Namo lasi unai tahua gaudia oi abia hidi, badina oi ura sibona emu ladana oi abia isi. Sibona oi nanadaia: ‘Dahaka dainai lau ura egu hesiai gaukara lau hanamoa o habadaia? Iamesi bona Ioane bamona, lau ura unai lau karaia badina dagi bada do lau abia bona haida ese egu ladana do idia abia isi, a?’

¹⁸ Bema oi itaia oi be sibona emu namo oi laloa bada, namona be Iehova oi noia oi do ia durua emu lalohadai bona hemami oi hamaoromaoroa totona. Bena oi gaukara goada Iehova ena ladana oi hanamoa totona. (Sal. 86:11) Danu, momo ese idia laloa bada lasi tahua gaudia oi abia hidi diba. Hegeregere, bema oi itaia lauma helaga ena huahua ta oi hahedinaraia be auka, oi hekwarahi unai oi hanamoa be namo. Eiava, bema oi be hebou gaudia oi hegaegaelaia namonamo, to oi ura lasi Kingdom Hall hagoevaia gaukarana oi durua, vadaeni namona be emu lalona oi hadaia Roma 12:16 (duahia) ena sisiba oi badinaia totona.

19. Bema Baibel lalonai sibona eda kara ita sekea bona kerere haida ita itaia, dahaka ita karaia be namo?

¹⁹ Bema Baibel lalonai sibona eda kara ita sekea bona eda kerere haida, hegeregere sibona eda namo laloa bada karana ita itaia, reana do ita lalometau. Bema oi dekenai unai bamona ia vara, namona be Iamesi ese ia herevalaia tauna ena haheitalai oi tohotohoa. Iamesi ia gwau lasi hevarivari ai sibona ia itaia tauna be kara haraga dika o miro gauna ia hamaoromaoroa. To, Iamesi ia gwau unai tau be ‘taravatu goevadaena ia badinaia noho.’ (Iam. 1:25) Hevarivari ai ia itaia dika o miro gauna ia laloatao, bena ia gaukara goada unai gaudia ia hanamoa totona. Oibe, namona be oi laloa maoromaoro bona laloatao ita ibounai be goevadae lasi taudia. (Hadibaia Tauna 7:20 duahia.) Iehova ese oiemu tadikaka haida ia durua hegeregerena, ia ura oi do ia durua danu. Bema Baibel ena hadibaia herevadia oi badinaia bona oi hekwarahi sibona emu ura oi dadaraia totona, Dirava ese oi do ia lalonamo henia bona hanamoa.