1. Panon ya impanengneng nen Jesus so perpekton alimbawa na inkamasakripisyo?

NEN walad dalin si Jesus, impanengneng toy perpekton alimbawa na inkamasakripisyo. Agton balot inyunay sarilin panlabayan tan pankaabigan to pian nagawaan toy linawa na Dios. (Juan 5:30) Diad impanmatoor to anggad patey, pinaneknekan to ya sarag ton isakripisyon amin.—Fil. 2:8.

2. Panon tayon nipanengneng so inkamasakripisyo, tan akin a nepeg tayon gawaen itan?

² Bilang papatumbok nen Jesus, kaukolan ya masakripisyo tayo met. Panon tayon nibaga ya say sakey et masakripisyo? No mabulos ton isakripisyoy panlabayan to pian natulongan toy arum. Kabaliktaran itan na inkamakasarili. (Basaen so Mateo 16:24.) Say toon agmakasarili et ikokonsidera toy liknaan na arum tan iyuuna toy labay da nen say sarili to. (Fil. 2:3, 4) Diad tua, imbangat nen Jesus ya importante so inkamasakripisyo ed panagdayew tayo. Akin? On ta say mamapakiwas ed sikatayon mansakripisyo et say Kristianon aro, ya pakabidbiran na saray tuan disipulo nen Jesus. (Juan 13:34, 35) Tan nonoten pa labat iray panliliketan tayon bendisyon lapud kaiba itayo ed sankamundoan ya impanaagi ya mangipapanengneng na inkamasakripisyo!

3. Antoy posiblin mangekal ed inkamasakripisyo tayo?

 ³ Balet walay agnaliklikas ya kalaban ya posiblin mangekal ed inkamasakripisyo tayo. Satan et say tendensia tayon magmaliw ya makasarili. Nonoten pa no panon ya impanengneng di Adan tan Eva so inkamakasarili. Ag-inunor nen Eva si Jehova lapud labay toy magmaliw ya singa Dios. Inyuna met nen Adan so pilalek ton paliketey asawa to. (Gen. 3:5, 6) Kayarin inyarawi na Diablo ed dugan panagdayew si Adan tan Eva, siansia nin iimpluensyaan to ray totoo ya magmaliw a makasarili. Atan ingen so inusar ton paraan nen sasalien ton tuksoey Jesus. (Mat. 4:1-9) Diad panaon tayo, dakel so nibalang nen Satanas, ya iimpluensyaan to ran magmaliw ya makasarili diad nanduruman paraan. Nepeg ya manalwar tayo ta ompan naalisan itayo na satan.—Efe. 2:2.

4. (a) Kasin sarag tayon sigpot ya naekal so tendensian magmaliw ya makasarili? Ipaliwawa. (b) Anto ran tepet so ikonsidera tayo?

⁴ Say makasarilin ugali et singa lati ed balatyang. No say balatyang et napaulyan, nalatian. Balet say talagan delikado et no ibaliwala labat so lati ta ompan onsabid punto ya deralen to la imay balatyang. Ontan met ed sikatayo. Anggano agtayo perpekto tan walay tendensia tayon magmaliw ya makasarili, kaukolan ya alerto tayod satan tan itultuloy tayon labanan. (1 Cor. 9:26, 27) Panon tayon nausisa so sarili tayo no kasin magmamaliw ti’ lan makasarili? Tan panon tayon lalon nipanengneng so inkamasakripisyo?

5. (a) Akin et nibaga tayon say Biblia et singa espiho? (Nengnengen so litratod gapo na artikulo.) (b) Antoy nepeg tayon paliisan diad pangusisa tayo no kasin magmamaliw ti lan makasarili?

⁵ No panon ya manguusar tayoy espiho pian nanengneng so itsura tayo, nausar tayo met so Biblia pian nausisay inkatoo tayo tan nauman tayo ray kakapuyan tayo. (Basaen so Santiago 1:22-25.) Balet, makatulong labat so espiho no dugay pangusar tayod satan. Alimbawa, no maganggano tayo labat ya onnengneng ed espiho, ompan agtayo nanengneng so melag ya dingot ya makaderal ed itsura tayo. Odino no aliway anggulo to may espiho, say nanengneng tayo et itsura na arum. Ontan met ed Biblia. Pian naamtaan tayo no magmamaliw tayo lan makasarili, agtayo labat basta babasaen odino usaren itan pian nanengneng so kakapuyan na arum.

6. Anto ni nepeg tayon gawaen likud ed ‘pangusisan maong ed ayadyarin ganggan’?

⁶ Ompan regular o inagew-agew tayo ni ingen ya babasaey Biblia, balet siansian agtayo nalilikas ya magmamaliw ti lan makasarili. Akin ey? Isipen pa iya: Diad samay insulat nen Santiago, nan-espiho met ya maong imay too. Say kuan nen Santiago et “ninengneng toy inkasikaton dili.” Inusar to dia so Griegon salita ya mankabaliksay inengneng ya maong o pangusisa. Anto siri’ ag-agawaan na sayan too? Intuloy nen Santiago: “Kaalis to et alingwanan to lan tampol no antoy itsura to.” On, nan-espihon tua balet anggapoy inuman tod itsura to. Miduma itan ed samay too ya deneskribe nen Santiago ya aglabat “manuusisan maong ed ayadyarin ganggan” noagta “pampepelengan ton gawaen itan.” Imbes ya lingwanan toy ayadyarin ganggan na Dios, gagawaen toy anggaay nayarian ton unoren itan. Ontan met so punton indanet nen Jesus nen imbaga ton: “No mansiansia kayo ed salitak, peteg a sikayo iray disipulok.”—Juan 8:31.

7. Panon tayon nausar so Biblia pian nausisa no kasin magmamaliw ti lan makasarili?

⁷ Kanian pian nalabanan tayoy tendensian magmaliw ya makasarili, kaukolan tayon basaen ya maong so Salita na Dios.  Ditan mo naamtaan no anto ray kaukolan mon umanen. Balet aliwan satan labat so nepeg mon gawaen. Man-research ka met. No malinlinew lad isip mo so sakey ya salaysay ed Biblia, imadyin mon wadman ka ed saman ya situasyon tan tepetan moy sarilim: ‘Anto kasi gawaen ko no siak so walad sayan situasyon? Kasin duga so magmaliw ya desisyon ko?’ Say sankaimportantian ed amin, kayarim ya dalepdepen so abasam, pampelengan mon iyaplika itan. (Mat. 7:24, 25) Nengnengen tayo natan no panon tayon nausar so salaysay nipaakar ed si Arin Saul tan apostol Pedro pian natulongan tayon pansiansiaen so inkamasakripisyo tayo.

8. Antoy ugali nen Saul nen kagapogapo to ni labat ya nanari, tan akin ya ontan so nibaga tayo?

⁸ Nanengneng tayod agawad Arin Saul no panon ya pakapuyen na makasarilin ugali so inkamasakripisyo tayo. Nen kagapogapo to ni labat ya ari, sikatoy mapaabeba. (1 Sam. 9:21) Agto dinusa iramay Israelitan binalaw day inkaari to, anggano walay kanepegan to ta say Dios so anurod sikato. (1 Sam. 10:27) Inunor toy panangigiya na espiritu na Dios kanian atalo na saray Israelita iray Ammonita. Kayari to, mapaabeba ton binidbir ya analo ira lapud tulong nen Jehova.—1 Sam. 11:6, 11-13.

9. Panon ya nagmaliw a makasarili si Saul?

⁹ Kalabas na panaon, pinaulyan labat nen Saul ya niwalad sikatoy pride tan makasarilin ugali, a singa makaderal a lati. Nen atalo to ray Amalekita, ginawa toy labay to imbes ya samay ingganggan nen Jehova. Maagum ton inala iray samsam imbes ya deralen iratan unong ya ingganggan na Dios. Tan malastog ya angipaalagey na monumento to. (1 Sam. 15:3, 9, 12) Nen imbagad sikato nen propeta Samuel ya sinmanok si Jehova ed ginawa to, imbaraan ton inunor to met so arum ya ingganggan na Dios tan tinetel toy arum. (1 Sam. 15:16-21) Tan lapud pride et mas importantid sikato so reputasyon to nen say panangabobon na Dios. (1 Sam. 15:30) Panon tayon nausar iyan salaysay a pinagka-espiho pian napansiansia tayoy inkamasakripisyo tayo?

10, 11. (a) Antoy naaralan tayod samay agawad si Saul nipaakar ed inkamasakripisyo? (b) Antoy nepeg tayon gawaen pian agtayo naalig si Saul?

¹⁰ Unona, nanengneng tayod agawad si Saul ya nepeg ya agtayo kampante—agtayo iisipen ya no natan et masakripisyo tayo, lanang ti lan masakripisyo. (1 Tim. 4:10) Tandaan ya diad gapo et maong so ugali nen Saul tan sikatoy inabobonan na Dios, balet agto nilabanan iray pakapatnagan ya magmamaliw lan makasarili. Lapud agtinmulok, inekal nen Jehova bilang ari.

¹¹ Komadua, manalwar itayo ompan say nanenengneng ti labat et saray maabig ya nagagawaan tayo, tan ibabaliwala tayo ray kaukolan ya paaligwasen. Singa itan pan-espiho pian nengnengey balibalin kawes tayo balet agtayo naiimanoy dutak ed lupa tayo. Anggano ag-itayo kampante a singa si Saul, nepeg ya labanan tayo nin siansia so tendensian magmaliw ya singa sikato. No makaawat tayoy simbawa, agtayo la manbabaraan, agtayo palelemewey lingo tayo, odino itetel itan ed arum. Imbes ya aligey Saul, mas maabig no ondengel tayod simbawa.—Basaen so Salmo 141:5.

12. Panon ya ontulong so inkamasakripisyo no akagawa tayoy seryoson kasalanan?

¹² Panon to balet no akagawa tayoy seryoson kasalanan? Lapud aglabay nen Saul ya naderal so reputasyon to, agto la apapawil so maong ya relasyon tod si Jehova. No masakripisyo itayo, onkerew tayoy tulong anggano singa itan kababaing. (Uli. 28:13; Sant. 5:14-16) Alimbawa,  walay sakey a brother ya 12 años to ni labat et manbabantay lay pornograpiya, tan insekreto to itan diad loob na masulok a sakey dekada. Imbaga to: “Mairap kon aminen ed si asawak tan ed saray elder iman ya gagawaen ko. Balet natan ya impatuak la, nainawaan ak ya maong. Adismaya so arum a kakaarok nen nakal ak ya ministeryal a lingkor, ya singa pinaermen ko ra. Balet amtak ya mas naliliketan la natan si Jehova ed panlilingkor ko no ikomparak ed samay nen manbabantay ak ni pornograpiya, tan say talagan importante et say panmoria to.”

13, 14. Panon ya impanengneng nen Pedro so tendensian magmaliw ya makasarili?

¹³ Impanengneng nen apostol Pedro so inkamasakripisyo nen sikatoy ipapasal nen Jesus. (Luc. 5:3-11) Balet kaukolan to met ya labanan so tendensian magmaliw ya makasarili. Alimbawa, mansyodot nen labay di apostol Santiago tan Juan so nawalaay atagey a posisyon diad Panarian na Dios. Anganko et inisip nen Pedro ya parad sikato so sakey ya atagey a posisyon, ta imbaga la nen Jesus ya walay importantin betang to. (Mat. 16:18, 19) Binilin nen Jesus si Santiago tan Juan, ontan met ed si Pedro tan arum nin apostol ya ag-ira “pakakatawan” ed saray agagi ra.—Mar. 10:35-45.

¹⁴ Anggano aminpiga lan kinorihe nen Jesus si Pedro, siansia nin irap ton umanen so pakanengneng tod sarili to. Nen imbaga nen Jesus ya sikatoy taynan na saray apostol, pinapaway nen Pedro ya sikatoy mas maong nen say arum ta sikato labat kunoy mansiansian matoor. (Mat. 26:31-33) Alingolingo ed satan ya imbaga to ta diad saman ya mismon labi et nagmaliw ya makasarili. Pian naprotektaan toy sarili to, amitlo ton imburi si Jesus.—Mat. 26:69-75.

15. Akin et makapaseseg so alimbawa nen Pedro anggano wala ray kakapuyan to?

¹⁵ Anggano wala ray kakapuyan tan lingo nen Pedro, napaseseg tayo nin siansia ed alimbawa to. Lapud impansagpot to tan diad tulong na masanton espiritu na Dios, alabanan to ray kakapuyan to, kanian nipanengneng  toy panangontrol ed dili tan masakripisyon aro. (Gal. 5:22, 23) Asarag to ray subok ya mas grabe ni nen saramay inmuunan agto alabanan. Impanengneng toy inkamapaabeba nen sikatoy prangkan kinorihe nen apostol Pablo ed arap na totoo. (Gal. 2:11-14) Kayari na saman ya agawa, agnanem-em na sakit na linawa si Pedro, tan agto inisip ya aderal so reputasyon to lapud samay ginawa nen Pablo. Intultuloy ton imbalikas so panangaro tod si Pablo. (2 Ped. 3:15) Ontulong so alimbawa nen Pedro pian magmaliw itayon masakripisyo.

16. Panon tayon nipanengneng so inkamasakripisyo diad mairap iran situasyon?

¹⁶ Isip mo pa no antoy reaksion mo diad mairap iran situasyon. Nen nipriso tan nilelewet ira di Pedro tan saray apostol lapud panagpulong da, manliket ira “lapud impasen iran makana a napabanday nisengeg ed ngaran [nen Jesus].” (Gawa 5:41) Sarag mo met ya ipasen so panamasegsegang bilang pankanawnawa ya aligey Pedro tan tumbokey bakat nen Jesus diad pangipanengneng moy inkamasakripisyo. (Basaen so 1 Pedro 2:20, 21.) Ontulong ingen itan ya panmoria no makaawat kay disiplina manlapud saray elder. Imbes ya nasakitan ka, alig moy alimbawa nen Pedro.—Ecl. 7:9.

17, 18. (a) Antoy itepet tayod sarili tayo no wala ray espiritual a kalat tayo? (b) Antoy gawaen tayo no walay nalikas tayon anggan daiset ya inkamakasarili ed puso tayo?

¹⁷ Makaaral ka met ed alimbawa nen Pedro no wala ray espiritual a kalat mo. Ipatnag moy inkamasakripisyo legan mon dadampoten iratan. Balet manalwar ya say motibom et aliwan pian magmaliw ya sikat. Kanian tepetan moy sarilim, ‘Kasin labay kon paaligwasen o palaknaben so panlilingkor kod si Jehova pian magmaliw ak ya kabkabat o nawalaan na autoridad, a singa napatnagan ed si Santiago tan Juan nensaman?’

¹⁸ No bilang nalikas mon walay anggan daiset ya inkamakasarili ed pusom, kerew mod si Jehova ya ipetek toy kanonotan tan liknaan mo, tan pampelengan mon iyapasakey so pusom ed pangigloriad sikato, imbes ya say sarilim. (Sal. 86:11) Sarag mo met ya dampoten iray kalat ya agtanton naimano na arum. Alimbawa, ompan mairap mon ipanengneng so arum ya aspekto na bungay espiritu, kanian lalom ya pansagpotan itan. Odino no bilang ta ipaparaan mon maong iray partem ed aral balet agmo labay so mitulongan ed panlinis na Kingdom Hall, nayarim ya gawaen a kalat so pangiyaplikad samay nabasad Roma 12:16.—Basaen.

19. Antoy gawaen tayo pian agtayo nadismayad nanengneng tayo diad pan-espiho tayod Salita na Dios?

¹⁹ No diad pani-espiho tayod Salita na Dios et wala ray naimano tayon kakapuyan tan pakapatnagan ni ingen na inkamakasarili, ompan nadismaya tayo. No ontan so situasyon mo, dalepdep mo imay komaduan too ya deneskribe nen Santiago diad ilustrasyon to. Ag-imbaga nen Santiago no kasin naayos ton tampol so probleman anengneng tod itsura to odino nakal toy amin ya dingot. Imbes, imbaga nen Santiago ya ‘nampelengan ton gawaen so ayadyarin ganggan.’ (Sant. 1:25) Agnilingwanan na samay too so anengneng tod espiho tan nampelengan ton umanen iray papaaligwasen. On, pansiansiam ya positibo so pakanengneng mod sarilim tan nepeg ya balanse so panmoriam ed saray kakapuyan mo. (Basaen so Eclesiastes 7:20.) Itultuloy mon usisaen so ayadyarin ganggan, tan gawam so anggaay nayarian mon mansiansian masakripisyo. Labalabay to kan tulongan nen Jehova a singa itutulong tod saray agagim, ya anggano agperpekto et aabobonan tan bebendisyonan to.