1. Kon Hesus a pone un ehèmpel perfekto di sakrifisio propio?

TEMPU ku Hesus tabata riba tera, el a pone un ehèmpel perfekto di sakrifisio propio. Kon asina? Wèl, el a pone e boluntat di Dios promé ku su mes deseonan i komodidat. (Huan 5:30) Kedando fiel te na morto, el a demostrá ku no tabatin límite na loke e tabata dispuesto pa sakrifiká na benefisio di otronan.—Flp. 2:8.

2. Kon nos por demostrá ku nos ta kla pa desplegá un spiritu di sakrifisio propio, i dikon nos mester hasi esei?

² Komo siguidónan di Hesus, nos tambe mester ta dispuesto pa hiba un bida di sakrifisio propio. Kiko esei ta enserá? Ku poko palabra, nos mester ta dispuesto pa pone interesnan di otro hende promé ku esnan di nos. Bon mirá, un persona ku ta kla pa hasi esei ta kontrario di un persona egoista. (Lesa Mateo 16:24.) Sí, ora nos no ta egoista, nos ta pone sintimentu- i preferensianan di otro hende promé ku esnan di nos. (Flp. 2:3, 4) De echo, Hesus a siña hende ku un aktitut inegoista ta indispensabel pa adorá Yehova korektamente. Kon asina? Wèl, ta amor kristian, esta, e amor ku ta identifiká e berdadero disipelnan di Hesus, ta motivá nos pa ta semper kla pa hasi sakrifisio pa sirbi otronan. (Huan 13:34, 35) I komo ku nos ta forma parti di un hermandat mundial ku ta kla pa demostrá un spiritu di sakrifisio propio, nos ta disfrutá di hopi bendishon.

3. Kiko por debilitá nos determinashon pa desplegá un spiritu di sakrifisio propio?

 ³ Sinembargo, nos tin un enemigu ku pokopoko por debilitá nos determinashon pa desplegá un spiritu di sakrifisio propio. E enemigu ei ta nos tendensia di ta egoista. Kòrda kon Adam ku Eva a desplegá egoismo. Eva a deseá di ta meskos ku Dios, i Adam a preferá di komplasé Eva en bes di agradá Yehova. (Gén. 3:5, 6) Despues ku Diabel a kita Adam ku Eva for di adorashon berdadero, el a sigui usa e trampa di egoismo pa gaña hende. El a asta purba di usa e trampa akí pa desviá Hesus. (Mat. 4:1-9) Awendia tambe Satanas ta logra gaña mayoria di hende i pone nan desplegá un aktitut egoista den vários manera. I si nos no tene kuidou, e aktitut egoista di e mundu akí por influensiá nos tambe.—Efe. 2:2.

4. (a) Nos por eliminá nos tendensianan egoista awe? Splika. (b) Ki preguntanan nos lo trata?

⁴ Nos por kompará egoismo ku frus. Ora heru ser eksponé na áwaseru i solo, e ta kuminsá frusa. Si nos no hasi nada pa stòp e heru di frusa, nos por haña nos ku un daño ireparabel. Ku egoismo ta meskos. Maske aktualmente nos no por eliminá nos tendensianan egoista i nos imperfekshon, nos mester hasi tur loke nos por pa resistí tendensianan egoista. (1 Kor. 9:26, 27) Kon nos por detektá rasgonan di egoismo serka nos mes? I kon nos por mehorá den e manera ku nos ta hasi sakrifisio na bienestar di otronan?

5. (a) Den ki sentido Beibel ta manera un spil? (Wak e promé plachi.) (b) Ora nos ta wak si nos tin rasgonan di egoismo, kiko nos mester evitá?

⁵ Meskos ku nos por usa un spil pa wak nos aparensia, nos por usa Beibel pa analisá nos personalidat i drecha kualke defekto ku nos por haña. (Lesa Santiago 1:22-25.) Sinembargo, ta solamente si nos ta usa un spil korektamente, e por yuda nos drecha nos aparensia. Si nos ta djis wak lihé lihé den spil, nos lo por keda sin wak un defekto na nos aparensia. Òf si nos ta wak den spil for di un ángulo ku ta otro hende nos ta mira, nos lo no mira nos mes. Di mes manera, si nos ke usa Beibel pa detektá un defekto manera egoismo, nos no mester les’é aribariba ni us’é pa wak fayo di otro hende.

6. Fuera di ‘wak kuidadosamente den e lei perfekto,’ kiko mas nos tin ku hasi?

⁶ Por sosodé ku nos ta lesa e Palabra di Dios regularmente, òf tur dia, sin ripará ku rasgonan di egoismo ta desaroyando den nos. Kon esei ta posibel? Wèl, ripará ku den e ehèmpel di spil ku Santiago a usa, e persona su problema no tabata ku e no a wak bon den spil. Santiago a skirbi ku e persona “ta wak su mes.” Aki Santiago a usa un palabra griego ku ta nifiká wak kuidadosamente. Pues, kiko tabata e persona su problema? Santiago a splika: “[E persona] ta bira bai, i mesora e ta lubidá ki sorto di hende e ta.” Sí, e ta bira bai sin hasi nada ku loke el a mira den spil. Di otro banda, e hende ku ta kumpli ku e palabra no solamente “ta wak kuidadosamente den e lei perfekto” pero “ta persistí den hasi esei” tambe. En bes di ignorá e Palabra di Dios, e ta persistí den su siñansanan. Hesus a deklará algu similar ora el a bisa: “Si boso keda fiel na mi palabranan, boso realmente ta mi disipelnan.”—Huan 8:31

7. Kon nos por usa Beibel pa detektá rasgonan di egoismo?

⁷ P’esei, pa bo por resistí tendensianan egoista ku éksito, e promé kos ku bo tin ku hasi ta lesa e Palabra di Dios kuidadosamente.  Esei por yuda bo identifiká áreanan ku mester di atenshon. Pero, bo tin ku hasi mas ku esei. Bo tin ku hasi investigashon. Ora bo ta lesa un relato di Beibel, hinka bo mes den e situashon, i puntra bo mes: ‘Kiko ami lo a hasi den e situashon akí? Lo mi a hasi loke ta korekto?’ Mas importante ainda, despues di a meditá riba loke bo a lesa, hasi esfuerso pa apliká loke bo a siña. (Mat. 7:24, 25) Awor, laga nos ban wak kon e relatonan tokante Rei Saul i apòstel Pedro por yuda nos keda ku un spiritu di sakrifisio propio.

8. Ki tipo di persona Saul tabata ora el a kuminsá reina, i kon el a demostrá esaki?

⁸ E ehèmpel di Rei Saul ta un spièrtamentu pa nos; e ta mustra kon egoismo por stroba nos di demostrá un aktitut di sakrifisio propio. Tempu ku Saul a kuminsá reina, e tabata un hòmber modesto i humilde. (1 Sam. 9:21) Por ehèmpel, e no a kastigá e israelitanan ku a menospresi’é komo rei aunke lo e por a sinti pa hasi esei ya ku ta Dios mes a nombr’é komo rei. (1 Sam. 10:27) Rei Saul a sigui guia di Dios su spiritu santu i a yuda e pueblo di Israel vense e amonitanan. Despues, humildemente el a duna Yehova tur mérito pa e viktoria.—1 Sam. 11:6, 11-13.

9. Kon bini Saul a bira egoista?

⁹ Pero mas despues, Saul a permití egoismo i orguyo desaroyá den su kurason, meskos ku frus ta afektá heru. Ora el a derotá e amalekitanan den bataya, el a kumpli ku su mes deseonan en bes di obedesé Yehova. Saul tabata golos; el a kohe di e botin en bes di destruí tur kos manera Dios a manda. I e tabata asina orguyoso ku el a lanta un monumento pa su mes. (1 Sam. 15:3, 9, 12) Ora ku profeta Samuel a bis’é ku Yehova no a keda kontentu kuné, Saul a purba di hustifiká su mes: El a enfoká riba e parti di Dios su mandamentu ku sí el a kumpli kuné i a kulpa otronan pa su eror. (1 Sam. 15:16-21) Saul su orguyo a pone ku e tabata mas preokupá ku loke hende tabata pensa di dje ku e tabata preokupá ku su amistat ku Dios. (1 Sam. 15:30) Kon nos por usa e relato tokante Saul manera un spil pa yuda nos keda ku un spiritu di sakrifisio propio?

10, 11. (a) Kiko e mal ehèmpel di Saul ta siña nos? (b) Kon nos por evitá di sigui Saul su mal ehèmpel?

¹⁰ Di promé, Saul su eksperensia ta mustra ku nos no mester tin demasiado konfiansa den nos mes. Nos no mester asumí ku unabes nos kuminsá demostrá un spiritu di sakrifisio propio ku outomátikamente nos lo sigui hasi esei. (1 Tim. 4:10) Kòrda ku un tempu Saul tabata humilde i tabata disfrutá di Dios su aprobashon, pero e no a eliminá e rasgonan di egoismo ku a kuminsá desaroyá den su kurason. Finalmente, Yehova a rechasá Saul pa motibu di su desobedensia.

¹¹ Di dos, nos mester tene kuidou pa no enfoká solamente riba áreanan di nos bida ku ta bon i ignorá aspektonan ku nos tin ku drecha. Pasobra si nos ta hasi esei, nos lo ta meskos ku un persona ku ta wak den spil, atmirá su paña nobo sin ripará ku su kara ta sushi. Asta si nos no ta orguyoso òf no tin demasiado konfiansa den nos mes, manera tabata e kaso ku Saul, nos mester traha duru pa resistí kualke tendensia ku por pone nos imitá su mal ehèmpel. Si nos haña konseho, laga nos tene kuidou pa nos no hustifiká nos mes, minimisá e problema òf kulpa otronan. Pues, en bes di imitá Saul, laga nos ta kla pa tuma konseho.—Lesa Salmo 141:5.

12. Kon un spiritu di sakrifisio propio por yuda nos si nos kometé un piká serio?

 ¹² Pero, kiko si nos a kometé un piká serio? Komo ku Saul tabata mas preokupá ku su reputashon, e no por a drecha su relashon ku Yehova. No sigui su mal ehèmpel! Si nos tin e spiritu di sakrifisio propio, nos lo guli nos orguyo i humiá nos mes; asina nos ta vense bèrgwensa i buska yudansa. (Pro. 28:13; Sant. 5:14-16) Por ehèmpel, un ruman hòmber a kuminsá wak pornografia for di ora e tabatin 12 aña i a sigui hasi esei den sekreto pa mas ku un dékada. Despues el a konta: “Mi tabatin masha difikultat pa bisa mi kasá i e ansianonan loke mi tabata hasiendo. Pero awor ku mi a konfesá, mi ta sinti ku un peso enorme a kita for di riba mi. Algun di mi amigunan a keda desapuntá ora mi a pèrdè mi privilegio komo sirbidó ministerial; nan a sinti komo si fuera mi a laga nan na kaya. Pero mi sa ku awor Yehova ta mas kontentu ku mi sirbishi ku tempu mi tabata wak pornografia, i ta su punto di bista ta esun di mas importante.”

13, 14. Kon Pedro a desplegá egoismo?

¹³ Apòstel Pedro a demostrá ku e tabata dispuesto pa sakrifiká su propio interesnan tempu ku Hesus tabata entren’é. (Luk. 5:3-11) Asina mes, e tabatin ku lucha kontra di tendensianan egoista. Por ehèmpel, el a rabia ora Santiago i Huan a purba di haña puestonan prominente banda di Hesus den e Reino di Dios. Podisé Pedro a pensa ku ta é mester a haña un di e puestonan ei pasobra Hesus a bis’é kaba ku lo el a haña un asignashon spesial. (Mat. 16:18, 19) En todo kaso, Hesus a spièrta tantu Santiago, Huan i Pedro komo e otro apòstelnan pa nan no ta egoista i pa nan no “dominá” nan rumannan.—Mar. 10:35-45.

¹⁴ Asta despues ku Hesus a purba di korigí Pedro su manera di pensa, Pedro a sigui desplegá egoismo. Ora Hesus a bisa e apòstelnan ku nan lo a bandon’é pa un tempu, Pedro a halsa su mes riba e otro apòstelnan i a pretendé ku e so lo a keda fiel. (Mat. 26:31-33) Pero e tabatin demasiado konfiansa den su mes i ta  esei a pone ku e mesun anochi ei e no tabata kla pa demostrá un spiritu di sakrifisio propio. Pa protehá su mes, Pedro a nenga Hesus tres biaha.—Mat. 26:69-75.

15. Dikon Pedro su ehèmpel ta un animashon pa nos?

¹⁵ Apesar di Pedro su lucha i fayonan, su ehèmpel ta un animashon pa nos. Hasiendo esfuerso i ku yudansa di spiritu santu, Pedro a logra vense tendensianan egoista i desplegá dominio propio i un amor inegoista. (Gal. 5:22, 23) El a soportá pruebanan ku por a parse mas grandi ku esnan ku el a konfrontá promé. El a reakshoná na un manera humilde ora Pablo a korigié públikamente. (Gal. 2:11-14) I e no a karga renkor pensando ku Pablo a daña su reputashon. Pedro a sigui ekspresá su amor pa Pablo. (2 Ped. 3:15) Sin duda, Pedro su ehèmpel por yuda nos keda ku un spiritu di sakrifisio propio.

16. Kon nos por demostrá un spiritu di sakrifisio propio den situashonnan difísil?

¹⁶ Kon abo ta reakshoná den situashonnan difísil? Ora Pedro i e otro apòstelnan a ser enkarselá i sutá pasobra nan tabata prediká, nan a keda kontentu ku “Dios a konsiderá nan digno di ser desonrá pa kousa di Hesus su nòmber.” (Echo. 5:41) Abo tambe por mira persekushon komo un oportunidat pa imitá Pedro i sigui Hesus su pasonan. (Lesa 1 Pedro 2:20, 21.) Si bo ta kla pa hasi esei, ta bira mas fásil pa bo aseptá disiplina for di e ansianonan. En bes di rabia, imitá Pedro su ehèmpel.—Ekl. 7:9.

17, 18. (a) Ki preguntanan nos mester hasi nos mes enkuanto nos metanan spiritual? (b) Kiko nos mester hasi si nos detektá sierto rasgo(nan) di egoismo den nos kurason?

¹⁷ E ehèmpel di Pedro por yuda nos ora di pone meta spiritual tambe. Bo mester ta kla pa hasi sakrifisio segun ku bo ta traha pa logra e metanan akí. Pero tene kuidou pa bo no ta buskando prominensia. P’esei, puntra bo mes: ‘Dikon mi ke progresá òf hasi mas pa Yehova? Ta pasobra mi ke elogio òf mas outoridat, manera Santiago i Huan tabata ke?’

¹⁸ Si bo detektá sierto rasgo(nan) di egoismo den bo kurason, pidi Yehova yuda bo korigí bo manera di pensa i sinti; kaba traha duru pa glorifiká Yehova i no bo mes. (Sal. 86:11) Ademas, bo por pone metanan ku no ta pone bo den spòtlait. Por ehèmpel, bo por pone meta pa mehorá den desplegá sierto aspekto di fruta di spiritu ku bo no ta asina bon den dje. Òf si bo ta prepará diligentemente pa bo reunionnan pero no ta masha interesá den limpia Salòn di Reino, bo por pone komo meta pa apliká e konseho ku nos ta haña na Romanonan 12:16.—Les’é.

19. Kiko nos por hasi pa nos no bira desanimá ora nos wak den e spil di e Palabra di Dios?

¹⁹ Ora nos wak nos mes kuidadosamente den e spil di e Palabra di Dios i nos mira sierto defekto, asta señal di egoismo, nos por desanimá. Si esei pasa ku bo, meditá riba e kumplidó di e palabra den e ilustrashon di Santiago. Santiago no a bisa kon lihé e persona akí a solushoná su problemanan ni ku e por a solushoná tur; mas bien, el a bisa ku e persona akí ‘a persistí den e lei perfekto.’ (Sant. 1:25) E persona akí a kòrda loke el a mira den spil i a sigui traha pa mehorá. Pues, keda ku un punto di bista positivo i balansá di bo mes i kòrda ku nos tur ta imperfekto. (Lesa Eklesiástes 7:20.) Sigui wak kuidadosamente den e lei perfekto i sigui hasi esfuerso pa keda ku un spiritu di sakrifisio propio. Yehova ta dispuesto pa yuda bo, meskos ku e ta yuda hopi di bo rumannan, kendenan tambe ta imperfekto. Pues, maske nos ta imperfekto, nos por tin Yehova su aprobashon i bendishon.