1. Hao nao Jesus showimaot nambawan example long wei for no tingim hemseleva nomoa?

TAEM Jesus stap long earth hem showimaot nambawan example long wei for no tingim hemseleva nomoa. Hem no duim wanem hemseleva laekem bat hem duim wanem God laekem. (John 5:30) Wei wea hem gohed faithful go kasem taem hem dae pruvim no enitaem hem tingim hemseleva nomoa.—Phil. 2:8.

2. Hao nao iumi savve showimaot iumi no tingim iumiseleva nomoa, and why nao datwan hem important?

² From iumi olketa Christian, iumi tu mas no tingim iumiseleva nomoa. Wanem nao showimaot man no tingim hemseleva? Man wea no tingim hemseleva bae no duim nomoa wanem hemseleva laekem, bat hem duim samting for helpem olketa narawan. (Readim Matthew 16:24.) Sapos iumi garem wei olsem datwan bae helpem iumi for tingim firstaem feeling bilong narawan and samting wea narawan laekem. (Phil. 2:3, 4) Samting wea Jesus teachim showimaot hem barava important for olketa wea worshipim God no tingim olketa seleva. Why nao olsem? Bikos love nao mekem olketa tru Christian for no tingim olketa seleva, and datfala love hem showimaot iumi olketa tru disaepol bilong Jesus. (John 13:34, 35) Iumi kasem staka blessing bikos iumi worshipim  Jehovah witim olketa brata and sista evriwea long world wea showimaot wei for no tingim seleva.

3. Sapos iumi no careful maet, wanem nao savve spoelem iumi?

³ Nomata olsem, sapos iumi no careful maet gogo iumi start for tingim iumiseleva, and datwan savve spoelem iumi. Tingim hao Adam and Eve duim samting wea showimaot tufala tingim seleva nomoa. From Eve laek for kamap olsem God datwan showimaot hem tingim hemseleva. From Adam laek mekem Eve hapi winim wei for mekem Jehovah hapi, datwan showimaot hem tingim hemseleva. (Gen. 3:5, 6) Bihaen Satan mekem Adam and Eve for no worshipim Jehovah, hem gohed for switim pipol for tingim olketa seleva nomoa. Hem duim datwan long Jesus tu. (Matt. 4:1-9) Distaem tu, Satan mekem staka pipol for tingim olketa seleva, and hem duim datwan long plande difren wei. Sapos iumi no careful maet iumi tu followim wei bilong pipol long world.—Eph. 2:2.

4. (a) Waswe, iumi savve barava aotem disfala feeling for tingim seleva? Minim kam. (b) Wanem tufala kwestin nao bae iumi storyim?

⁴ Wei for tingim seleva hem olsem rasta. Sapos iron hem stap aotsaed, maet hem start for rasta. Sapos iumi no duim eni samting for stopem datfala rasta, gogo hem savve spoelem and brekem datfala iron, and sapos iron hia sapotim wanfala building maet datfala building savve foldaon. Long sem wei tu, from iumi no perfect maet samfala taem iumi tingim iumiseleva, bat iumi mas traem best for no olsem. Sapos iumi no duim eni samting for againstim datfala feeling, wei for tingim iumiseleva savve spoelem iumi. (1 Cor. 9:26, 27) Hao nao bae iumi luksavve sapos iumi garem wei for tingim iumiseleva? And wanem nao savve helpem iumi for no tingim iumiseleva?

5. (a) Long wanem wei nao Bible hem olsem mirror? (Lukim piksa long start bilong study.) (b) Sapos iumi laekem Bible for helpem iumi for no tingim iumiseleva, wanem nao iumi mas duim?

⁵ Iumi savve iusim mirror for lukim eni samting wea no luk stret long iumi. Long sem wei tu, iumi savve iusim Bible for lukim sapos wei bilong iumi hem gud or nomoa, and stretem eni nogud samting wea iumi lukim. (Readim James 1:22-25.) Bat for lukim eni samting wea no luk stret long iumi, iumi mas iusim gud datfala mirror. Olsem example, sapos iumi luk kwiktaem nomoa long mirror maet iumi no lukim wanfala important samting wea iumi mas stretem. Or sapos iumi tanem mirror long saed maet nara man nao iumi lukim. Long sem wei tu, sapos iumi laekem Bible for helpem iumi luksavve sapos iumi garem wei for tingim iumiseleva, iumi mas readim gud and ting raonem, and no iusim for pointim rong bilong narawan.

6. Bihaen iumi “lukluk gud long datfala perfect law,” wanem nao iumi mas duim?

⁶ Olsem example, nomata iumi readim Bible evri day maet hem no helpem iumi for luksavve sapos iumi start for garem wei for tingim iumiseleva. Hao nao olsem? Tingim diswan: Long tokpiksa abaotem man wea “lukim hemseleva” long mirror, James iusim Greek word wea savve minim barava lukluk gud. So datfala man hem barava lukluk gud long datfala mirror, bat wanem nao problem bilong hem? James sei: “Bihaen hem go, hem forgetim nao lukluk bilong hem.” Datfala man no stretem wanem hem lukim long mirror. Bat man wea duim stret samting, hem “lukluk gud long datfala perfect law” and tu hem “gohed for duim wanem law talem.” Hem no ting nating long law bilong God, bat hem gohed for followim wanem Bible talem. Jesus tu mekhae long datwan taem hem sei: “Sapos iufala  followim teaching bilong mi, iufala barava disaepol bilong mi nao.”—John 8:31.

7. Hao nao Bible savve helpem iumi for no tingim iumiseleva?

⁷ So for helpem iumi no tingim iumiseleva, first samting, iumi mas readim gud Bible. Datwan bae helpem iumi for luksavve long wanem iumi need for stretem. Bat for readim Bible nomoa hem no inaf. Iumi mas duim research tu. Taem iu readim wanfala story long Bible, tingim olsem iu long there, and ting raonem tufala kwestin hia: ‘Sapos samting olsem happen long mi wanem nao bae mi duim? Waswe, bae mi duim stret samting?’ Bihaen iumi ting raonem wanem iumi readim, hem barava important for iumi traem best for followim. (Matt. 7:24, 25) Distaem bae iumi ting raonem wei wea example bilong King Saul and aposol Peter savve helpem iumi for no tingim iumiseleva.

8. Wanem gudfala wei nao Saul garem taem hem kamap king, and hao nao hem showimaot datwan?

⁸ Example bilong King Saul showimaot sapos iumi no careful maet iumi start for tingim iumiseleva. Taem Saul hem kamap king hem hambol and hem no tinghae long hemseleva. (1 Sam. 9:21) From hem hambol hem no panisim olketa Israelite wea tok againstim wei wea hem rul, nomata God nao markem hem for king. (1 Sam. 10:27) King Saul letem holy spirit bilong God leadim hem taem olketa Israelite faet againstim olketa Ammonite. Bihaen olketa winim datfala faet, Saul no mekhae long hemseleva, bat hem sei Jehovah nao helpem olketa for win.—1 Sam. 11:6, 11-13.

9. Wanem nao Saul duim wea showimaot hem start for tingim hemseleva?

⁹ Gogo Saul start for praod and tingim hemseleva nomoa, olsem rasta wea start for spoelem wanfala iron. Taem hem winim wanfala faet againstim olketa Amalekite, hem no obeyim Jehovah bat hem duim samting wea hemseleva nomoa laekem. Saul greedy and tekem staka samting bilong olketa Amalekite wea God talem for hem mas distroem. From Saul praod tumas hem wakem wanfala ston post for mekhae long hemseleva. (1 Sam. 15:3, 9, 12) Taem profet Samuel sei Jehovah no hapi long Saul, Saul mek excuse and sei hem duim samfala samting wea God talem, and hem blamem olketa narawan long nogud samting wea hem duim. (1 Sam. 15:16-21) From Saul hem praod, hem laekem pipol for tinghae long hem winim wei for hem duim wanem God laekem. (1 Sam. 15:30) Wanem nao iumi lanem from example bilong Saul wea savve helpem iumi for no tingim iumiseleva?

10, 11. (a) Wanem nao iumi lanem from example bilong Saul wea savve helpem iumi for no tingim iumiseleva? (b) Wanem nao bae helpem iumi for no olsem Saul?

¹⁰ First samting, example bilong Saul showimaot sapos iumi no careful maet iumi start for tingim iumiseleva. (1 Tim. 4:10) Saul duim staka gud samting wea God hapi long hem firstaem, bat gogo hem start for tingim hemseleva and no trae for aotem datfala tingting. From Saul no obey, Jehovah rejectim hem.

¹¹ Mek-tu samting, hem nogud for iumi tingim nomoa olketa gud samting wea iumi duim for obeyim God, bat no tingim samfala wei bilong iumi wea iumi need for stretem. Sapos iumi duim datwan, hem olsem iumi lukluk long mirror for lukim niu kaleko wea iumi werem, bat no lukim dirty long feis bilong iumi. Iumi shud gohed waka hard for no olsem Saul wea praod. Taem iumi kasem kaonsel, iumi shud no olsem Saul long wei for mek excuse for samting iumi duim, or blamem narawan. Iumi shud willing for acceptim kaonsel.—Readim Psalm 141:5.

12. Hao nao wei for no tingim iumiseleva savve helpem iumi taem iumi duim wanfala big sin?

¹² Waswe sapos iumi duim wanfala big sin? Saul laekem for pipol tinghae long hem,  and datwan nao stopem hem for stretem wei wea hem fren witim God. Bat sapos iumi no tingim iumiseleva, datwan bae helpem iumi for kasem help wea iumi needim nomata maet iumi shame long samting wea iumi duim. (Prov. 28:13; Jas. 5:14-16) Olsem example, wanfala brata start for lukluk long olketa rabis piksa taem hem 12 year, and hem gohed for lukluk haed for winim 10 year. Hem sei: “Hem no isi for mi storyim long waef bilong mi and olketa elder samting wea mi duim. Bat bihaen mi storyim datwan, mi barava feel gud. Mi lusim privilege bilong mi for ministerial servant, and samfala fren bilong mi no hapi and sorre long wanem mi duim. Nomata olsem, mi savve Jehovah hem hapi long wanem mi duim distaem winim taem mi lukluk long rabis piksa, and wei wea Jehovah ting long mi nao hem important.”

13, 14. Wanem nao Peter duim wea showimaot samfala taem hem tingim hemseleva?

¹³ Taem aposol Peter gogo witim Jesus, plande samting hem duim showimaot hem no tingim hemseleva. (Luke 5:3-11) Bat samfala taem Peter tingim hemseleva nomoa. Olsem example, Peter kros taem aposol James and John askem Jesus for hae position long Kingdom bilong God. Maet Peter tingse hem nao shud garem hae position, bikos Jesus talem hem finis hem bae duim wanfala spesol waka. (Matt. 16:18, 19) Jesus talem James, John, Peter, and olketa nara aposol for no tingim olketa seleva and tingse olketa gud winim olketa nara brata.—Mark 10:35-45.

¹⁴ Nomata bihaen Jesus trae for stretem tingting bilong Peter, samfala taem Peter gohed yet for tingim hemseleva. Taem Jesus talem long olketa aposol olketa bae lusim hem for lelebet taem, Peter tok daonem olketa narawan taem hem sei hem nomoa bae faithful long Jesus. (Matt. 26:31-33) Bat long datfala naet wea olketa kasholem Jesus, Peter tingim hemseleva nomoa. From Peter laek for protectim hemseleva, thrifala taem nao hem sei hem no savve long Jesus.—Matt. 26:69-75.

15. Long wanem wei nao example bilong Peter encouragem iumi?

¹⁵ Nomata Peter duim mistek samfala  taem, example bilong hem savve encouragem iumi. From Peter traem best and letem holy spirit bilong God for leadim hem, datwan helpem hem for no tingim hemseleva. Gogo hem showimaot wei for kontrolem hemseleva and lovem olketa narawan. (Gal. 5:22, 23) Peter gohed faithful long staka test wea winim eni test wea kasem hem bifor. Olsem example, taem Paul kaonselem Peter front long olketa narawan, Peter hambol nomoa. (Gal. 2:11-14) Peter no feel nogud long kaonsel bilong Paul, and no feel olsem Paul spoelem nem bilong hem. Peter gohed for showimaot hem lovem Paul. (2 Pet. 3:15) Example bilong Peter savve helpem iumi for no tingim iumiseleva.

16. Taem iumi kasem hard taem, wanem nao iumi savve duim for showimaot iumi no tingim iumiseleva?

¹⁶ Wanem nao bae iumi duim sapos iumi kasem hard taem? Taem olketa bigman putim Peter and olketa aposol long prison and whipim olketa bikos olketa duim preaching waka, olketa “hapi nomoa from olketa savve God nao letem datwan for kasem olketa bikos olketa faithful for followim Jesus.” (Acts 5:41) Iumi tu savve ting long persecution olsem chance for followim example bilong Peter, and followim example bilong Jesus for no tingim seleva. (Readim 1 Peter 2:20, 21.) Taem iumi kasem kaonsel from olketa elder, hem chance tu for showimaot iumi no tingim iumiseleva. Followim example bilong Peter and no feel nogud taem iumi kasem kaonsel.—Eccl. 7:9.

17, 18. (a) Wanem tufala kwestin nao iumi savve tingim taem iumi markem olketa goal? (b) Wanem nao iumi savve duim sapos iumi luksavve iumi start for tingim iumiseleva?

¹⁷ Example bilong Peter savve helpem iu for markem olketa spiritual goal. Iu savve kasem olketa goal bilong iu long wei wea showimaot iu no tingim iuseleva. Bat iu mas careful nogud iu laek kasem olketa goal bikos iu laekem hae position. Taem iu markem olketa goal, tingim tufala kwestin hia: ‘Why nao mi laek duim samfala samting moa long waka bilong Jehovah? Waswe, hem bikos mi laekem olketa narawan tinghae long mi or mi laekem hae position, olsem James and John?’

¹⁸ Sapos iu luksavve iu start for tingim iuseleva, prea long Jehovah for helpem iu stretem tingting and feeling bilong iu. Then traem best for mekhae long Jehovah and no long iuseleva. (Ps. 86:11) And tu, iu savve markem samfala goal for duim samfala samting wea bae no mekhae long iuseleva. Olsem example, iu savve traem best for showimaot wanfala wei bilong spirit wea iu need for kamap gud long hem. Or sapos iu waka hard for redyim olketa tok bilong iu for meeting bat iu no laek klinim Kingdom Hall, maet iu savve markem goal for followim advaes long Rome 12:16.—Readim.

19. Wanem nao savve helpem iumi for no wikdaon taem Bible helpem iumi luksavve long samfala nogud wei bilong iumi?

¹⁹ Taem Bible helpem iumi for luksavve long samfala nogud wei bilong iumi, or luksavve iumi start for tingim iumiseleva, maet datwan savve mekem iumi wikdaon. Sapos iu garem feeling olsem, tingim datfala man wea duim stret samting long tokpiksa bilong James. James no sei datfala man kwiktaem stretem olketa nogud wei bilong hem or stretem evri nogud wei bilong hem. Bat James sei datfala man gohed for duim wanem “datfala perfect law” talem. (Jas. 1:25) Datfala man tingim wanem hem lukim long mirror, and hem gohed traem best for stretem hemseleva. So no ting daonem iuseleva, and no forget iumi evriwan no perfect. (Readim Ecclesiastes 7:20.) Jehovah hem willing for helpem iu long sem wei olsem hem helpem staka brata bilong iu finis. Sapos iu followim wanem Bible talem and gohed showimaot iu no tingim iuseleva, God bae hapi long iu and bae hem blessim iu.