1. ?Wanem ol blesing we Jehova i givim blong mekem yumi harem gud?

JEHOVA i wantem se yumi glad, taswe hem i givim plante blesing blong mekem yumi harem gud. Wan samting we hem i givim long yumi, hemia laef. Yumi save yusum laef blong yumi blong presem hem, from hem nao i pulum yumi i kam long tru wosip. (Sam 144:15; Jon 6:44) Jehova i soemaot se hem i lavem yumi, mo i givhan long yumi blong yumi no kam slak long wok blong hem. (Jer. 31:3; 2 Kor. 4:16) Yumi harem gud blong stap wetem ol brata mo sista we oli lavlavem olgeta, oli gat pis, mo oli joen gud. Mo tu, oltaem yumi stap kasem ol advaes we oli soemaot se Jehova i lavem yumi. Antap long hemia, yumi gat wan nambawan fiuja.

2. ?Wanem sam nogud tingting we sam man blong God oli gat?

² Nating se yumi gat plante risen blong stap glad, sam man blong God oli traehad blong winim nogud tingting. Maet oli harem se Jehova i no tinghae long olgeta mo long wok we oli mekem. Olgeta we oli gat nogud tingting oltaem, maet oli tingbaot tok ya se “evri yia” oli save harem gud long laef, i olsem wan drim nomo. Maet yumi harem se laef blong yumi evri dei i nogud nomo.—Pri. 11:8.

3. ?Wanem i mekem se yumi gat ol nogud tingting?

³ Yumi save gat ol nogud tingting from we maet yumi sik, yumi kam olfala, no maet from we tingting blong yumi i foldaon. (Sam  71:9; Prov. 13:12; Pri. 7:7) Mo tu, yumi mas luksave we hat blong yumi i save ‘giaman long yumi bakegen,’ mo i save mekem yumi harem se yumi gat fol, nating se God i glad long yumi. (Jer. 17:9; 1 Jon 3:20) Setan i stap talem ol giaman toktok blong spolem ol man blong God. Mo olgeta we oli gat tingting olsem Setan, maet oli traem mekem se yumi bilivim ol tok blong Elifas we i talem se, long fored blong Jehova yumi nating nomo. Hemia wan giaman tingting long taem blong Job, mo tede ol man oli gat tingting ya yet.—Job 4:18, 19.

4. ?Bambae yumi tokbaot wanem long stadi ya?

⁴ Jehova i talem se hem bambae i stap wetem olgeta we oli traehad blong winim ol nogud tingting. (Sam 23:4) Taem yumi ridim Baebol i olsem we hem i stap wetem yumi. Baebol i ‘naf blong brekemdaon ol strong ples blong haed blong Setan. Nao yumi stap brekemdaon ol giaman toktok we ol man oli stap talem blong blokem ol trutok.’ Hemia i min se Baebol i save jenisim ol nogud tingting we yumi gat. (2 Kor. 10:4, 5) Taswe, naoia bambae yumi tokbaot olsem wanem yumi save yusum Baebol blong yumi gat gudfala tingting, mo holemtaet gudfala tingting ya. Maet save ya i stret long yu, mo maet yu luk sam rod we oli save givhan long narafala.

5. ?Yumi save mekem wanem blong yumi gat gudfala tingting?

⁵ Aposol Pol i tokbaot sam samting we oli save givhan long yumi blong yumi gat gudfala tingting. Hem i givim advaes long kongregesen blong Korin se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot se yufala i stap holem yet fasin blong bilif, no yufala i no moa holem.” (2 Kor. 13:5) Tok ya “fasin blong bilif” hem i olgeta Kristin tijing we oli stap long Baebol. Sipos yumi talemaot ol tijing blong Baebol mo yumi folem ol tijing ya, yumi soemaot se yumi “holem yet fasin blong bilif.” I tru, yumi no save jusum tijing we yumi wantem folem. Yumi mas obei long olgeta Kristin tijing we i stap long Baebol.—Jem. 2:10, 11.

6. ?From wanem i gud blong faenemaot se ‘yu stap holem yet fasin blong bilif,’ no nogat? (Yu luk pija long stat blong stadi ya.)

⁶ Maet yu no wantem folem advaes ya blong Pol blong jekem bilif blong yu, antap moa sipos yu ting se yu no moa holem fasin blong bilif. Be tingting we Jehova i gat long yumi, i moa impoten i bitim tingting blong yumi. Hem i gat moa save i bitim yumi. (Aes. 55:8, 9) Hem i stap lukluk gud ol man we oli wosipim hem, blong faenem ol gudfala fasin blong olgeta mo givhan long olgeta. Be hem i no mekem olsem blong faenem poen long olgeta. Taem yu yusum Tok blong God blong faenemaot ‘se yu stap holem yet fasin blong bilif,’ no nogat, bambae yu kasem save tingting we Jehova i gat long yu. Nao bambae yu naf blong sakemaot tingting ya se yu yu nating nomo, mo tingbaot se, God i tinghae long yu. Hemia i olsem we yu openem wan windo, nao laet i saen i kam insaed long wan rum we i tudak.

7. ?Yu mas mekem wanem blong ol stori blong ol man blong God long Baebol i givhan long yu?

⁷ Wan gudfala rod blong jekem yu wan, hemia blong tingting dip long eksampol blong ol man blong God long Baebol. Yu skelem laef mo tingting blong olgeta wetem blong yu, mo yu luk samting we yu save mekem sipos yu kasem sem trabol olsem olgeta. Naoia bambae yumi tokbaot tri stori we oli soemaot olsem wanem yu save yusum Baebol blong faenemaot sipos yu “holem yet fasin blong bilif.” Mo hemia bambae i givhan long yu blong yu gat gudfala tingting.

8, 9. (1) ?Laef blong wido ya i olsem wanem? (2) ?Wanem ol nogud tingting we wido ya i save gat?

⁸ Taem Jisas i stap long tempol long Jerusalem, hem i luk wan wido woman  we i kam sakem tu smol mane. Eksampol blong wido ya i save givhan long yumi blong yumi holemtaet gudfala tingting, nating se samtaem yumi no save mekem evri samting we yumi wantem mekem. (Ridim Luk 21:1-4.) Yu traem tingbaot laef blong wido ya. Hem i harem nogud tumas from man blong hem i ded. Be i no hemia nomo, ol lida blong skul tu oli stap ravem ol wido i bitim we oli givhan long olgeta. (Luk 20:47) Wido ya i pua we i pua tumas, taswe mane we hem i save putum long haos tempol, i sem mak long mane we wan wokman i save winim long sam minit nomo.

⁹ Taem wido ya i go insaed long haos tempol wetem tu smol mane nomo, ?wanem tingting blong hem? Maet hem i save skelem mane we hem i gat, wetem mane we hem i stap givim, taem man blong hem i laef yet. Mo taem hem i luk we ol narafala man ya oli stap putum plante mane, maet hem i ting se mane we bambae hem i putum i nating nomo. Nating sipos hem i gat ol tingting olsem, be hem i mekem samting we hem i naf blong mekem blong sapotem tru wosip.

10. ?Jisas i soemaot olsem wanem se Jehova i tinghae long wido ya?

¹⁰ Jisas i talem se Jehova i tinghae long wido ya mo mane we hem i putum. Hem i talem se wido ya i sakem moa mane i winim olgeta mane we ol rijman oli sakem. Mane we wido ya i putum bambae i joen wetem mane we ol narafala oli putum. Be Jisas i talem se hem i glad we wido ya i mekem samting ya blong Jehova nomo. Ol man blong kaontem mane long tempol, bambae oli no luksave se Jehova i tinghae long wido ya mo smol mane we hem i sakem. Be tingting blong Jehova nao i moa impoten, i no tingting blong ol narafala, mo i no tingting we wido ya i gat long hem wan. ?Olsem wanem? ?Yu save yusum stori ya blong faenemaot sipos yu holem yet fasin blong bilif?

11. ?Yumi lanem wanem long stori blong wido ya?

¹¹ Ol samting long laef blong yumi, oli save mekem se yumi no save givim plante samting long Jehova olsem yumi wantem. Samfala oli no naf blong mekem moa long wok blong prij, from we maet oli olfala no  oli sik. Long taem olsem, maet oli ting se i no impoten blong givim ripot. Nating sipos yu yangfala no yu gat gudfala helt, maet yu harem se aoa we yu mekem, i smol tumas taem yu skelem wetem olgeta aoa we ol man blong God oli mekem. Stori blong wido ya, i soemaot se Jehova i luk mo i tinghae long evri smosmol samting we yumi mekem blong hem, antap moa taem yumi fesem hadtaem. I gud yu tingbaot ol wok blong Jehova we yu mekem long yia we i pas. ?Olsem wanem? ?I gat wan taem we yu yu mas lego sam samting blong mekem wan aoa long wok blong Jehova? Sipos yes, yu save se hem i tinghae long samting we yu mekem long aoa ya. Taem yu mekem bes blong yu long wok blong Jehova olsem wido ya, yu soemaot se yu “holem yet fasin blong bilif.”

12-14. (1) ?Wanem nogud tingting we Elaeja i gat? (2) ?Wanem i mekem Elaeja i harem nogud olsem?

¹² Profet Elaeja i holemstrong long Jehova mo i gat strong bilif. Nating se i olsem, wan taem tingting blong hem i foldaon, nao hem i askem long Jehova se: “Hae God, mi mi harem nogud tumas. Plis yu tekemaot laef blong mi.” (1 King 19:4) Olgeta we oli neva harem nogud olsem, maet oli “sek long ol tok ya” we Elaeja i talem long prea blong hem. (Job 6:3) Be tok ya we Elaeja i talem, hemia nao tingting blong hem. I gud blong makem se, Jehova i no kros long Elaeja. Defren olgeta, hem i givhan long hem.

¹³ ?Wanem i mekem Elaeja i harem nogud olsem? Bifo we hem i talem tok ya, hem i mekem wan merikel blong pruvum se Jehova hem i tru God. Mo afta long hemia oli kilim 450 profet blong Bal i ded. (1 King 18:37-40) Maet Elaeja i ting se naoia ol man blong God bambae oli kambak long tru wosip. Be samting ya i no kamtru. Mo tu, rabis Kwin Jesebel i talem se bambae hem i kilim Elaeja i ded. Elaeja i fraet tumas, nao hem i ronwe i gokros long Juda blong go long draeples.—1 King 19:2-4.

¹⁴ Elaeja i stap hem wan mo i stap tingting se wok blong hem olsem wan profet, i blong nating nomo. Hem i talem long Jehova se: “I moa gud mi mi ded.” Hem i harem se hem i nating nomo, mo hem i ting se Jehova mo ol man oli no tinghae long hem.

15. ?Jehova i mekem wanem blong soemaot se hem i tinghae long Elaeja?

¹⁵ Be tingting blong Jehova i defren. Hem i tinghae long Elaeja mo i wantem se Elaeja i save samting ya. Taswe hem i sanem wan enjel blong mekem Elaeja i strong. Mo tu, Jehova i givim kakae mo wota long hem blong mekem hem i strong, nao hem i save wokbaot 40 dei i go kasem hil ya Horeb. Jehova i stretem rong tingting we Elaeja i gat se i no gat wan man Isrel nating we i holemstrong long Jehova. I gud blong makem tu se Jehova i givim wan narafala wok long Elaeja, mo hem i glad blong mekem. Jehova i givhan long Elaeja, mo from samting ya hem i kasem paoa bakegen, mo hem i mekem wok blong hem bakegen olsem wan profet.—1 King 19:5-8, 15-19.

16. ?Yu save talem sam samting we Jehova i mekem blong yu yu kam strong bakegen?

¹⁶ Yu save yusum stori blong Elaeja blong pruvum sipos yu “holem yet fasin blong bilif,” mo yu gat gudfala tingting. Fastaem yu tingbaot ol samting we Jehova i mekem blong givhan long yu. ?I gat wan elda no wan we i bigman long ol Kristin fasin, i givhan finis long yu? (Gal. 6:2) ?Yu yu luk se Baebol, ol buk blong yumi, mo ol miting, oli givhan long yu blong yu harem se Jehova i kea long yu? Nekis taem we yu kasem wan help olsem, i gud yu tingbaot se help ya i kam long Jehova, mo yu mas talem tangkiu long hem from.—Sam 121:1, 2.

17. ?Jehova i tinghae long wanem samting we yumi mekem?

¹⁷ Namba tu samting, hemia blong tingbaot se, ol nogud tingting oli save lidim yumi  i gorong. Tingting blong God nao i impoten moa. (Ridim Rom 14:4.) Jehova i no stap makem hamas wok we yumi mekem blong hem. Hem i tinghae long yumi taem yumi wosipim hem mo yumi holemstrong long hem. Maet yu yu olsem Elaeja, we yu mekem plante wok blong Jehova be yu no luksave. Maet yu givhan long samfala long kongregesen, be yu no save. Mo maet ol man long teritori tu, oli harem trutok from yu yu prij long olgeta.

18. ?Taem Jehova i givim wok long yu, hem i soemaot wanem?

¹⁸ Laswan samting blong tingbaot, hemia se taem Jehova i givim wok long yu, hem i soemaot se hem i glad long yu. (Jer. 20:11) Maet samtaem yu luk se wok blong yu i no karem frut, no maet yu ting se yu no stap kamgud moa long wok blong Jehova. Nao tingting blong yu i foldaon olsem Elaeja. Nating se i olsem, yu gat bigfala ona blong joen long wok blong prij, mo blong stap olsem wan Witnes blong Jehova. Taswe, yu mas holemstrong long Jehova. Nao, olsem Jisas i talem, bambae yu save glad long fiuja.—Mat. 25:23.

19. ?Man blong raetem Sam 102, i harem olsem wanem?

¹⁹ Man blong raetem Sam 102, i harem nogud tumas. Hem i kasem “trabol” nao hem i harem nogud long bodi blong hem, mo long tingting blong hem. Mo tu, hem i harem se hem i no moa gat paoa blong winim ol trabol blong hem. (Sam 102, smol toktok long stat) Hem i stap tingbaot nomo se hem i harem nogud tumas, mo hem i stap hem wan. (Sam 102:3, 4, 6, 11) Hem i ting se Jehova i wantem sakem hem i go longwe.—Sam 102:10.

20. ?Olsem wanem prea i save givhan long yumi?

²⁰ Nating se i olsem, man blong raetem Sam ya, i save gohed yet blong presem Jehova. (Ridim Ol Sam 102:19-21.) Ol tok long Sam 102, oli soemaot se, yumi we yumi “holem yet fasin blong bilif,” yumi save harem nogud, nao yumi no moa save tingbaot wan narafala samting. Man blong raetem Sam ya i harem se hem i stap hem wan, mo raonabaot long hem, i gat ol trabol nomo i stap. Hem i “olsem wan pijin we i no gat fren blong hem, we hem i stap sidaon antap long haos.” (Sam 102:7) Sipos yu harem nogud olsem, i gud yu prea long Jehova olsem man blong raetem Sam. Ol prea blong yu, oli save givhan long yu blong yu faet agensem ol nogud tingting. Jehova i promes se, bambae hem i harem prea blong yumi, mo bambae hem i lesin long yumi. (Sam 102:17) Yu mas trastem promes blong hem.

21. Wan man we i stap faet agensem ol nogud tingting, ?hem i save gat gudfala tingting olsem wanem?

²¹ Ol tok blong Sam 102, oli soemaot olsem wanem yumi save gat gudfala tingting. Man blong raetem Sam ya i tingbaot we hem i stap fren gud wetem Jehova. (Sam 102:12, 27) Hem i harem gud blong save se oltaem, Jehova i stap givhan long ol man blong Hem, blong oli winim ol trabol blong olgeta. Taswe, sipos ol nogud tingting oli blokem yu smoltaem, blong yu no mekem plante long wok blong Jehova, i gud yu prea long saed ya. I gud yu askem long God blong i harem prea blong yu. Hemia i no blong yu harem gud nomo, be blong ‘leftemap nem blong hem’ tu.—Sam 102:20, 21.

22. ?Olsem wanem yumi wanwan i save mekem Jehova i glad?

²² Yes, yumi save yusum Baebol blong pruvum se yumi stap “holem yet fasin blong bilif” mo se Jehova i tinghae long yumi. I tru, long wol ya we Setan i bos long hem, yumi no naf blong winim olgeta samting we oli mekem tingting blong yumi i foldaon mo yumi harem nogud. Nating se i olsem, sipos yumi evriwan i holemstrong long wok blong Jehova, yumi save mekem Jehova i glad, mo yumi save kasem laef we i no save finis.—Mat. 24:13.