1. Ka burí abinirúni lúmagiñeti Heowá íderagubaliwa lun gunda wamá?

 BUSENTI Heowá larihiniwa gúndaañu ani ruti saragu abinirúni woun lun gunda wamá. Furumiñe, ru laali ibagari woun. Ani gayarati wayusuruni lun walawahani, ladüga barǘ láadiwa lidoun relihión le inarüniti (Sal. 144:15; Huan 6:44). Chóurugüda lumuti giñe woun hínsiñe wamá lun ani íderagua lumutiwa lun wasigirun eseriwida lun lau awanduni (Her. 31:3; 2 Ko. 4:16). Ani tídanñadiwa aban óundaruni to ladundehaboun Bungiu, lugundun resibitiwa saragu ariñahani tídangiñeti Bíbülia, le ítarabei kei éigini, ani gúndaatiwa lau hádanñadiwa lan íbirigu ha hínsiñehabutiña ha lídanbaña sun ubóu. Ani lanwoun lira, resibitiwa aban lubuidun emenigini lubá ámuñegü.

2. Ka burí luriban saminaü úmabei hageindagua fiú lubúeingu Bungiu?

² Gama lumoun, íbini anihein lan saragu resun lun gunda wamá, añahein fiú hádangiñe lubúeingu Bungiu saminatiña wuriba hawougua. Genegeti houn mebegi hamá lun Heowá ani mebegi ligía heseriwidun lun. Adügati luriban saminaü ligía lun hasaminarun aban lan uénedü gayara lan hagundaarun luagu “saragu dan”. Houn gürigia ha, ítara liña ibagari kei luburiga (Apur. 11:8).

3. Ka gayarabei ladügün lun hasaminarun gürigia wuriba hawougua?

³ Ka gayarabei ladügün lun hasaminarun gürigia wuriba hawougua? Háfuga somu magundani, sandi o lani aweiyaduni efekütu  (Sal. 71:9; Ari. 13:12; Apur. 7:7). Haritagua waméi geyeedaguadi tan wanigi ani gayarati tíchugun wadurun íbini gunda lan Bungiu wau (Her. 17:9; 1 Huan 3:20). Ayanuhati Satanási iyeeni hawagu lubúeingu Bungiu. Ani añahein gürigia ha ígiraguagüdütiña houngua lun lisaminan Mafia, ani áluahatiña hadügün lun wafiñeruni dimurei le meha lariñagubei aban wügüri múaragunti gíriti Elifási lun Hobu: luagu mebegi wamá lun Bungiu. Iyeeni meha dimurei ligía, ítara kei guentó (Hobu 4:18, 19).

4. Kaba wariha lidan arütíkulu le?

⁴ Chóurügüda lumuti Heowá woun tidan Bíbülia luagu anihein lan hama ha ásügürübaña “lídangiñe fulasu le búrigatimabei” (Sal. 23:4). Kei hénpulu, yusu lumutu Lererun lun líderaguniña. Gabafutu Bíbülia lun ‘tagünrinchaguni sun aritaguni le múaranbei luma linarün Bungiu’, kéiburi wasaminarun wuriba wawougua (2 Ko. 10:4, 5). Ariha waméi ida luba lan gayara lan wayusurunu Bíbülia lun wakipurun ani arufuda wagíame aban lubuidun igaburi. Lahuuduba le woun saragu lun wabuidun guánarügü luma lun wíchugun gurasu houn amu.

5. Ka gayarabei líderaguniwa akipura aban lubuidun igaburi?

⁵ Ayanuhati meha apostolu Pábulu luagu aban katei le gayarabei líderaguniwa akipura aban lubuidun igaburi. Ariñagati houn kristiánugu ha Korintubaña: “Aríagua humá hungua anhein derebuguñu hiña lubéi lidan hafiñen” (2 Ko. 13:5). “Afiñeni” ligía, mini lan sun arufudahani kristiánu le adarirúbei tidan Bíbülia. Lun wasubudiruni anhein ‘afiñe’ wabéi, lunti waríaagun woungua anhein úara lubéi le wariñagubei luma le wadügübei luma sun arufudahani le tídanbei Bíbülia. Furangunti ua lan buídurügü lan wagunfuliruni lérügü buídubei woun; lunti giñe wawinwandun según sun arufudahani kristiánu le wafurendeirubei (Sant. 2:10, 11).

6. Ka uagu lunti lubéi wakutihani anhein lídanñadiwa lubéi ‘afiñeni’? (Ariha huméi dibuhu le lídanbei lagumeseha arütíkulu.)

⁶ Háfuga hanufudetün hadügüni égüsamini le húniwagua, dántima hanufude hubéi luéi magundan humá lau resultóu le lunbei hibihini. Gama lumoun, le súdinitimabei, le lasaminarubei Heowá wawagu; lugundun ‘íñutimati’ lisaminan Bungiu luéi wasaminan (Isa. 55:8, 9). Téniti houn lubúeingu, mama lun lasiadiruniña, adüga lumuti lun larihini lubuidun hagaburi luma lun líderaguniña. Danme le hayusurunu Lererun Bungiu lun harihini anhein lídanñadün lubéi ‘afiñeni’, gunfuranda hubéi buidu le lasandirubei Bungiu huagu. Líderagubadün lira lun masigirun humá asaminara wuriba huougua luma lun gunfuranda humá aban óunwenbu inarüni: luagu gebegi humá lun Heowá saragu. Gunfuranda wamani katei le ítara liña kei wadararunu korütína lun lebelurun weyu lidoun aban rumu búriti.

7. Ida liña gayara lan líderaguniwa hani lubúeingu Bungiu hénpulu ha awinwandubaña lidan tidaani Bíbülia?

⁷ Lun wadügüni égüsamini le wawougua buiti lun wasaminarun luagu hénpulu le híchugubei lubúeingu Bungiu ha meha awinwandubaña lidan tidaani Bíbülia. Konpararü huméi le meha hasandirubei lubúeingu Bungiu hagía luma le meha gádanbaliña luma le asuseredubei hun uguñe weyu, ani samina humá luagu ida luba lan hamuga hóuserun lidan halugaarun. Guentó, akutiha waméi ǘrüwa hénpulu le arufudubalin ida luba lan wayusurunu Bíbülia lun wachoururuni anhein lídanñadiwa lubéi ‘afiñeni’ luma lun wagumeserun aríagua woungua lau aban lubuidun igaburi.

8, 9. a) Ka meha gádanbarün würi to hilaaruboun úmari ani gudemetu? b) Háfuga, ka meha luriban saminaü ñǘbüinbei lidoun tichügü würi to?

⁸ Tidan ténpulu to Herusalénboun, arihati meha Hesusu aban würi hilaali túmari ani gudemetu. Gayarati líderaguniwa tani würi to hénpulu lun wakipurun aban lubuidun igaburi íbini  siñá lan wadügüni sun le wabuserunbei wadügün (aliiha huméi Lúkasi 21:1-4). Ka meha gádanbarün würi hilaaru úmari to? Furumiñe, nidiheritu luagu lounwen tani weiriei, ani luagu amu oubaü, súfuritu ladüga memenihabu hamá ha alidihabalin relihión lidan dan ligía, ‘ha agidarubarun haban würiña ha hilaañabaña úmarigu’ hawéi lubaragiñe hamuga híderaguniña würiña gudemetiña hagía (Luk. 20:47). Hanarimeti tugudemen darí lun murusunrügü lan budagia tíchugun tun ténpulu, háfuga le meha lagañeirubei aban nadagimeinti lau luadigimaridun fiú minutu.

⁹ Samina humá luagu le tasandirubei würi hilaaru úmari to dan le tebelurunbei lidoun tibürürün ténpulu lau bián gáwanaü. Saminatu funa san luagu murusunrügüñein lan le tíchugubei lumoun le meha tiyaraabei íchiga dan le meha wínwangili tani weiriei? Sandiguatu san tungua lau busiganu lau tarihini saragu seinsu le híchugubei ha tubaragiñebaña? Saminatu san luagu moun lumuti lan hamuga tíchuguni bián gáwanaü ligía? Íbini anhein ñübüin lubéi saminaü le lidoun tichügü, úati ni kata araramutu: adüga tumuti sun tiyaraati lun tídehan lidan áhuduraguni le inarüniti.

10. Ida liña meha larufuduni Hesusu gebegi tan würi to hilaaruboun úmari lun Heowá?

¹⁰ Arufuda lumuti meha Hesusu gebegi tan würi hilaaru úmari to lun Heowá saragu ani gebegi ligía budagia le tíchugubei. Ariñagati “gíbetima lan tíchugun fugiabu würi to sügǘ hau [ha rísibaña]”. Furanguti mígisigua lan seinsu le tíchugubei luma le híchugubei ha híbiri, gama lumoun, anúadira lumutu Hesusu hádangiñe súngubei lun layanuhan luagu lubuidun tigaburi. Ha arihibaña lau seinsu ariha hamuti bián gáwanaü ligía laganagua le líbiri, ani masaminarungubeitiña gebegi lan saragu lun Heowá. Gama lumoun, le lasaminarubei Bungiu ligía súdinitimabei, mama le hariñagubei gürigia, ni le tasaminarubei würi tuguya tuougua. Gayarati san líderaguniwa abahüdaguni le arihei anhein lídanñadiwa lubéi ‘afiñeni’?

11. Ka wafurendeirubei lídangiñe abahüdaguni tuáguti würi hilaaru úmari?

¹¹ Furanguti anihein lan dan gani lan le gádanbaliwa efekütu lidan le gayarabei wíchuguni lun  Heowá. Adügati aweiyaduni o somu sandi lun lásiñarun háfuridun fiú íbirigu apurichiha saragu oura. Lunti funa san hasaminarun moun lumuti lan habürüdüni dan le hásügürübei apurichiha? Íbini anhein niburein wabéi ani buidu ligía wátuadi, gayarati wasaminarun luagu le lan wíchugubei lidan weseriwidun lun Heowá lougua lan lumoun le híchugubei saragu lubúeingu. Gama lumoun, arufudahati abahüdaguni tuáguti würi hilaali túmari gebegi lan kada áfaaguni le wadügübei lun Heowá, dántima le wásügürün lídangiñe lénrengunga. Samina humá luagu le hadügübei lidan heseriwidun lun Heowá lidan irumu le ásügürübei. Chülüti san aban oura lun hadügün aban óunwenbu sákürifisiu lun herederun apurichiha? Chouru huméi: gebegiti oura ligía saragu lun Heowá. Dan le hadügüni sun hiyaraati lidan heseriwidun lun Heowá, ítara kei meha würi hilaaru úmari, gayarati hariñagun lídanñadün lan ‘afiñeni’.

12-14. a) Ida liña meha lasandiragun Elíasi lungua? b) Ka funa san uagu lasandiragunbei Elíasi lungua lau saragu íruni?

¹² Úaraguati meha profeta Elíasi lun Heowá ani héreti meha lafiñen. Íbini ítara, lidan aban ókaasion aba lírudun saragu darí lun lamuriahan luma Bungiu lun lagidaruni libagari. Ariñagati: “Buídurügaali, Nabureme! Gidabei nibagari” (1 Uru. 19:4). Ha másügürüngiña lídangiñe saragu idiheri háfuga hasaminarun ‘lánina lan anarimeni’ dimurei le (Hobu 6:3). Gama lumoun, inarüni le meha lasandirubei. Magañidunti meha Heowá luma Elíasi luagu labusenrun lounwen. Íderaguarügü lumuti.

¹³ Ka uagu lasandiragunbei Elíasi lungua lau saragu íruni? Murusun dan lubaragiñe, adügaali meha aban milaguru le arufudubalin Heowá lan Búngiubei le inarüniti. Lárigiñebei milaguru ligía, áfarawaguatiña 450 lani Baali profetagu (1 Uru. 18:37-40). Háfuga agurabahati yebe Elíasi hagiribuduba lan lumutuniña Bungiu lidoun áhuduraguni inarüniti, gama lumoun, masuseredunti lira. Óunahatu urúei wuribatu Hesaweli uganu lun ariñaga luagu táfarubei lan hilaagubei. Le lanufude, aba lanurahan luagun suru, hiñungua lumuti Hudá, aba lidin lidoun fulasu mageirawati, aban fulasu denchati (1 Uru. 19:2-4).

¹⁴ Dan le lábuguarügü lubéi Elíasi, aba meha lagumeserun asaminara luagu mouni lan wadagimanu le ladügübei. Aba lariñagun lun Heowá: “Mabuiduntina hawéi nagübürigu”. Ítara liña, sandiguati meha lungua meseriwin lan ítara kei habu luma hakalikin lagüchagu. Según lisaminan, mebegiti meha lun Heowá ani mebegi ligía houn amu gürigia.

15. Ida liña meha larufuduni Heowá lun Elíasi luagu gebegimémegili lan lun?

¹⁵ Gama lumoun, ariha lumuti Suntigabafu katei lidan amu igaburi. Gebegiti meha Elíasi lun, ani chóurugüda lumuti lun ítara liña lan. Ka ladügübei Bungiu? Aba lóunahan aban ánheli lun gayara lan líchugun dǘgüdaguaü lun Elíasi. Ruti giñe éigini lun luma kaba lan lata, le lunbei líchugun erei lun lidan wéiyaasu le ladügübei luagu bián-wein weyu darí luagu wübü Orebü. Ani arufuda lumuti Bungiu lun Elíasi lau ínsiñehabuni luagu labulieidaguña lan lau lasaminarun ligíarügüñein lan ísüraelina úaragua lun. Ariha huméi giñe luagu ru lan Bungiu amu burí iseri wadagimanu lun, ani ánhati Elíasi lun. Sagati profeta saragu buiti lídangiñe ídemuei le meha líchugubei Heowá lun, ani ábaya lagumeseruni luadigimari lau iseri erei (1 Uru. 19:5-8, 15-19).

16. Ida liña líchugun Heowá dǘgüdaguaü hun?

¹⁶ Gayarati líderagunün lani Elíasi hénpulu lun hachoururuni luagu lídanñadün lan ‘afiñeni’ luma lun hakipurun aban lubuidun igaburi. Ida? Furumiñe, samina humá luagu ámuñegueinarügü igaburi le ídanbei íderagua laadün lan Heowá. Resibihadün san ídemuei lúmagiñe somu wéiyaali lidan afiñeni o lúmagiñe amu íbiri le derebuguhali lidan lafiñen lidan lidaani lénrengunga? (Gal. 6:2.) Ibihaadün san gurasu tídangiñe Bíbülia, wani agumeiraguagüdüni o lídangiñe wadamuridagun? Dánmeya le hibihin  gurasu lídangiñe aban lídangiñe katei le, samina humá lúmagiñe lan Heowá liabin ídemuei ligía, ani ru humá seremei lun (Sal. 121:1, 2).

17. Ka hínsiñebei lun Heowá wawagu?

¹⁷ Libiaman, haritagua huméi gayara lan leyeedunün aban luriban saminaü. Le lasaminarubei Heowá wawagu ligía súdinitimabei (aliiha huméi Rómana 14:4). Gebegitiwa lun ladüga wáhuduragun lun ani úaragua wagía lun, mama luagu resultóu le wibihibei lidan weseriwidun lun. Ani háfuga adügañahadün saragu luagu Heowá sügǘ lau le hasaminarubei, ítara kei Elíasi. Sin híchugun fe, háfuga íderaguadün ámuñegueinarügü íbirigu lidan damuriguaü. Ani háfuga aganba hamaali fiú gürigia inarüni tídangiñeti Bíbülia seremei hídehan lidan apurichihani.

18. Ka larufudubei Heowá lau líchugun somu wadagimanu woun?

¹⁸ Ani, lagumuhóun, ariha huméi kada wadagimanu le líchugubei Heowá hun kei aban chansi lun hasubudiruni anihein lan huma (Her. 20:11). Ítara kei Elíasi, gayarati weferidiruni waguraasun ladüga genege lan woun mani lan weseriwidun resultóu o ladüga genege lan woun siñá wamani le wabusenrubei lidan weseriwidun lun Bungiu ibiha. Gama lumoun, meberesenga ka lan hasaminarubei, anihein chansi le súdinitimabei lidan dan le huma: lun hapurichihani uganu buiti luma lun hanügüni liri Bungiu. Kipu humá úaragua lun Bungiu. Anhein hadüga ítara, gayarabei lariñawagún hun dimurei le meha lariñagubei Hesusu lidan aban hénpulu: “Gundaabá úara [luma biyubudiri]” (Mat. 25:23).

19. Ida liña meha lasandiragun le abürühabalin Sálumu 102 lungua?

¹⁹ Nidiheriti meha le abürühabalin Sálumu 102 ladüga aban lanarime igarigu le lasandirubei, ani mabafuti meha lun lagagibudagun luma lituróbulin (Sal. 102). Arufuda lumuti le lariñagubei luagu weiri lan ligarigu ani sandigua lan lungua lábuguarügüñein lan (Sal. 102:3, 4, 6, 11). Afiñeti meha busén lan Heowá láguruni (Sal. 102:10).

20. Ida liña líderaguniwa furíei lun wageindagun luma luriban saminaü?

²⁰ Íbini ítara, gayarati meha layusuruni abürühati sálumu libagari lun lalawahani Heowá (aliiha huméi Sálumu 102:19-21). Kei larufuduni Sálumu 102, ha lídanbaña afiñeni gayarati hasandirun saragu idiheri darí lun siñá lan hasaminarun luagu amu katei. Aba lasandiragun abürühati sálumu lungua kei “aban dunuru lábugua tábulugu muna”, kamá hamuga idiherirügüñein lani paaná (Sal. 102:7). Anhein sandiguañahadün lubéi hungua ítara, dará humóun hanigi lun Heowá kei meha ladügüni abürühati sálumu. Líderagubadün furíei lun hageindagun luma luriban saminaü. Ariñaga laali Heowá leteniruba lan lun lafurieidun ‘le igirúaalibei ani laganbubei lan lafurieidun’ súnwandan (Sal. 102:17). Afiñe humá luagu füramasei le.

21. Ida luba gayara lan wakipurun aban lubuidun igaburi?

²¹ Arufudahati giñe Sálumu 102 woun ida luba lan wakipurun aban lubuidun igaburi. Ibiha lumuti abürühati sálumu katei le lau letenirun lun lumadagua luma Heowá (Sal. 102:12, 27). Ruti meha gurasu lun lasubudiruni luagu ñeinbei lan Bungiu hama lumutuniña súnwandan lun líderaguniña agagibudagua luma lénrengunga. Ligíati, anhein mígirun lubéi luriban saminaü le huágubei lun hadügüni sun le habusenrubei lidan heseriwidun lun Bungiu, ariñaga huméi lun lidan furíei. Amuriaha humá luma lun laganbuni hafurieidun, mámarügü lun hibihin awalidaguni, lun ‘hasubudiruni sun gürigia liri’ (Sal. 102:20, 21).

22.  Ida luba gayara lan wagundaaragüdüni Heowá sun wagía?

²² Kei le aubei warihei, gayarati wayusurunu Bíbülia lun wachoururuni luagu lídanñadiwa lan afiñeni ani gebegi wagía lun Heowá. Inarüni siñati lan wesefurun sunsuinagubei luéi luriban saminaü ni luéi maguraasuni lidan ubóu wuribati le. Gama lumoun sun wagía gayarati wagundaaragüdüni Heowá ani ibiha wameime asalbaruni ánhawa eredera úaragu lidan weseriwidun lun (Mat. 24:13).