1. Nemene la itre manathithi qaathei Iehova nyine amadrinë së?

IEHOVA a ajane tro sa mele madrin, nge Nyidrëti fe a hamëne la itre manathith ka nyimutre göi troa amadrinë së. Ame la ketre e itre ej, tre ene la mel. Loi e tro sa xome la mele së matre troa atrunyi Nyidrë, ke, hnei Nyidrëti hna e së kowe la hmi ka wië. (Sal. 144:15; Ioane 6:44) Iehova a qaja axeciëne la ihnimi Nyidrë koi së, nge Nyidrëti fe a xatua së matre tha tro kö sa nue la huliwa i Nyidrë. (Iere. 31:3; 2 Kor. 4:16) Easa madrine la easa mele hnine la paradraiso ngöne la u, gaa mana la xeni ngöne la u, nge e cili fe la lapa ne la itre trejine ka ihnim. Ketre, hetrenyi së la mejiune ka sisitria göi itre drai elany.

2. Nemene la hna isi memin hnene la itre xa hlue i Akötresie?

² Maine nyipici laka, hetrenyi la itre ewekë celë nyine amadrinë së, ngo kola isi hnene la itre xa hlue i Akötresie memine la itre mekune ka ajolëne la hni angatr. Angatr a mekune ka hape, tha Iehova fe kö a nyipi ewekë angatr, memine la huliwa hnei angatre hna kuca koi Nyidrë. Ame koi angatr, ame la troa madrine ‘la itre macatre ka nyimutre,’ tre ceitu me pu ne jidr. Kösë haitre la mele i angatre e nöjei drai.—Ate cai. 11:8.

3. Nemene la ka axulune la itre mekune ka ajolëne la hni së?

³ Maine jë troa traqa koi së la itre mekune ka ajolëne la hni së, ke, hleuhleu la hni së, maine hna tithi së hnene la ketre mec, maine hnene  laka easa uti ipië trootro. (Sal. 71:9; Ite edomë 13:12; Ate cai. 7:7) Ketre, nyipi ewekë tro sa atrehmekune ka hape, ka “iaö” la hni së, me upe zö së ngacama Akötresieti a kepe së. (Iere. 17:9; 1 Ioane 3:20) Diabolo a sili trenga thoi hune la itre hlue i Akötresie. Haawe, ame la itre ka mekune tui angeic, tre angatre a thele tro sa mekune ka hape, tha ka nyipi ewekë kö së koi Akötresie, tune lo hna qaja hnei Elifaza. Trenga thoi lai ngöne lo ijine i Iobu, nge enehila mina fe.—Iobu 4:18, 19.

4. Nemene la hne së hna troa ce ithanatane ngöne la tane mekune celë?

⁴ Ame e hnine la Tusi Hmitrötr, Iehova a qaja axeciëne koi së ka hape, tro Nyidrëti a xatuane la itre ka isi memine la itre mekune ka ajolëne la hni angatr. (Sal. 23:4) Nyidrëti a xatua së jëne la Wesi Ula i Nyidrë. “Hna amenene hnei Akötesie [la Wesi Ula] nyine auligötrane la ite hunapo ka cat.” Kolo lai a hape, tro la Wesi Ula a saze la itre mekune ka ajolëne la hni së. (2 Kor. 10:4, 5) Celë hi matre, tro sa ce ithanatane la aqane tro sa xome la Tusi Hmitrötre matre troa xatua së troa eköthe me akökötrene la aqane waiewekë ka loi. Ijije hi tro epuni a isa kepe thangane qa ngöne lai, me hane atre la itre aqane tro epuni a ithuecatre koi itre xan.

5. Nemene la ewekë ka troa xatua së matre troa eköthe la aqane waiewekë ka loi?

⁵ Hnei Paulo aposetolo hna qaja la itre xa ewekë ka troa xatua së troa eköthe la itre aqane mekune ka loi. Hnei angeice hna hamë eamo kowe la ekalesia ne Korinito, ka hape: “Thelejë e kuhu ite hni nyipunieti kö, hape u, nyipunieti hë ngöne la lapaun.” (2 Kor. 13:5) Ame “la lapaun,” tre, celë hi lo itre ini asë hna kapa hnene la itre Keresiano, nge hna hamëne hnene la Tusi Hmitrötr. Maine easa qaja me kuca la hnei Tusi Hmitrötre hna ini së, haawe, ijije hë tro sa qaja ka hape, easë “ngöne la lapaun.” Eje hi laka, tha tro kö sa iëne la itre ini nyine tro sa xötrethenge. Ngo nyipi ewekë pe tro la itre Keresiano a trongëne asë la itre ini hna hamëne hnene la Tusi Hmitrötr.—Iako. 2:10, 11.

6. Pine nemene matre loi e tro sa thele ka hape, easë kö “ngöne la lapaun”? (Wange ju la pane iatr.)

⁶ Maine jë tha ajane kö epuni troa isa tupathi epuni tune la, ke epuni a mekune ka hape, tha lapaune hë epun. Ngo ame pe, kola mama laka, tru catre kö la itre ewekë hnei Iehova hna atre, matre sisitria catre kö la itre mekuna i Nyidrë göi së hune la itre sipu mekuna së. (Is. 55:8, 9) Nyidrëti a waipengöne la itre hlue i Nyidrë, tha göi tro kö a jele ngazo angatr, ngo göi tro pe a thele thei angatre la itre thiina ka loi, me xatua angatr. Maine tro epuni a xome la Wesi Ula i Nyidrëti matre troa isa thele ka hape, epuni kö “ngöne la lapaun,” tro hë epuni e cili a atre la mekuna i Nyidrë göi epun. Tro lai a xatua epuni matre tha tro kö epuni a mekune ka hape, tha ka nyipi ewekë fe kö epun, nge troa amekunë epuni pala hi la mekuna i Akötresie. Eje hi laka, ka nyipi lolo epuni xajawa i Nyidrë. Matre, ame hi la epuni a mekune tune lai, ceitune hi lai memine la kola fe la mamalama matre lai pi la hnahag.

7. Nemene la aqane troa xatua epun hnene la tulu ne la itre hlue i Akötresie hna qaja hnei Tusi Hmitrötr?

⁷ Ame la ketre aqane tro sa tupathi së, tre ene la troa mekune ajuine la tulu ne la itre hlue Akötresie hna qaja hnei Tusi Hmitrötr. Pane wange ju la mele i angatre ekö memine la itre aqane mekuna i angatr, matre tro fe epuni a isa waipengöi epun me thele ka hape, nemene jë fe la hnei epuni hna troa hane kuca. Tro sa ce wange la köni ceitun ka amamane la aqane tro epuni a xome la Tusi Hmitrötre matre troa anyipicine ka hape, epuni fe hi “ngöne la lapaun.” Tro fe lai a xatua epuni matre troa lolo la aqane tro epuni a sipu waipengöi epuni kö.

8, 9. (a) Nemene la hna melëne hnene la sine föe ka puafala? (b) Nemene la itre mekune ka ajolë eahlo?

⁸ Ame ngöne lo ketre ijine Iesu e hnine la ēnē e Ierusalema, hnei nyidrëti hna öhne la ketre föe ka pë ewekë. Troa xatua së hnene la tulu ne la sine föe cili troa hetrenyi pala hi la aqane waiewekë ka loi, ngacama thatreine kö së troa eatrëne la itre aja së. (E jë la Luka 21:1-4.) Pane mekune jë la mele i  eahlo. Eahlo a akötre ke hna meci triji eahlo hnei föi eahlo. Nge pine laka ame ngöne la ijine cili, ke ka pi aja mo la itre hene ne hmi, haawe kola thapa la enufa ne la itre sine föe, ngo tha xatua nyudreni pe. (Luka 20:47) Hnene laka ka puafala catre eahlo, ame la ahnahna hnei eahlo hna hamëne e hnine la ēnē, tre, ceitune hi memine la hna kapa hnene la ketre atre ka huliwa ngöne la itre hnepe menetre hi.

⁹ Easa pane mekune la sine föe la eahlo a lö hnine la ēnē fë la lue drenari ka co. Drei jë kö la eahlo a mekune ekö la etrun la ahnahna ngöne lo mele petre kö la föi eahlo, ke ame hë enehila coco catre pe hi la hnei eahlo hna hamën. Ame la eahlo a öhne la etrune la hna kuië mani hnene la itre xan, maine jë hnei eahlo hna pane hmahma me mekune ka hape, ka pë pengöne la ahnahna hnei eahlo hna kuiën. Ngacama kola mekune tune lai hnene la sine föe, ngo ame pe, hnei eahlo hna hamëne la hnei eahlo hna hetrenyi thatraqane la nyipi hmi.

10. Hnei Iesu hna amamane tune kaa ka hape, ka sisitria la sine föe xajawa i Akötresie?

¹⁰ Hnei Iesu hna amamane ka hape, ka sisitria koi Iehova la sine föe memine la ahnahna i eahlo, nge tru catre kö la hnei eahlo hna hamëne hune la hna hamëne hnene la itre trenamo asë. Ngacama hna ce xome la itre hna ithingë, ngo ame kö lai hnei Iesu hna wangatrune catrën, tre, ene la aqane hnimi Iehova hnene la sine föe. Thatre fe kö la itre ka e mani la enyipiewekëne koi Iehova lo lai lue neköi drenari, memine la aqane wangatrune Nyidrëti lai sine föe. Ame la ka nyipi ewekë catr, tre mekuna i Akötresie, ngo tha ene kö la mekuna ne la itre atr maine pena la aqane mekune ne la sine föe la sipu pengöi eahlo. Ijije fe kö tro epuni a xome la ceitune celë matre troa tupathe laka epuni pala hi “ngöne la lapaun”?

11. Nemene la ini nyine tro epuni a xome qa ngöne la hna melëne hnene la sine föe?

¹¹ Maine jë troa hetre thangane la pengöne la mele i epuni kowe la aqane hame i epun koi Iehova. Ame itre xan tha ijiji angatre hë troa tru la hna cainöj tune ekö, ke angatr a qatre trootro maine wezipo pena. Tro kö angatre a mekune ka hape, tha nyipi ewewkë fe kö tro angatr a hane fejane la itre hawa ne cainöje i angatr? Maine epuni la ketre thöth ka egöcatre hi, ma epuni jë a mekune ka  hape, hnepe ka co hi la hnei epuni hna kuca hune la itre hawa hna xome hnene la itre hlue i Akötresie troa cainöj. Kola ini së hnene la hna melëne ekö hnene la sine föe ka puafala laka, tha sihngödri kö koi Iehova nge ka tru koi Nyidrë la nöjei ewekë ka co hne së hna kuca thatraqai Nyidrë, tune mina fe ngöne la itre ijine jol. Pane mekune jë la huliwa hnei epuni hna kuca thatraqai Nyidrë ngöne lo macatre ka ase hë. Hetrenyi kö la ketre ijine hnei epuni hna öhne ngöne la macatre cili ka mama ka hape, jol e troa nyihlue i Nyidrë? Maine eje hi, loi e troa xecie koi epuni ka hape, Iehova a wangatrune catrëne la hnei epuni hna kuca ngöne la ijine cili. Ame la epuni a xötrethenge la tulu ne la sine föe ka puafala me kuca asë la hnei epuni hna atreine matre troa nyihlue i Iehova, haawe epuni hi lai a amamane laka, epuni hnyawa hi “ngöne la lapaun.”

12-14. (a) Nemene la hnei Elia hna sipone lo angeic a kucakuca? (b) Pine nemene matre mekune jë Elia tune lai?

¹² Ka nyipici pala hi Perofeta Elia koi Iehova, nge ka catre lapaune angeic. Ngo, ame la ketre ijine angeic a kucakuca, angeice hi a sipo Iehova troa xome la mele i angeic, me hape: “Iehova fe, loi hë enehila xomi ni jë.” (1 Ite jo. 19:4) Ame la itre ka tha hane fe kö kucakuca, tre ma tro jë angatr a mekune ka hape, ‘itre trenge ewekë ka menu’ la hna qaja hnei Elia ngöne la thith. (Iobu 6:3) Ame pe, celë hi aliene hni angeice lai. Ngo tha hnei Iehova kö hna wesitre koi Elia, hnei Nyidrëti pe hna xatua angeic.

¹³ Pine nemene matre kola mekune tune lai hnei Elia? Elia hi lo a ase kuca la ketre iamamanyikeu ka amamane ka hape, Iehova hi la nyipi Akötresie. Thupene lai iamamanyikeu cili, hna humuthe la ala 450 lao perofeta i Baala. (1 Ite jo. 18:37-40) Maine jë, hnei Elia hna mekune ka hape, tro la nöje i Akötresie a nyihlue i Iehova hmaca, ngo tha hna traqa ju kö tune lai. Hnei Iezebela Isola hna upe la ketre maca koi Elia ka hape, tro eahlo a humuthi angeic. Ame hna xou hnei angeic, me kötre mele kowe la götrane ailojë ne Isaraela hna jëne la nöje Iudra, uti hë la traqa angeice ngöne la hnapapa.—1 Ite jo. 19:2-4.

¹⁴ Pine laka Elia casi hi ngöne la hnapapa, ame hnei angeice hna nyiqaane mekune ka hape, ka gufa la huliwa ne perofeta i angeic. Öni angeice koi Iehova: “Tha loi kö ni hune la ite kemeng.” Kösë ame koi angeic, pëkö ca eloine la huliwa i angeic, ceitune hi memine la huliwa ne la itre ka meci hë. Haawe, angeice hi a mekune ka hape, pëkö thangane la huliwa i angeic, nge pëkö eloi angeic xajawai Iehova me kowe la itre atr.

15. Nemene la aqane amamane Akötresie koi Elia ka hape, ka tru pala hi angeice koi Nyidrë?

¹⁵ Ngo, ketrepengöne kö la aqane goeë Elia hnene la Kapucatinasë. Ka tru pala hi Elia koi Iehova, nge Nyidrëti a amamane lai koi angeic. Hnei nyidrëti hna upe la ketre angela troa ithuecatre koi angeic. Hnei Iehova fe hna thua i Elia me thue ime i angeic matre hetre trenge catre i angeice troa trongëne la hnapapa uti hë la wete Horeba, a 40 lao drai ne tro angeic a tro. Ame la Elia a mekune ka hape, pëkö xa atre Isaraela ka nyipici koi Iehova, tre Akötresieti hi lai a wenë amekötine la aqane mekune i angeic. Ketre, hnei Iehova hna hamëne la itre xa hnëqa koi Elia, nge hnei angeice hna kapa. Hnei Iehova hna xatua Elia, ame hë la thangane lai, hetre trenge catre i angeice hmaca ha, ene pe angeice a bëeke hmaca ju troa kuca la huliwa ne perofeta.—1 Ite jo. 19:5-8, 15-19.

16. Hnei Iehova hna ithuecatre tune kaa koi epun?

¹⁶ Loi e tro epuni a xome la hna melëne hnei Elia matre troa xecie koi epuni ka hape, epuni hi “ngöne la lapaun,” nge matre tro fe a eköthe la aqane waiewekë ka loi. Ame la hnapan, pane mekune jë la itre aqane xatua epuni hnei Iehova. Hna hane fe xatua epuni hnene la ketre qatre thupe maine ketre trejine ka macaje ngöne la ketre ijin? (Gal. 6:2) Hnei epuni kö hna hane kapa la ixatua qa hnine la Tusi Hmitrötre memine la itre itusi së me itre icasikeu së, matre troa atrehmekune laka Iehova a wangatrunyi epun? E xatua epuni hmaca jë tune lai e ketre ijin, pane mekune ju laka Iehova la Atre hamë ixatua, nge the thëthëhmine kö troa olene koi Nyidrë ngöne la thith.—Sal. 121:1, 2.

17. Nemene la hnei Iehova hna wangatrune thene la itre hlue i Nyidrë?

 ¹⁷ Ame la hnaaluen, the thëthëhmine kö laka troa amenu së hnene la itre aqane mekune ka iajolë. Ngo ame la ka sisitria, tre, mekuna i Akötresie göi së. (E jë la Roma 14:4.) Ka tru koi Iehova la aqane nyihlue i Nyidrëti hne së, me aqane nyipici së koi Nyidrë. Tha hnene kö laka tru la hne së hna kuca koi Nyidrë, ke ka sisitria hë së lai koi Nyidrë. Maine jë, tui Elia, troa tru la hnei epuni hna kuca koi Iehova. Thatre kö epuni e itre xa ijin, ngo hetrenyi fe la itre atr hnei epuni hna xatuane e hnine la ekalesia. Nge hetrenyi fe la itre atr ngöne la teritoare ka drenge la nyipici hnene la hnei epuni hna catre cainöj.

18. Nemene la hna amamane hnene la hnëqa hnei epuni hna kapa qaathei Iehova?

¹⁸ Ame hë la hnaakönin, pane mekune ju la itre hnëqa hna isa kapa hnei epun ka amamane ka hape, hna kepe epuni hnei Nyidrë. (Iere. 20:11) Tui Elia, maine jë tro epuni a kucakuca ngöne la kola mama koi epuni ka hape, pëkö thangane la huliwa i epun, maine thatreine pena kö epuni eatrëne la huliwa i epuni koi Iehova. Ngo ka sisitria catre pala hi la hnëqa ka eje thei epun. Ame la hnëqa cili, tre ene la troa cainöjëne la maca ka loi, me hane hë epuni ka hape Atre Anyipici Iehova. Qa ngöne lai, catre jë mele nyipici koi Iehova. Nge eje hi lai laka, tune la hna qaja hnei Iesu, tro hë epuni a ‘lö kowe la ga madrine ne la joxu i [epun].’—Mat. 25:23.

19. Nemene la aliene la hni ne la atre cinyihane la Salamo 102?

¹⁹ Hna pane kucakuca la atre cinyihane la Salamo 102. Hna “aköt” hnei angeic me hace hni; pë hë trenge catre i angeice troa xomihni ahoeane la itre jole ka traqa koi angeic. (Salamo 102, mekune ne la ka cinyihan) Ame pe hi la ka lapane la mekuna i angeic, tre, akötr, me sipu aliene hni angeice kö, nge angeic a lapa casi fë hace. (Sal. 102:3, 4, 6, 11) Öni angeice pe kö ka hape, ase hë Iehova nuetriji angeic.—Sal. 102:10.

20. Tro la thithi a xatuane tune kaa la atr ka isi memine la itre mekune ka ajolë angeic?

²⁰ Ngo, tro pala kö la atre cinyihane la salamo a huujëne la mele i angeice nyine atrunyi Iehova. (E jë la Salamo 102:19-21.) Kola amamane koi së hnene la tusi Salamo 102 ka hape, tro fe la itre ka catre “ngöne la lapaun” a hane akötr. Pine laka kola kucakuca la atre cinyihane la salamo, öni angeice ka hape, “tunge la waco kola lapa casi hune uma”; angeice hi lai a qaja tun, ke kola traqa itrai la itre jol koi angeic. (Sal. 102:7) Maine aqane mekune i epuni hi lai, loi e tro fe epuni a fe la hni epuni koi Iehova. Thithi jë matre troa xatua epuni troa lepe trije la itre mekun ka ajolë epuni. Tha tro kö epuni a hnehengazone menune la itre aliene la hni epun, ke Iehova a thingehnaeane ka hape, “Hnei nyidëti hna xei kowe la thithi ne la ka hleuhleu, nge tha sixelene kö la thithi angat.” (Sal. 102:17) Mejiune jë kowe lai!

21. Nemene la aqane troa isi memine la itre mekune ka ajolë epuni me eköthe pena la aqane waiewekë ka loi?

²¹ Kolo fe a amamane hnene la tusi Salamo 102 laka ijiji epuni hi troa eköthe la aqane waiewekë ka lolo. Hnene la atre cinyihane la tusi Salamo hna pane mekune la aqane imelekeu i angeic me Iehova. (Sal. 102:12, 27) Hna akeukawane la hni angeic ngöne la angeic a atre ka hape, tro pala hi Iehova a ce memine la itre hlue i Nyidrë ngöne la itre ijine jol. Maine kola pane sewe nyipunie hnene la itre mekune ka iajolë troa eatrëne la hnei epuni hna ajane troa kuca göi Akötresie, pane thithi jë thatraqane lai. Sipo Akötresieti jë troa drenge la itre thithi epuni, tha göne hmekuje kö troa nyinyine la itre jol ka eje thei epuni, ngo göi tro fe a “qaja la atesiwa i Iehova.”—Sal. 102:20, 21.

22. Nemene la aqane tro sa isa amadrinë Iehova?

²² Nyipici, ijije hi tro sa xome la Tusi Hmitrötr matre troa waipengö së maine easë jë pala hi “ngöne la lapun,” nge ka nyipi ewekë pala hi së koi Iehova. Eje hi laka, ame ngöne la fene i Satana, thatreine jë kö së troa neëne la nöjei mekune asë ka ngazo maine itre sine kucakuca së pena. Ngo ame pe, ijije hi tro asë hi së a amadrinë Iehova me mele epine palua, e hne së hna cile huti ngöne la huliwa i Nyidrë.—Mat. 24:13.